Mensahe sa Visiting Teaching, Enero 2017
Ang Katuyuan sang Relief Society
Tun-i sing mainampuon ining materyal kag magpangayo sang inspirasyon agud mahibaloan kon ano ang ipaambit.
Pagtuo, Pamilya, Bulig
Ang katuyuan sang Relief Society amo ang “ihanda ang kababayin-an para sa mga bugay sang kabuhi nga wala’y katapusan,” siling ni Linda K. Burton, Pang-kabilugan nga Pangulo sang Relief Society.1 Paagi sa pagtuo, pamilya, kag bulig nga ginahikot naton ang aton “importante nga bahin sa sini nga buluhaton.”2
Ang Relief Society “isa ka temporal kag espirituhanon nga buluhaton,” siling ni Carole M. Stephens, Unang Manuglaygay sa Relief Society General Presidency. “Amo ini ang ginhimo sang kababayin-an sang panahon sang Manluluwas, kag amo ini ang ginapadayon naton nga himuon.”3
Sa aton pagtulok sa babaying Samariahanon sa bubon, nga nagbiya sang iya suludlan sang tubig kag nagdalagan agud sugiran ang iban nga si Jesus isa ka propeta (tan-awa sa Juan 4:6–42), ukon kay Febe, nga masinadyahon nga nag-alagad sa iban sa bug-os niya nga kabuhi (tan-awa sa Mga Taga-Roma 16:1–2), makakita kita sang mga halimbawa sang kababayin-an sa panahon sang Manluluwas nga aktibo nga nakigbahin sa pagkari kay Cristo. Sia amo ang nagbukas sang aton dalan padulong sa kabuhi nga wala’y katapusan (tan-awa sa Juan 3:16).
Sa aton pagtulok sa aton pionero nga kauturan nga babayi sa Nauvoo, Illinois, nga nagtilipon sa balay ni Sarah Kimball sang 1842 agud tukuron ang ila kaugalingon nga organisasyon, makita naton ang plano sang Dios sa pagpasad sang Relief Society kag suno sa priesthood. Matapos nga ginsulat ni Eliza R. Snow ang konstitusyon, ginrepaso ini sang Propetang Joseph Smith. Narealisar niya nga ang Simbahan wala pa lubos nga naorganisar tubtob nga naorganisar ang kababayin-an. Nagsiling Siya nga ginbaton sang Dios ang ila halad pero may mas maayo pa diri. “Organisahon ko ang mga babayi sa idalom sang priesthood suno sa sulundan sang priesthood,” siling niya.4
“Ang Relief Society indi lamang isa pa ka grupo sang mga babayi nga gusto maghimo sang kaayuhan sa kalibutan. Lain ini. ‘Mas maayo’ ini tungod gin-organisar ini sa idalom sang awtoridad sang priesthood. Ang pag-organisar sini isa ka kinahanglanon nga lihok sa paglapnag sang hilikuton sang Dios sa duta.”5
Dugang nga Balaan nga mga Kasulatan kag Impormasyon
Doctrine and Covenants 25:2–3, 10; 88:73; reliefsociety.lds.org
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, January 2017. Hiligaynon. 97921 861
Binagbinaga Ini
Paano bala ang Relief Society nagabulig sa kababayin-an nga tumanon ang diosnon nga papel nga gintigana sang Amay nga Langitnon para sa ila kag tuytuyan sila padulong sa kabuhi nga wala’y katapusan?