Te Rongorongo man te Moan Beretitentii, Beberuare 2018
Man aki Toki n Ururingnga
Iroun Beretitenti Henry B. Eyring
Moan ni Kauntira n te Moan Beretitentii
Ko kona ni katamneia ma ngai te burabeti Moronaai korean ana kabanea n taeka iaon Ana Boki Moomon iaon bwatua aika koora? Bon ti ngaia. E a tia n noora bwakaia ana baronga, ana aomata, ao ana utu. Iaon te aba “e bon waaki iai te tiritiri ao kawawaean te raraa ae reiti nako” n te buaka (Moomon 8:8). Ma iai ana onimaki, bwa e a tia n noori ara bong aikai! Ao man bwaai ni kabane ake e kona ni korei, e kaoira bwa ti na uringngi (taraa Moronaai 10:3).
Beretitenti Spencer W. Kimball (1895–1985) e tatangiria n reirei te taeka ae moan te kakaawaki n te rikitinare are uringnga. Ibukina bwa ti a tia ni karaoi berita aika a tabu ma te Atua, e taku, “tibwangara ae korakora bwa ti na uringii.”1
Ko kona ni kunea te taeka uringnga rinanon nako koroboki aika a tabu. Ngke e kauringiia tarina Nibwaai, n tainako e kaoia bwa a na uringa ana taeka te Uea ao n uringa aron te Atua ni kamaiuiia aia bakatibu (taraa 1 Nibwaai 15:11, 25; 17:40).
N ana taeka ni kabo, te Uea Beniamina e kabonganaa te taeka ae uringnga itiua te tai. E kantaningaia bwa ana aomata a na ururinga “korakoran te Atua … ma raoiroina ma aki kakai unna nakoia (Motiaea 4:11; taraa naba 2:41; 4:28, 30; 5:11–12).
Ngke e anga te toa te Tia Kamaiu, E kaoia ana Abotoro bwa a ana butimwaea te toa ni kanikinaean “Kanuringan” Ana Anganano (Ruka 22:19). N te tataro n toa ao ngkoe ao Ngai, I ongo, te taeka n tainako ni moanaki ma te taeka uringnga (taraa R&B 20:77, 79).
Au rongorongo bon te kakao, ao bon te bubuti, n uringnga. Aikai teniua kaotiango iaon bwaai ake ko kona n uringii ngkai ko kana te toa ni katoa wiiki ni kanikinaean te toa ae tabu. Au kantaninga bwa a ibuobuoki nakoimi, n aroia ngkai a tia ni buokai.
Ururinga Iesu Kristo.
Te moan, uringa te Tia Kamaiu Uringnga bwa antai ngaia ngke E mena iaon te aba, arona n taetae nakoia tabeman, ao arona ni kaota te akoi n ana mwakuri. Uringnga bwa antai are e kabanea ana tai mangaia ao tera are E anga reirei iaona. E “nakonako ni karaoa ae raoiroi” (Mwakuri 10:38). E kawariia aoraki. E ongotaeka nakon ana kantaninga Tamana.
Riki, ti kona n uringnga te anganano ae korakora are e karaoia, ibukin Ana tangira ibukira, ni kanakoa memean ara bure. Ngkai ti uringnga, nanora ni kan iriiria e na rikirake. Ti na tangiria n akoi riki, ni kakabwara bure riki, ao n tangiria n ukoukora ana kantaninga te Atua ni karaoi.
Uringnga Te Bwai ae Ko Riai ni Karaoi ni Katamaroa Riki
E kaangaanga ae ti na iangoa te Tia Kamaiu—Arona n itiaki ao ni kororaoi—n aki naba iangoa arora ni kairua ao n aki kororaoi ni kabotauara. Ti a tia ni karaoa te berita ae tabu bwa ti na ongotaeka nakon Ana tua, ma ti aki toki ni kabwaka man te kainibaire ae rietata aei. Ma te Tia Kamaiu e ataia bwa aei ae e na kona n riki, ae ngaia anne bukina are E angananiira te otenanti n te toa.
Iai aron moan karaoan te toa n te O Tetemanti are e kakaraoaki n te bao ni karea, are e na kaota ae bure iai (taraa Nakoaia Ibonga 5:5). Ti aki manga angakarea irouia maan, ma ti kona n anganako ara bure. Ni koroboki aika a tabu e arana te anganano aei bwa “te nano ae uruaki ma te tamnei ae raraoma” (3 Nibwaai 9:20). Nakomai nakon te toa ma te rairannano (taraa R&B 59:12; Moronaai 6:2). Ngkai ko karaoa aei, ko na karekea kabwaraan am bure ao ko na aki tionako man te kawai n oki nakon te Atua.
Uringa te Rikirake ae Ko Karaoia
Ngkai ko kamwataua aron maium n tain te otenanti n te toa, au kantaninga bwa am iango aki ti boboto iaon bwaai ake ko a tia ni karaoia aika a kairua ma bwaai naba ake ko a tia ni karaoi aika eti—taai ake ko a tia n namakina iai Tamam are i Karawa ao te Tia Kamaiu ngke a kukurei iroum. Ko kona naba n anaa tabeua te tai n tain te toa ni butiia te Atua bwa e na buokiko n noori bwaai aikai. Ngkana ko karaoa anne, I berita nakoim bwa iai te bwai ae ko na namakinna. Ko na namakina te kantaninga.
Ngkana I a tia ni karaoa aei, te Tamnei e na kamatoa nakoiu bwa ngkai I teimatoa n raroa man te kororaoi, ma I a nakoraoi riki nakon are ngkoananoa. Ao aio are e na anganai te raunnao bwa, ibukin te Tia Kamaiu, I kona n tamaroa riki nakon te ingabong.
N tainako bon te tai ae abwabwaki, ao e kabwarabwara ae mwaiti iaon te mwakuri ae teimatoa. Ko ataia man te bwai are ko rinanona matoatoan aron iangoana n teimatoa iaon te bwai teuana ni katoa tai. Ma n aki taraia bwa teimatoara ngkoe ni kawakina am berita n ururingnga, E ururingngko naba n tainako.
Te Tia Kamaiu e atai am kaangaanga. E ataa aron matoan te maiu ni kona n rawawata iaom. E ataia ngkana ko kainnanoa te kakabwaia n te tai ae waekoa are e roko n tainako man ururingana ao n ongotaeka Nakoina—“bwa [ko] kona n tainako ni karekea Tamneina [iroum]” (R&B 20:77; e kairaki katuruturuana).
Ngaia are, E butimwaiko n oki nakon taiboran te toa ni katoa wiiki, teuana riki te tai n anganiko am tai ni kakoaua imatana bwa kona ururingnga n tainako.
© 2018 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/17. Kariaiakaki rairana: 6/17. Rairan te First Presidency Message, February 2018. Kiribati. 15046 859