O Se Perofeta mo o Tatou Taimi
Saunia e Peresitene Dieter F. Uchtdorf
Fesoasoani Lua i le Au Peresitene Sili
Ua matuai faamamaluina lava a’u ma faafetaia le avanoa e saafi ai ia Peresitene Thomas S. Monson, o se perofeta a le Atua ma la’u uo pele.
I lenei taimi maaleale, ua loloto lava lagona ma manatu ma ua oge foi upu e faaali ai lo tatou alolofa, lotofaafetai, ma le faanoanoa.
Ma te faailoa atu ma Harriet lo ma tigaalofa, faamaisega, ma le lotofaafetai i le aiga, ma i latou uma o e alolofa ia te ia, ma le toatele o e na tausia ma le agalelei o ia. E tuuina atu se upu faapitoa o le lotofaafetai ia Ann Monson Dibb, le afafine o Peresitene Monson. Ina ua mavae le maliu o le faletua pele a Peresitene Monson, o Frances, o le tuuto ma le alofa o Ann na matuai faamanuiaina tele ai o ia i toe aso o lona soifua.
O loo laeiina e tagata o le aiga le losa samasama e faamamaluina ai le lanu e sili ona fiafia i ai Peresitene Monson.
Oka sou misia o ia! Sa ou faamamaluina o ia o sa’u uo ae ou te lei feiloai ia te ia. Ou te talitonu o i latou uma o e na silafia o ia, faalogo ia te ia, pe na vaai ia te ia, e tusa lava pe na o se mea mamao, na mafaufau ia i latou lava o ni ana uo.
A o ma femalagaai ma Sister Uchtdorf i le lalolagi, e faailoa mai e tagata lo latou alolofa, lotofaafetai, ma tatalo mo lo latou perofeta pele. O nei alofaaga faamomoiloto na aumai mai le autalavou, le au matutua, ma vaitausaga uma i le va.
Sa avea Thomas S. Monson ma se tamalii mo vaitau uma, o se toa manumanu moni faaleagaga. E tumu o ia i le poto, faatuatua, alofa, vaaiga mamao, molimau, lototele, ma le agaalofa—sa lei taitai ma auauna atu mai se nofoa, ae na faafesagai lava i taimi uma ma tagata. Na i ai se nofoaga faapitoa i lona loto mo e matitiva ma le tagolima. O le a tatou misia lona siufofoga, lona mausali, lona talitonuga i le Alii, lana ataata, lona atamai, lona naunautaiga, ona manatu lelei, ma ana tala, ia ou te mafaufau i ai o ni faataoto a se perofeta a le Atua o aso nei.
Ua 24 nei tausaga talu ona valaauliaina i maua e Peresitene Monson i lona ofisa ma valaauina a’u e auauna atu o se Pulega Aoao o le Ekalesia. Sa ma tauivi ma Harriet e taulimaina le taua o lena taimi ma lona aafiaga loloto mo o maua olaga.
Peitai, o le faamafanafanaga a Peresitene Monson, naunautaiga patino, faamalosiauga, maelega mo le galuega, ma le malualii faaperofeta na ma lagona ai le toafimalie ma le filemu. Sa ma lagona lo ma i ai faatasi ma se tasi na silafia le Faaola, o se na avea ma Ana auauna, o se na silafia e lo tatou Tama Faalelagi.
Na matua faamanuiaina Siamani ma ona tagata e Peresitene Monson. O le malosi o lona faatuatua na fesoasoani e atiae lo matou [faatuatua] i tausaga o le Taua a Malo Malolosi (Cold War). Sa le gata na ia aumaia ni atopau na tumu i lavalava mo tagata o le ekalesia i Siamani i Sasae, ae o lana tatalo mamana faaaposetolo na faia i le 1975 na folafola atu ai ni faamanuiaga faaleagaga. Na toe foi mai Peresitene Monson ma Elder Russell M. Nelson [i lena taimi] ma toe tulitatao ia folafolaga paia nei. Sa faataunuuina uma lava, i lea laasaga ma lea laasaga. Na saunoa le perofeta a le Atua, ma sa faamamaluina e le Atua le faatuatua ma le galuega a Lana auauna.
Ina ua ma faafeaoina atu ma Harriet ia Peresitene Monson i se konafesi i Hamburg, sa ia fesili e uiga ia Michael Panitsch, o se na avea muamua ma peresitene o se siteki ma peteriaka, o se tasi o paionia malosi o le Ekalesia i Siamani. Na mai tigaina Uso Panitsch, faataotolia, ma le mafai ona auai i a matou sauniga. Ae ui i lea, sa manao Peresitene Monson e asiasi ia te ia.
Sa lei mamao atu, na faia ai le taotoga o le aao o Peresitene Monson ma sa tau le mafai ona savali ona o le tiga. Sa nofo Uso Panitsch i le fogafale lima o se fale e leai ni lifi eletise. Sa ao ai ona matou a’e i ni sitepu maualuluga se tele. Ae na naunau lava Peresitene Monson, o lea sa matou o ai.
O se a’e tiga tele mo Peresitene Monson, ae na ia a’e pea ma le fiafia. Na matou oo atu i le uso na faataotolia, ma tuu atu i ai e Peresitene Monson sona faamanuiaga faaperisitua matagofie, faafetai atu ia te ia mo lona olaga o auaunaga tuuto, ma faafiafiaina o ia i se ataata.
Soo se taimi lava ou te mafaufau ai i lenei aafiaga, e faamanatu mai ai lava ia te au le tala a le Aposetolo o Peteru e uiga ia Iesu, lana uo ma faiaoga: “Sa [Ia] femaliuai ma agalelei.”1
E faapena foi se faamatalaga e uiga i le tagata tatou te alolofa i ai, faaaloalo, ma lagolagoina o se perofeta a le Atua, la tatou uo ma le uo a le Atua, o Thomas Spencer Monson.
O se aafiaga sili ona faamalieina ma tauiaina faaleagaga le auauna ai o se tasi o fesoasoani o Peresitene Monson i le Au Peresitene Sili o le Ekalesia. Na aofia ai le fiafia ma le lototiga, toeega ma le faanoanoa, talanoaga loloto, ma le tele o taimi musuia faaperofeta.
Talu ai nei, ina o le a ma tuua ma Peresitene Eyring le maota o le perofeta ina ua uma se asiasiga, sa taofi i maua e Peresitene Monson ma faapea mai, “Ou te alofa i le Faaola o Iesu Keriso. Ma ou te iloa e alofa o Ia ia te a’u.” Oka se molimau inā mālū ma mamana mai se perofeta a le Atua.
O Peresitene Monson o se perofeta moni mo lo tatou taimi. O ia o se tamalii mo vaitau uma. O mea uma ua tatou iloa ma alolofa ai e uiga ia Peresitene Thomas S. Monson o le a faaauau pea. Ua toe foi atu lona agaga i le aiga i le Atua, lo tatou Tama i le Lagi, o le na tuuina mai ia te ia le ola. Po o fea lava ou te alu i ai i lenei lalolagi matagofie, o le a ma o faatasi ma se vaega o lenei uo faapelepele.
Ou te tuuina atu se faamavaega faamamai i lo tatou perofeta pele: Faafetai, Peresitene Thomas S. Monson. Ia faatasi le Atua ma oe seia tatou toe feiloai. I le suafa paia o Iesu Keriso, lo tatou Faaola ma le Togiola, amene.