Ririmwiakin Kawain te Kukurei
Iroun Unimwaane Quentin L. Cook
Man te Kooram n Abotoro n te Tengaun ma Uoman
Ti kona ni karikirakeia ataei aika raraoi, ao n onimakinaki n taabo ni kabane n te aonaaba ngkana iai aaia ae matoa iroun te Tia Kamaiu.
Tamnei iroun Jim Lillywhite
Tabeua ririki n nako, tabeman ai tariu ao mwaneu aika uarereke a mwiokoaki bwa a na karaoa te mwakuri n ibuobuoki n ana tabo ni man Tibura Crozier Kimball. Ibukin kaniwangaia, a tuangaki bwa e na reke irouia ana keeke ae kangkang1 Tibuia te Aine ae Clara.
Ngke a tia ni karaoi tabeia, a nakon te tabo n amwarake ibukin kaniwangaia. Tibuia te mwaane, e, kaina mataroan te umwanikuuka. Ai tariu Kathy Galloway, ae tao 14 n te tai anne, e uringnga ngke e tekateka iaon kaintekatekan te biano ao e kaoiia ai tarina bwa a na tekateka iaon tano. E kaitauia ibukin aia mwakuri korakora ao imwiina e taekinna bwa iai te bwai ae kakawaki ae na tibwauaia imwain ae a kana aia keeke.
“E na roko te tai ni maiumi are kam na kainnanoia n ataia ao ni mwakuria te bwai ae N nang tibwauaia nakoimi, ” e taku.
E kabwarabwara bwa tibuna te mwaane Heber C. Kimball (1801–68) ao tabeman aia bakatibu ake rimoa a tia ni kaitara ma te korakai n taian kakaewenako n rabwata. E taku tibu te unimwaane bwa bwaeoniia a waekoa n reiakinna bwa ngkana a na kamaiuak, a riai ni bootaki ni mwakuri ao n tatangira ao ni beku ibon imarenaia.
“Aio teuana te bwai ae moan te kakawaki ae a katikua nakoim!” e taekinna ngke a moanna ni wanako ranimatana nakon bwangena.
“N au wewete ae te tamanuea ao ngkai ngai tibum te unimwaane, ngke I iangoi kanoan taai aika a na roko, … e rotaki nanou iroum,” e taku. “Ko na kaitara ma kakaewenako n te iango ao n tamnei aika aki kona am bakatibu aika bwaeoniia n iangoi.”
Ni karokoa te roro are imwiina a karinei aia tangira ao aia mwakuri n ibuobuoki bwaeoniia, e reitia, “ana mwaiti mai ibuakomi aika a na bwaka ibukina bwa kam na aki kona ni kamaiu ngkami bon iroumi.”
Ngkanne, inanon te reitaki n tamnei, Grandpa Kimball e motikia: “Ti kainnanoira ibon iroura. Irarikin are tibwauakin ara koaua n te euangkerio imarenara, tabera bwa ti na tangira ao ni beku ao ni kakorakora ao ni karikirakea ao ni boutoka ao ni kamatoaira bon iroura, … riki inanon ara utu. Taiaoka n uringnga bwa ni boong aika kaitira, kamaiuam e bon nakon am tatauraoi ni bootaki ni mwakuri ao n tangira ao ni beku ibon imarenami. Ngkai, ti a nako n amwarake n te keeke!”
Ti Kainnanoira Ibon Imarenara
Tamnei iroun Wendy Gibbs Keeler
N aron are e oti man mangaongaon te aonaaba aika a katobibiira, ao n aron are e a kaman noria Grandpa Crozier Kimball, ti kainnanoira ibon imarenara. Ti kainanoia utu aika tatangira, kooram ao Bootaki n Aine aika kaonaki ma mwakuri n ibuobuoki, ao mwaanga, uoote, ao titeiki aika a boutoka.
“Te Atua e tangiriira bwa ti na uaia ni mwakuri ao ni buokiira ibon imanerara,” e taku Beretitenti Nelson. “Anne bukina ngkai E kanakomaira nako aon te aba inanon utuu ao e baireira inanon uoote ao titeiki. Anne bukina ngkai E tuangiira bwa ti na beku ao n ibuobuoki nakoira n tatabemanira. Anne bukina ngkai E tuangiira bwa ti na maeka n te aonaaba ma tiaki kaain te aonaaba. Ti kona ni kakoroa nanon baika a mwaiti ngkana ti bootaki nakon ae ti ngaira.”2
Te maiu n te kauoua ni maeka e kangaanga. Ibukin bwakan Atam ao Ewa, ti kaitara ma kataakin ao kariirin te maiu. Aekan taneiai aikanne bon mwakoron te babaire ni kakukurei, ma ti ibuobuoki imarenara ni kaitarai kangaangan te maiu aei.
N aron Atam ao Ewa, ake a “kanakoaki … man te ne n aroka are Eten” (Karikani Bwai 3:23), ti a tia ni kanakoaki man mwengara are ti katauraoaki iai imwain te maiu aei nakon te aonaaba aei. Ao n aron Atam ao Ewa, ti kimwareirei n ara taneiai n ana babaire te Atua ibukiia Natina:
“Ao n te bong arei Atam e neboa te Atua ao e kaonaki n te Tamnei ae Raoiroi, ao e moanna n taetae ni burabeti ni kaineti ma utu ni kabaneia n te aonaba, ni kangai: E na neboaki aran te Atua, bwa ibukin riaoan te tua irou a kaukaki matau, ao n te maiu aei N na karekea te kimwareirei, ao N na manga noora te Atua n te iriko.
“Ao Ewa, are buuna, e ongo bwaai aikai ni kabane ao e kukurei, n taku: Ngke arona bwa ti aki riaon te tua ti na aki kona ni kariki, ao n aki kona n ataa ae raoiroi ao ae buakaka, ao te kimwareirei ni kaboakira, ao te maiu ae akea tokina are e anga te Atua nakoia ni kabane aika ongeaba” (Mote 5:10–11; taraa naba 2 Nibwaai 2:25).
“Mwakoron Ana Kantaninga ae Mairoun te Atua”
Ni karekea te “aki mamate ao te maiu ae akea tokina” bon ana “mwakuri Tamara ao … mimitongina” (Mote 1:39). “Ngaira bon,” n aron are e a tia n reiakinna Beretitenti Nelson, “mwakoron Ana kantaninga are mairoun te Atua.”3
Te Moan ni Beretitentii n te Kooram n Abotoro n te Tengaun ma Uoman a tia ni katanoata ae ngkai naati mwaane ao aine aika tamnei imwain te maiu n te aonaaba, “ti a ataia ao ti taromauria te Atua bwa [Tamara] ae Akea Tokina ao a butimwaai Ana babaire n te aro are a kona iai Natina ni karekei rabwataia ao ni karekea te atatai n aonaaba ni waaki nakon te tau ao n tokina a na ataa tokin kawaia are mai iroun te Atua bwa ngaiia taan bwaibwai n te maiu ae akea tokina.”4 Ao Beretitenti Dallin H. Oaks, Te Moan Kauntira n te Moan Beretitentii, e reirei, “Iaan ana babaire Tamara are i Karawa, [Iesu Kristo] ‘e kariki karawa ao te aonaaba’ (Reirei ao Berita aika Tabu 14:9) bwa ti aonga ngaira n tatabemaniira nako ni karekea te taneiai n te maiu ae mamate are ti na kona iai ni ukoukora tokin kawaira iroun te Atua.”5
Booki aika tabu ao burabeti ni boong aika kaitira a kamataata taben rabwatara aika kakawaki n ana babaire te Atua. Tokin kawaira bon te oki rikaaki nako Ina ma rabwata aika mangauti ao ni karineaki ao ni maeka bwa utu n akea tokina.
“Ara reitaki ma aomata ake tabeman, ara konabwai n atai ao ni mwakuri ni kaineti ma te koaua, ao ara konabwai n ongotaeka nakon reirei ao otenanti n ana euangkerio Iesu Kristo a karikirakeaki rinanon rabwatara aikai,” e taku Unimwaane David A. Bednar man te Kooram n Abotoro n te Tengaun ma Uoman. “Inanon te reirei n rabwata, ti rinanon te namakin ae tamaroa, te tangira, te akoi, te kukurei, nanokawaki, te un, kammarakaki, ao bon kakaewenako n ara aki konabwai n rabwata ni kawai ake a katauraoira nakon ae akea tokina.”6
Reirei aron Kristo
Ni boong aika ti rinanon te raraoma ao n aki koaua, te atatai n te babaire ni kakukurei e kakawaki nakon kamaiuakira n tamnei. Ma tiaki kona ni kantaninga te aonaaba bwa e na anganiia natira taian reirei ibukin te kukurei ae akea tokina. Ngkai ngaira kaaro, ti riai n reireiniia ara ataei taekan te tabo ae a nako mai iai ao te tabo ae a na nako iai.
Ti moanna man buokaia ni karikirakea aia koaua iroun Iesu Kristo ao Ana Mwakuri ni Kamaiu, are e kakawaki nakon te babaire ni kamaiu. I kakoaua ae ti kona ni karikirakeia ataei n ae raoiroi ao n onimakinaki n taabo ni kabane n te aonaaba ngkana iai aaia ae matoa iroun te Tia Kamaiu.
Inanon te mweenga n te tairiki, n tain te tataro ao kamatebwaian booki aika a tabu, rinanon waaki ni kakukurei ao katei, ao tao n tain kaetakiia ataei, “ti kakarabakauakina Kristo, ao ti kimwareirei iroun Kristo, ti tataekina Kristo, ao ti taetae ni burabeti ibukin Kristo, … bwa natira n ataia bwa antai ae a na kawaria ibukin kamaunaan aia bure” (2 Nibwaai 25:26).
Ti buokiia natira bwa ana ataia ae n te babaire ni kamaiu, te rairannano bon “bwaai n reirei n te maiu aei”7 are e uota te kantaninga ao te kamaiuaki ngkai e kabebetea te tamnei ao ni kanakoraoa te tai ae na roko.
Ngkai ara ataei a karikirakea te onimaki n ana Mwakuri ni Kamaiu Kristo, a na ataia ae akea te bwai ae e na aki reke ao bwa te Uea e tauraoi n tainako ni butimwaia. Ti buokia ni kaotaia bwa “bwaai nako ake [ti] riai ni katikui n ira te kawai nakon [mweengara] i karawa e na taraa n ae ngaia bon tiaki te angakarea ae rawawata.”8
Botiia Natin te Atua
Ti aki kona n roko n ara tabo are mairoun te Atua n tingaira. N aroia Aika Itiaki ni Boong aika Kaitira, iai tabera ae onoti ni kaoia tabeman ni kairiia iaon kawaira nakon mwengara i karawa. Te aonaaba e kainnanoia Aika Itiaki ni Boong aika Kaitira aika a tangiria ni kaota otan Kaokan Bwai n otanako rinanon aia koaua, aia banna ni katooto, ao nanoia ni kan tibwaua te euangkerio. Ngkana ti riki bwa banna ni katooto nakoia tabeman, ti kona n ikotiia aomata.
“Ngkana ti taetae iaon te ikoikotaki,” e taku Beretitenti Nelson, “ti taekina kakawakin te koaua aei: ni kabaneia natin Tamara are i Karawa, n iteran te roki aika uoua, e tau n ongoraeaki rongorongon ana euangkerio Iesu Kristo ae kaokaki. A baireia i bon ibukiia ngkana a kan ataa ae bati riki.”9
Ngaia are, n aron are e reirei Grandpa Crozier, ti tibwaua ara koaua n ana euangkerio Iesu Kristo. Ti tangira ao ti beku, kakorakoraia ao ni karikirakeia, ao ni boutokaia ao ni kamatoaia raora aika ti tangiriia ao kaain rarikira.
Ngkai ti buokiia tabeman nakon tokin kawaia ae mairoun te Atua, ti bon buokiira rinanon te kawai naba anne, “bwa ti na butimwaeaki nakon Uean te Tama ao a na manga aki kitanna, ma a na maeka ma te Atua i karawa n aki toki” (3 Nibwaai 28:40).