Luhngse, Akacsruhi, Suli
Ke kuht luhngse, akacsruhi, ac suli, kuht eis ma kunacsr ke orekma usrnguck ac wolacna se ma ahkoeyuck facluh nuhke fohlohk luhn Messiah.
Wiyuc nuhnkuh, ke kihtihn pacl, tulac ke finohl soko Galilee, liye wolacna ac kahtoiyacn sifil moulyak luhn Mwet Lahngo muhtwacta yurin mwet tuhma lutlut Lal. Yohk nuhnak ke lohng kahs inge uh, suc El akacsruhi nuh selos, sap fokoko se Lal in “som, ac luti muhtuhnfacl nuhkwewa, pacptais elos lac ke inen Pahpah, ac Wen, ac Nguhn Muhtahl.”1 Pwacyena lah kahs inge ahkfokokoye, ahknuhnakye,ac moklwe kais sie sesr, oacna ke elos oruh Mwet Sap Lal. Ahok, elos kihsackuhnlah moul lalos in oruh ma ingacn.
Usrnguckiyac uh, tiac mwet Sap inge muhkwena eis kahs luhn Jisus nuh insiaclos. Mempucrs meet ke Alu uh, ke sasuciyacn ac puhlan pacl se emet ah, elos oruh ip lalos ke sap se luhn Mwet Lahngo inge, akacsruhi pweng wo ke wosasuc nuh sin mwet elos ohsun nuh se ac etuh. Srihpac yohk lalos in akacsruhi ke luhlahlfongi lalos ke Jisus Kraist kahsruh Alu sasuc Lal in kapkapwack.2
Kuht pac, ekihn mwet tuhma lutlut luhn Kraist, suliyuck in lohacng nuhke sap Lal mihsenge uh, oruh in muh kuht oasr finohl Galilee ke pacl se El ahkkahlwemye ah. Sap se inge sifil pac muhtacwacack ke 1830, ke Joseph Smith el sulwaclah tamuhlwel se wiyacl Samuel in ekihn misineri se ke pacl sac ke Alu luhn Jisus Kraist.3 Ke pacl se ngacn, puhs liki na miliacn 1.5 misineri tuh forfor nuh fin facluh in luti muhtuhnfwacl nuhkewa ac pacptais elos lac suc eis pweng wolacna se ke fohlohkyak luhn wosasuc.
Pa inge mwe luti lasr uh. Kena fokoko se lasr uh.
Muhtacwacaack yurin tuhlihk srihsrihk nuh ke mwet mahtuh inmahsrlosr, kuht finsrakkihn nuh ke pacl se kuht kuh in lohacng nuh ke pahng luhn Mwet Lahngo ac akacsruhi wosasuc nuh sin muhtuhnfwacl facluh. Nga etuh kowos muhtacn fuhsr ac mukul fuhsr an puhlakihn pac kuh se yurin mwet pahluh ekeah ke el ngihsre kowos in ahkolah in oruh kuhlwacnsap ekihn misineri oacna ke Mwet Lahngo El oruh nuh sin Mwet Sap ah.
Oacna ke mwet kahsruhsr se ahkolah in oruh kasruhsr lal, kuht rahrahlac tuhpan pahng lasr uh, ahksahfyeyucklac ke sain luhn mwet pahluh, fahk lah ngac muhtacwacack kahsruhsr sacn! Kena se inge yohk suhnak kac ac yohk luhngse; tuhsruhk, lwelah kuht in nuhnkuh kihsen siyuck se: efuh kuht kwewa muhtwacwacack ingena?
Sahp kom ac siyuck, “Kuh nga ac misineri fuhkah ke wacngihn ine se an keik uh?” Kuh kuht fahk nuh sesr, Misineri ma kuhlwacnsap yac luo uh akmuhsralah in oruh orekma se inge. Nga luhngse kahsruh tuh sahp fah tok tuhpan in mihsi kuhtuh moul se inge.”
Tamuhlwel ac tahmtahel, kuh in fihsracsr liki na ngacn! Kulohlacna, nguhsr luhn Mwet Lahngo kuh in ahkfahsryeyucklac ke ma na kahlwem, mwe luti fihsracsr lutiyuck kuht kais sie ke kuht srihk ah: luhngse, akacsruhi, ac suli.
Luhngse
Ma se omeet kuht kuh in oruh pa luhngse oacna luhngse luhn Kraist.
Insiacsr toasr ke keok ac welac ke ma mwet oruh kuht liye facluh ke pacl na upac se inge. Tuhsruhktuh, kuht kuh in puhla moklweyuck pac ke pahkomuhta yohk ac kahsruh luhlahp kuht liye yurin mwet puhkantwen ke elos kampare in kahsruh mwet enenuh—elos suc itucklac liki lohm selos, maelihk liki sucu lalos, kuh puhlakihn ohiyac ahsor ac keok sahyac.
Ingena, sruhmuhnyuck kuht lohng u in ninac se fin acn Portland, puhlakihn elyah yohk sin sucu ma som liki acn selos, tahkuhnlah mwe kahsruhsr ukacn ahwowo ke acn in train ah, an ahkolah ac sano ninac ac tuhlihk ma tuhkuh liki acn selos inge in orekmakihn pacl se elos srolah ke train ah. Pacyena, Pahpah Tuhmasr el engan ke ohiyacn luhngse se elos oruh inge, tuh ke kuht akacsruhi ke ma toasr luhn kais sie, kuht “akfalye ma sap lun Kraist.”4
Pacl nuhkewa kuht oruh luhngse luhn Kraist nuh sin mwet tuhlan wiacsr, kuht luti ke wosasuc—finne kuht tena fahklah kahs se.
Luhngse mwet sahyac el atac na fokoko se ke masap fuhlwact ahkluo pa in luhngse mwet tuhlan;5 oruh kahlwem orekma luhn Nguhn Muhtahl ke moul lasr. Ke kuht oruh luhngse luhn Kraist nuh sin mwet sahyac, kuht oruh mwet sahyac in liye orekma wo lasr ac “kaksakin Papa [tuhmasr] suc inkuhsrao.”6
Kuht oruh ohinge ac tiac tuhpan fohlohkinyac uh.
Finsrak lasr, ke pwacye, pa elos fah eis luhngse lasr, tuh ma elos sulaclah tiac ma lasr.
Ma kuht oruh ac suc kuht uh pa elyah uh.
Ke luhngse pwacye luhn Kraist nuh sin mwet sahyac, kuht luti ma wolacna, eklac se ke moul ke wosasuc luhn Kraist, ac kuht wi ahkfahsrye in oraclah sap se Lal ah.
Akacsruhi
Ma se ahkluo kuht kuh in oruh pa akacsruhi.
Ke mahlwem ekahsr emeet ma sikyak mas se pahngpahng COVID-19 inge, Tamuhlwel Wisan fin acn Thailand el luhngse akacsruhi puhla ac nuhnak lal ke ma el lotwelah ke el lutlut ke Puk luhn Mormon ke social media account lal ah. Sie ma el sang ke sihm lal ah, el akacsruhi sramsram soko ke misineri luo ke Puk luhn Mormon, Amulek ac Alma.
Tamuhlwel se wiacl, Winai, fokoko ke luhlahlfongi lal ke alu lal, el luhngse ma se el sihmihs inge ac el sihm nuh sel, siyuck, “Nga kuh in eis puk se ngacn ke kahs Thai?”
Wisan el suhmaht sang Puk of Mormon sac nuh sin muhtwacn misineri luo, suc muhtacwacack luti tamuhlwel se wiacl inge.
Oasr pacl ma Wisan el wi lutlut, suc el akacsruhi puhla lal ke Puk luhn Mormon. Winai el lotwelah in pruhe ac lutlut kihn in suk nguhn pwacye, in eis ac sruokyac ma pwacye. Sun mahlwem se ma, Winai el pacptaislac!
Tok Wisan el fahk, “Ma kunacsr in pa sie kuhfa ke poun God, ac kuht enenuh in ahkolah nuh Sel pacl nuhkewa in oruh orekma Lal ke inkacnek Lal yohrohsr.” Ma usrnguck se ke sucu lalos uh tuhkuh ke srihpen Wisan el akacsruhi ke ohiyac na fal ac tena okahrkahr.
Kuht nuhkewa akacsruhi ma uh nuhsin mwet sahyac. Kuht kacna oruh. Kuht akacsruhi petsac mukwikwi ac mongo kuht luhngse, ma pacr kuht liye, acn kuht muhtwacta kac, sral kuht kahtokihn, pohloh kahs ma moklwe kuht.
Ac fuhkah kuht fin sang nuh ke ma kuht luhngse muhta akacsruhi inge ma kuht luhngse ke wosasuc luhn Jisus Kraist?
Elder Dieter F. Uchtdorf el ahkuhtweyac: “Fin oasr mwet siyuck lah fuhkah wiken lom, nimet ahlohloh in akacsruhi ma kom puhla ke alu ah. Sruhmuhn tuhlihk srihsrihk ma tu e meet ke alu ah ac on ke engan lah meac elos e oruh in oacna Jisus. Sruhmuhn u in tuhlihk fuhsr se ma sislah pacl lalos in som nuh ke acn luhn mwet mahtuh ac kahsrelos oraclah tahk in sucu.”7
Akacsruhi tiac pa “kuhkackihn” wosasuc. Kowos tiac enenuh in suhmuhslah alu se kuh ahksuwohsyelah tahfonglac se luhn mwet se.
Ke pacl se e tuhkuh nuh ke orekma luhn misineri, God El tena enenwe kowos in sracrif Lal, tuhsruhk, El, ngihsre kowos in mwet ahkacsruhi Lal.
Ke kuht akacsruhi ma wowo kuht puhlakihn ke wosasuc nuh sin mwet sahyac, kuht oruh ip kunwacsr in ahkfahsryelah sap kuh se luhn Mwet Lahngo ah.
Suli.
Ma se ahktolu kuht kuh in oruh uh pa suli.
Tahmtahel Mayra el tuhfahna in welah alu uh fin acn Ecuador. Engan lal ke wosasuc uh upac oruh tukun na el pacptaislac ah el suli kawuck ac mwet sacohk lal ke social media account lal ah. Puhslac sucu ac kawuck lal liye ma el sihmihs inge ac kihsensiyuck kac. Mayra el muhta sramsram nuh selos, kacna solwaclos nuh lohm sel in ohsun sin misineris.
Ninac kiacl ac pahpah tuhmacl Mayra, tuhlihk wiyacl, uhnti se lal, kuhsin luo lal, ac kuhtuh sin kawuck lal ah pacptaislac ke srihpen puhlaik lal in solwaclos in “tuhkuh ac liye,” “tuhkuh ac kahsruh,” ac “tuhkuh ac weacng.” Ke na solsol fihsracsr ac kahlwem se lal inge, puhs liki na mwet 20 eis nguhsr lal in pacptaislac mempucrs ke Alu luhn Jisus Kraist. Ma se inge tuhkuh ke srihpen Tahmtahel Mayra el suli mwet sahyac in wi puhlakihn engan se el puhla ekihn mempucr se ke Alu uh.
Oasr ke foko solsol kuht kuh in oruh pac nuh sin mwet sahyac. Kuht kuh in suli mwet sahyac in “tuhkuh ac liye” ke ahfkahsryeyuck kuhfa luhn Leum, toeni se ke ward, petsac se orek ke internet ahkuhtweyac wosasuc luhn Jisus Kraist. “Tuhkuh ac liye” kuh in solsol se in riti Puk luhn Mormon kuh muhtwacta nuh ke sie tempuhl sasuc ke pacl se tuhfahna ikacklah aluiyuck uh. Kuhtuh pacl uh solsol kuht oruh uh kuh in tuhkuh loac me—pa nuh ke kuht suli kuht sifacna, in liye lah mac elyah ac meac kuht liye ke ma rauni kuht lac, ac meac kuht ac oruh kac.
Ke pacl se lasr inge, mempucrs uh kacna akacsruhi ma se ke social media. Oasr ke foko, ac sun tausin, ke ma wo pucspucs kuht kuh in sokwack yohk srihpac in akacsruhi kac. Ma loac inge nwacnwack nguhsr se in “tuhkuh ac liye,” “tuhkuh ac kahsruh,” ac “tuhkuh ac wi.”
Ke kuht suli mwet sahyac in luti yohk ke wosasuc luhn Jisus Kraist, kuht eis ma kunwacsr ke pahng se luhn Mwet Lahngo in wi oruh orekma se El sapkihn ah.
In ahksahfye
Tamuhlwel ac tahmtahel sacok wiyuck, kuht sramsram mihsenge ke ma na kahlwem tolu—ma na fihsracsr—ma mwet nuhkwewa kuh in oruh. Ma kom kuh in oruh! Sahp kowos oruh tari ma inge—finne tiacna akihlen lah kowos oruh!
Nga suli kowos in nuhnkuh ke ohiyac ma kowos kuh in luhngse, akacsruhi, ac suli. Ke kowos oruh, kowos fah puhla luhpan engan se etuh lah kowos lohng kahs luhn Mwet Lahngo sacoklacna.
Ma se nga kena kowos in oruh tiacna nguhsr sasuc se. Kowos lohng ke ip yohk inge meet. Tiac pac inge “ma yohk se tok” Alu uh ngihsre kowos in oruh. Ma tolu inge kahsruh in ahkkohnye lah suc kuht uh ekihn mwet tuhma lutlut luhn Jisus Kraist.
Wacngihn ine sihmlac an kacsr kuh lacta ma enwenweyuck.
Wacngihn pahng enwenweyuck.
Ke ma tolu inge muhtacwacack in sremlah kacsr lah suc kuht uh kuh fuhkah muhta lasr uh, elos ac sifacna fahsr, ac kuht kuh in akihlen luhngse.
Oacna mwet sap lun Kraist ma toeni nuh sie in eis etwack Sel Galilee ke yac 2,000 somlah ah, kuht kuh pac in sruokyac sap se luhn Mwet Lahngo inge ac som nuh fin facluh nohfohn ac luti ke wosasuc.
Ke kuht luhngse, akacsruhi, ac suli, kuht eis ma kunwacsr ke orekma usrnguck ac wolacna se ma ahkoeyuck facluh nuhke fohlohk luhn Messiah.
Lwelah kuht in lohng pahng luhn Mwet Lahngo ac insacnweacng in wi oruh orekma wolacna se Lal inge pa pruhe luhk ke inen Jisus Kraist, amen.