Milwol ko Bin Somm’on e Presidency, February 2012
Tay u Wun’um ni Gubin Ngiyal’
Yib rok President Henry B. Eyring
Bin Somm’on e Counselor u lane Bin Somm’on e Presidency
Rayog ni ngam tafney nag ya’an fare profet Moroni ni be yoloy fapi thin ni’ir e tomur ko fare Babyor ku Mormon u dakan fare plate nib gold? Yi go’ ir. Ke guy e nam rok, gidii’ rok’, nge chongin e tabinaew rok’ nike puth nga butt’. Dakean fare nam “’ul’ul ni dar tal’” ko mael (Mormon 8:8). Machane’ bay athap rok’, ya ke guy e pi rran rodaed! Ma gubin fapi n’en ni rayog ni ke yoloy, ke pinning daed ni ngad ted u wun’daed (mu guy koMoroni 10:3).
President Spencer W. Kimball (1895–1985) e be’ ni ke peri’eg ni bin tha’abi ga’fan e bugi thin ni bay ulan e dictionary e ngad ted u wun’daed. Ni bachan e kaed fal’agnead e motochiyel ngak’ Got, ke ga’ar, “bin tha’abi ga’fan rodaed e ngad ted u wun’daed” roraed.1
Rayog ni ngam peri’eg fare thin ni ted u wun’daed u fithik fapi chep nib thothup. Nap’an ke non Nephi ngak’ walagen nib pumo’on, ma baga’ ni ma pug oran ngorow ni ngar puguran fapi thin rok’ Somoel min lamnag rogon ni ke ayuweg raed Got (mu guy ko 1 Nephi 15:11, 25; 17:40).
Yaen tomur ni non nib ga’, Benjamin nib Pilung uneg fare bugi thin ngay ni ngaed ted u wun’daed ni medlip yay. ke athapeg ni gidii’ rok’ e bay u wun’raed “fare fal’ngin rok Got … fal’ngin nge gafgow nib n’uw nap’an” ni ke tay ni fan ngomed (Mosiah 4:11; mu guy ko 2:41; 4:28, 30; 5:11–12).
Nap’an fare Tathapeg ni weliy e ngongol ko fare sacrament, ke pinning gachalpen ni ngar feked “u wun’raed” ko fare gafgow ni tay(Luke 22:19). Ko gubin e meybil ko fare sacrament ni gadow ma rung’ag, fare bugi thin ni gubin ngiyal’ e be yip’fan fare thin ni ted u wun’daed (mu guy ko D&C 20:77, 79).
Mulwol rog e gube pinning daed, ma kug be wening, ni ngam tay u wun’um. Ba’aray fare dalipi ban’en ni ngam tay u wun’um u nap’an ni gara fek fare gali pow nib thothup nifan fare sacrament. Gube athapeg ni ra yib angin ngom, ni woed ni ke yib angin ngog.
Tay u Wun’um Yesus Kristus
Somm’on, mu tay u wun’um fare Tathapeg. Tay u wun’um ko Ir mini’ nap’an ni’i moy u fayleng, rogon ni’i non ngak reb e ba’, nge rogon ni’i dag nib gol ko pi n’en ni’i rin’. Tay u wun’um ko mini’ e i guy nge tin ni ke fil ban’en. Fare Tathapeg “me yan nga gubin yang ni be rin’ e tin ni bfel” (Acts 10:38). I yan nge guy e gidii’ nib m’ar. Ma ke tay u wan’ ni nge rin’ e murwel ko Chitmangin.
Ma bin tha’abi ga’fan, e ngan tay u wun’uy fare bin nib ga’ pilwon ni thang, ni bachane tu’ufeg Rok’ ngodaed, ni nge chuweg fare makalit ko liyach rodaed. Nap’an ni gadaed ra tay Ir u wun’daed, ma a’adag rodaed ni ngaed laked e ra ga’i yan. Ma gadaed ra a’adag ni ngad gol gaed, n’agfan, min rin’ e murwel rok’ Got.
Tay u Wun’um e Tin ni Ngam Rin’
Mom’aw rogon ni ngan lamnag fare Tathapeg—rogon ni fane bfel’—ni dab ni lemnag rogon ni fani gadaed ba mo’war ni ri gadaed ba thil ngak. Kad fal’agned e m’ag ni ngad fol gaed ko fapi motochiyel Rok’, ma iraray ni kagdaed be mo’owar riy. Machane fare Tathapeg e manang ni ra buch e tiney, ni iraray fan ni ke pi’ ngodaed fare sacrament.
Fare sacrament e bay rogon ni yima rin’ ulan fare Bin Kakrom e M’ag ko rogon ni yima pi’ e maligach, mib mu’un e puwofaynag e denen riy (mu guy ko Levitikus 5:5). Darn ki yima pi’ e gamanman ni maligach, machane rayog ni ngaed piged fapi denen rodaed. Fare chep nib thothup e ke pinning e biney e maligach fare “m’ingaen’ nge kalngaen’” ngay (3 Nephi 9:20). Mub ko fare sacrament ni kam kalngaen’um (mu guy ko D&C 59:12; Moroni 6:2). Nap’an ni garam rin’ ni iraray rogon, ma ran n’agfan fapi denen rom ma dabni chuwegnem ko fare pi’i kanawo’ ni be sul ngak’ Got.
Tay u Wun’um e pi N’en ni Gabe Mon’og Riy
Nap’an ni garam sap ko pi n’en ni ku’um rin’ u nap’an fare sacrament, ma gube athapeg ni tafney rom e gathi kemus nibe sap ko fapi n’en ni kam rin’ nib kireb machane fapi n’en ni ku’um rin’ nib mangil—woed e ngiyal’ ni kam thamiy ni ke fal’falan’ e Chitmangdad ni bay u Tharmiy nge fare Tathapeg ni yow ba fal’falan’ ngom. Ma ku rayog ni ngam fith ngak Got nge ayuwegnem ngam guy e pin’ey. Nap’an ni garam rin’, ma gube micheg nag ngom ni garam thamiy ban’en. Garam thamiy e athap.
Nap’an ni kug rin’ e biney, fare Thothup e ke micheg nag ngog ni ngiyal’ ni gub palog ko rir nib mangil, ma dabay e bfel’ ko fowap. Ma biney e be yoeg ngog ni rayog rog, ni bachan fare Tathapeg, ni ku rayog ni ngu mon’og ko gubul.
Gubin ngiyal’ en n’uw nap’an, ma btu’uf ni ngam gay rogon nib gel. Gur ma gamanang rogon nib mom’aw ni ngam par ma gabe lemnag ban’en ni gubin ngiyal’. Ma demtrug rogon gelngin ni gara tay Ir u wun’um, ma Ir e gubin ngiyal’ ma leam nigem.
Fare Tathapeg e manang e pi magawon rom. Manang rogon fapi magawon e yafos nu fayleng nib mom’aw ngom. Ma manang ko ngiyal’ nib tu’uf fapi tawa’ath rom ko fapi ngiyal’ ni gama tay Ir u wun’um ma gabe fol Rok’—“ni nge [gur] yogni gubin ngiyal’ ma bay fare Thothup [rom] ” (D&C 20:77; kan uneg inn ngay).
Ere, be pinngem ngam sul ko fare sacrament ni gubin e wik, ni nge mich u wun’um ngay ni bay mag tay Ir u wun’um ni gubin ngiyal’.
© 2018 rok Intellectual Reserve, Inc. Bay mot’won ni gubin. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg ni thin ko First Presidency Message, February 2018. Yapese. 15046 905