Mukenji wa ku Ngondu wa Liahona, Ngondu wa Dikumi ne Umua 2022
Kutshimuna Malu a pa Buloba ne Kupeta Dikisha
Kupeta dikisha ku dipampakana, mpata ne dibungama bia pa buloba ebu ku ditshimuna malu a pa buloba kupitshila ku bipungidid bieba ne Nzambi.
Bana betu bananga baluma ne bakaji, ndi ne disanka bua kunuela moyo mu dinda emu mua Sabata wa butumbi. Nudi misangu yonsu mu meji anyi. Ndi nsanka bua mushindu unudi nudifila mu tshienzedi panudi numona bantu mu majinga. Ndi nkatshila bua ditabuija ne bujadiki bunudi nuleja misangu yonsu. Ndi ndila bua tunyinganyinga tuenu, kuteketa kua maboku, ne disumpakana dienu. Ndi mununanga. Ndi nutuishila ne Tatu wetu wa mu Diûlu ne Muanenda Munanga, Yezu Kilisto, mbanunanga. Mbamanya bimpa malu enu, buimpa buenu, majinga enu ne masambila enu bua diambuluisha. Misangu yonsu, ndi nsambila buenu bua numvua dinanga didibu nadi buenu.
Kumanya dinanga diabu kudi kuikala ne mushinga, bualu matuku onsu tudi tuluishibua kudi buluishi bua malu adi atuelesha meji. Nudi ne mua kuikala ne matuku anudi muakumvua bua kusenya bilamba bienu bia tulu, ne kudibuikila mu mbulanketa, ne kulomba muntu mukuabu bua kunubisha pikala mpepela ya ntatu yonsu mijika.
Kadi, bana betu baluma ne bakaji, bintu bimpa biabungi bidi bilua kumpala. Mu matuku alualua, netumona mamuenesha manena bikola a bukola bua Mupandishi atu buloba kabuyi buanji kumona. Pankatshi pa mpidiewu ne diba dialukilaye “ne bukola ne butumbi bunena,”1 neafila manema, mabenesha, bishima biabungi kabiyi kubala pa mutu pa badi ne lulamatu.
Nansha nanku, tudi mpidiewu bikala bushuwa mu tshikondu tshitamba kujingakana bikola mu miyuki ya malu a pa buloba. Ntatu ne makenga bidi bishiya bantu ba bungi ne dipampakana ne ditshiokeshibua. Kadi tangilayi bualu buia-bupia ebu budi mua kufila butoka mu mushindu uwudi wewa ne memamua mua kupeta dikisha.
Mu dikangula dia bîbi bia ntempelu wa Washington D.C matuku apitshi â, tshidimba tshia kasumbu ka dikangula dia bîbi tshivua tshijadika muyuki pavuatshi tshileja tumuna-tuamba tua bungi bua kumona mu ntempelu. Mu mushindu umua, dîku dikesa divua dilamata luendu lua media elu. Kamona kamba kamuepela kavua kakonka pa “luendu” lua muena milulu ku ntempelu mu kuenda muikala kuabu mu ntempelu. Uvua usua kumanya pikala luendu lua ku ntempelu luleja tshifuanyikijilu tshia ntatu ya mu luendu lua muntu mu moyo ewu.
Nsonga mukesa mu dîku wakabuela mu muyuki. Padi tshisumbu tshia babandidi tshibuela mu tshibambalu tshia diambika, nsonga wakafunkuna ku tshioshelu, muaba udi bantu batua binu bua kuenza bipungidi ne Nzambi, ne wamba “O, tshidi tshimpa. Ewu udi muaba udi bantu bikisha mu luendu luabu lua ku ntempelu.”
Ndi ngela mpata bua ne nsonga uvua mumanya ndondu wa ditangila dienda. Kavua nansha ne lungenyi lukesa pa dipetangana didi pankatshi pa kuenza bipungidi ne Nzambi mu ntempelu ne mulayi musunguluka wa Musungidi:
“Luayi kundi, nuenu bonsu badi batshioka ne badi ne majitu, ne mema nenupesha dikisha.
“Angatayi mutshi tshikokedi tshianyi pa mitu yenu, ne nulonga buanyi; … ne nenupeta dikisha mu mitshima yenu.
“Bualu tshikokedi tshianyi tshidi tshiakane, ne bujitu buanyi budi bupepele.”2
Bana betu baluma ne bakaji, ndi nyingalala bua aba badi bumbuka mu Ekelezia bualu badi bumvua buikadi bua tshidimba buabu bubalomba bia bungi. Kabena mbaji kujingulula bua ne, kuenza ne kulama bipungidi kudi kufila moyo mupepela! Muntu yonsu udi wenza bipungidi mu tshitambushilu ne mu ntempelu—ne ubilama—udi ukangula njila wa dipeta dia bukola bua Yezu Kilisto. Suayi nuela meji pa bulelela ebu budi bukemesha!
Difutu dia kulama kua bipungidi ne Nzambi didi bukola bua ku diûlu—bukola budi butukankamika bua kukandamena bimpa ntatu, matêtshibua ne tunyinganya. Bukola ebu budi bupepeja njila wetu. Aba badi balama mikenji minena ya Yezu Kilisto, badi bapeta bukola buenda bunena. Nanku balami ba bipungidi, badi ne dikisha disunguluka didi dilua kudibu kupitshila ku malanda abu a tshipungidi ne Nzambi.
Kumpala kua Mupandishi kukôkeshesha ku dipampakana mu Getesemane ne ku Kabalubalu ka Mutu, yeya wakambila bapostolo benda ne, “Nenuikala ne makenga pa buloba: kadi tuishibuayi ne; ndi mutshimuna ba pa buloba.”3 Pashisha, Yezu wakasengelela yonsu wa kutudi bua kuenza momumua padiyi wamba ne, “Ndi musua bua nenu nutshimuna malu a pa buloba.”4
Bana betu baluma ne bakaji, mukenji wanyi kunudi lelu udi ne, bu mudi Yezu Kilisto mutshimuna malu a pa buloba bupona ebu, ne bu mudiye mupikula yonsu wa kutudi, wewa peba udi mua kutshimuna malu a pa buloba ebu budi buwula nteta ne mibi, lukuna malu atshiokesha.
Bu mudi Mupandishi, kupitshila ku Bupikudi buenda budi kabuyi ndekelu, musungila yonsu wa kutudi ku matêketa, bilema ne bubi, ne bu muvuaye mumvua kusâma, kudiabakena, ne majitu binudi kanuyi banji kupeta,5 nanku binuakudimuna mutshima bulelela ne kukeba diambuluisha dienda, nudi mua kujuka pa mpala pa buloba ebu bua bupela lelu.
Nudi mua kutshimuna bipupu bia bubi bia mu nyuma ne bia ku moyo bia pa buloba, bu mudi buakulavi, diditambisha, tshiji, buenzavi, lukinu, dialakana, lubabu, mukawu, ne bowa. Nansha kabuyi bua dipanga ne lumvu lubi bitudinabi, nudi mua kupeta dikisha dilelela—dilelela, dikuatshisha ne ditalala binena—nansha munkatshi mua malu adi manutonda.
Bulelela ebu bua mushinga budi bujula makonka asatu manena:
Tshia kumpala, kutshimuna malu a pa buloba kudi kumvuija tshinyi?
Tshibidi, mushindu kayi utudi tutshimuna?
Ne tshisatu, mushindu kayi udi kutshimuna malu a pa buloba kubenesha mioyo yetu?
Kutshimuna malu a pa buloba kudi kumvuija tshinyi? Kudi kumvuija kutshimuna matêtshibua a kunanga bintu bia pa buloba kupita bintu bia Nzambi. Kudi kumvuija, kueyemena ku dilongesha dia Kilisto pa mutu pa mamanya a bantu. Kudi kumvuija kusanka mu bulelela, kubenga mashimi, ne kulua “muyidi mudipuekesa wa Kilisto.”6 Tshidi tshiumvuija kusungula bua kudilama ku tshionsu tshidi tshinyemesha Nyuma. Tshidi tshiumvuija kuikala pabuipi bua “kulekela” nansha bubi buetu bunanga.7
Mpindiewu, kutshimuna malu a pa buloba bushuwa kakuena kumvuija kuikala mujalama mu moyo ewu to, kakuena kumvuija ne majinga eba adi ajika musangu umua to—bu mudibi nanku, kabiena biumvuija ne kuakuenza kabidi bilema to. Kadi kutshimuna malu a pa buloba kudi kumvuija ne kukandamena kueba bua kuenza bubi nekudiunda. Mutshima weba neupoleshibua padi ditabuija dieba mu Yezu Kilisto didiunda.8 Kutshimuna malu a pa buloba kudi kumvuija kukola mu dinanga dia Nzambi ne dia Muanenda Munanga kupita muntu anyi tshintu tshikuabu.
Nanku, mushindu kayi utudi mua kutshimuna malu a pa buloba? Mfumu Benyamina wakatulongesha mushindu wa kuenza. Wakamba ne “muntu wa panu udi muena lukuna kudi Nzambi” ne uvua nanku kumbukila ku dipona dia Adama, ne neikala nanku, bua kashidi ne kashidi “amu yeya mudifila ku masuisha a Nyuma wa Tshijila, ne mudivûla bumuntu bua panu ne mulua munsantu ku njila wa bupikudi bua Kilisto Mukalenga.”9 Diba dionsu dinudi nukeba ne nulonda lungenyi lua Nyuma, diba dionsu dinudi nuenza tshintu tshimpa—tshintu tshidi “muntu wa panu” kayi mua kuenza—udi utshimuna malu a pa buloba.
Kutshimuna malu a pa buloba ki tshikuma tshidi tshifika mu dituku dimua anyi abidi to. Tshidi tshifika ku bungi bua matuku patudi tupukila nangananga dilongesha dia Kilisto. Tudi tukeba ditabuija mu Yezu Kilisto mu dikudimuna mutshima dituku dionsu ne dilama bipungidi bidi bitupesha bukola. Tudi tushala mu njila wa tshipungidi ne tudi tubeneshibua ne bukola bua nyuma, dibuluila dia nkaya, didiunda dia ditabuija, ne busambi bua banjelu. Kuteka dilongesha dia Kilisto mu tshienzedi kudi mua kufila tshijengu tshia buakana bua bukola bua bungi budi bufila tshidia tshia nyuma mu moyo wetu.10
Patudi tudienzeja bua kutumikila mikenji minena ya Yezu Kilisto, mioyo yetu ne ngikadilu bidi bibanga dikudimuka. Mupandishi udi utujula ku mutu bua tuetu kutshimuna malu a pa buloba ebu bua mibi ku ditubenesha ne bunangi, didipuekesha, kalolu, bulengela, didilongesha, ditalala, ne dikisha.
Mpidiewu, nudi mua kuela meji ne mbimfuanangana ne mudimu mukola wa nyuma udi mupita dikisha. Kadi apa padi bulelela bunena: nansha mudi buloba buamba ne bukola, bubanji, dimanyika ne bisankasanka bia mubidi bidi bituala diakalenga, kabiena nanku to! Kabiena mua kutuala tshintu to! Tshidibi bifila tshidi anu tshintu tshidi tshikala tshikesa ku “ngikadilu mubeneshibua ne wa musangelu wa [badi] balama mikenji ya Nzambi.”11
Bulelela budi ne bidi ne bukola bua bungi bua kukeba diakalenga muaba uwudi kuyi mua kudipeta! Kadi, panudi nulamata Yezu Kilisto ne nuenza mudimu wa mu nyuma udi ulombibua bua kutshimuna malu a pa buloba, anu yeya nkayenda ki udi ne bukola bua kukuambuluisha bua kutshimuna malu a pa buloba.
Mpidiewu, mushindu kayi utudi kutshimuna kua malu a pa buloba kubenesha mioyo yetu? Diandamu didi dipepela: kubuela mu tshipungidi ne Nzambi kudi kutusuika nenda mu mushindu udi wenza bintu bionsu bia moyo wetu bipepela. Suayi kanungumvu bibi: ntshiena muamba ne kuenza bipungidi kudi kuenza ne moyo udi upepela to. Bushuwa, nuindila dishilangana, bualu muluishi kakusua bua wewa upeta bukola bua Yezu Kilisto to. Kadi kulonda Musungidi kudi kumvuija ne udi upeta bukola bua dikankamika ne disungila bienda.
Ndi njadika kabidi dilongesha dinena dia Mulombodi Mukulu Ezra Taft Benson didi diamba ne : Baluma ne Bakaji badi bateka mioyo yabu mu Nzambi badi bajandula ne badi benza bia bungi kupita bobu bikala nkayabu. Neabapesha disanka diabungi, neabadiundishila muenenu yabu, meji abu neatoka, … neajula nyuma yabu, neavudija mabenesha abu, neavudija mishindu yabu, neakankamika anyima yabu, neabajudila balunda, ne neabapuekeshela ditalala dia bungi.”12
Manema â adi ka’ayi kufuanyikija adi alonda aba badi bakeba dikuatshisha dia ku diûlu bua dibambuluisha bua kutshimuna malu a pa buloba. Ku ndekelu eku, ndi mpesha bidimba bionsu bia Ekelezia bujitu bua momumua bumvua mupesha nsonga mikola mu ngondu Muitanu mushala. Ndi mubakankamika—ne ndi nusengelela mpidiewu—bua kuangata bujitu bua bujadiki buenu nkayenu bua Yezu Kilisto ne lumu luimpa luenda. Enza mudimu buabu. Budishayi bua bukola. Budishayi ne malu malelela. Kanubunyangi ne mamanya a mafi a baluma ne bakaji badi kabayi ne ditaba to. Panudi nutunguluka ne nukankamika bujadiki buenu bua Yezu Kilisto bua tshintu tshia mushinga, nuteyayi ntema ku bishima biafika mu mioyo yenu.13
Dilomba dianyi mudinda emu kunudi didi bua nupeta dikisha ku dipampakana, mpata ne dibungama bia pa buloba ebu ku ditshimuna malu a pa buloba kupitshila ku bipungidid bienu ne Nzambi. Mumanyishayi ku disambila ne mu tshienzedi ne, nudi nushindama pa ku tshimuna malu a pa buloba. Mulomba bua atokesha meji enu ne anutumina diambuluisha dinudi nukeba. Dituku dionsu, funda ngenyi idi ikuvuila paudi usambila; nanku uyilonda ne tshisumi. Pitshisha diba diabungi munda mua ntempelu, ne keba mua kumvua mushindu udi ntempelu ukulongesha bua kuikala pa mpala pa buloba ebu bupona.14
Bu munkadi mubiamba ku mbangilu, disangisha dia Isalele didi mudimu wa mushinga wa bungi udi wenzeka pa buloba lelu. Tshintu tshia mushinga tshimua tshia disangisha edi tshidi dilongolola bantu badi bamueneka, bikala papuipi, ne bakumbana bua kuakidila Mukalenga paluayi kabidi, bantu bakadi basungula Yezu Kilisto mu buloba ebu bupona, bantu badi basanka mu didisuila diabu bua kusomba mu mikenji minena misantu ya Yezu Kilisto.
Ndi nubikila, bana betu baluma ne bakaji, bua nuikala bantu bajalama aba. Nangayi ne nemekayi bipungidi bienu ku mutu kua mambika makuabu onsu. Panudi nulekela Nzambi utamba mu mioyo yenu, ndi nulaya ditalala dinena, ditekemena, disanka, ne eyowa, dikisha.
Ne bukola bua tshijila bua bupostolo bungambika, ndi nubenesha mu mvita yenu bua kutshimuna malu a pa buloba ebu. Ndi ndubenesha bua nukolesha ditabuija dienu mu Yezu Kilisto ne nulonga bimpa mushindu wa kueyemena bukola buenda. Ndi nubenesha bua nuikala bakumbana bua bujingula buimpa ne bubi. Ndi nubenesha bua nutamba kunanga bintu bia Nzambi bimpa kupita bintu bia pa buloba. Ndi nubenesha bua numona ku luseka luenu badi ne dijinga ne nukankamika banudi bananga. Bu mudi Yezu Kilisto mutshimuna malu a pa buloba, nudi petu mua kutshimuna. Ndi njadika nunku mu dina dia Yezu Kilisto, amena.