« ការផ្ដល់ការងារបម្រើដោយមានចំណេះដឹងដ៏មហិមា ? » លីអាហូណា ខែ មករា ឆ្នាំ ២០២៣ ។
គោលការណ៍ទាំងឡាយនៃការងារបម្រើ
ការផ្ដល់ការងារបម្រើដោយមានចំណេះដឹងដ៏មហិមា
អ្នកមិនចាំបាច់មានចម្លើយទាំងអស់នោះទេ ប៉ុន្តែការស្គាល់ទ្រង់កាន់តែច្បាស់នឹងជួយយើងឲ្យផ្ដល់ការងារបម្រើដូចព្រះអង្គសង្គ្រោះបានធ្វើដែរ ។
សេចក្តីលម្អិតមកពី ព្រះគ្រីស្ទនៅក្នុងព្រះវិហារបរិសុទ្ធ ដោយ ហែនរិច ហូហ្វម៉ាន់
ព្រះយេស៊ូវបង្ហាញយើងពីគំរូនៃការរៀនសូត្រ
កាលព្រះអង្គសង្រ្គោះមានវ័យចម្រើនឡើង ទ្រង់ « មានកម្លាំងខាងវិញ្ញាណរឹតតែច្រើនឡើង ប្រកបដោយប្រាជ្ញាដ៏ពោរពេញ ហើយព្រះគុណនៃព្រះក៏សណ្ឋិតលើទ្រង់ផង » ( លូកា ២:៤០ ) ។ ពាក្យថា រឹតតែច្រើនឡើង មានន័យថារីកចម្រើនបន្តិចម្តងៗ ដូចជាព្រះចន្ទពេញវង់តាមគន្លងប្រចាំខែ ។ លូកាបន្ថែមថា « ព្រះយេស៊ូវក៏កាន់តែធំ ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឫទ័យដល់ព្រះ និងចិត្តមនុស្សផង » ( លូកា ២:៥២ ) ។ ព្រះយេស៊ូវពុំមានចំណេះដឹងភ្លាមៗនោះទេ—ទ្រង់ទទួលបានចំណេះដឹងបន្តិចម្តងៗ ( សូមមើល គោលលទ្ធិ និង សេចក្តីសញ្ញា ៩៣:១២–១៤ ) ។
ពេលព្រះយេស៊ូវមានព្រះជន្ម ១២ ព្រះវស្សា មាតាបិតាទ្រង់បានរកឃើញទ្រង់នៅក្នុងព្រះវិហារ—ជាកន្លែងថ្វាយបង្គំកណ្តាលក្រុងយេរូសាឡិម—« គង់នៅកណ្ដាលពួកអាចារ្យ ហើយពួកអាចារ្យកំពុងតែស្ដាប់ទ្រង់ ហើយសួរទ្រង់នូវសំនួរទាំងឡាយ » ( ការបកប្រែដោយយ៉ូសែប ស៊្មីធ លូកា ២:៤៦ [ នៅក្នុង លូកា ២:៤៦គ] ) ។ ដោយសារការរៀនសូត្រជាផ្នែកមួយដ៏សំខាន់នៃការលូតលាស់របស់ទ្រង់ នៅពេលឱកាសបានមកដល់ដើម្បីបង្រៀនអស់អ្នកដែលនៅក្នុងព្រះវិហារបរិសុទ្ធ នោះទ្រង់បានត្រៀមព្រះកាយជាស្រេច ។ ការបង្រៀនរបស់ទ្រង់នៅទីនោះមានឥទ្ធិពលដ៏គួរឲ្យភ្ញាក់ផ្អើលចំពោះពួកគេ និងលើមាតាបិតារបស់ទ្រង់ផងដែរ ។
ការប្រើប្រាស់ចំណេះដឹងនៅក្នុងការងារបម្រើ
នេះជារបៀបបីយ៉ាងដែលការអភិវឌ្ឍចំណេះដឹងដូចជាព្រះគ្រីស្ទ អាចជួយយើងក្នុងការងារបម្រើរបស់យើងបាន ៖
-
កាលយើងចាប់ផ្តើមស្គាល់ព្រះអង្គសង្គ្រោះ ហើយរៀនអំពីគុណលក្ខណៈរបស់ទ្រង់ នោះយើងនឹងដឹងកាន់តែច្បាស់អំពីអ្វីដែលទ្រង់នឹងធ្វើ ដើម្បីផ្ដល់ការងារបម្រើជំនួសយើង ។
-
កាលចំណេះដឹង និងការយល់ដឹងអំពីដំណឹងល្អយើង កាន់តែរីកចម្រើនឡើង នោះយើងនឹងស្ថិតក្នុងទីតាំងដ៏ប្រសើរមួយ ដែលព្រះវិញ្ញាណបរិសុទ្ធនាំឲ្យយើងចាំអ្វីដែលយើងត្រូវការ នៅពេលណាដែលយើងត្រូវការចំណេះដឹងនេះ ( សូមមើល យ៉ូហាន ១៤:២៦ ) ។ ការណ៍នេះអាចជួយយើងឲ្យយល់ពីតម្រូវការរបស់អ្នកដែលយើងផ្ដល់ការងារបម្រើ ហើយអាចឆ្លើយសំណួរ ឬកង្វល់របស់ពួកគេបាន ។
-
កាលយើងបង្កើនសមត្ថភាពរបស់យើងក្នុងការរៀនសូត្រ នោះយើងនឹងអាចភ្ជាប់ទំនាក់ទំនងជាមួយអ្នកដទៃ ឬបម្រើអ្នកដទៃបានកាន់តែល្អ ។ យើងអាចស្វែងយល់បន្ថែមទៀតអំពីប្រធានបទដើម្បីភ្ជាប់ទំនាក់ទំនងជាមួយមិត្តភក្តិដែលចាប់អារម្មណ៍លើប្រធានបទនេះ ។ ឬយើងអាចរៀនជំនាញមួយចំនួនដែលអាចជួយបំពេញតាមតម្រូវការ ។
ការទទួលបានចំណេះដឹងអាចជួយយើងឲ្យផ្ដល់ការងារបម្រើតាមរបៀបជាច្រើន ។ បន្ថែមពីនោះ « គោលការណ៍នៃបញ្ញាណាក៏ដោយ ដែលយើងបាននៅក្នុងជីវិតនេះ នោះនឹងនៅជាប់នឹងយើងក្នុងដំណើររស់ឡើងវិញ » ( គោលលទ្ធិ និង សេចក្តីសញ្ញា ១៣០:១៨ ) ។
ការអភិវឌ្ឍចំណេះដឹង
តើយើងអាចអភិវឌ្ឍគុណលក្ខណៈនៃចំណេះដឹងដូចជាព្រះគ្រីស្ទដោយរបៀបណា ? នេះគឺជាគំនិតមួយចំនួន ៖
-
សូមចងចាំថា សូម្បីតែព្រះយេស៊ូវក៏បានរៀនបន្តិចម្តងៗដែរ ។ ចូរមានចិត្តឧស្សាហ៍ព្យាយាម ប៉ុន្តែចូរមានចិត្តអំណត់នឹងខ្លួនឯង ។ ការរៀនសូត្រកើតឡើង « មួយបន្ទាត់ម្ដងៗ មួយសិក្ខាបទម្ដងៗ » ( នីហ្វៃទី២ ២៨:៣០ ) ។
-
សូមរៀនស្វែងរកប្រភពដែលគួរឲ្យទុកចិត្ត ។ ( សូមមើល « Finding Truth in the Misinformation Age » នៅក្នុង ខែ តុលា ឆ្នាំ ២០២២ លីអាហូណា ឌីជីថល ) ។
-
សូមចង់ដឹងចង់យល់ ។ រៀនពីអ្វីដែលកំពុងកើតឡើងនៅជុំវិញអ្នករាល់ថ្ងៃ ។ សួរសំណួរ ។ អានសៀវភៅៗល្អ និងទទួលបានព័ត៌មានថ្មី ។ ( សូមមើល គោលលទ្ធិ និង សេចក្តីសញ្ញា ៨៨:៧៩, ១១៨; ៩០:១៥ ) ។
-
សូមរៀនសូត្រដោយការសិក្សា និងដោយសេចក្តីជំនឿ ( សូមមើល គោលលទ្ធិ និង សេចក្តីសញ្ញា ៨៨:១១៨ ) ។ សមត្ថភាពរបស់អ្នកក្នុងការយល់ពីសេចក្ដីពិតនៅរាល់ប្រធានបទណាមួយ នឹងត្រូវបានធ្វើឲ្យប្រសើរឡើងដោយការផ្គូផ្គងការខិតខំប្រឹងប្រែងខាងបញ្ញាដ៏ល្អបំផុតរបស់អ្នក ជាមួយនឹងការខិតខំប្រឹងប្រែងខាងវិញ្ញាណដ៏ល្អបំផុតរបស់អ្នក ។ សូមរស់នៅតាមបែបដែលអ្នកអាចទទួលបានជំនួយពីព្រះវិញ្ញាណបរិសុទ្ធ ។