Boton te Euangkerio
Te Bwaka bon Mwakoron Ana Baire te Atua
Ibukin te Bwaka, ti a roko nakon te aonaaba ao ti kona n te bong teuana ni manga oki ni maeka ma Tamara are i Karawa.
Atam ao Ewa n te Onaroka are Eten, iroun Robert T. Barrett; Atam ao Ewa a Kakioakinako man te Onaroka, iroun Gary L. Kapp, e na aki katotongaki; Atam ao Ewa, iroun Jay Bryant Ward; Te Mangauti, iroun Harry Anderson
Inanon te Onaroka are i Eten, e tua te Atua nakon Atam ao Ewa bwa a na aki kana uaan te kai n ataakin te raoiroi ao te buakaka. Ngkanne E tuangiia, “Ko kona n rineia i bon ibukim, bwa ko bon anganaki, … ma, uringnga bwa I katabua” (Mote 3:17). Tatan e kaririia Ewa bwa e na kana uaan te kai. E tuangnga, “Kam na riki n ai aroia atua, n ataa ae raoiroi ao ae buakaka” (Mote 4:11). E kana uaan te kai ao imwiina e angan Atam. Te Atua e kanakoia man te Onaroka are i Eten.
Te Bwaka
Ngke a kiitana te Onaroka are i Eten Atam ao Ewa, aikoa ikotaki ni maeka ma te Atua. Te maenako aei mai iroun te Atua e aranaki bwa te mate n tamnei. Kiitanan te onaroka e nanonaki naba bwa Atam ao Ewa a karekei rabwata are a kona iai ni mate. E ngae ngke Atam ao Ewa aikoa maeka ma te Atua ao a riki n rabwata n te tai aei, a bon kukurei ao a onimaki ngke a nooria bwa a kona n rikirake (taraa Mote 5:10–11). “E bwaka Atam bwa aonga n riki aomata, ao a riki aomata bwa aonga ni karekea te kimwareirei.” (2 Nibwaai 2:25).
Te Tai ni Kataaki
Ngke ti a bungiaki, ti maenako ni maeka ma te Atua, n ai aron Atam ao Ewa imwiin te Bwaka. Tatan e kaririira bwa tina karaoi rinerine aika buakaka. Kaririaki aikai a karekea nakoira bwa tina kataaki ao n rineia imarenan ae eti ao ae e kairua (taraa Aramwa 12:24). Ni katoa tai are ti bure iai ao ti aki rairi nanora, ti rikirake n raroanako mairoun Tamara are i Karawa. Ma ngkana ti rairi nanora, ti rikirake ni kaan riki nakon Tamara are i Karawa.
Te Mate n Rabwata
Te aonaaba e karikaki ibukira (taraae 1 Nibwaai 17:36). Te Bwaka e karekea nakon Atam ao Ewa bwa a na kona ni karaoi ana tua te Atua ni karikiia natiia, ni karekea rokora nakon te aonaaba ni karekei rabwatara. Rabwatara n te bong teuana e na mate, ma tamneia e na reitinako ni maiu. Rabwatara ao tamneira e na manga ikotaki ngkana ti a manga uti.
Kamauiaki iroun Iesu Kristo
Rinanon mwaakan ana kamaiu Iesu Kristo, ti a kona n tokanikai iaon te mate n rabwata ao n tamnei. Ibukina bwa Kristo e mangauti, aomata ni kabane ake a bungiaki nakon te aonaaba aei a na mangauti ao ni maeka n aki toki. Ao ibukina bwa Kristo e korakai ibukin ara bure, ti kona n rairi nanora ao ni kabwaraaki ara bure bwa ti aonga ni kona ni manga maeka ma Tamara are i Karawa.