Tiac Sahngweng: Luhlahlfongi Muhkwena!
Muhtwacwacack suk engan ke sruokyacn ma oasr yohrohsr ingena ma kuht eis sin El suc use mwe sang wo nuhkwewa.
Sramsam luhk mihsenge uh ma nuh sin mwet fuhsr ke Alu uh, kalmac pa mwet nuhkwewa ma matwacl oacna Prestuhn Russell M. Nelson kuh fuhsr liki. Nga suhkwac orekmakihn petsac, tuhsruhk petsac se inge nga tiac kuh in tiac akacsruhi kac.
Cri de coeur tuhkuh yurin kawuck yac-alkosr se luhk Marin Arnold, sihmlac ke el yac itkohsr ah. Nga ac tuhfah luhngaslah nuh sum kahs Egypt lal inge:
Pisap Sacohk
toeni luhlahp
Tena Pwacr efuh
Kuh kuht enenuh in
oruh? fahk nuh sihk lah efuh
Ke inse pwacye, Marin
Arnold.1
Koacl, Marin, sramsram se ma nga ahkolah in usot nuh sum inge ac oruh kom suhpwacrlac pac. Tuhsruhk ke kom sihm nuh sin pisap lom in tohrkahskahs uh, yohk srihpac kom in fahk nuh sel muh inek pa “Kearon. Elder Patrick Kearon.”
Apkuhran in yac luo ma sihmlac ke Bible uh sikyak fin facluh nohfohn, ac ke pacl se inge tilokihnyucki apkuhran in ma nuhkwewa, tiacna tilokihnyac acnwuck, ahkmas, ac fohs ahkkoluk luhn acn se. Oacna in tiac fal ma inge, kuht srwackna sun ma upac ke toeni ac facsin lasr, ma ke srihkeni ohiyacn sruh mani nuhke kuhnanuclac luhn acn sesr ac srisri inmahsrlon mwet uh.
Kain eng upac ac lwen lohsr inge kuh in ahkmuhnahsye mwet fuhsr inmahsrlosr inge, elos suc kuht ngwet nuh se in use kahlwem ac kuh nuh sesr nuhke pacl fahsruh uh. Fwackyuck tari lah “kuh luhn mwet fuhsr pa mwe kahsruhp luhn facluh nohfohn. Mwet fuhsr uh … pa muhtuhn … pacl fahsruh lasr uh.2 In weacng pac, tuhlihk nahtuhsr uh pa pac ac liyacacng Alu uh ke pacl se kuht muhnahslah uh.
Utuckuh pacl lasr ingena uh, kuht kahlwem kac lah efuh srihpac luhn mwet fuhsr uh srihkeni kuhtuh. Dr. Laurie Santos, mwet luti se ke University luhn Yale, el oraclah kuhlahs se pahngpahng Psychology ac Moul Wo. “Yac se emet ma kuhlahs se inge orek ah, apkuhran in sun [kohtoh-sie] sin nohfohnna tuhlihk ma sonna eis tikri lalos eis kuhlahs se inge.3 Ahluhkwelah mwet miliacn 64 sroacng nuhke podcast lal uh. Sie mwet sihm el sihm fahk lah el kweok ke el liye arulacna puhkantwen mwet fuhsr lahlmwetmwet—ac mahtuh—“suk ke sie ma tuhlac lalos”, kuh upac liki na, kena in suk sie ma sonna oasr lalos.4
Mwe nguhsr luhk nuh sin mwet fuhsr lasr uh, ac nuh suwos ninac ac pahpah ac mwet mahtuh ma liyaclos uh, pa in muhtwacwacack suk engan ke sruokyacn ma oasr yohrohsr ingena ma kuht eis sin El suc use mwe sang wo nuhkwewa.5 Ke pacl se na inge puhkantwen mwet fin facluh siyuck kihsensiyuck na loal, ma kuht enenuh in topuk ke “pweng wo”6 ke wosasuc luhn Jisus Kraist. Alu luhn Jisus Kraist luhn Mwet Luhlahlfongi ke Lwen-sahflah, suc sruokyac yohk sripaciyacn mwe fahkwack luhn Mwet Lahngo luhn facluh, use sie inkacnek na wo in sokwack kewana ma wo ac oruh ma wo ke pacl ma enenweyuck uh.
Prestuhn Russell M. Nelson el tuh fahk lah fihl se luhn mwet fuhsr inge pa yohk kuh lalos in “oruh [ma wo] fin facluh se inge liki na fihl ke pacl met ah.”7 Inmahsrlon mwet nuhkwewa, kuht enenuh in onkackihn on in luhngse molwelah,”8 tuhsruhk enenuh kaiyuck—“elah wo”—fin kom luhngse—kain elah se ma karingihn kuht liki elah koluk ac ohiyac koluk ma ac ul kuht lac liki puhsra suwohs ke kuht srihke in onkackihn on in molwelah uh.
Finne kuht muhta na “ke acn se ma kahlwem ke inkacnek uh,”9 kuht kuh in fihlfihl in ohsun nuh sin mwet se suc ma sulaclah sie ma suhpwacr ac sie ma tena wo ke ma nuhkwewa. Kom etuh mwe fahk lal: “Lohsr na upac ke pacl nuhkwewa ac lohsrlah uh.” Fuhkah kolukiyacn araruhma ac kweokiyacn muhta se inge! Aok, kuhtuh pacl uh kuht ac ke kahinglac liki acn se kuht oasr kac uh, tuhsruhk enenuh kuht in tiac kahinglac liki kuht—tuhlihk nuhtin God suc luhngse kuht, ac El ahkolah in nuhnak muhnahs nuh sesr pacl nuhkwewa, ac El ac fah tiacna sis kuht lac. Kom pa tuhlihk sacohk se Nahtuhl emet uh. Kom pa tuhlihk Nahtuhl, suc El sang nuh se mwet pahluh ac olwelah puhs, mwe sang muhtahl ac fwackyuck, mwenmwen ac mwe fahkwack, ac lipufacn ke kwewana siskac ke mwe lihsrlihsr sac.10
El oacyacpac usot nuh sum alu se ma ahkfokokoye sucu ke moul se inge ac sruokyac sucu uh in toeni ne tok ma pahtpaht. Aluhkwelah ward ac pracns 31,000 ma mwet uh som tuhkweni we, on, lalo, ac pruhe luhn kais sie sie ac sang ma lalos in kahsruh mwet suhkahsruhp. Pa inge acn ma mwet nuhkwewa ituhkyang ine la, ac lutiyuck, ac kawuck ac mwet tuhlan uh sifacna kohkoh po in kuhlwacnsuhpuh mwet sahyac ke pahng lalos ke orekma luhn klerk nuh ke orekma luhn mwet ahknwacsnwacs. Mwet mahtuh— ac siyacnyacn mahtuh—elos kuhlwacnsap ke misrin ac elos tiac etuh lah elos ac som nuh oyac, ac mwet fuhsr weacng mwet mahtuh uh som nuhke tempuhl in oruh akwuck muhtahl in siliyac sucu uh—sie mukwikwi na fokoko ke facl na fahsrwelihk se tuhsruhk ohiyac se inge fahkwack lah fahsrwelihk uh ac tiac ma na ne tok. Pa inge kuhtuh srihpac kuht sang nuhke “finsrak se ma oan in [kuht] uh.”11
Ahok, ke pacl lasr mihsenge uh, ma na upac yohk sun mwet ma fahsr tukun Jisus Kraist uh. Mwet kol ke Alu se Lal inge, sang moul lalos kwewa in suk kolyuck luhn Leum ke ahkwoyacn ma upac inge. Fin kuhtuh tiacna ahkfihsrwacsryeyuck lac nuhke luhngse luhn mwet nuhkwewa, sahp elos orwaclah kuhtuh ip ke sahksin soko ma Jisus El fahk muh kuht enenuh in sruhkwack nuh fwacsr in fahsr Tohkohl uh.12 Ma inge ma ke sripen oasr lwen ac lohsr ac ma upac ma God El owlelah, puhkuhnyeng se ke lwen ac e se ke fong, kol mwet pahluh uh, sang iron rod, ikucslah sruhnguhl ohsrihksrihk sac nuhke soko inkacnek suwohs, ac yohk liki nuhkwewa use nuh sesr nohfohn kuh in ahksahfyelah fuhfahsryucsr se inge.13
Pwacnwacng nuhnakmuhnahs, muhta wi mongo se inge finne kom tiac arlac etuh kac fukunsahk broccoli sac. Muhta ke kahlwem Lal ac sang kahlwem lom sifacna nuhke orekma se.14 Oasr ke Primary: Pwacyena lah Jisus El arulacna “[ke kom] in pa sie kahlwem.”15
Ke mwet kol Jew se pahngpahng Jairus el tuhng siyuck sel Jisus Elan onwelah tuhlihk muhtwacn yac-12 se nahtuhl ah, suc an kweok lohm selos, raunwellah Mwet Lahngo lusen pacl loeloes se tuh sie mwet kuhlwacnsap ah tuhkuh fahk nuh sin pahpah elyah sac muh, “Tulik mutan se nutum ah misac; nimet wakracl Master.”
“Tuhsruhk ke Jisus El lohng ohinge uh, El tohpohkuhl, ac fahk, Tiac sahngweng: luhlahlfongi muhkwena, ac elac fah kwelac.”16
Ac el kwelac. Ac kuh pac in kom. “Tiac Sahngweng: Luhlahlfongi Muhkwena.”
Ke srihpen kais sie suwos ma oasr ke mwet intei inge sacohk sin God ac nuhke Alu uh, nga kaliyac ke fahk na sacohk se inge. Met liki kom eis mwe sang luhn Nguhn Muhtahl, kahlwem luhn Kraist oasr in ikom,17 “kahlwem se ingacn oasr ke ma nuhkwewa, … sang moul nuhsin ma nuhkwewa,”18 ac pa inge orekma luhn ma wo ke insiyacn mwet nuhkwewa suc moul kuh ac tuhfah moul fin facluh uh. Kahlwem se ingacn utuckoht nuh sum in karihngihn kom ac luti kom. Sie mwe fahkwack yohk uh pa moul uh pa sacohk emeet ke mwe sang nuhkwewa, sie mwe sang ma ituck muhkwena ke Iwaclah luhn Leum Jisus Kraist. Ke El ekihn Kahlwem ac Moul luhn Facluh,19 Wen Se Fanna nuhtin God tuhkuh in use nuh sesr moul ke kuhtanglah misac uh.
Kuht enenuh in eis kuhtyang nohfohn nuhke mwe sang luhn moul ac kahsruh mwet suc apkuhran in fuhlweack mwe sang se inge. Mwet kol, mwet kahsruh, kawuck, sucu—liye akucl ke suhpwacr kuh oacna sie ma ac kuh in ahkkolukye mwet se. Sang kahsruh lom. Lohng. Eiskomyang in kahsruh oacna ke ma enenweyuck fal uh.
Nuhsin oacna sie mwet fuhsr ingacn ma oasr ke ma upac uh, lah meac elyah kuh ma upac lom an, ahklas uh tiacna pa ingacn top nuh kac uh. E tiac ahkfihsracsryelah ngal se kom puhla uh kuh nuhnkuh muh kom pa srihpacack uh. Ke sie facl ma enenuh na pwacye nohfohn kahlwem uh, nuhnak muhnahs tiacna ahksrihkyelah kahlwem se ma God El fihliyac oasr in kom met liki facluh oasr. Sramsram nuhsin sie mwet. Siyuck ke kahsruh. Nimet kom kuhnahoslah moul se ma Kraist El sang moul Lal in molwelah uh. Kom kuh in kuhtanglah ma upac ke moul se inge ke srihpen kuht ac kahsre kom in muhtwenglah. Kowos fokoko liki ma kowos akihlen uh. Kahsruh uh pa oasr, sin mwet sahyac ac tuhkuh sin God. Kom luhngseyuck ac sekoeyuck ac enenweyuck. Kuht enenwe kowos! “Tiac Sahngweng: Luhlahlfongi Muhkwena.”
Sie mwet ma puhlakihn ma upac yohk liki kom ac nga tuh fahk sie pacl ah: “Fahsr nuh met [kawuck fuhsr sacohk luhk]. Puhlaik, … ac som na, som na nuhke kuhtanglah! Lwelah insiowos in enganwack, ac in arulacna pwacr.”20 Arulacna puhs ma kuht ac engankihn. Kuht kahsruh kais sie sie, ac El kahsrwe kuht. Nimet pihlesruh pacl se lom an, nga ngihsre, ke ine sacok ac muhtahl luhn Leum Jisus Kraist, amen.