Jipan̄ Ajri ro Kōppopo n̄an Peptaij
Jemaron̄ lukkuun jar, kōn kōttōbar, im kijenmej ilo ad jipan̄ ajri ro nejid bōk bun̄tōn in ippānļo̧k iaļan bujen eo.
Pija ko jān Bryan Beach
Peptaij im kapen ej juon tōpar eo ekam̧ōņōņō n̄an ajri ro ilo Kabun̄ in. Ilo an lōn̄ ro rej erreim̧aanļo̧k n̄an kain̄i kein, ekkā an ajri ro en̄jake mijak im ikūm̧kūm̧.
Āinwōt juon rijeje n̄an māākjiin Eo Jera, māākjiin eo an Kabun̄ in n̄an ajri ro, ikar ron̄ elōn̄ bwebwenato ko kōn ajri ro rej mijak rejjan̄in pojak n̄an kōm̧m̧ane bujen in. Jet rej inepata bwe ejjabwe naan in kam̧ool ko aer. Jet rej mijak dān. Im jet rej en̄jakeeddodo kōn ļōmņak in aer ke rej aikuj wānōk.
Erkein rej jet iaan wāween ko n̄an jipan̄ ajri eo nejūm̧ kōppopo im peran n̄an bōk bun̄tōn eo tok juon ilo iaļan bujen eo.
Katakin ilo Lukkuun Kōttōbar
Emaron̄ pidodo n̄an ļōmņak kōn peptaij āinwōt juon iien eaorōk ak juon men me ej waļo̧k n̄e ajri eo nejūm̧ ej jejjet ruwalitōk an iiō. Ak lukkuun lo m̧ool, peptaij ej juon jokāālet ekwojarjar, meļeļein rej aikuj meļeļe etke eaorōk. Katakin er ilo lukkuun kōttōbar emaron̄ jipan̄ kōm̧m̧an bwe peptaij en ļapļo̧k meļeļein (im edik an kamijak). Katakin er wāween eo kwonaaj kōņaan bwe jabdewōt armej ren ekkatak kōn Kabun̄ in m̧okta jān aer maron̄ peptaij.
Eaorōk n̄an kōj n̄an katakin ajri ro kōn bujen ko me renaaj kōm̧m̧ane ilo iien peptaij. Ennaan eo em̧m̧an ej, menin ejjab juon men eo me jej aikuj (ak akuj) kajjieon̄ emmej im kōm̧m̧an aolepān bon̄in ak ilo juon wiik. Jejjetin iien ekkatak gospel eo ilo m̧weo im̧ōm̧ ej juon wāween eo em̧m̧antata n̄an jipan̄ ajri ro nejimi kōppopo n̄an peptaij. Ijoke, ewōr jejjo men ko me relukkuun ļap aer jipan̄ n̄an mije ilo an epaaketok iien peptaij eo an ajri ro nejim.
-
Ilo juon naan epidodoļo̧k, kōmeļeļe wāween an peptaij meļeļein kallim̧ur n̄an ļoor Jisōs Kraist.
-
Riit kōn peptaij ilo jeje ko rekwojarjar, āinwōt Mosaia 18:8–10. Kōmeļeļe bwe eoon ko bwe ajri eo nejim en meļeļe im emaron̄ bar katakin eok kōn ļōmņak ko. N̄an waanjon̄ak, juon leddik ej kab m̧ōj an peptaij ilo Hawaii, USA, ekar kōmeļeļeik bwe “ineek eddo ko an bar juon” āinwōt “jipan̄ aolep jabdewōt iien rej aikuj jipan̄.”
-
Lale bwe kwon kōnono ippāer kōn menin letok eo an Jetōb Kwojarjar, im kwaļo̧k en̄jake ko kwaar en̄jaki ke Jetōb Kwojarjar ekar kōjeraam̧m̧an mour eo am̧.
Jet ajri remaron̄ inepata kōn peptaij kōn rej ļōmņak ejjeļo̧k juon aer naan in kam̧ool ak ejabwe. Jipan̄ ajri eo nejūm̧ keememej en̄jake ko rem̧m̧an me rekar en̄jaki ilo aer kōm̧m̧an juon men ejouj, al ilo Būraimere, ak kōnono kōn gospel eo. Kōketak er n̄an ļōmņak kōn wāween ko rejeļā bwe Jemedwōj Ilan̄ ej iakwe er. Kōmeļeļeiki bwe aolep men kein rej jinoin juon naan in kam̧ool im bwe naan in kam̧ool eo aer enaaj eddōkļo̧k wōt ilo aer kōm̧m̧an jokāālet ko aer rem̧m̧an.
Kwaļo̧k Ta eo Kōtmene
Eļan̄n̄e ajri eo nejūm̧ ej mijak in peptaij—ak bolen ejjab kōņaan—emaron̄ lukkuun jipan̄ n̄an kōnono kake ta eo kōtmene. Juon jikin em̧m̧an n̄an jino ej kōpooj er n̄an intōrpiu ippān bisop eo aer ak branch būreejtōn eo aer. Jipan̄ ajri eo nejūm̧ uwaake kajjitōk ko āinwōt, “Etke eaorōk peptaij?” im “Ta meļeļein n̄an bōk ioom etan Kraist?” emaron̄ jipan̄ er kōppopo n̄an ekkōnono in. Jipan̄ ajri eo nejūm̧ keememej bwe bisop eo ej pād ijeņ n̄an jipan̄ er pojak, ejjab teej e er ak lale jon̄e er. Im keememej, kwomaron̄ aolep iien pād ippān ajri eo nejūm̧ ilo iien an intōrpiu, n̄e kwoj kōņaan.
Bar juon men n̄an kōpooj ajri eo nejūm̧ ej n̄an kōtmene ta eo enaaj iooni ilo raan in peptaij. Kwaļo̧k n̄an er wāween aer jutak n̄e rej pād ilowaan jikin peptaij eo. Kwomaron̄ kajjitōk ippān rikabwijer priesthood eo me enaaj peptaiji ajri eo nejūm̧ n̄an kamelmel kilen peptaij ejjab kōn dān, bwe eo nejūm̧ en jeļā ta eo enaaj kōtmene ilo iien an naaj tulaļļo̧k im bar walōn̄ļo̧k. Kōmeļeļe ta eo enaaj waļo̧k ilo iien kapen eo.
Eļan̄n̄e ajri eo nejūm̧ ej mijak in tuļo̧k ilo dān jar im ļōmņak kōn wāween ko kwomaron̄ jipan̄ er eļļā jān mijak ilo aer epaake iien peptaij eo aer. Bolen kwe im ajri eo nejūm̧ maron̄ alooje an juon armej peptaij n̄an lale jon̄an m̧ōkaj in aer tuļo̧k ilo dān. Bolen kwe im ajri eo nejūm̧ maron̄ kamelmel pinej botim im katuļo̧k mejam̧ ilo dān ippān doon ium̧win jejjo jekōn ilo juon iien. Enaaj bolen wōr juon armej ilo eria eo am̧ eo ej katakin ajri eo nejūm̧ n̄an aoū eo me enaaj bōk jet kapilōk. Jabdewōt men eo kwokōm̧m̧ane, lukkuun lale bwe kwon kōm̧m̧ane kōn iakwe im kijenmej.
An ajri eo pojak kōn men ko rej bōk jikier ilo iien peptaij, enaaj ļapļo̧k aer peran im mije wōt bujen in jetōb eo rej kōm̧m̧ane.
Mije wōt Eddōkļo̧k, Ejjab Wānōk
Jet iien, bolen kōnke jej kōnono eļap kōn an peptaij karreoik kōj, ajri ro rejjab meļeļe im rej ļōmņak rej aikuj wānōk ālkin kain̄i eo. Juon iaan bwebwenato ko me ekkā ad ron̄ ilo Eo Jera ej mijak eo me juon ajri ej en̄jake n̄e rej kōm̧m̧an bōd kein kajuon ālkin aer kar peptaij. Akwāāl ippān juon eo jeim̧ ak jatim̧ ak meļo̧kļo̧k in kōm̧m̧an jerbal ej kōm̧m̧an bwe ren en̄jake āinwōt n̄e rekar kakkure en̄jake ko aer n̄an indeeo!
Āinwōt pāāren im ritōl ro, eaorōk bwe jej jipan̄ ajri ro meļeļe pedped in ukweļo̧k. Ajri ro nejid rej ke meļele bwe kile bōd im ekkatak jāni ej m̧ōttan wāween ad ekkatak im eddōkļo̧k ilo laļ in? Rej ke jeļā bwe remaron̄ jar kōn jeorļo̧k bōd ilo jabdewōt iien? Im n̄e rej bōk kwojkwoj eo kajjojo wiik, rej kōkāāle bujen ko rekar kōm̧m̧ani ilo iien peptaij? Kam̧ool bwe iien n̄an peptaij ej juon kōjeraam̧m̧an im menin letok. Peptaij ejjab n̄an wānōk kiiō ak ijjeļo̧kin ej kōn deļo̧n̄e iaļan bujen eo im bōk bun̄tōn eo kajjojo raan n̄an erom̧ āinwōt Jisōs Kraist.
Juon Ijjino eo Eaibojooj
Ijjeļo̧kin am̧ kalimjōk peptaij im kapen āinwōt juon mejān kajjik, jemaron̄ jipan̄ ajri ro nejid lo āinwōt juon ijjino aibojooj—ijjino an juon mour ekāāl āinwōt juon rikaļoor in bujen an Jisōs Kraist. Men̄e ajri eo nejūm̧ ej en̄jake m̧ōņōņō, mijak, ak jidikin aolepāer, kwomaron̄ kōm̧m̧an bwe ren jab make iaer ilo iaļ in. Ilo aer jar, lukkuun kōttōpar, im kijenmej, jemaron̄ jipan̄ ajri ro en̄jake lan̄lōn̄ ilo aer bōk bun̄tōn ko ļo̧k n̄an ippān Jemeer Ilan̄.