O Se Talatuu o le Alofa ma le Auauna Atu
O se maimoaga faalauaitele mo Peresitene Thomas S. Monson sa faia i le Maota Autu mo Konafesi i le aso 11 Ianuari, 2018. O sauniga o le maliu sa faia i le aso na sosoo ai i le Maota Autu mo Konafesi. O lona falelauasiga sa faia i lena aoauli mo nao lona aiga i le Fanuatanu i Sate Leki.
O se faamanuiaga mo a’u le tu atu i o outou luma i lenei aso ma ofoina atu ni faamatalaga e manatua ai lo’u tama, o Peresitene Thomas Spencer Monson, Peresitene lona 16 o Le Ekalesia a Iesu Keriso o le Au Paia o Aso e Gata Ai. O le asō ua faatumulia ai lenei Maota Autu mo Konafesi i lo outou alofa ma tatalo. Ou te faafetai atu ia te outou uma mo lo outou auai mai ma le lagolago.
I le avea ai o se aiga, matou te fia faafetai atu i le anoanoai o tagata na faamanuiaina lo matou tama i a latou auaunaga ma le tausiga. Matou te tuuina atu le faafetai faamaoni ia Peresitene Henry B. Eyring ma Peresitene Dieter F. Uchtdorf. Matou te faafetai i sui taitasi o le Korama a Aposetolo e Toasefululua. Matou te faafetai foi i le toatele o isi Au Pulega Aoao ma Taitai o le Ekalesia. E le faagaloina foi le aufaigaluega o le ofisa a Peresitene Monson ma isi tagata faigaluega. O le vaega o le puipuiga a lo’u tama, aemaise Tracy Monson ma Dan Stephens, i o la tulaga faapolofesa ma le popole na tuuina mai ai le auaunaga tulaga ese. Matou te tuuina atu se faafetai faapitoa i lana aufaigaluega tausisoifua, aemaise o Sister Aleese Walker. Matou te faafetai mo taulasea [therapists], fomai nifo, ma fomai tuuto a lo’u tama, e aofia ai lana fomai faapitoa o Dr. Russell Maxwell. Sa matua ofoofogia outou uma i la outou tausiga agaalofa lē faavaivai.
Ou te fia faafetai i lo’u toalua, o Roger, ma le ma fanau mo le lagolagoina o a’u a o ou auauna atu i lo’u tama ma lo latou tama matua.
Tama pele, o se faamanuiaga paia ma se faamamaluga le tausia o oe e pei ona talosagaina ai e lo’u tina tuuto. Ou te iloa sa ta maua “[agelu na] si’o faataamilo [i ta’ua], e sapasapai [i ta’ua] i luga.”1
Ma le mea mulimuli, ou te fia faafetai atu ia te outou, o tagata o le Ekalesia. O a outou tatalo i aso uma mo le 54 tausaga, na ofoina atu a o auauna atu lo’u tama o se Aposetolo ma sosoo ai o se Peresitene o le Ekalesia, na faia se eseesega.
I le asō, ou te matuai faafetai tele mo lo’u tama ma le talatuu na ia fatuina—o se talatuu o le alofa ma le auauna atu. E ui sa avea o ia ma se perofeta, ae sa iloa lava e lo’u tama sa le atoatoa o ia. Faatasi ai ma lona loto atoa, sa ia faalagolago atu ai ma le lotomaualalo ma taumafai e faapei o lo tatou Alii ma le Faaola, o Iesu Keriso. Pe a ma se tausaga talu ai, sa galue ai o ia i lona ofisa. Sa matala se kopi o le mekasini o le Ensign ma faaali mai ai lona ata. Sa tusi atu le lima o lo’u tama i le ata ma faapea mai, “ou te iloa le alii le la. Sa ia taumafai i le mea sili na te mafaia.”
O Se Talatuu o le Alofa
O Peresitene Monson, i lona “taumafai i le mea sili na te mafaia,” ua ia tuua se talatuu e le mafaagaloina o le love. Sa ia alofa i le Alii ma sa ia alofa i tagata. Sa ia vaaia lo tatou gafatia ma talitonu faamaoni i lo tatou tomai e sui ai ma agai i luma e ala i le Togiola a Iesu Keriso.
Sa ia alofa i ona matua, ona tuafafine ma uso, ma le aiga lautele. Sa ia alofa i lana soa pele e faavavau—lana Frances lalelei, filemu, lagolago faamaoni ma le faatupumea. Sa ia alofa i lona aiga ma ana faifeautalai taitoatasi i Kanata i sasae. Sa faapitoa lona alofa i ana fanau a fanau. E ui i lona pisi i tiute, ae sa ia fatuina le tele o manatuaga lemafaitaulia ma i latou. Sa ia fiafia moni i o latou olaga taitoatasi.
Sa lagona foi e tagata ese le alofa o Peresitene Monson. I se tasi taimi, a o asiasi atu i se nofoaga e tausi ai tagata matutua i le lotoifale, sa ia faatalofa ai i se toeaina i le nofoa faataavalevale. Sa tepa a’e i luga le toeaina ma faapea mai ma le matamuli, “Peresitene Monson, ua e faatalofa mai i lo’u lima, ae ou te manaomia se opo.” E aunoa ma le faatali, sa punou i lalo Tama ma opo ma le agalelei lenei toeaina pele.
E masani ona ta’ua e lo’u tama le poloaiga sili a le Faaola:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi le lona lua, E te alofa atu i le lua te tuaoi, ia pei o oe lava ia te oe.”2
Sa ia filifili foi e ola ai i lenei poloaiga i aso taitasi ma aso uma.
O Se Talatuu o le Auauna Atu
I le The Two Gentlemen of Verona, na tusia ai ma le atamai e William Shakespeare: “Latou te le lagona le alofa pe a le faaali atu lo latou alolofa.”3 Na malamalama lelei lo’u tama i lenei mea ma faaalia lona alofa mo isi i le mulimuli ai i le faataitaiga a le Faaola: “[O Ia] sa femaliuai ma agalelei, … aua sa ia te ia le Atua.”4 Sa faaaluina e lo’u tama lona olaga atoa e auauna atu ai i isi.
Sa faamanuiaina a’u e avea ma soa a lo’u tama i le tele o ana lava ia asiasiga patino. Na masani ona ma asia sana uo mamae, o Elder Glen Rudd, 98 tausaga le matua. I se tasi taimi, sa tele se taimi na alu i le va o a ma asiasiga. I se tasi aso, na tali ai e se failautusi i le ofisa a lo’u tama se telefoni mai ia Elder Rudd. Sa ia fesili, “O malaga foi Peresitene Monson i fafo e asia e mama’i, mafatia, ma e matutua? Afai o lea, ou te agavaa foi i ai!” Sa ma tali vave atu i se asiasiga i lona maota. Ina ua maea le asiasiga, sa faliu mai Tama ma se ataata i ona fofoga, ma faapea mai, “Ann, ou te lagona ua ta faia se mea lelei i le asō.”
O le manao o lo’u tama e auauna atu i isi na masani ona faia e sili atu ma lona gafatia e faia ai, pe a manatu i le tele o ona tiutetauave. Sa lei faavaivai, sa ia maua se vaifofo: sa ia faaaofia isi e tuuina atu le auaunaga e manaomia e fai ma ona sui. Na te valaau ma le faaeteete tagata na filifilia ma faapea atu, “O la’u uo lea o Mac? O Tom lea. O le a le lanu e te fia manao e vali sesega ai lou agaga i lenei aso?” A faaliliuina, o lona uiga na manaomia e Peresitene Monson se “faatinoga o le auaunaga.” O “Mac” sa fiafia tele e faataunuu.
E le manaomia ona tatou avea ma Peresitene o le Ekalesia e iloa ai le manaoga o le isi tagata ma “vali sesega ai o tatou agaga.” Na faatino e lo’u tama ona lagona masani, “O se mea lelei lena e fai,” ae iloa mulimuli ane ai o le tali lena i le tatalo a le isi tagata. E ala i le mulimuli i uunaiga a le Agaga, o a tatou faatinoga faigofie o auaunaga e mafai foi ona avea ma tali i tatalo, ma e mafai ona tatou tauaveina lenei talatuu o le auauna atu i isi.
I le silia laitiiti ma le tausaga talu ai, sa ma asiasi ai ma lo’u tama i se isi uo ua leva, sa 94 tausaga ma sa talioti. I se leo tele, na faapea atu lo’u tama, “O la’u uo le la o Brent Goates?” Na pupula mata o Brother Goates ma fai mai i se taumafaiga malosi ma le ootia, “Tom, ua e sau. Lelei. Lelei.”
Na faamatala atu e lo’u tama, “Brent, e leai se isi nofoaga ou te fia i ai nai lo le i ai iinei ma oe. O le nofoaga e finagalo le Alii ia ou i ai.” Na talanoa lo’u tama ia te ia e pei ua la toe talavou uma ma o sa tiotio ma malosi mai le alii o Brent; ona ia tuu atu lea ia Brother Goates se faamanuiaga faaleperisitua. A o ma o ese atu, sa fai mai lo’u tama, “Na tuu mai e le Alii ia i matou le perisitua e auauna ai ma faamanuia ai isi. O se faamanuiaga sili lenei le asiasi i la’u uo ma faailoa atu ia te ia o loo manatua pea o ia. Ou te lagona ua ta faia se mea lelei i le asō, Ann.” O lena aso, sa le mafai ona taofia le ataata o lo’u tama. Sa mapumapu o ia. Sa ia fiafia.
O le matauina o ia, sa ou iloa ai na iloa e lo’u tama le auala e maua ai le olioli moni. E ala i lana auaunaga tuuto, sa ia aoao ai e oo mai le olioli mai le alofa i le Alii ma le auauna atu i lou tuaoi. O loo avanoa lenei olioli ia i tatou uma. E leai se isi auala sili e faamamalu ai lo’u tama, le perofeta, ma lo tatou Faaola o Iesu Keriso nai lo le ola ai i aso uma ia mafai ona tatou faapea moni atu i le iuga, “Ou te lagona ua ou faia se mea lelei i le asō.”
E i ai sa’u molimau. E moni Le Ekalesia a Iesu Keriso o le Au Paia o Aso e Gata Ai. Ou te iloa o loo soifua le Atua ma e alofa i Lana fanau. Faafetai atu i tagata uma na alolofa ma faamamaluina lo’u tama, o Peresitene Thomas S. Monson. Ia taitoatasi i tatou ma faaauau pea ona mulimuli i le perofeta a le Alii. Ia tatou vaai atu ia Keriso, lo tatou Alii ma le Togiola atoatoa, o lo tatou faataitaiga e faavavau. O la’u tatalo faamaoni o le a faalogo atu lo’u tama pele, ma i se aso o i tatou uma foi i nei upu: “Ua lelei ia, le auauna lelei e, ma le faamaoni: … ulufale mai ia i le fiafia o lou alii.”5
Ou te tau atu nei mea i le suafa o Iesu Keriso, amene.