“Jusum blong Gat Maen long Ol Samting blong Spirit,” Liahona, Septemba 2022.
Jusum blong Gat Maen long Ol Samting blong Spirit
Blong stap holemtaet progres blong yumi long rod ia blong gospel, hem i semmak olsem we yumi stap ron long baeskel—long tugeta saed, yumi nidim blong stap strong blong stap wokhad.
Ol pikja i kam long Dilen Mas
Blong stap dil wetem jenis mo blong save wanem blong mekem long ol taem blong trabol, hem i wan long ol bigfala blesing blong stap wan fetful memba blong Jos ia blong Lod. Presen we i Tabu Spirit, hem i spesel janis blong gohed blong kasem toktok blong lidim yumi mo insperesen taem yumi gohed blong stap fetful.
Laef, Pis, Save Wijwan Rod, mo Proteksen
Aposol Pol i talem: “Be sapos tingting blong man i fas gud long ol gudfala fasin ya we Tabu Spirit i wantem, bambae hem i gat laef mo pis from” (Rom 8:6; luk tu long ves 5).
Blong jusum blong gat wan maen we i stap long ol samting blong Spirit taem yumi laef folem wan laef we i klin blong Tabu Spirit i toktok kwaet long yumi, bae i soem yu wijwan rod blong tekem long taem blong mekem desisen blong yu, mo protektem yumi long ol denja we i save kam spolem bodi o spirit blong yumi. Tru long Tabu Spirit, yu save kasem ol presen blong Spirit, blong gud blong yu, mo blong gud blong olgeta we yu lavem mo stap givim seves long olgeta. Toktok blong Hem we i kam long spirit blong yu bae i moa stret mo i moa gud bitim eni toktok we i save kam long ol filing blong bodi blong yu.
?Olsem wanem nao yu save laef long wan laef we i tingting blong yu i stap long ol samting blong Spirit, mo gat Tabu Spirit i soem rod long yu moa fulwan?
1. Yu i mas lisingud long Papa long Heven mo Sevya.
Taem laef blong yumi i stret wetem wanem Papa long Heven i wantem, nao yumi gat kampani blong Spirit blong Hem i stap wetem yumi. Taem yumi mekem gud laef wetem Hem i kam faswan insaed long laef blong yumi, nao yumi go kolosap moa long Hem mo Pikinini blong Hem, “Jisas Kraes, we hem i bin sendem” (Doktrin mo Ol Kavenan 132:24).
2. Lavem God.
Blong stap lavem Papa long Heven mo stap fidim wan rilesensip wetem Hem tru long prea, bae i mekem se yumi holemtaet Hem i stap insaed long maen mo hat blong yumi.
Aposol Jon, wetem testemoni blong hem abaot lav we God i gat long yumi, mo wetem witnes blong hemwan abaot Jisas Kraes, i sakemaot giaman bilif ia se, fasin blong sevem man, yumi save kasem long ol nara wei, be i no tru long bilif long Jisas Kraes. Jon i bin invaetem olgeta we oli bin stap ridim toktok blong hem, blong oli gat eksperiens long glad ia blong stap long wan gudlaef wetem Papa mo Pikinini (luk long 1 Jon 1:3). Hem i ademap:
“Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi.
“Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem” (1 Jon 2:15, 17).
Long laef ia, yumi save filim lav blong God tru long kampani blong Spirit blong Hem. Taem yumi mekem wanem we Papa blong yumi we i stap long Heven i wantem, mo traehad blong stap long rod ia we i lidim yumi i go long Hem, bae Tabu Spirit i save soem rod long yumi.1
3. Tingbaot wanem we Sevya i bin mekem blong yumi.
Promes we i stap long ol tugeta prea blong sakramen, i we, “blong olgeta we oli tekem mo kakae, oli save gat Spirit blong hem i stap wetem olgeta” (Doktrin mo Ol Kavenan 20:77, 79). Yumi tekem sakramen, evri wik, from se yumi wantem blong holemtaet gud, mo fidim fasin blong laef wetem spirit blong yumi.
Presiden Dallin H. Oaks, Fas Kaonsela long Fas Presidensi, i bin tijim: “Taem yumi stap go longwe moa long ol fasin blong wol ia, bae yumi filim se yumi stap kolosap moa long Papa we i stap long Heven, mo bae yumi filim se Spirit blong Hem i stap lidim yumi moa. Yumi singaotem kwaliti blong laef ia, se fasin blong laef wetem Spirit.” Presiden Oaks i ademap: “Olsem wanem yumi luk o eksplenem mining blong eksperiens blong yumi, i wan wok tu blong mak blong fasin blong laef blong yumi wetem Spirit. Yumi, we yumi gat wan testemoni abaot gospel blong Jisas Kraes, i mas save talem mining blong eksperiens blong yumi long saed blong save blong yumi abaot stamba tingting blong laef ia, misin blong Sevya blong yumi, mo fiuja we i no save finis blong ol pikinini blong God.”2
4. Luksave ol samting long saed blong spirit.
Mi talem se i tru, se fasin blong laef wetem Spirit, i wan blesing we i kam taem yumi strong blong stap wokhad oltaem, long saed blong yumiwan. Taem yumi lukaot blong lanem mo folem ol kwaet toktok blong Spirit, yumi save luksave isi moa, ol samting ia we oli blong God, mo ol samting ia we oli blong wol.
Elda Quentin L. Cook, blong Kworom blong Olgeta Twelef Aposol, i talem: “Semmak olsem we yumi nidim blong ripripitim hadwok, mo stap wokhad oltaem blong save kasem paoa long bodi mo long maen, hemia i tru semmak wetem ol samting long saed blong spirit.”3
Developem Fasin blong Yu blong Stap Laef wetem Spirit
Tangkyu tumas long ol samting we ol lida blong Jos oli save luk fastaem; from hemia, yumi gat ol gudfala tul blong helpem yumi blong mekem fasin blong laef ia wetem Spirit, i kam strong moa. Tingting long ol divelopmen we oli kam wetem Gospel Laebri ap, we i letem paoa blong skripja mo gospel stadi blong i stap stret insaed long poket blong yumi evri taem. Tingting long ol jenis we oli go wetem wok blong givhan, we i leftemap fasin blong yusum teknoloji taem yumi stap go aot blong helpem ol narawan. Tingting long hom we i senta, wei blong sapot blong Jos blong stap lanem samting mo kurikulom ia, Kam Folem Mi, we i tekem fasin blong laef wetem Spirit i go antap moa bitim weaples yumi bin stap long hem.
!Yumi no nid blong stap long wan kwarantin long saed blong spirit wetem evri tul mo risos ia we yumi gat! Yumi save wok tugeta, jusum evri janis blong save laef wetem Spirit, leftemap tingting blong save laef mo gat pis, mo wetem gud tingting, mekem se fasin blong laef wetem Spirit i wan ful pat blong laef blong yumi. Ol skripja oli tijim se: “Be Tabu Spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis mo oli save blokem ol samting we olgeta nomo oli wantem” (Galesia 5:22–23).
Mekem mo Kipim Ol Gol long saed blong Spirit
Wan man o woman we i gat fasin blong laef wetem Spirit, i traehad blong mekem se spirit fasin blong hem i kam strong moa, mo taem hem i putum ol gol blong hem, bae i askem: “?Weswe? ?Ol gol blong mi oli stret wetem ol nid blong mi long saed blong spirit?”
Wan man o woman we i gat fasin blong laef wetem Spirit, i wantem blong save olsem wanem blong folem ol kwaet toktok long saed blong spirit, mo afta, i tekem aksen folem ol kwaet toktok ia. From hemia, blong putum ol gol i stap blong stap groap long saed blong spirit, i wan mas.
Annie, smol apugel blong mitufala we i gat faef yia, i putum wan gol blong hem i lanem blong ron long baeskel. Hem i praktis gogo nao hem i kasem kwiktaem; mekem se papa mo mama blong hem i tekem hem i go ronron long baeskel olsem wan famli.
Taem oli bin stap ron i go, mama blong Annie i talem se hem i sapraes tumas olsem wanem Annie i bin ron gud long baeskel i go antap long wan hil mo i krosem wan brij. Annie i serem sikret blong sakses blong hem. “Mama, mi jes hang strong mo mi gohed blong purumbut strong long baeskel.”
Yumi mas mekem sem samting. Taem yumi purumbut strong, yumi save holemtaet balens blong yumi. Ol simpol aksen ia, blong prea evri dei, stadi ol skripja, mo stap folem ol kaonsel blong ol profet, oli stap holem taet fasin blong yumi blong laef wetem Spirit i gohed strong nomata ol hil, ol wol sik, mo ol jenis long laef.
Presiden Russell M. Nelson i talem: “Taem we bigfala tingting blong hat blong yu i blong letem God i stap win, blong yu pat blong Isrel, plante desisen bae oli kam isi moa. !Plante trabol, oli nomo ol trabol! … Yu save wanem yu wantem blong mekem i kamtru. Yu save kaen man o woman we yu rili wantem blong kam olsem.”4
Taem yu stap lukluk nomo long wanem i rili impoten, bambae yu luk se, rod ia, blong stap mekem fasin blong laef blong yu wetem Spirit mo blong kam blong laef wetem Spirit, i wan simpol samting, nomata i askem blong yu mas wok had mo yu mas strong oltaem. !So, hang strong mo gohed blong purumbut strong!
Fidim Liahona blong Spirit blong Yu
Plante long ol voes blong wol ia oli pusum yu, oli stikim yu, oli pulum yu i go long plante kaen daereksen long laef, we i mekem se, i gat sam taem we yu filim se yu stop smol mo yu stap tingting se bae yu folem wijwan rod. Tingbaot se Liahona blong spirit blong yu i wok gud moa taem we yu save haremsave wijwan i voes blong Spirit, mo wijwan oli ol voes blong wol ia.
Tabu Spirit i kwaet, i klia, mo i leftemap tingting. Hem i givim ol spesifik rod blong folem, blong yu gat pis mo hop. Hem i wok wan stret wetem Papa long Heven mo Jisas Kraes, i stap mekem ol defren rol blong helpem yu blong laef long wan stret mo gud fasin, mo blong kasem ol blesing blong gospel.
Presiden Nelson i talem: “Stret stamba blong paoa blong Spirit, i God we i Papa blong yumi.” “Mesenja blong paoa ia, hem i Tabu Spirit. Paoa ia i defren long lektrik paoa. Wan lektrik tul i kakae paoa. Be taem yumi yusum paoa blong Spirit blong Hem, i fulumap bakegen paoa blong yumi. !Lektrik paoa, yumi save yusum nomo blong sam sot taem we yumi skelem gud, paoa blong Spirit blong Hem, yumi save yusum blong taem naoia mo blong taem we i no save finis!5
Blong gat fasin blong laef wetem Spirit blong Hem, hang strong, gohed blong purumbut o ron i go, mo putum ol gol long saed blong spirit. Yusum ol fulap risos we oli stap blong mekem spirit blong yu i kam strong moa.
Mi testifae se, blong gat fasin blong laef wetem Spirit, i tru, hem i laef mo pis (luk long 2 Nifae 9:39); se kwaliti blong laef blong yumi bae i kam antap taem we yumi laef stret mo gud wetem Papa mo Pikinini, mo se God i lavem yumi mo i gat tingting long yumi mo ol nid blong yumi.
I kamaot long wan divosen toktok we oli singaotem, “To Be Spiritually Minded Is Life and Peace,” we hem i bin givim long Brigham Yang Yunivesiti long 9 Febwari 2021. Blong kasem ful toktok blong hem, go long speeches.byu.edu.