O Se Perofeta e Popole [mo isi] ma Lototele

Saunia e Peresitene Henry B. Eyring

Fesoasoani Muamua i le Au Peresitene Sili

Ua faamamaluina a’u i le valaauliaina e lauga i le falelauasiga o se perofeta maoae a le Atua, o Peresitene Thomas S. Monson. Ua ootia tele lo’u loto i lona aiga ma i latou uma o loo faavauvau i lona maliu. E faitau miliona tagata i le lalolagi o e ua tausoaina faatasi lena lagona o le maliu. Sa alofagia o ia e i latou na iloaina o ia mai ana saunoaga ma taitaiga faagaeetia ma musuia. O le aofai o tagata o e na alolofa ia te ia e ala i lona agalelei faaletagata, ua na o le Atua o le na auina mai o ia e tausia i latou ua silafiaina.

O le tausiga o isi na tupu soo i le auaunaga a Peresitene Monson. Na te alu e asiasi i se tasi e i ai se manaoga, lagona se uunaiga a’o i ai iina e alu i se isi tagata, ma sosoo ai ma se isi. E tele taimi e fai mai ai sea tagata, “Na ou iloa lava o le a e sau.” Atonu na ia iloa, atonu na silafia e le Alii, ae sa lei silafia e Peresitene Monson ina ua ia amata ona alu atu. Peitai, o i latou na iloa o le a ia sau na iloa foi le alofa tele o le Atua ia i latou na auina atu ai Lana auauna. Sa latou lagona le alofa o le Atua e ala atu i le agalelei o Peresitene Monson ia i latou. O le alofa i le Atua, ma le alofa mo fanau o le Atua, na faatumulia ai lona soifuaga.

Na amata vave lena alofa ma tumau ia te ia e oo i le iuga. I lana auaunaga patino ma a’o ia taitai i Le Ekalesia a Iesu Keriso o le Au Paia o Aso e Gata Ai, sa ia taulimaina upu nei a Isaia o le afioga a le Atua. Sa tusi e Isaia e uiga i le tulafono o le anapogi, lea e taulai atu i le tausiga o i latou e le tagolima:

“E le o lenei ea [le tulafono]? ona ia tofitofi au mea e ai i le ua fia ai, ia au mai i lou fale ē ua matitiva ma faasauaina; a e iloa lē ua lē lavalavā e te faaofuina o ia, aua foi e te lafi ia i latou o lou lava aiga?

“Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muliau mai le pupula o Ieova ia te oe.

“Ona e valaau lea, ae tali mai Ieova; e te alaga atu, ae fetalai mai o ia, O a’u lenei. …

“E taitaiina foi oe e le aunoa e Ieova; e faamalie foi o ia ia te oe pe a oge vai, ma faamalosia ou ivi; e avea foi oe e pei se fanua ua faasusuina, e pei o le punavai foi e le mate ona suavai” (Isaia 58:7–9, 11).

I le i ai i le galuega a le Alii i le olaga atoa, na tausia e Peresitene Monson i latou i manaoga faaletino ma faaleagaga, ma sa ia mauaina na faamanuiaga folafolaina. Ina ua ia valaau atu i le Alii i le tatalo, na tali mai le Alii. Ma sa oo mai ia Thomas Monson le faamautinoaga o loo i ai iina le Alii.

E masani ona sii mai e Peresitene Monson le folafolaga o le a faatasi le Alii ma i tatou i la tatou auaunaga faamaoni mo Ia. Na moni na folafolaga i lona aafiaga.

O le Mataupu Faavae ma Feagaiga 84:88 o se mau lea e fiafia i ai: “Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’u agelu, e sapasapai outou i luga.”

Ona na ia silafia le moni o lena folafolaga, na manatu lava Peresitene Monson o le a lelei mea uma. Na faalototeleina ai foi o ia. Pe a ia faia ni filifiliga faigata ma taua, na faamoemoe lava o ia o le a tali mai le Alii i lana tatalo ma faaali mai ia te ia le ala e alu ai. Ina ua valaauina o ia e alu i ni mea sa foliga mai o ni tulaga matautia pe faigata, na fefefe isi, ae sa lei lagona e ia se fefe. Na ia talitonu o le a muamua le Alii i ona luma ma si’o faataamilo o ia e agelu ma sapasapai o ia i luga. Na faamaonia le moni o lena mea. O lona afafine, o Ann, lea na saunoa ma le alofa telei le asō, na tu i ona talaane a o lei maliu o ia. Na faamanuiaina a’u i le i ai iina. A o ou tilotilo atu i ona fofoga, na ou manatu ua faataunuuina le folafolaga a le Alii. Na si’o faataamilo ma sapasapai o ia e agelu tagata—ma masalo ma isi foi.

Na ou lagona le faamautinoaga o loo faatalitali mai le Alii toetu, o le na muamua atu ia te ia i le lalolagi o agaga, ma aao o loo faaloaloa mai. Sa ou lagona se molimau mumasaesae, lea ua ou tuuina atu nei ia te outou, na silafia e Peresitene Monson le Alii, ua faamamaina o ia e ala i le Togiola a o ia tuuina atu mea uma ua ia te ia i le galuega a le Alii ma le fanau a le Tama. Na ia silafia lelei le Alii. Na ia alofa i le Alii. Ma na ia fai mai na ia iloa e alofa le Alii ia te ia.

Na soifua Peresitene Monson i le soifuaga lea na fautua mai e le Tupu o Peniamina ia i tatou uma:

“Ou te fai atu ia te outou, ou te manao ia outou manatua ia taofi le suafa ia tusia pea i o outou loto, ina ia lē maua outou i le aao tauagavale o le Atua, ae ia outou lagona ma iloa le leo o le a valaau ai outou, ma le igoa foi, o le a valaau ai outou e ia.

“Aua pe faapefea ona iloa e se tagata le matai e lei auauna i ai o ia, ma o se foi o se tagata ese ia te ia, ma ua mamao mai mafaufauga ma faamoemoega o lona loto? …

“O lea, ou te manao ai ia outou tutumau ma lē masiiese, ma tumu e lē aunoa i galuega lelei, ina ia mafai ona faamauina outou e Keriso, le Alii le Atua Mamana Aoao, e fai mona, ina ia mafai ona aumai o outou i le lagi, ina ia mafai ona outou maua le olataga tumau-faavavau ma le ola e faavavau” (Mosaea 5:12–13, 15).

Ou te molimau atu o Iesu o le Keriso. Ou te molimau atu ma le faamaoni, e ala mai i Lona soifuaga e leai se agasala ma Lana Togiola le i’u, o le a toetutu uma fanau a le Tama Faalelagi o e fananau mai i le olaga faaletino. E ala mai i auaunaga a agelu ia Iosefa Samita, le perofeta o le Toefuataiga, na toefuatai mai ai ki uma o le perisitua. O na ki na tuufaasolo mai i se laina le mamotusiaina ia Peresitene Monson. Ua aofia ai le mana e faamau faatasi ai aiga mo le faavavau atoa. Na silafia e Peresitene Monson lena mea ma molimau mai ai. O le a faaauau pea lena mana o le perisitua i le Ekalesia a le Faaola i le lalolagi seia toe afio mai o Ia.

Na faamauina Peresitene ma Sister Monson i lena mana. Ou te tatalo mo se faamanuiaga i luga o le la fanau uma ina ia latou maua le faamautinoaga e leoleoina i latou e le Alii ma e mafai ona latou tulimatai atu i se toe faatasiga mamalu ma faavavau faaleaiga. I le suafa o Iesu Keriso, amene.