Ua Tatou Lelei Atu Ona o Ia
Saunia e Peresitene Russell M. Nelson
Peresitene o le Korama a Aposetolo e Toasefululua
Aiga e, uso, tuafafine, ma uo pele, ua faamamaluina a’u e talanoa atu e uiga i lo’u taitai, faufautua, ma le uo pele, o Peresitene Thomas S. Monson.
E agavaivai o’u lagona mo lenei tamalii na ou iloaina ma alofa i ai mo le silia ma le 50 tausaga. I le avea ai ma sui o le Au Pulega Aoao ma Taitai Aoao uma, matou te folafola atu lo matou alolofa ma le agaga faafetai mo Peresitene Monson. I lona aiga—Thomas, Ann, ma Clark, faatasi ai ma o latou taitoalua, fanau, ma fanau a fanau—matou te faailoa atu foi lo matou alolofa ma faamaisega sili ona loloto. Tatou te matuai talisapaia savali ootia na saunoa i ai Ann M. Dibb, Peresitene Dieter F. Uchtdorf ma Peresitene Henry B. Eyring, ma ua lagiina ma le matagofie e le Aufaipese a le Tapeneko.
Sa soifua Peresitene Monson i se soifuaga ofoofogia. O le a le toe i ai lava se isi e pei o ia! Ua maligi ma o le a tele loimata o le valavala a i tatou taitoatasi e maligi pea . O le a tatou misia lava o ia! Ae o lo tatou faanoanoa o le a faatoafimalieina e le Togiola a le Alii o Iesu Keriso. O Lana ipu oona tatou te lavatia ai le faavauvau. O Lana Togiola ua avea ai le Toetu ma se mea moni. O Lana Togiola ua toe faatasia ai aiga e faavavau i le fuafuaga a le Tama Faalelagi. Tatou te olioli i le iloaina ua toe faatasia Peresitene Monson ma lana manamea o Frances ma o le a i ai se aso o le a faaauau ai le tatou mafutaga ma i laua.
Talu mai le maliu o Peresitene Monson, ua matua lelei le saunia ma le tuuina atu o manatuaga o lona soifuaga e le au faasalalau. Ua faagaeetia lava a’u i nei mea. E le gata i lea, o malo faaaloalogia ma uo i le lalolagi atoa ua auina mai a latou faamaisega ma faailoa mai lo latou faamemelo loloto.
O le mea lea e tatau ona faamoemoeina mo se tamalii na faatosinaina olaga ma mamanuina le taunuuga o le faitau miliona o tagata i le lalolagi atoa. Ua tatou lelei uma ona o ia. Ma ua lelei atili le Ekalesia ona o ia. Ua ia tuua se talatuu o le tuputupu ae. Talu mai lona faauuina o se Aposetolo i le 1963, ua faatupulaia le auai o le Ekalesia mai le 2.1 miliona i le toeitiiti 16 miliona. Ua faatupulaia le fuainumera o faifeautalai o loo auauna atu i le taimi nei mai le 5,700 i le silia ma le 70,000. Ma malumalu—sa na o le 12 le aofai—ua 159 nei, ma le tele o loo faasolosolo mai.
Ae i nei mea uma, sa taulai atu pea Peresitene Monson i tagata taitoatasi. Sa ia faamanatu mai ia i tatou ni faaupuga e pei o le “Auina atu se tusi i le uo ua e tuulafoaiina,” “Fusi atu i lau tama,” “Ia faatele ona e fai atu, ‘ou te alofa ia te oe’” “Ia faaalia e le aunoa lou agaga faafetai,” ma “Aua nei sili atu le taua o se faafitauli e foia nai lo se tagata ina ia alofaina.”
Sa lei sailia lava e Peresitene Monson se viiga mai le lalolagi. I se lalolagi ua faatumulia i “selfies,” na ia faataitai maia le le manatu faapito. Sa ia faatinoina le fetalaiga a le Alii, o le na fetalai, ‘A o le sili ia te outou, e fai lea ma a outou auauna.”1 Sa tuu atu lona lava taimi e asiasi ai, faamanuia, ma alofa atu i isi. E oo lava i le pulapula lagoto o lona soifua, sa faaauau pea ona ia auauna atu, asiasi soo atu i falemai ma nofoaga mo tagata matutua.
I le gasologa o tausaga, sa ma fefaasoaiina le tele o aafiaga faapelepele faatasi ma Peresitene Monson. Sei ou faamatalaina se tasi lea na faaalia ai le ala na ia faaaoga ai le faatauanau, loa ona talitiga, agamaualalo, agamalu, ma le alofa faamaoni e ausia ai sini maoae.2
I le 1985, sa tuuina mai ia te au se tiutetauave mo le Ekalesia i Europa, o se tofiga na umia e Peresitene Monson mo le tele o tausaga. Sa avea a’u ma ana soa talavou i le tele o lena galuega faigata. I tua atu o le Pupuni Uamea lea sa ta’ua ai i lena taimi, sa galue Peresitene Monson mo le toeitiiti lua sefulu tausaga e faavae le faatuatuaina ma taitai o le malo o Ripapelika Temokarasi o Siamani.
I le 1988, sa ma malaga ai ma se aumalaga toalaiti o tatou taitai faale-Ekalesia i le lotoifale i lona laumua o Perelini i Sasae. I lenei atunuu na tapunia ai le galuega faafaifeautalai mo le silia ma le 50 tausaga, sa ma lagonaina le uunaiga e talosagaina se faatagaga mo faifeautalai ia auauna atu iina. Sa ma talosaga foi mo le faatagaga o toeiina agavaa mai lena atunuu ia maua le avanoa e auauna atu i le Alii o se faifeautalai i isi nofoaga.
Sa faia lenei fonotaga taua tele i le aso puaoa ma faamalumalu o Oketopa 28, 1988. Sa matou feiloai ma Erich Honecker, taitaifono o le aufono a le setete mo le malo o Ripapelika Temokarasi a Siamani, ma lana aufaigaluega. Sa ia amata i se lauga umi e uiga i le lelei o le faakominisi. (Sa na o le pau le mea na mafai ona matou faia o le faalogo.)
Ona oo lea, i le feemoa’i o le anoano o meapueata, sa valaaulia ai Peresitene Monson e saunoa. Sa ia tuuina atu ma le toa ma le agalelei lana savali i le auala ma le mafuaaga o le a lelei ai le i ai o a tatou faifeautalai mo lena atunuu.
Ina ua maea le talosaga a Peresitene Monson, sa faatali uma ma le naunautai tagata i le tali a le Taitaifono o Honecker. O le a le galo lava ia te a’u lana tali: “Peresitene Monson, matou te iloa oe! Na matou mata’ituina oe mo le tele o tausaga! Matou te faatuatuaina oe! O lau talosaga e faatatau i faifeautalai ua taliaina!”
Ina ua matou tuua lena fonotaga, na mouese atu ao mo sina taimi ma susulu malosi mai le la i o matou luga. Na foliga mai sa faailo mai i le lagi le faamaoniga o le mea lea faatoa tupu.
O lenei, a o oo i le si’ui o le soifuaga faaletino o Peresitene Monson, tatou te lagona o faamanuiaga a le Alii i Lana perofeta o Nifae e tutusa lava le faatatauga i lo tatou taitai pele ua maliu.
“Amuia lava oe, [Peresitene Thomas S. Monson], ona o ia mea na e faia; ona ua ou vaai i lou talai atu ma le le faavaivai o le upu na ou tuuina atu ia te oe, i lenei nuu. Ma sa e le fefe ia te i latou, ma sa e le sailia lou lava ola, ae sa e saili loʼu loto, ma ia tausia au poloaiga.
“Ma o lenei, ona ua e faia lenei mea ma le le faavaivai, faauta, o le a ou faamanuiaina oe [ma lou aiga] e faavavau.”3
Ou te tautino atu ma le faamaoni o Peresitene Thomas S. Monson o se perofeta a le Atua. Sa ia aoao atu ma molimau atu o se perofeta. Sa ia maua le lototele o se perofeta ma le agalelei o se perofeta. Sa ia maua faaaliga o se perofeta ma tali atu o se perofeta. Sa ia soifua o se perofeta ma maliu o se perofeta, faamaufaailogaina i lona soifua ma i lana molimau o loo soifua le Atua, o Iesu o le Keriso, ua toefuataiina Lana Ekalesia i le lalolagi, ma o lenei galuega paia e moni. I le molimau sa ia tuuina atu soo mai lenei pulelaa, ou te faaopoopo atu i ai ma le lotomaualalo la’u molimau, i le suafa paia o Iesu Keriso, amene.