![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F3c%2F50%2F3c502bb4ee2deb39449d7aef135cc164f30aafe2%2F3c502bb4ee2deb39449d7aef135cc164f30aafe2.jpeg/full/!250,/0/default)
Orekma luhn Misineri: Akacsruhi ke Ma An Insiom
Oacna sie acn ma kom oasr we fin facluh, arulacna puhs pacl wo in akacsruhi ke pweng wolacna ke wosasuc luhn Jisus Kraist
Mahlwem tari ah Singucul Luo ah tuh suliyuck sin mwet pahluh sacohk lasr, Prestuhn Russell M. Nelson, in weluhl forfor nuh ke kihsaclah luhn Rome Italy Tempuhl. Ke forfor lasr ah, nga motko kacl Mwet Sap Paul ac ke fuhfahsryucsr lal. Ke pacl lal ah, in som Jerusalem lac nuh Rome, ac fuhfahsryucsr lusen lwen 40. Misenge, ke sie sin aksohk ma nga luhngse emet, ac te ahluhkwelah lusen ao 3.
Mwet pihsrlac ke Bible uh luhlahlfongi lah Paul el tuh muhta Rome ke pacl se ma el suhmuhslah kuhtuh sin lwacta lal, ma arulacna yohk srihpac nuh ke ahfokokoyeyacn mempuhr luhn Alu in pacl sac oacpacna nuh misenge.
Paul ac mempuhr sahyac ke Alu ke pacl omet ah, Mwet Luhlahlfongi ke Pacl Omet ah elos arulacna etuh ke moul upac. Puhs selos tuh kalyeiyuck na upac, finne ne ke na misac.
Ke yac 200 somlah ah, mempuhr ke Alu sifilpac fohlohkihnyuckyak luhn Jisus Kraist, Mwet Luhlahlfongi ke Lwen Sahflah tuh oacyacpac puhlakihn kain in kalye pucspucs. Tuhsruhk finne ke kalyeiyuck ingacn (ac kuhtuh pacl uh ke srihpen ma inge) Alu luhn Jisus Kraist luhn Mwet Luhlahlfongi ke Lwen Sahflah fahfahlac na in kap ac inge oasr fin facluh nohfohn.
Arulacna Puhs Ma in Orek
Tuhsruhk, met liki kuht kaksakihn kuht sifacna ke kuhtanglah na wo se inge, ac wo nuh sesr in nuhnkuh ke kapkapwack sacn.
Oasr kuhtuh mwet billion itkohsr tahfuh fin facluh, srihkasrak nuh ke kuhtuh million 16 mempuhr ke Alu luhn Jisus Kraist luhn Mwet Luhlahlfongi ke Lwen Sahflah—pwacye na lah u na suhpuhs suhna se.1
Ke pacl inge, luhpan mwet Kristin luhlahlfongi ke kuhtuh acn fin facluh uh srihkeni.2
Finne ke Alu sifilpac fohlohkihnyuckyak luhn Leum—ke luhpan mempuhr ke alu uh fahfahlac na in kapkapwack—arulacna puhslac mwet suc tiacna eis mwe insewowo ke wi Alu pacl nuhkwewa.
Ke kahs sahyac, oacna sie acn ma kom oasr we fin facluh, arulacna puhs pacl wo in akacsruhi ke pweng wolacna3 ke wosasuc luhn Jisus Kraist nuh sin mwet kom ohsun nuh se, wi lutlut, ac wi muhta, kuh orekma, ac kakawuck nuh se.
Ke yac se somlah ah, oasr pacl na wo se luhk in wi oruh mukwikwi luhn misineri fin facluh nohfohn ke Alu uh. Pacl pucspucs nga motko ac pruhe ke sap wolacna se luhn Mwet Lahngo nuh sin mwet tuhma lutlut Lal ac “fahk elos in som, ac luti muhtuhnfacl nuhkwewa, pacptaiselos ke inen Pahpah, ac Wen, ac Nguhn Muhtahl.”4
Nga amaci na ke kihsensiyuck se “Kuht ac oruh fuhkah, oa mempuhr ac mwet tuhma lutlut luhn Kraist, in oraclah wo kunohkohn na yohk se in moul lasr uh?”
Misenge nga suli kowos in motko ke kihsensiyuck sepacna inge ke insiowos and nuhnak lowos an.5
Sie Mwe Sang ke Orekma luhn Misineri
Mwet kol Alu uh tuh ahkkahlwemye in yohk ke pweng se ma pahngpahng “Mempuhr nuhkwewa misineri!” ke lusen pacl loeloes.6
Mempuhr ke Alu luhn Jisus Kraist—kwewana ke pacl somlah ac ke pacl lasr uh—engan in akacsruhi ke wosasuc nuh sin mwet kawuck ac mwet tuhlan. Insiaclos fihrihr ke kahs in luhlahlfongi ke Jisus Kraist, ac elos arulacna kena mwet sahyac in puhlakihn kain engan sepacna ma elos sokwack ke wosasuc luhn Mwet Lahngo.
Oacna kuhtuh mempuhr ke Alu uh in oasr mwe sang se inge se. Elos luhngse in mwet usaclihk pweng ke wosasuc. Elos puhlaik ac engan in kuhlwacnsap ac kol orekma oa mempuhr misineri.
Tuhsruhk, kuhtuh sesr ahlohloh. Ke orekma luhn misineri uh sramsramkihnyuck ke miting ke Alu uh, sifen mwet uh kahkahsrihk na kuhi ne ke na sifacltahl sun siyah ah, muhtahlos liye na ma suhmuhslah kuh mutultullac ke nuhnak yohk in kahingkihn in tiac angwetwacni liye muhtuhn mempuhr sahyac.
Efuh ohinge? Sahp kuht puhla mwacta koluk ke kuht tiac oruh yohk in akacsruhi ke wosasuc. Sahp kuht ahlohloh lah kuht ac oruh fuhkah. Kuh sahp kuht sepuhlaik in illac liki ma ma kuht etuh muh kuht kuh in oruh.
Nga kahlwem ke ma se inge.
Tuhsruhk esam, Leum El tiac enenuh misineri ma pihsrlac, ac kampare ahluhkwelah wo. Tuhsruhk Leum El enenuh na inse ac nuhnak insese.7
Kom fin muhtwacwacack tari in oruh orekma luhn misineri, nuhnakmuhnahs fahfahlacna in oruh, ac tuyak in mwe srihkasrak se nuh sin mwet sahyac. Leum El fah ahkinsewowoye kowos.
Tuhsruhk kom fin puhlakihn muh kom fahsr ul niyom ke akacsruhi ke pweng luhn wosasuc, lwelah nga in fahk ke ma wacngihn puhla koluk ke mwacta ma kom kuh in oruh sap na yohk luhn Mwet Lahngo in oracni Israel?
Ma Fihsrwacsr Limekohsr
Ma se met, ahkfototo nuh yurun God. Masap se ma yohk emet an pa in luhngse God.8 Pa inge srihpac yohk se lah efuh kuht muhta fin facluh. Sifacna siyuck sum, “Yac nga luhlahlfongi na pwacye Pahpah Lucng?”
“Yac nga luhngse El ac luhlahlfongel?”
Ke kom fototoyang nuh sin Pahpah Tuhmasr Inkuhsrao, kahlwem ac kaksak Lal ac fah kahlmwelihk liki insiom. Mwet sahyac ac fah akihlen lah oasr sie ma ma pihsrlac ac yohk srihpac keim. Ac elos ac fah siyuck kac.
Ahkluo, nwacklah insiom ke luhngse nuh sin mwet sahyac. Pa inge masap yohk se ahkluo.9 Srihke na pwacye in liye mwet nuhkwewa siskom an oacna tuhlihk nuhtin God. Luti nuh selos—finne inelos an ke tahk in tahmtahel kuh tamuhlwel ma kuneyucki nuh sum in luti.
Weluhlos isrwacsr. Weluhlos kaksak. Weluhlos tuhng. Suhnakuhnuhlos. Unwelos, sruhkuhltahlwack, ac ahkfokokoyaclos.
Srihke in etahi luhngse luhn Kraist ac in pahkomuhta mwet sahyac—finne elos suc sekuhlwacng nuh sum, suc isrucn kom ac kena ahkkolukye kom. Luhngse elos ac oracltahl oacna tuhlihk nuhtin Pahpah Lucng.
Ahktolu, srihke in fahsr ke inkacnek luhn tuhma lutlut. Ke luhngse lom nuh sin God ac tuhlihk nahtuhl an yohkwaclihk, oacpacna nuh ke insacnweacng lom in fahsr tukun Jisus Kraist.
Kom etwacack ke inkacnek Lal ke kuht ipeis ke kahs Lal ac porongo ac orekmakihn luti luhn mwet pahluh ac mwet sap in pacl inge uh. Yohkwaclihk puhlaik lom in fahsr tukun inkacnek Lal ke kom sramsram nuh sin Pahpah Lucng ke inse ma kuh in lutiyuck, ac inse puhsisacl.
Fahsr ke inkacnek luhn tuhma lutlut uh enenuh in srihkeyuck—kais sie lwen, kais kuhtuh na, luhngkuhlwacng nuh ke luhngkuhlwacng,10 lain nuh ke lain.11 Kuhtuh pacl uh sis falkacsr pacl luo nuh met ac fohlohk nuh tok sie.
Ma yohk srihpac uh pa kom in tiac fuhlweack; kuht srihke na srihke in ahkpwacyelah. Sie pacl kom ac fah wolac, engan, ac oaru liki met ah. Sramsram nuh sin mwet sahyac ke luhlahlfongi lom an ac fah fihsrwacsrlah ac wolac. Pwacye lah, wosasuc uh ac fah sie ip enenweyuck, ac yohk srihpac ke moul lom uh oruh ac oacna in upac in tiac sramsramkihn nuh sin mwet sahyac. Ma se ingacn kuh in tiac sa na sikyak—ma inge tuhkuh ke tukun lusen pacl loeloes. Tuhsruhk ac fah sikyak.
Ahkahkosr, akacsruhi ke ma an insiom. Nga tiac siyuck tuh kom in tulac ke sisken inkacnek uh sruok mwe ahkyohkye puhsrwem ac sasa fahk fuhs ke Puk luhn Mormon. Ma nga siyuck uh pa tuh kom in kwacna suk pacl wo in ahkyohkye luhlahlfongi lom ke ohiyac wo ac fihsrwacsr in sramsram nuh sin mwet—kwewana in foracng na sramsram nuh sin mwet ac oacyacpac ke internet. Nga siyuck tuh kom in “tu oacna mwet loh”12 ke kuh luhn wosasuc ke pacl nuhkwewa—ac fin enenweyuck, orekmakihn kahskahs.13
Ke srihpen wosasuc luhn Kraist … pa kuh luhn God nuh ke molwelah, kom kuh in puhlaik ac insepuhsisacl ke kuht akacsruhi ke ma inge.14 Ekahk, puhlaik, ac insepuhsisacl uh oacna in ohiyac ma lain, tuhsruhk ma inge tiac. Ma inge ahkkahlwemye suli luhn Mwet Lahngo in tiac okanlah srihpac yohk ac ip yohk ke wosasuc ye sie ahluh tuhsruhk in lwelah kahlwem lom in kahlmwelihk, tuh orekma wo lom in kaksakihn Pahpah Tuhmasr Inkuhsrao.15
Oasr ohiyac wo pucspucs in oruh ma inge, ke mukwikwi in kuhlwacng nuh ke akacsruhi ke kahs in luhlahlfongi luhn kais sie mwet ke YouTube, Facebook, Instagram, kuh Twitter nuh ke sramsram fihsrwacsr nuh sin mwet ma kom ohsun nuh se. Ke yac se inge kuht lutlut ke Wuhlweacng Sasuc in lohm sesr an ac ke Sacnri Skul. Pacl na wowo se in suli kawuck ac mwet tuhlan lasr nuh ke alu ac nuh in lohm sum in wi kom lutlut ke Mwet Lahngo. Akacsruhi nuh selos ke Gospel Library app, ma elos kuh in sokwack Come, Follow Me. Kom fin etuh mwet fuhsr ac sucu lalos, sang nuh selos puk ke For the Strength of Youth ac solwaclos in tuhkuh ac liye lah mwet fuhsr lasr uh oruh fuhkah elos in srihke in muhtana ke ip yohk ingacn.
Fin oasr mwet siyuck lah fuhkah weekend lom ah, nimet ahlohloh in sramsramkihn ma kom puhlakihn ke alu uh. Sramsram ke tuhlihk srihsrihk suc tulac met ah ac kampare onkackihn srihke lalos in oacna Jisus. Sramsram ke un mwet fuhsr suc sislah pacl lalos in kahsruh mwet mahtuh suc muhta ke acn in liyacacng mwet mahtuh in oraclah tahk in sucu luhn mwet. Sramsram ke ayaol sasuc ke miting lasr ke Sacnri ac ma inge ahkinsewowoye fuhkah sucu lom an. Kuh ahkuhtweyac lah efuh kuht ahkyohkye lah pa inge Alu luhn Jisus Kraist ac lah kuht Mwet Luhlahlfongi ke Lwen Sahflah, oacna ke mempuhr ke Alu mahtuh omet ah tuh oacyacpac pahngpahng Mwet Luhlahlfongi.
Ke oacna sie inkacnek ma wo fal nuh sum, akacsruhi nuh sin mwet uh lah efuh Jisus Kraist ac Alu Lal yohk srihpac nuh sum. Solwacltahl in “fahsruh ac liye.”16 Na ahkkweyaclos in fahsruh ac kahsruh. Oasr pacl wo pucspucs luhn mwet uh in kahsruh ke mukwikwi lasr ke Alu uh.
Tiac pruhe muhkwena lah misinacri ma ac konwacack mwet suwohs. Sikalweni in pruhe lwen nuhkwewa ke insiom nohfohn in sokwack elos suc fah fahsruh ac liye, fahsruh ac kahsruh, ac fahsruh ac muhta. Esam in fahk nuh sin full-time misineri an. Elos oacna lupufacn, ahkolah in kahsruh!
Ke kom akacsruhi ke pweng wowo an, wosasuc luhn Jisus Kraist, oruh ke luhngse ac muhtweng. Kuht fin sramsram nuh sin mwet uh ac nuhnkuh muhkwena muh elos ac kuhracnna nokomwacng nuknuk fasrfasr ac siyuckyuck inkacnek nuh ke unohn in pacptais se ma an fototo emet nuh yohrohl an, kuht suhtuhelac in oruh.
Kuhtuh suc fahsruh ac liye ac fah, sahp, tiacna welah Alu uh; kuhtuh ac fah welah ke sie pacl tok. Sulaclah na laltahl. Tuhsruhk ma ingacn tiacna ekuhllah luhngse lasr nuh selos. Ac ma inge tiacna ekuhllah kampare lasr in fahfahlacna in suli kais sie mwet ac sucu an in fahsruh ac liye, fahsruh ac kahsruh, ac fahsruh ac muhta.
Ahklimekohsr, luhlahlfongi Leum in oruh ma usrnguck Lal. Kahlwem kac lah tiac ma kunom in ekuhllah mwet uh. Pa ingacn orekma luhn Nguhn Muhtahl uh. Ma kunom pa in akacsruhi ke ma an insiom ac muhta na fal nuh ke luhlahlfongi lom an.
Pa sis kom tiac puhlakihn fuhlweack fin oasr mwet tiacna sa in insese nuh ke pweng luhn wosasuc. Tiacna ma kom kuf kac.
Ma se ingacn ma na inmahsrlon sie mwet ac Pahpah Lucng.
Ma kunom pa in luhngse God ac mwet tuhlan Lal an.
Luhlahlfongi, luhngse, oruh.
Ukwe inkacnek se inge, ac God El ac fah oruh ma usrnguck Lal keim in ahkinsewowoye tuhlihk sacohk Nahtuhl.
Ma in kahsruh limekohsr inge ac kahsre kom in oruh ma mwet tuhma lutlut luhn Jisus Kraist elos tuh oruh e ke pacl mahtuh omet ah. Wosasuc ac Alu Lal uh yohk srihpac nuh ke moul lom ac lah suc kom an ac ma kom oruh. Kom ac fah kena suli mwet sahyac in fahsruh ac liye ac fahsruh ac kahsruh, ac God El ac fah oruh orekma in molwelah Lal, ac elos ac fah fahsruh ac muhta.
Tuhsruhk tuh Fuhkah Fin ac Upac?
“Tuhsruhk,” sahp kom ac siyuck, “ac fuhkah fin nga oruh ma inge kwewa ac mwet uh tiac topuk wo? Fuhkah elos fin suhfan Alu uh? Fuhkah fin elos tilac kawuck luhk?”
Ahok, ma ingacn kuh in sikyak. E ke na pacl mahtuh omet ah, mwet tuhmal lutlut luhn Jisus Kraist elos sruhngwacyuck.17 Mwet Sap Peter el fahk muh in engan lah kom ipeis ke kweok luhn Kraist.18 Mwet Luhlahlfongi ke pacl mahtuh met ah kaksak lah elos fal in wi kweok ke inel.19
Esam, Leum El orekma ke inkacnek usrnguck. Sahp ke kom topuk oacna Kraist finne oasr sruhngweyac uh ac kuh pac na in pa ma kuh in ahkfihsrwacsrye sie inse kwekwe.
Oa sie Mwet Sap luhn Leum Jisus Kraist, nga ahkinsewowoye kom in suhmwekihn in kahs in luhlahlfongi moul ke ohiyac wo luhn wosasuc, weacng puhlaik in akihlenyuck muh sie mempuhr luhn Alu luhn Jisus Kraist luhn Mwet Luhlahlfongi ke Lwen Sahflah, weacng insepuhsisacl in kahsruh ke orekma Lal oacna mwe ahkkahlwemye luhngse lom nuh sin Pahpah Lucng ac tuhlihk Nahtuhl.
Kawuck sacohk luhk, kom ac engan in etuh lah kom yohk srihpac nuh ke orekeni luhn Israel, in ahkolah nuh ke tuhkuh luhn Kraist ke kuh ac wosasuc yohk; weacng lipufacn muhtahl nuhkwewa.20
Pahpah Lucng El etwe kom. Leum El luhngse kom yohk. God El ac ahkinsewowoye kom. Orekma se inge ahkmuhtahlyeyuck Sel. Kom kuh in oruh ma inge. Kuht kuh in tuhkweni oruh ma inge.
Nga fahkwack ke inen Jisus Kraist, amen.