Tuhsruhk Kuht Tiac Lohacng Nuh Selos.
Wuhlwelah ac akwuck lasr uh pwen kuht ac kahsre kuht in esam kuhpahsr lasr nuh sin Jisus Kraist ke kuht kampare fahsr ke inkacnek in wuhlwelah.
Muhtwacn kiuck, Susan, tuhlihk mukul tolu nahtuhsr ac muhtwacn kiaclos, nuhtin tuhlihk nahtuhsr nohfohn, ac Elder Quintin L. Cook, suc muhta siskuck ke U luhn Mwet Sap Singucul Luo apkuhran in yac 15, elos nohfohn insese etuh lah tiac wo puhsrek ke on uh. Tuhsruhk nga ne tena pihsrlac ke on uh, nga luhngse yuck on ke Fohlohkyak se. Kahs usrnguhk ke on inge ac ahiyacn on inge tuhkweni kahsre yuc in lotwelah yohk srihpaciyacn wosasuc ac pihrihk nguhnihk.
Sie on in alu ma ahkinsewowoye moul luhk ke ma puhkantwen pa “Lela Kuht Nuhkwewa in Kacfweacng.” Pacl fototo somlah ah nga motko ac lutlut kihn pohloh kahs se kalweniyuck na ke on in alu soko ah. “Kuht ac fah tiac lohacng lah mac ma koluk uh ac fahk, tuhsruhk Leum muhkwena kuht ahkos.”1
Kuht ac fah tiac lohacng.
Ke nga onkihn “Lela Kuht Nuhkwewa in Kacfweacng nuh Met,” nga kwacna nuhnkuh ke mwet ke mwemwe lal Lehi ah ke elos fahsr na nuh met ke inkacnek se nuh ke sahk in moul suc elos tiacna “sruokyacna nuhkac”2 tuhsruhk elos “tahfwelah na in lihksrweni sruokyac osra soko ah, ne ke na elos tuhkuh ac puhtati nuh ten ac ipeis ke fukun sahk ke sahk soko ah.”3 Lehi el ahkuhtweyac mwet puhs ke lohm luhlahp ac mwesahs sac ke elos srihsrngi “kihfihn paho in [isruhnuhl] ac elos suc … ipeis ke fukun sahk sac .”4 Top lal nuh ke isruhn ac ahkoluk ah sun na pwacye ac mwe esamyuck: “Tuhsruhk kuht tiac lohacng nuh selos.”5
Nga pruhe tuh Nguhn Muhtahl fah ahinsewowoye ac ahkenganye kais sie ke kuht tuhkweni nuhnkuh lah meac kuht enenuh in oruh in fokoko in “tiac lohacng” nuh ke ohiyac koluk ac puhsra in ahkpuckpuck ke moul se kuht muhta kac inge.
Tiac Lohacng
Kahs se inge lohacng som yohk nuh ke liye kuh tuni mwet se kuh ma se. Na, kahs ke on in alu “Lela Kuht Nuhkwewa in Kacfweacng nuh Met” luti kuht in oraclah sulwaclah fokoko in tiac lohacng nuh ke “ma koluk uh fahk uh.” Ac Lehi ac mwet weluhl ipeis ke fukun sahk soko ah oakiyac srihkasrak wowo se in tiac lohacng nuh sin mwet isruhnuhlos kuh ahkkolukyaclos ma tuhkuh ke lohm luhlahp ac mwesahs sac.
Mwe luti luhn Kraist sihmlac “ke Nguhn luhn God moul … ac keikoacn tepuh luhn [insiacsr]”6 ahkyohkye luhpan “tiac lohacng” lasr nuh ke mwe lusrohngtwen puhkantwen, kahs in puhrakwack, ac eklac luhn facl se inge. Sie mwe srihkasrak pa, luhlahlfongi pwacye ke ac kacl Leum Jisus Kraist use fokoko luhn nguhnasr. Luhlahlfongi ke Mwet in Molwelah pa sie ohiyac nuh ke mukwikiwi ac kuh uh. Ke kuht orekma fal nuh ke pwacyeiyacn wosasuc Lal, kuht ahkinsewowoyeyuck ke wolacnaiyacn nguhn in fahsr na nuh met fine asr ma lain kuht ke moul kawihl se inge ac siyac na engan ma mwet Molwelah El use nuh sesr uh. Pwacyena “fin kuht oruh wo kuht fah tiac sahngeng, tuh Leum lasr, El tiac loeslac nuh yohrohsr.”7
Kuhpahsr se lasr sifacna ke Wuhlwelah
Ilyak nuh ke wuhlwelah muhtahl ac nwacsnwacs in eis akwuck luhn pristut eis kuhtyang ac kapri kuhti nuh sin Leum Jisus Kraist ac Pahpah Inkuhsrao.8 Kalmac pa kuht luhlahlfongi Mwet Lahngo in pa Mwet Iwe lasr9 ac Ahkmihs10 ac luhlahlfongi ke orekma wo pahkotwen, ac kuhlwacng Lal11 ke moul in fuhfahsryucsr se. Ke kuht kampare in fahsr nuh yurin Kraist ac orekma Siskacl, kuht puhla nwacsnwacslah, onweyucklac, ac mwe insewowo ahkfokoyeyuck ke Iwaclah ne tok ac wacngihn sahflahiyac Lal uh.12
Moulkihn ac luhngse wuhlwelah kuht oakiyac oraclah kuhpahsr se lasr nuh sin Leum suc ma na nuh sin sie sie ac fokoko nguhn kac. Ke kuht ahkmuhtahlye yohk srihpaciyacn wuhlwelah muhtahl ac akwuck, kuht kahkahsrihk ac kais kuhtuh in fototoeni nuh Sel13 ac puhlakihn wolacnaiyacn kahsruh Lal ac moulkihn ma pwacye ke moul lasr. Jisus El sruhmuhnyuck yohk liki na inkaiyen mwet fwackyuck ke ma suhmuhslah; srikasrak ac luti Lal ahkngengye kena, nuhnak ac mukwikwi lasr.
Nga kena ahkahlwemye lah nga tiac kuh in lihksreni ahkuhtweyac na pwacye ke ma facluh uh ac ke wuhlwelah lasr ma kuhpasr nuh ke fohlohkyak ac Wen moul nuhtin God. Tuhsruhk nga fahk na pwacye lah kuhpahsr Lal ac Pahpah Inkuhsrao uh pwacye ac olwelah pwacye se ne tok, mihs, engan, ac fokoko luhn nguhn in oruh kuht in “tiac sangeng, tuh lokoalok finne tuhkuh.”14 Ke kuht oruh-wuhlwelah ac sruok-wuhlwelah Lal Jisus Kraist, kuht kuh in ahkinsewowoyeyuck in eis “puhlaik, tuh Leum El oasr siskacsr”15 ac tiac lohacng nuh ke ma koluk ac kahs in ahkkoluk.
Ke nga muhtwacta yurin mempucrs ke Alu uh fin facluh nohfohn, nga kwacna siyuck selos kihsen siyuck se inge: meac kahsre kom in “tiac lohacng” nuh ke mwe pacr luhn facluh, isruhn, ac aksruhksruhk? Top lalos ah yohk na pwacye kalmac.
Mempucrs puhlaik elos kwacna srwelah pacl yohk in suli kuh luhn Nguhn Muhtahl nuh ke moul lalos in lutlutkihn ma suhmuhslah, sikalweni in pruhe, ac ahkolah wo in eis akwuck ke kuhfa luhn Leum. Sie pac ma fwackyuck yohk ah pa kahsruh luhn nguhn yurin sucu fokoko ac kawuck pwacye, mwe lutlut yohk srihpac se lutiyucklac ke luti ac kuhlwacnsap ke Alu fohlohkyak luhn Leum, ac yohkiacna akihlen in liye lah alal kuh wacngihn ma tuhkuh ke lohm luhlahp ac mwesahs sac.
Nga akihlenyac pactuhn se ke top luhn mempucrs inge suc yohk na pwacye srihpac. Ma se emet ac yohk srihpac an pa, oasr testimoni fokoko luhn mwet tuhma lutlut inge ke placn in engan luhn Pahpah Inkuhsrao ac kunohkohn Lal Jisus Kraist ekihn Mwet in Molwelah ac Mwet Lahngo lasr. Ac ahkluo, nguhnin etuh lalos ac ma elos oraclah ma na nuh sin kais sie, mwet se, ac arulacna kahlwem; tiacna yohklac ac ahkuhtweyucki wo. Nga lihpsre ke mwet inge sruhmuhn ke wuhlwelah ma ahkweyaclos in kuhtanglah mwe sruhf ac kuhpahsr lalos nuh sin Leum moul suc kahsrelos ke pacl wo ac koluk. Nuh sin mwet inge, Jisus Kraist el Mwet Lahngo lalos sifacna.
Wuhlwelah ke wosasuc ac akwuck uh orekma nuh ke moul lasr oacna in compass se. Compass el device se ma ahkahlwemye suwohsiyacn eir, epang, kuhtuhlacp, ac rohtoh nuh ke fahsr luhn oak ac puhlan pacl wo ke oak ke pacl nuhkewa. In oacna kain sacn, wuhlwelah ac akwuck lasr uh pwen kuht ac kahsre kuht in esam kuhpahsr lasr nuh sin Jisus Kraist ke kuht kampare fahsr ke inkacnek in wuhlwelah.
Acn na pwacye se kuht nuhkwewa enenuh in fahsr nuh kac ke moul se lasr facluh inge pa in tuhkuh nuh yurun Kriast ac ahksuwohsyeyucklac Kacl.16 Wuhlwelah muhtahl ac akwuck uh kahsre kuht in siac na Mwet Lahngo ac fasrweacng, ke kuhlwacng Lal,17 in muh oacna El. Ma na pwacye uh pa, “po kuh lucng ac fah kahsre yuc ac kom ke srihpac wo suwohs.”18
Lihksreni Sruokyac Osra uh
Wuhlwelah kuhpahsr lasr nuh sin God ac Jisus Kraist el inyac soko ma kuht kuh in eis luhpah ac fokokoiyacn “tiac lohacng” lasr. Ac kuhpahsr se inge fokokoi ke kuht sikalweni in sruokyac na kuh osra uh. Tuh ke tuhlihk wiyacl Nephi ah siyuck ah, “Meac kalmeyacn osra soko ma pahpah tuhmwacsr el liye … ?
“Ac [Nephi] el fahk nuh selos lah ma sacn pa kahs luhn God; ac elos suc porongo kahs luhn God, ac lihksreni na sruokyac, elos ac tiacna misac: ac mwe sruf ac mwe pihsr fihrihr luhn mwet lain tiac pac kuh in kuhtanguhltahllah elos in lohsrlah, in kohlohloslac nuh ke kuhnahoslah.”19
Nuhnak muhnahs esam lah ohiyac se in kuhtanglah mwe sruhf ac mwe pihsr fihrihr luhn mwet lain kuht uliyucki tari nuh selos suc “lihksreni na sruokyac” liki na in kahkahsrihk “sruokyac” kahs luhn God.
Sihmlac pac, mwet Sap John el ahkuhtweyac lah Jisus Kraist pa Kahs.20
“Ke muhtacwack oasr Kahs, ac Kahs muhta yurin God, ac Kahs God. …
“God El orala ma nukewa kacl.Wangin kutena ma orekla saya, fin tia ke Kas. …
“Ac Kas el ekla mwet ac muta inmasrlosr, (ac kut liye wolana Lal, wolana su el eis ke sripen el Wen sefanna nutin Papa,) sessesla ke kulang ac pwacye.”21
Pwacnacng oruh, sie e lal Jisus Kraist pa “Kahs.”22
In tahfelah, ke Ip Yohk ke Luhlahlfongi alkosrfahk, “Kuht luhlahlfongi ke Bible muh kahs luhn Godfin lwenglah wo; kuht oacyacpac luhlahlfongi muh Puk luhn Mormon kahs luhn God.”23
Oacyacpac, mwe luti luhn Mwet Lahngo, ma sihmlac ke ma suhmuhslah muhtahl, elos “kahs” pac.
Lwelah nga in ahkahlwemye lah sruokyac in kuh kahs luhn God pa nuhke (1) esam na, ahkfuhlwactye, ac ahkfokokoye kuhpahsr lasr kais sie nuh sin Mwet Lahngo ac Pahpah Tuhmacl ke wuhlwelah ac akwuck ke fohlohkyak luhn wosasuc se inge, ac (2) sikaleni, inswacneacng, ac pruhe pacl nuhkwewa orekmakihn ma suhmuhslah muhtahl ac mwe luti luhn mwet pahluh moul ac mwet tuhma lutlut suc ma inge pa ma pwacye in ahkkahlwemyeyuck uh. Ke kuht otwelah in “sruokyac na kuh” nuh sin Leum ac eklac in moulkihn mwe luti Lal,24 Nga olwelah lah kais sie ac kuht nuhkewa ac fah eis insewowo in tu ke acn muhtahl, ac tiac mukwilac.”25 Kuht fin muhtana yurin Kraist, na El ac muhta yohrohsr ac wi kuht fahsr.26 Pwacyena, “ke lwen in nuhnuhkuh Mwet Luhlahlfongi Lal fah sasa, ahkkahsruhpye ke suwohs.”27
Fahkwack luhlahlfongi
Ahkwot nuh meet. Sruokyac na. Tiac lohacng.
Nga etuh lah pwacyeiyacn wuhlwelah ac akwuck ke fohlohkyak luhn wosasuc ke Mwet Lahngo ac kasre kuht in fahsr nuh meet ke orekma luhn Leum, in sruokyac na kuh nuh Sel ekihn Kahs luhn God, ac in tiac lohacng nuh ke ma okahrkahr lain kuht. Ke lainyacn ma pwacye, lwelah kais sie in us mwe mweun nahtuhsr, finne “mitmit luhn suwohs,”28 ke ine muhtahlacna luhn Leum Jisus Kraist, amen.