Yu Pruvum se Yu Famli

I Kam long Nadezhda Karezina, Omsk, Siberia, Rasia

Mi ting se Lod i stap askem samting we i no posibol, be mi bin rong.

Pikja

Glas blong mekem samting i luk bigwan mo bubu jat

Olfala neba blong mi, mo boe blong hem, i bin stap laef long wan apatmen kolosap long famli blong mi. Hem i kam kolosap long mifala. Taem we boe blong hem i ded, hem i kam sik, mo i mas slip long bed nomo. Mifala i bin lukaot long hem kasem taem we hem i ded, tri manis afta.

Afta we tufala i ded, mi bin wantem mekem ol tempol odinens blong famli ia. Be, mifala i no famli, nao i no bin save olsem. Wan dei, wan klia tingting i kam long maen blong mi: “Pruvum se yu famli, mo bae yu save mekem wok blong olgeta.”¹ Mi ting se Lod i stap askem samting we i no posibol, be toktok ia, pruvum i stap gohed blong kamkambak long maen blong mi.

Famli blong neba blong mi oli stat blong mekem ol pepa wok blong transferem nem blong apatmen blong hem, be oli no bin gat ol rekod blong pruvum se oli famli, iven taem we oli bin go lukaot long ol akaev blong gavman.

Spirit i talem long mi, se i gat wan samting we mifala i mestem. Wetem raet blong ol famli ia, mi go lukluk insaed long apatmen blong hem blong faenem ol pepa. Long wan kona blong apatmen, mi faenem sam bag we oli fulap long ol olfala pepa. Mi gat wan filing se ol bag ia oli impoten.

Mi lukluk i go long tu bag, mo afta, mi stat blong go long nambatri. Kolosap mi kasem en blong bag, taem mi filim wan notbuk kova. Insaed long poket blong kova blong notbuk ia, mi faenem faef impoten setifiket: bondei setifiket blong neba blong mi, ded mo mared setifiket blong mama blong hem, ded setifiket blong bubuwoman blong hem, mo setifiket we i blong berem papa blong hem.

Taem we ol famli blong neba mo mi i luklukbak long ol pepa ia, i gat tu toktok i kamaot klia long mi, “Vagaysky Distrik,” long Wes Siberia. Kwiktaem, mi filim se mi mas go luk famli tri blong mi. Taem mi luk i go, mi faenem Vagaysky i kamaot long ol laen blong famli blong papa blong mi. Taem mi bin lukaot i go moa, i soem se neba blong mi we i ded, hem mo mi, !mitufala i famli!

Lod i no bin askem samting we i no posibol long mi. Mi no save talemaot glad blong mi taem mi lanem se neba blong mi, i pat blong famli blong mi. Link ia i letem mi blong mi mekemsua se bae oli mekem ol tempol odinens blong hem long fiuja.

Lod i lavem ol pikinini blong Hem. Hem i bin mekem rere plan ia blong fasin blong sevem man blong evriwan, mo tu, neba blong mi mo boe blong hem.