Kuhlwacnsap luhn Misinacri Ahkinsewowoye Moul Luhk Ne Tohk Ma Pahtpaht
Nga pruhe tuh kowos mukul fuhsr ac muhtwacn fuhsr ac ninac pahpah kiowos ac tuhmowos fah liye ac etuh lah orekma luhn misinacri uh ac ahkinsewowoye moul lom fuhkah.
Kuloh, Prestuhn Nelson, ke kom sulpac akacsruhi mwe luti ingacn ke kuhlwacnsap luhn misinacri.
Tamuhlwel ac tahmtahel, kuhtuh yac somlah ke nga sramsram ke toeni luhlahp, mwe ngetnget luhk ke ahtron muhta lacsac se luhk uh koluk lac ke ma se pahngpahng macular degeneration, suc ma ahk upacyelah koluklaciyac ac oruh wacngihnlac orekmakihnyacn mwe liye luhk ke ahtron muhta sacn.
Ke nga sun ma upac se inge, nga kuloh ke ohiyacn liye sahyac, weacng kahlwemiyacn mwe ngetnget uh. Ke nga ngetlah esamack moul luhk meet ah, nga tuh kuh in liye ma sikyak nuh sihk ma yohk srihpac. Sie ma sikyak pa pacl in kuhlwacnsap in misinacri luhk ke nga sie mukul fuhsr fin acn England tuh ahkinsewowoye moul luhk ac ahkfokokoye moul in nguhn luhk.
Nga nuhnkuh ke luhpan elyah luhn mani weacng Kweok Upac se ke yac 1930 ma muh kohllah nuhke sie acn se ma ahkelyahye ninac ac pahpah tuhmuhk ac sucu lasr. Pahpah tuhmuhk el orekma upac ke stoh in stohsah lal ac karihngihn sucu lal ke pacl upac se inge oruh ke puhluhn pacl elos tiac wi alu.
Finne sucu luhk tiac som alu ekihn sucu se, tiac kosrweyuclac in som wi alu kuhtuh pacl uh wi kawuck luhk.
Ke lwen ingacn, nga tiac nuhnkuh yohk in som wi misrin, ac tiac sie ma nga sramsram kac nuh sin ninac pahpah tuhmuhk kac pac.
Ke nga som wi college, ngac ac kuhtuh sin kawuck luhk sulwaclah in som wi kuhlwacnsap ke misrin. Muhtwacta yurin pisrap luhk, nga nwacklah pwepuh in misrin luhk ke pacl se ma ninac ac pahpah tuhmuhk ah wacngihn fin acn uh. Ke ninac pahpah fohlohk, nga ahklutyaclos kac lah nga pahngonyuck in wi kuhlwacnsap ke misrin nuh fin acn Great Britain. Nga tarilac selos ke ahkkweye wo lalos ke sulwaclah se inge, ac sin kawuck wowo suc kahsrwe yuc in sulwaclah in kuhlwacnsap.
Kuhlwacnsap ke misin luhk kahsre yuc ke pacl nga pahyuck ac ekihn pahpah se ac in kapkapwack ke pisnis luhk uh. Misrin luhk oacyacpac kahsre yuc ke nga kuhlwacnsap nuh sin Leum ke Alu Lal.
Ke toeni luhlahp ke Eprel 1985 ah, nga pahngonyuck in sramsram ke toeni luhn pristut. Nga tuh sramsram nuh sin mukul fuhsr. Na sramsramkihn ahkoeyac in kuhlwacnsap ekihn sie misrinacri. Nga fahk, “Ke lutlut nuhkwewa nga eis ke nga kuhlwacnsap ke Alu uh, wacngihn sie ma yohk srihpac nuh sihk tiac apkuhran nuh ke lutlut in ahkpah nga eis ke nga sie elder yac-singucul yuc suc kuhlwacnsap fohnohslah misrin la .”1
Leum El etwekom. Ke kom kuhlwacnsap ke misin lom, kom ac puhlakihn ma ac kahsruh kom in Etacl yohk liki met ah. Kom ac kapwack in nguhn ke kom kuhlwacnsap nuh Sel. Ke Inel, kom ac suhpweyucklac in kahsruh mwet sahyac. El ac usot nuh suwos kolyuck sin Nguhn Muhtahl. Leum El ac ahkkweye kom in luti ke Inel. Kom kuh in ahkkahlwemye nuh Sel lah El kuh in luhlahlfongi kom ac kuh in suhpwe kom.
Mahlwem limekohsr tari ac, Elder Jeffrey R. Holland ac Elder Quentin L. Cook, suc tuh kuhlwacnsap ekihn misrinacri fin acn Britain, wiyuc in muhtwacta yurun mempucr ac misrinacri ke acn kahto sacn. Acn we, nga nuhkuh ke pacl luhk ke nga tuh sie misrinacri fuhsr ah. Nga fahkwelihk tuh misrin luhk pa acn se ma nga etwaclah muh Pahpah tuhmuhk Inkuhsrao ac Mwet Lahngo luhk, Jisus Kraist, etweyuc ac luhngse nga.
Nga tuh ahkinsewowoyeyuck in oasr misin prestuhn wowo luo luhk, Selvoy J. Boyer ac Stainer Richards, wi pac muhtwacn kiaclos Glady Boyer ac Jane Richards. Esamack acn meet, nga kuh in liye kahlwem tuh elos luhlahlfongiyuc ac luhngse nga. Elos lutiyuc ke wosasuc. Yohk finsrak lalos nuh sihk. Elos use nuh sihk kunohkohn upac ac pacl wowo in kol in kahsrweyuc in kapwack ac ahkolah nuh ke sie moul in kuhlwacnsap.
Nga oacyacpac esamack ke nga tuh pahngonyuck sel Prestuhn Spencer W. Kimball in kol ke Misrin Canada Toronto wi muhtwacn kahto kiyuck, Barbara, ac wi pac tuhlihk nahtuhsr. Prestuhn Kimball el pahngon kuht in kuhlwacnsap ke April 1974, tiac paht tukun el oruh sramsram wowo lal pahngpahng “Ke Pacl se Facluh Fah Eklac uh.”2 Ke pweng sacn Prestuhn Kimball el ahkuhtweyac finsrak lal lah wosasuc ac osraclihk facluh nohfohn. El pahng nuh sin misrinacri puhs raunweack facluh nohfohn. El ahkacsmakihnye kuht ke finsrak luhn Leum “lah mwet nuhkwewa enenuh … in sruhkwack puhsra sulkackihn nuh sin mwet fin facluh.”3 Mwe luti lal Prestuhn Kimball ke kunohkohn luhn mukul fuhsr in kuhlwacnsap ke misin sramsramkihnyuck ke lohm fin facluh nohfohn. Finsrak sacn tiac eklac. Nga tarilacna lah Prestuhn Nelson el oacyacpac ahkweye kena luhn Leum olutu.
Apkuhran yac 10 ke pacl se Prestuhn Thomas S. Monson el ahkkahlwemye ke ma eklac ke matwac luhn misrinacri luhn mukul fuhsr ac muhtwacn fuhsr.4 Ke liye luhk uh, srihpac se ke eklac se inge pa in sang pacl yohk nuh sin mwet fuhsr lasr pacl wowo in ekuhllah moul uh pa in kuhlwacnsap ekihn sie misrinacri.
Ekihn sie Mwet Sap luhn Leum Jisus Kraist, nga ingena pahngon kowos mukul fuhsr—ac muhtwacn fuhsr suc ma kena in kuhlwacnsap ke sie misrin—ac muhtwacwacack ingena in sramsram nuh sin pahpah ninac kiowos in kuhlwacnsap ke misrin. Nga oacyacpac suli kowos in sramsram nuh sin kawuck lowos in kuhlwacnsap ke misrin se, ac fin sie sin kawuck lowos tiac arlac etuh kac, ahkkweyaclos in sramsram nuh sin pisrap lalos.
Olwelah nuh suwos sifacna ac nuh sin Pahpah Inkuhsrao tuh kowos fah kuhlwacnsap ke sie misrin ac lah pacl se inge fahlac kowos ac srihke in karihngihn tuh insiowos, pouwos, ac nuhnak lowos nwacsnwacs ac suwohs. Nga suli kowos in eis luhlahlfongi fokoko ke wosasuc fohlohkihnyuck luhn Jisus Kraist.
Pahpah ac ninac luhn mwet fuhsr wowo inge, oasr kunohkohn yohk srihpac lowos ke ohiyacn ahkolah inge. Muhtwacwacack mihsenge in sramsram nuh sin tuhlihk nuhtuwos an ke orekma luhn misrinacri uh. Kuht etuh lah sucu uh pa yohk srihpac na pwacye in kahsruh mukul fuhsr ac muhtwacn fuhsr in ahkolah.
Kowos fin matwac fal in kuhlwacnsap ekihn sie misrinacri tuh sonna kuhlwacnsap ke srihpen mas COVID kuh ohiyac sahyac, nga suli kowos in kuhlwacnsap ingena. Sramsram nuh sin pisrap lowos, ac ahkolah in sramsram nuh sin Leum.
Nga kwacfe kowos pisrap in kahsruh mukul fuhsr ac muhtwacn fuhsr suc apkuhran matwac nuh ke misinacri in ahkolah in kuhlwacnsap, ac nga kwacfe kowos pisap in akihlen elos suc matwac fal suc sonna kuhlwacnsap. Suli kais sie mukul fuhsr in welah misrinacri, oacyacpac kais sie muhtwacn fuhsr suc kena in kuhlwacnsap.
Nuh suwos suc misrinacri ingena, kuht tarilacna nuh suwos. Misrin lowos oasr ke pacl luhn mas fin facluh nohfohn. Ke srihpac se inge, misrin lowos tiac oacna misrin luhk kuh misrin luhn kuhtwena mwet suc kuhlwacnsap met liki yac 2020. Nga etuh lah tiac fihsrwacsr. Tuh finne ke pacl upac inge, oasr orekma ma Leum El ke kowos in oruh, ac kowos oruh ke ohiyac na wowo se. Ke srihkasrak, kowos orekmakihn technology ke ohiyac sasuc in konwacack elos suc ahkolah in etwaclah ke Fohlohkyak luhn wosasuc luhn Jisus Kraist. Ke kowos kuhlwacnsap ac fal nuh ke kuh lowos, nga etuh lah Leum El engan ke orekma lowos. Nga etuh lah kuhlwacnsap lowos an ac ahkinsewowoye moul lowos.
Ke kom fihli liki misrin lom, esam lah kowos tiac fihli liki mukwikwi ke Alu uh. Muhsaheack ohiyac wowo ke ma kom etwaclah ke misrin lom an, tahfwelah in ahkfokokoye luhlahlfongi lom, orekma upac, pruhe, ac ahkostwen nuh sin Leum. Ahkfuhlwactye olwelah ma kowos oraclah. Kalweni in ahkinsewowoye ac kuhlwacnsap nuh sin mwet sahyac.
Nga pruhe tuh kowos mukul fuhsr ac muhtwacn fuhsr ac ninac pahpah kiowos ac tomowos fah liye ac etuh lah orekma luhn misrinacri uh ac ahkinsewowoye moul lom fuhkah. Lwelah kowos in etuh ke nuhnak lowos ac puhla insiowos ke kuhiyacn solsol ma Leum El sang nuh sin mukul misrinacri wowo nahtuhl Mosiah ah. El fahk, “Som … ac oakiyac kahs Luhk; tuhsruhk kowos in muhtweng ke mongfihsrwacsr ac kweok, tuh kowos in kuh in ahkkahlwemye mwe srihkasrak wo … Keik, ac Nga fah oruh tuh kowos in sie kuhfa in orekmakihnyuck ke Pouk nuh ke molwelah luhn nguhna pucspucs.”5
Lwelah tuh God elan ahkinsewowoye mwet fuhsr ke Alu uh in oasr kena se in ahkoeloslac ac Kuhlwacnsuhpacl pa pruhe puhsisacl luhk, suc nga ngihsre ke litutacng se inge ke ine muhtahl luhn Leum Jisus Kraist, amen.