Etop eke First Presidency, Ofiong Iba eke isua 2018
Ti Enye Kpukpru Ini
Otode President Henry B. Eyring
Akpa Ono-item ke First Presidency
Nte mbufo emekut ye ami nte prophet Moroni ewetde mme akpatre iko ke Nwed Mormon esin ke itiat nwed? Enye okodu ikpong. Enye ama okut nte idut esie, ikot esie ye ufokemana esie eduode. Isong oro “okoyoho” ye ekong (Mormon 8:8). Edi enye ama enyene idorenyin koro enye ama ada okut eyo nnyin! Ndien ke ofuri nkpo emi enye ekpekemede ndiwet, enye odoho nnyin ete ti (kese Moroni 10:3).
President Spencer W. Kimball (1895–1985) ama esima ndikpeb ete ke ata-akpan nworo nda iko emi odude ke dictionary ekeme ndidi ti Enye odoho ete, “Sia nnyin ima ikanam ediomo ye Abasi,” ke mkpon-nkan nkpo emi nnyin iyomde edi nditi” mmo.1
Mbufo emekeme ndikut iko oro ti ke ofuri ebiet ke Nwed Abasi. Ke ini Nephi okonode ndito-eka esie irenowo item, enye esiwak ndidoho mmo ete eti iko Jehovah enyung eti danga Abasi akanyangake mme ete-ete mmo (kese 1 Nephi 15:11, 25; 17:40).
Ke akpatre akwa etop esie, Edidem Benjamin ama esin iko emi ti akang itiaba ke etop esie. Enye ekere ete ke ikot esie eyeti ebanga “ubong Abasi … ye eti ido ye anyan ufen” emi enye obode ono mmo (Mosiah 4:11; nko kese 2:41; 4:28, 30; 5:11–12).
Kini Andinyanga okotongode udia-Obong, Enye ama odoho mbet Esie ete edia mme idiongo emi “ke nditi” nwaidem Esie (Luke 22:19). Ke ofuri akam udia-Obong eke ami ye mbufo ikopde, iko emi kpukpru ini esibem iko emi ti (kese D&C 20:77, 79).
Etop mi edi ikoot, kpa mkpe ubok, ete ti. Se mme ekikere ita mi kabanga se mbufo ekemede nditi kwa udua kini ediade mme edisana idiongo eke udia-Obong. Ami mmenim ke mmo esin unwam eno mbufo, nte ekesinde eno mi.
Ti Jesus Christ.
Akpa, ti Andinyanga. Ti owo emi Enye ekededi kini okodude ke isong, danga nte Enye ekesitingde iko ono mbon efen, ye danga nte Enye okowutde mfonido ke mme edinam Esie. Ti mme owo emi Enye ekesibiatde ini ono ye se Enye ekekpebde. Andinyanga “ekesisanga ke ebiet ke ebiet anam ufon ono mme owo” (Acts 10:38). Enye ama okok mme udongo. Enye ama esin idem ke ndinam uduak eke Ete Esie.
Akpan-akpan, nnyin imekeme nditi akwa ekom-urua emi Enye ekekpede, oto ke ima emi Enye enyenede ono nnyin, man emen ntoi idioknkpo nnyin efeb. Nte nnyin itide Enye, udong nnyin ke nditiene Enye eyekori. Nnyin iyeyom ndifon ido esisit, iwak ndifen-nno, inyung iwak ndiyom uduak Abasi nyung nam uduak oro.
Ti Se Anade man Mbufo Enam Ofon
Ososong ndikere nkpo mbanga Andinyanga—edisana ye mfon-mma ido Esie—ke mukereke nko kabanga ndudue ye unana mfon-mma eke nnyin ke ndida ndomo. Nnyin ima inam mme ediomo ke ndinim mme ewuho Esie, edi nnyin imesiwak ndiduo nworo mkpong edikong ndaha emi. Edi Andiyanga ama odiongo ete ke emi eyetibe, emi edide ntak emi Enye okonode nnyin edinam udia-Obong.
Udia-Obong enyene ntongo esie ke edinam Akani Testament eke edinam uwa, emi esinede ndiyarare idioknkpo nnyin (kese Leviticus 5:5). Nnyin inamke uwa unam aba, edi nnyin imekeme ndisa-na mme idioknkpo nnyin nyak. Nwed Abasi okot emi uwa eke “mbungo esitye spirt emi anuahare” (3 Nephi 9:20). Edi edidia udia-Obong ye esit emi atuade mkpofiok (kese D&C 59:12; Moroni 6:2). Nte mbufo enamde ntre, mbufo eyebo edifen ke idioknkpo ndien mbufo idiworoke ikpong usung emi afiakde ada etiene Abasi.
Ti Nkori emi Mbufo Enamde
Nte mbufo esede uwem mbufo kini edinam udia-Obong, ami mmenim ke ekikere mbufo ikongoke ke nkpo emi mbufo enamde edue kpot edi nko ese mme nkpo emi mbufo ekanamde ofon—mme ini emi mbufo ekekopde nte Ete ke Enyong ye Andinyanga ekenemde esit ye mbufo. Mbufo emekeme ndida esisit ini kini udia-Obong ebup Abasi ete anwam mbufo man ekut mme nkpo emi. Edieke mbufo enamde emi, ami nwongo nno mbufo nte ke mbufo eyekop nti iko emi ke esit mbufo. Mbufo eyenyene ekikere idorenyin.
Ini eke ami nkanamde emi, Spirit ama afiak osongo ono mi ete okposuk nte ami mme mfonke-mma ofuri ofuri, ke ami mmefon mfin nkan nte nkedide ke mkpong. Ndien emi ama ono mi uko ete, oto ke Andinyanga, ke ami mmekeme ndinam ofon mkpong.
Kpukpru ini edi anyan ini, ndien oro oworo akamba ukeme ke nditing enyin. Mbufo emediongo eto ifiok-ukpeb danga nte osongde ke ndinehede nkere mbanga nkpo kiet ke ofuri ini. Okposuk edi nte mbufo enehede enim enwongo mbufo ofon ke nditi Enye kpukpru ini, Enye ke eteti mbufo kpukpru ini.
Andinyanga odiongo mme mfina nnyin. Enye odiongo se oworo ke ndiyo unana eke uwem emi ke idem mbufo. Enye odiongo danga nte mbufo enehede eyom edidiong emi otode ke nditi Enye kpukpru ini ye ke ndinam item Esie—“man [mbufo] ke kpukpru ini ekpenyene Spirit esie ndidu ye [mbufo]” (D&C 20:77; efiak eyire eting).
Ntem, Enye adara mbufo edifiak ndi ke okpokoro udia-Obong kwa udua, inikiet efen ke ndino mbufo ufang ndidi ntiense nno Enye ete ke mbufo eyeti Enye ke kpukpru ini.
© 2018 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Ndikabare Etop eke First Presidency Message, February 2018. Efik 15046 553