Pweng sin Prestuhnsi Se Met, Fepweri 2018
Esamuhl Pacl Nuhkwewa
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Kuh kom kuh in wiyuc ac nuhnkwelah ke nuhnak lom mwet pahluh Moroni ke el suhmuhslah kahs sahflah luhn Puk luhn Mormon fin puhlwet kol ah? El muhkahimtacl. El tuh liye acn sel, mwet lal, ac sucu lal kuhnausyucklac. Acn sacn “fahfahlacna in tiac tui” ke mweun (Mormon 8:8). Tuh oasr finsrak lal, ke srihpen el liye lwen lasr! Ke ma nuhkwewa el kuh in sihmihs, el suli kuht in esam (liye Moroni 10:3).
Prestuhn Spencer W. Kimball (1895–1985) el luhngse in luti lah kahs yohk srihpac se emet ke dictionary ah pa esam. Ke srihpen kuht oraclah olwelah nuh sin God, el fahk, “enenuh yohk emet lasr pa in Esamuhlos.”1
Kowos kuh in konwacwack kahs esamyucki ke ma suhmuhslah. Ke Nephi el kaiyac tamuhlwel lal, el kwacna solwaclos in esam kahs luhn Leum ac esam ohiyac ma God El molwelah pahpah tuhmwaclos (liye 1 Nephi 15:11, 25; 17:40).
Ke sramsram wolacna sahflah lal, Tohkohsrah Benjamin el orekmakihn kahs esam pacl itkohsr. El finsrak tuh mwet lal in muh esam “yohklacna luhn God … ac wolacna ac mongfihsrwacsr Lal” kaclos (Mosiah 4:11; liye pac 2:41; 4:28, 30; 5:11–12).
Ke Mwet Lahngo El akiyac kuhfa luhn Leum, El suli mwet tuhmal lutlut in ipeis ke mwe akucl “in esam” ke iwaclah Lal (Luke 22:19). Ke kais sie pruhe luhn kuhfa luhn Leum ma kowos ac nga lohng, kahs pacl nuhkwewa tuhkuh met liki kahs se esam (liye D&C 20:77, 79).
Pweng luhk pa mwe solsol se, finne nguhsr se, in esam. Pa inge mwe luti tolu ma kom kuh in esam kais sie wik ke kom ipeis ke mwe akucl muhtahl luhn kuhfa luhn Leum. Nga finsrak tuh ac mwe kahsruh nuh sum, oacna ma inge kahsrweyuc.
Esamuhl Jisus Kraist
Ma se met, Esamuhl Mwet Lahngo. Esam lah suc El uh ke El oasr fin facluh ah, ohiyacn sramsram Lal nuh sin mwet sahyac, ac ohiyacn kuhlwacng Lal ke mukwikwi Lal. Esam mwet El eis pacl la yohroh ac ma El luti ah. Mwet Lahngo El “forfor oruh ma wo” (Orekma 10:38). El muhtwacta yurin mwet mas. El insacnweacng in oruh kena luhn Pahpah Tuhmwacl.
Tuh yohk liki ma nuhkwewa, kuht kuh in esam luhpah yohk El molwelah, ke luhngse Lal nuh sesr, in eislah fohkfohk luhn ma koluk lasr. Ke kuht Esamuhl, kena lasr in Ukwacl ac fah kapkapwack. Kuht fah kena in kuhlwacng, sang nuhnak muhnahs, ac luhngse in suk kena luhn God ac oruh.
Esam Ma Kom Enenuh in Oruh Wo Liki Met
Upac in nuhnkuh Kacl Mwet Lahngo—nwacsnwacs ac suwohswohs Lal—sahyacn nuhnkuh pac muh kuht suhfal ac sesuwohs luhmweyuck nuh Sel. Kuht oraclah olwelah in ukwe masap Lal, tuhsruhk kuht kwacna tiacna sun srihkasrak fuhlwact se inge. Tuh Mwet Lahngo El etuh lah ma inge ac sikyak, pa oruh El use nuh sesr akwuck ke kuhfa luhn Leum.
Kuhfa luhn Leum eis muhtwacwacack la ke ohiyac luhn Wuhlweacng Mahtuh in oruh kihsac uh, weacng taltal luhn ma koluk (liye Leviticus 5:5). Kuht tiac sifil kihsackihn kosro uh ke pacl inge, tuh kuht srwackna kuh in fuhl-weack ma koluk lasr. Ma suhmuhslah uh pahngon ma inge kihsac luhn “inse muhsahl ac toasr in nguhn” (3 Nephi 9:20). Tuhkuh nuh ke kuhfa luhn Leum ke inse auliyak (liye D&C 59:12; Moroni 6:2). Ke kom oruh ma inge, kom fah eis nuhnak muhnahs ke ma koluk ac kom fah tiac fahsr liki inkacnek ma kol fohlohk nuh yurin God.
Esam Kapkapwack Kom Oraclah
Ke kom motko ke moul lom ke akwuck luhn kuhfa luhn Leum, nga finsrak tuh nuhnak lom tiac oasr ke ma kom oruh koluk muhkwena tuh oacyacpac oasr ke ma kom oruh wo—pacl ma kom puhla muh Pahpah Lucng ac Mwet Lahngo Elos engan sum. Sahp kom ac eis pacl srihksrihk se ke kuhfa luhn Leum in siyuck sin God El in tuh kahsruh kom liye ma inge. Kom fin oruh, nga olwelah nuh sum lah kom ac puhla ma se. Kom ac puhla finsrak.
Ke nga oruh ma inge, Nguhn El ahkkweyeyuc lah finne nga tiacna suwohswohs, nga wo mihsenge likina nga oruh ekweah. Ac ma inge ahkpwacyei nuh sihk lah, ke srihpen Mwet Lahngo, nga kuh in oruh wo liki lutu.
Pacl nuhkwewa pa pacl na loeloes se, ac kalmac kuht in srihke na pwacye. Kom etuh ke moul lom lah upac in nuhnkuh ke ma sefanna pacl nuhkwewa. Tuh oacna sie ohiyacn olwelah lom in esamuhl pacl nuhkwewa, El fah pacl nuhkwewa esam kom.
Mwet Lahngo El etuh ma upac lom. El etuh lah fuhkah in puhla upac luhn moul raunikomlac. El etuh lah kom enenuh na pwacye mwe insewowo ma tuhkuh ke Esamuhl pacl nuh kwewa ac ahksol—tuh Nguhn Lal kuh in [wi kom] pacl nuh kwewa. (liye D&C 20:77; ahkuhtweyac wo ituckyang).
Ohinge, El pain kom in fohlohk nuh ke kuhfa luhn Leum kais sie wik, in sulpac usot nuh sum pacl in ahkpwacyei ye Muhtahl lah kom ac Esamuhl pacl nuh kwewa.
© 2018 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, February 2018. Kosraean. 15046 868