17:18

Kuh se ke Mukwikwi luhn Nguhn

Sel Prestuhn Russell M. Nelson

Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah

Nga luhngse akacsruhi limekohsr ohiyac kuht kuh in oruh in kahsre kuht sruokyac ma wo ke mukwikwi luhn nguhn.

Tamuhlwel ac tahmtahel sacohk, nga akacsruhi luhngse luhk nuh suwos. Nga kulohkihn pacl se lwelah nga in sramsram nuh suwos misenge. Nga pruhe pacl nuhkwewa tuh kom in karihngihnyuck ke mwe acnwuck luhn ma koluk ac kom in fokoko in kampare ke oacna sie ma kom puhlakihn.

Kuhtuh mwe sruhf inge wihklac loal toasr ac wacngihn mwet kuh in liye. Kuhtuh arulacna fihsrwacsr in akihlenyuck. Ma upac se sikyak fin acn Europe ah pa sie sin ma inge. Nga som nuh Ukraine ac Russia pacl na puhkantwen. Nga luhngse acn ingacn, mwet we, ac kahs lalos. Nga tuhng ac pruhe ke mwet nuhkwewa ma ongaiyac ke mweun se inge. Alu uh oruh kahsruh ke kuhiyacsr nohfohn nuh selos nuhkwewa suc puhlakihn kweok ac suk in pain moullac. Kuht ngihsre kowos nuhkwewa in wi kuht lalo ac pruhe kac mwet nuhkwewa suc sun elyah ke ongaiyac na upac se inge. Mweun uh lain na pwacye ma nuhkwewa Leum Jisus Kraist El luti ac tu kac.

Wacngihn sie sesr kuh in karihngihn acn luhlahp se kuh mukwikwi luhn mwet sahyac, kuh finne mempucr ke sucu lasr sifacna. Tuhsruhk kuht kuh in sifacna karihngihn kuht. Nguhsr luhk mihsenge, tamuhlwel ac tahmtahel sacohk wiyuck, pa in tulokihnyac fohs ma oasr ke insiom, lohm sum, ac moul lom. Eislah kuhtwena ohiyac keim in ahkkolukye mwet sahyac—lah kuhfwen ohiyac ngacn pa ahngyahng, loh kohsroh se, nuhnak fokoko ke sruhnga se sin mwet se suc ahkngalye kom. Mwet Lahngo El sapkihn kuht in sang pac lihkihn tuhpah se sahyac ah,¹ in lungse mwet lokoalok lasr, ac in pruhe kaclos suc kalyei kuht.²

Upac ngal se ke kuht ac srihke in oruh in wacngihnlac ahngyahng ma oasr sesr uh. Upac in nuhnkuh in nuhnak muhnahs nuh selos suc kuhnahoslah moul luhn mwet wo. Ne ohinge, Mwet Lahngo lasr El ngihsre kuht in “nuhnak muhnahs nuh sin nuhkwewa.”³

Kuht mwet fahsr tukun Fihsrack lun Mislac. Ke pacl se inge, kuht enenuh mislac se El us inge. Mihs uh tuhkuh fuhkah nuh yohrohsr fin facl se inge ke, kais sie sesr, tiacna suk mihs ac insese lasr sifacna uh? Tamuhlwel ac tahmtahel, nga etuh lah ma nga ngihsre inge tiacna fihsrwacsr. Tuhsruhk mwet fahsr tukun Jisus Kraist enenuh in oakiyac sie srihkasrak nuh sin facluh in ukwe. Nga ngihsre kowos in oruh ma nuhkwewa ma ac tulokihnyac elyah nuhkwewa lun insiom ac ke moul lom.

Nga kuh in ahkkohnye nguhsr se inge ke ohiyac se nga tuh liye ke sritacl basket se suc ahkacsmakihnye yuc.

Ke sritacl se ingacn, puhlan pacl se meet ah upac amacin kac ah, som fohlohk. Na, ke sackuhns limekohsr meet liki tari tahfuhn pacl se meet ah, sie mwet ke soko u ah oraclah basket se sang tweng tolu lalos. Sackuhns se fanna luhlah, mwet weluhl ke u soko ah pihsraclah ball ah ac sifilpac oraclah tweng se uh muh pacl in tari. Oruh u se ingacn som nuh ke acn in ayaol lalos ah ke points ahkosr elos fahsr meet, ke puhla wo ke mukwikwi se elos ah. Elos oruh mukwikwi se lalos ingacn nuh ke tahfuhn pacl se ahkluo ah ac elos kuhtanglah.

Mukwikwi el fokoko. Kuht nuhkwewa puhlakihn pac ke kain in ohiyac—fin pa nuh ke, mwe kahsruhsr soko ma arulacna muhi kuh nuh ke tiac insese se ma oraclah amacin se.

Lwelah ngan siyuck, meac kuh in oruh in ahkoswack mukwikwi luhn nguhn? Kuht liye tari srihkasrak ke kewana mukwikwi wo ac koluk. Kuht etuh ke mwet fahsr tukun Jisus Kraist elos eklac ac kapwack ke luhlahlfongi lalos. Tuhsruhk kuht oacyacpac etuh kaclos ma eklac ne puhtatlac. Mukwikwi el kuh pac in som nuh ke acn se sahyac.

Enenuh lasr nuh ke ma wo ke mukwikwi luhn nguhn upaclah ingena, liki na meet ah, in lain ma koluk puhkantwen ac akucl sakihrihk sikyak inge. Ma wo ke mukwikwi luhn nguhn kahsre kuht in kampare nuh meet finne kuht sahngweng ac fosrngah ke mas, eng upac, e fihrihr, ac elah koluk. Mukwikwi luhn nguhn kuh in kahsre kuht in tu na kuh, kuh in lain ma lain kuht ac tulokihn kuhiyacl in kuhnaoslah nguhnin pwelucng lasr uh.

Puhs atac kuh in orek in sang ahkoswack mukwikwi luhn nguhn. Ahkostwen, luhngse, mongfihsrwacsr, kuhlwacnsap, ac sang kuloh⁴ pa kuhtuh tuhsruhk suhpuhs.

Misenge nga luhngse akacsruhi limekohsr ohiyac kuht kuh in oruh in kahsre kuht sruokyac ma wo ke mukwikwi luhn nguhn.

Ma se meet an: Utyak nuh ke inkacnek in wuhlwelah ac muhta na kac.

Tiac loes pacl somlah ah, nga tuh oruh sie mwemwe na usrnguck suc nga ohsun nuh sin un mwet na puhs se. Elos siyuck sihk kihsen siyuck puhs, inkaiyac ah susc ma ke inkacnek in olwelah ac efuh yohk srihpac.

Ke mwemwe se luhk ah, nga ahkuhtweyac lah kuht utyak nuh ke inkacnek in olwelah pa kuht pacptais lac ac oraclah olwelah se meet lasr nuh sin God.⁵ Pacl nuhkwewa kuht ipeis ke kuhfa luhn Leum, kuht sifilpac olwelah eis inen Mwet Lahngo nuh facsr, in Esamuhl, ac liyacacng masap Lal.⁶ In topuk, God El olwelah lah Nguhn luhn Leum ac wi kuht pacl nuhkwewa ke moul lasr.

Tohkoh kuht oraclah pac wuhlwelah muhtahl lin tempuhl, suc kuht eis olwelah yohk srihpac kac. Akwuck ac wuhlwelah ikacslah nuh sesr in eis kuh wolacna. Inkacnek in wuhlwelah muhkwena pa inkacnek soko nuh ke moul nuh tok ac ma pahtpaht.

Ke mwemwe se luhk ah, muhtwacn se siyuck sihk lah mwet se suc ma kuhnahoslah wuhlwelah la uh kuh in fohlohkyang nuh ke inkacnek soko ingacn fuhkah. Top nuh ke kihsen siyuck soko inge pwen yuc nuh ke kahsruh ahkluo luhk uh.

Moulkihn enganiyacn auliyak lwen nuhkwewa.

Fuhkah yohk srihpaciyacn auliyak uh? Alma el luti lah kuht enenuh in “luti wacngihn sahyacn auliyak ac luhlahlfongi ke Leum.”⁷ Auliyak el enenweyuck nuh selos nuhkwewa suc kena ke moul ma pahtpaht.⁸ Wacngihn ma sahyac. Ke fwackyuck se nuh sel Mwet Pahluh Joseph Smith, Leum el kaleyi mwet kol luhn Alu uh ke elos tiacna luti wosasuc nuh sin tuhlihk nahtuhlos.⁹ Auliyak pa ki nuh ke kapkapwack uh. Luhlahlfongi pwacye pwen kuht in fahsr nuh meet ke inkacnek in wuhlwelah.

Nuhnak muhnahs nimet sahngweng kuh kohllah auliyak. Satan el engan ke ma koluk lom an. Otwelah in fototo. Eislah oruh lal an liki moul lom an. Muhtwacwacack misenge in kuh in eislah nuh sahyac orekma luhn mwet .¹⁰ Mwet Lahngo El luhngse kuht na pwacye yohk na ke kuht auliyak uh. El olwelah lah finne “eol uh, ac inging uh ku in mokukla, … lungse luk nu sum fah tiacna safla.”¹¹

Kom fin puhla muh kom som liki inkacnek in wuhlwelah sac loeslac kuh pahtlac ac wacngihn inkacnek in fohlohk, tiacna ma pwacye se.¹² Nuhnak muhnahs ohsun nuh sin pisap kuh pracns prestuhn lom an. El ahol Leum ac kasre kom in puhla engan ac mwesahslah ke auliyak.

Tuhsruhk, esam: Fohlohk nuh ke inkacnek in wuhlwelah tiac na kalmac pa moul lom uh ac fihsracsr. Inkacnek se inge upac ac kuhtuh pacl uh kom puhla muh kom fan ke an fuhlwact.¹³ Fan se inge, pwacyeiyac, oreklac in srihke ac luti kuht, in ahkwoyelah atacsr kuh ohiyacsr, ac kahsrekuht in kuh in Mwet Luhlahlfongi wowo. Pa inkacnek soko muhkwena ma kohllah nuh ke moul ma pahtpaht. Sie mwet pahluh¹⁴ ahkuhtweyac ke “insewowo ac oasr in engan nuh selos suc liyacacng masap luhn God. Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao … [ac]fah muhta yurun God ke sie ohiyac engan wacngihn sahflahiyac.”¹⁵

Fahsr ke inkacnek in wuhlwelah, ac auliyak pacl nuhkwewa, ahkoswack ma wo ke mukwikwi luhn nguhn.

Kahsruh ahktolu luhk uh: Lutlut kacl God ac fuhkah atacn orekma Lal.

Sie ma na upac kuht sun misenge pa in etuh in liye ma eklac ke ma pwacye luhn God ac ma stuhuh lal Satan. Srihpac se inge pa oruh Leum El sapkihn nuh sesr in sikalweni in pruhe, … tuh [kuht in kuh in kuhtanguhlah Satan ac … kahingkuhnlah poun mwet kuhlwacnsap lal Satan ma oruh orekma lal.¹⁶

Moses el mwet in srihkasrak na wowo se in akihlen ma tiacna oacna sie sel God ac Satan. Ke Satan el tuhkuh in srihfacl, Moses el kuhracna sruhflah tuhsruhk el tuhfahna sramsram sin God muhtahl nuh ke muhtahl God. Oruh, Moses el sa na akihlenwack lah suc Satan uh ac sapkihn nuh sel in som.¹⁷ Ke Satan el sruhnga ah, Moses el etuh in pahng nuh sin God ke kahsruh. Moses el eis kuh na fokoko se ac luhslah mwet koluk sifilpacna, fahk, Fahsr likiyuc, Satan, tuh ma se inge God muhkwena pa nga ahkfuhlwactye.¹⁸

Mwet nuhkwewa enenuh in ukwe mwe srihkasrak se ingacn. Eslah oruh lal Satan liki moul lom an. Nuhnak muhnahs nimet ukwacl nuh ke “inahlok luhn suhpwacr ac ongaiyac ma wacngihn sahflahiyac.”¹⁹

Elyahiacn pacl uh, luhlahlfongi lasr uh fin tiac ahkfokokoyeyuck ke “kahs wo luhn God”²⁰ na e muhsahlah. Tuh, orekma ma Satan el srihke in oruh uh kahlwem: Kuht enenuh in ahkfuhtwactye Leum ac lutlutkihn wosasuc Lal lwen nuhkwewa. Nga ngihsre kowos in lwelah tuh God Elan kuhtanglah moul lom an. Sang nuh Sel pacl lom an. Ke kowos oruh, akihlen ma wo sikyak ke mukwikwi luhng nguhn in kom.

Mwe ahkkweye 4: Suk ac tuhpan in sikyak ma usrnguck.

Moroni el ahkpwacyei nuh sesr lah “God el tiac tui in sie God luhn ma usrnguck.”²¹ Puk nuhkwewa ke ma suhmuhslah ahkuhtweyac lah Leum el sikyak fuhkah nuh sin mwet ma luhlahlfongi Kacl.²² El srwaclihk Meoa Sruhsrah nuh sel Moses, kahsrel Nephi in eis prahs plwet, ac fohlohkohnwack Alu Lal sel Mwet Pahluh Joseph Smith. Kais sie ma usrnguck inge yohk pacl sisilac kac ac tiac pa inge ma mwet inge finsrak kihn kuh ngihsre sin Leum uh.

Ke ohiyac se pacna inge, Leum elac fah ahkinsewowoye kom ke ma usrnguck kom enenuh fin kom luhlahlfongi Kacl, “tiac ahlohloh.”²³ Oruh orekma in nguhn in eis ma usrnguck. Sikalweni in pruhe siyuck God lacn kahsre kom in orekma ke luhlahlfongi sacn. Nga olwelah lah kowos kuh in sifacna puhlakihn suwos lah Jisus Kraist el “akkeyalos su munas ac totola; ac nuh selos suc wacngihn kuh la El ahkfokokoye.”²⁴ Ma ekahsr kuh in ahkmuhiye mukwikwi luhn nguhn in kom yohk liki na akihlen lah Leum el kuh in kahsre kom in kihl finohl ke moul lom an.

Mwe ahkkweye ahk 5: Ahksahfyelah fohs ke moul sifacna lom an.

Nga sifil ngihsre in ahkwacngihnyelah fohs ke moul lom an. Moulkihn mongfihsrwacsr, puhlaik, ac fokoko kwewa ma inge enenweyuck nuh ke nuhnak muhnahs ac suk in eis nuhnak muhnahs. Mwet Lahngo El olwelah “fin [kuht] nuhnak muhnahs nuh sin mwet sahyac ke ma koluk lalos, Pahpah [tuhmasr] Inkuhsrao elac nuhnak muhnahs nuh [sesr] pac.”²⁵

Wik luo nuh misenge kuht ac ahkfuhlwactye Istuh. Inmahsrlon pacl meet ah nuh ingena, nga ngihsre kowos in suk in ahkwacangihnyelah fohs lowos sifacna ma ahktoasrye kowos. Kuh oasr orekma wolacna se in fahk kuloh nuh sel Jisus Kraist ke Iwaclah Lal? Fin nuhnak muhnahs uh oacna in ma na upac se, ngihsre kuh ke misac ac srah kacl Jisus Kraist in kahsre kom. Ke kowos oruh, nga olwelah mihs ac okwacoht mukwikwi luhn nguhn nuh yuruwos.

Ke Mwet Lahngo el misac ke mwet nuhkwewa, El ikacslah inkacnek se nuh selos suc fahsr Tohkohl in kuh in eis onweyuck Lal, ahkkweyeyuck, ac molwelah fokoko. Mwe ahkinsewowo luhn nguhn kuh in orekmakihnyuck nuh selos kwewa ma suk in Lohngohl ac fahsr Tohkohl.

Tamuhlwel ac tahmtahel sacohk wiyuck, ke nuhnak in nguhsr luhk kwewa, nga kwacfe kowos in som nuh ke inkacnek in wuhlwelah ac muhta na kac. Moulkihn enganiyacn auliyak pacl nuhkwewa. Lutlut kacl God ac fuhkah atacn orekma Lal. Suk ac tuhpan in sikyak ma usrnguck. Kampare in ahksahfyelah fohs ke moul lom an.

Ke kowos orekma ke finsrak inge, nga olwelah nuh suwos kuh se in fahsr na nuh meet ke inkacnek in wuhlwelah orekmakihn mukwikwi pihsrpihsr, tiac elyah ke oacna sie ma e fungul kom. Ac nga olwelah nuh suwos kuh in kuhtanglah mwe sruhf, mihs nuh in nuhnak ac mwesahslah liki sahngweng, ac fokokoi kuhpahsr lom nuh sin sucu lom an.

God El moul! Jisus pa Kraist! El moul. El luhngse ac kahsre kuht. Ke ma inge nga fahkwack ke ine muhtahl luhn Mwet in Molwelah lasr, Jisus Kraist, amen.