Digital Lamang: Mga Young Adult

Paggawa ng Sagradong Gawain Habang Naka-Quarantine

Ni Kaith Ashley Moran

Bagama’t sarado ang mga templo, maaari tayong patuloy na tumulong sa sagradong gawain mula sa tahanan.

Larawan

Mga babaeng nakatingin sa tablet

Ang awtor ay naninirahan sa Manila, Philippines.

Hindi ko inaasahang marinig ang mga salitang tulad ng ibinahagi ng Unang Panguluhan noong nakaraang buwan: “Matapos ang maingat at mapanalanging pagsasaalang-alang, at nang may pagnanais na maging responsableng mamamayan ng mundo, nagpasiya kaming suspindihin ang lahat ng aktibidad sa templo.”¹

Siguro tulad ko, nag-iisip ka kung paano haharapin ang mahihirap na panahon ngayon nang wala ang mga banal na lugar ng kapayapaan na ito. Dito sa Pilipinas, ang mga templo ay isinara bago pa sinimulan ang community quarantine, kaya medyo matagal ko nang gustong bumalik sa bahay ng Panginoon.

Ngunit may natanto akong bagay na mahalaga habang naka-quarantine. Kahit na sarado ang mga pintuan ng templo, ang gawain ng paghahanda para sa mga ordenansa ay nagpapatuloy. Ang mga ninuno natin ay nasa kabilang panig pa rin ng tabing, naghihintay na mas malaman pa natin ang tungkol sa kanila. Kung naghahanap ka ng mga paraan na maanyayahan ang mga sagradong pakiramdam na makukuha sa paglilingkod sa templo sa iyong tahanan, narito ang ilang ideya:

Siyasatin ang iyong family tree sa FamilySearch.org.
Subukan ang indexing. Talagang mas kapaki-pakinabang ito kaysa sa mga video game!
Gamitin ang teknolohiya upang makipag-ugnayan sa mga buhay na mga kamag-anak.
Isulat ang mga kuwento ng sarili mong pamilya.

Nakita ko kung paano “[ibinaling] ang [mga] puso” ng mga miyembro ng aking pamilya ng mga aktibidad na ito, tulad ng inilarawan sa Malakias 4:6, at iniligtas kami mula sa pagkabigo, pagkainip, at kawalan ng pag-asa. Kahit na ang mapailalim sa quarantine ay hindi ang pinakamagandang sitwasyon, nagpapasalamat ako sa pagkakataon na ibinibigay nito sa akin na tumulong sa takdang-gawain na ito sa templo.

Ito ay maaaring maging sagradong panahon ng ating buhay. Marahil matutulungan tayo ng pandemyang ito na maalala kung gaano kahalaga ang mga templo. Baka mas pahalagahan natin ang pagkakataong bumisita sa templo kaysa noon. Tulad ng sinabi sa anunsiyo ng Unang Panguluhan, “Ito ay pansamantalang pagbabago, at nasasabik kami sa araw na muling magbubukas ang mga templo.”²

Hindi ko na mahintay ang araw na muli tayong makagagawa ng nagliligtas na mga ordenansa para sa ating mga ninuno! Hanggang sa araw na iyon, marami pa rin tayong magagawa.

Basbas ng Pagpapagaling

Sinabi ni Elder Dale G. Renlund ng Korum ng Labindalawang Apostol na “sa ating pakikilahok sa gawain sa family history at sa gawain sa templo ngayon, nagiging … karapat-dapat din tayo sa mga pagpapalang ‘nagpapagaling’ na ipinangako ng mga propeta at mga apostol. … Kabilang sa mahabang listahang ito ang mga pagpapalang ito:

Dagdag na pagkaunawa tungkol sa Tagapagligtas at sa Kanyang nagbabayad-salang sakripisyo;
Dagdag na impluwensya ng Espiritu Santo upang makadama ng lakas at direksyon para sa ating sariling buhay;
Dagdag na pananampalataya, upang maging malalim at manatili ang pagbabalik-loob sa Tagapagligtas;
Dagdag na kakayahan at motibasyon na matuto at magsisi dahil nauunawaan natin kung sino tayo, saan tayo galing, at mayroon tayong mas malinaw na kaalaman kung saan tayo patungo;
Dagdag na mga impluwensya sa ating mga puso na nagpapadalisay, naglilinis, at nagpapatatag;
Dagdag na kagalakan sa pamamagitan ng nadagdagang kakayahang madama ang pagmamahal ng Panginoon;
Dagdag na mga pagpapala sa pamilya, anuman ang kalagayan ng pamilya sa kasalukuyan, nakaraan, o hinaharap, o gaano man hindi kaperpekto ang ating family tree;
Dagdag na pagmamahal at pagpapahalaga para sa ating mga ninuno at nabubuhay pang mga kamag-anak, upang hindi na tayo makadama ng pag-iisa;
Dagdag na kakayahan na mahiwatigan kung sino ang nangangailangan ng pagpapagaling at sa gayon, sa tulong ng Panginoon, ay mapaglingkuran ang iba;
Dagdag na proteksyon mula sa mga tukso at sa umiigting na impluwensya ng kaaway; at
Dagdag na tulong upang mapaghilom ang nahihirapan, bagbag, o nababalisang mga puso at pagalingin ang nasugatan” (“Family History at Gawain sa Templo: Pagbubuklod at Pagpapagaling,” Ensign o Liahona, Mayo 2018, 47).