Pweng ke Kais Sie Mahlwem ke Liahona, Julahe 2023

Akacsruhi ke wosasuc luhn Jisus Kraist

Ke kuht nuhnkuh ke mwe insewowo kuht eis ke srihpen kuht mempuhr ke Alu luhn Jisus Kraist luhn Mwet Luhlahlfongi ke Lwen-sahflah, kuht kena akacsruhi ke wosasuc nuh selos suc kuht luhngse. Kuht kuh in akacsruhi ke luhlahlfongi kuh lasr ke ma pwacye ke kahs lasr ac srihkasrak lasr. Kuht kuh in pruhe in mokleyuck in etuh lah suc [kuht in] akacsruhi nuh se ac lah meac [kuht] in fahk.

Luhngse Mwet Sahyac

Sie ip yohk srihpac ke akacsruhi ke wosasuc uh pa luhngse mwet sahyac. Pacl nuhkwewa kuht oruh luhngse luhn Kraist nuh sin mwet wiacsr, kuht luti ke wosasuc—finne kuht tena fahklah kahs se. Ac ke mwet sahyac etuh lah kuht oaru kaclos, sahp elos e insese kuhtuh in lohng nuhnak lasr ke wosasuc. (Liye Gary E. Stevenson, “Luhngse, Akacsruhi, Suli,” Liahona, Mei 2022, 84–87.)

Akacsruhi ke Ohiyac Fal ac Wo

Kuht kuh in akacsruhi ke ma kuht luhngse ke wosasuc. Ke kuht oruh ma inge oacna sie ipin moul lasr pengana lwen, e tiac upac kuh motok. In mwe srihkasrak, kuht kuh in sramsram nuh sin sucu ac kawuck lasr ke ma kuht oruh ke Sacnri. Kuh kuht kuh in fahk nuh selos ke engan ma kuht puhlakihn ke kuht kuhlwacnsapuh mwet sahyac. (Liye Dieter F. Uchtdorf, “Orekma luhn Misineri: Akacsrhi ke Ma An Insiom,” Liahona, Mei 2019, 15–18.)

Suli Mwet Sahyac in Wi Kuht

Kuht kuh in suli mwet sahyac in lutlutkihn wosasuc. In mwe srihkasrak, kuht kuh in solwelos in tuhkuh wi toeni ke Alu kuh mukwikwi, riti Puk luhn Mormon, liye video luhn Alu uh, kuh muhtwacta yurun misineri. Ma orek inge kuh in kahsrelos in puhlakihn Nguhn ac kena in lutlut pac.

Siyuck ke Ma Elos Puhlakihn

Tukun kawuck ac sucu an tuhkuh wi alu kuh lutlut sin misineri an, kuht kuh in siyuck selos ke ma elos puhlakihn. Kuhtuh mwe luti ke wosasuc sahp sasuc nuh selos, pa sis kuht kuh in topuk kihsensiyuck lalos. Kuht kuh in ahkkahlwemye luhngse ac kahsruh lasr ke insacnweacng lalos in tuhkuh nuh yurun Kraist.

Ahkyohkye Luhlahlfongi Lalos

Kuht sekoi ac ahkfuhlwactye luhlahlfongi luhn mwet sahyac, ac kuht srihke in ahkyohkye luhlahlfongi ma oasr yohrohlos tari. In mwe srihkasrak, sie kawuck suc puhlakihn wo ke ma sihmlac ke Pwacpuhl kuh pac in puhlakihn wo ke mwe luti ma kuht akacsruhi kac ke Puk luhn Mormon.

Kahsruh Mempuhr Sasuc ke Alu uh

Ke mwet uh welah Alu uh, kuht kuh in kahsruh ahkkweyeye luhlahfongi lalos. Kuht kuh in kawuck lalos, topuk kihsensiyuck lalos, ac kahsrelos ke elos eis kunohkohn. Kuht kuh in ahkweyaclos in tahfwelah fahsr na tukun Jisus Kraist ac lutlut ke wosasuc Lal.

Kuhlwacnsap Full-Time ke Misin

In weacng akacsruhi ke wosasuc ke moul lasr pengana lwen, mempucr ke Alu uh kuh in pahngyak in kuhlwacnsap oa full-time misineri. Elos fin ahkolah, mukul fuhsr an kuh in sa na kuhlwacnsap ke matwac yac 18. Muhtwacn fuhsr ac mwet mahtuh kuh pac in kuhlwacnsap. Kom kuh in sokwack kuhtuh pac kahsruh kac an ke ChurchofJesusChrist.org/callings/missionary.

Ke Ma Suhmuhslah

Jisus Kraist El sapkihn mwet tuhma lutlut Lal in akacsruhi ke wosasuc nuh sin mwet nuhkwewa (liye Mark 16:15).

Elos suc pahngyak in kuhlwacnsap an enenuh in oruh ke insiaclos, kuhiyaclos, nuhnkwaclos, ac fokokoiyaclos kwewa (liye Doctrine and Covenants 4).

Kuht fah engan yohk ke kuht kahsruh in pwacnma mwet sahyac nuh ke wosasuc (liye Doctrine and Covenants 18:15–16).

Mwe Kahsruh Online

“Nga kuh in sang fuhkah Puk luhn Mormon nuh sin sie kawuck?” “Ngac oruh fuhkah kawuck se luhk in toeni yurun misineri?” Kihsensiyuck inge ac kuhtuh pac sahyac topukyucklac oasr ke ChurchofJesusChrist.org/share.

Laepracri ke Wosasuc oasr (ke {ChurchofJesusChrist.org kuh orekmakihn app ke phone an) oasr mwe kahsruh loac ac, weacng pac ip yohk ke luhlahlfongi lasr uh. Sulaclah “Akacsruhi ke Wosasuc” in lutlut kac ac in akacsruhi fuhkah kac.

In lutlut pac ke ahkkweyeyacn mempuhr sasuc, liye ke Laepracri ke Wosasuc ye “Handbooks ac Kunohkohn” ac na fah “Kunohkohn ke Ward ac Pracns.”

Sokwack Kuhtuh Pac

Fin oasr kihsensiyuck lom ke akacsruhi ke wosasuc, kom kuh in sramsram nuh sin tamuhlwel ac tahmtahel ma karihngihn kom an, mwet kol ke ward kuh pracns lom an, kuh nuh sin misineri an.

© 2023 sin Intellectual Reserve, Inc. Suwohs nuhkewa fihliyucki. Printiyucki fin acn USA. Ahkkweyeyucklac ke Englishg: 6/19. Ahkkweyeyucklac ke lweng: 6/19. Lwenglah luhn Pweng ke Kais Sie Mahlwem, Julahe 2023. Language. 19045 000