Sie Lohm Ma Nguhn luhn Leum Muhta We
Kom ac konwacack kuhtuh engan yohk lom ke srihke lom in oruh lohm sum an in sie acn luhn luhlahlfongi ke Jisus Kraist ac sie acn ma sesseslah ke luhngse.
Tamuhlwel ac tahmtahel sacohk luhk, nga tarilacna ke suliyuck nga in sramsram nuh suwos ke Toeni Luhlahp ahk 189 ke yac nuhkwewa se inge ke Alu luhn Jisus Kraist luhn Mwet Luhlahlfongi ke Lwen-sahflah. Ke yac se inge ke 1830, Joseph Smith el akiyac Alu uh ke kolyuck luhn Leum. Tuh sikyak lun lohm sin sucu lal Whitmer siskacn acn Fayette, New York. Tuh oasr mempucr ohnkohsr ac oasr mwet 50 sahyac tuh engan in wi ke lwen sac.
Nga ne tiac etuh ma Joseph Smith el tuh fahk ah kuh fuhkah muhtahl ke el tu ye muhtuhn u srihsrihk sac, nga etuh lah mac mwet oasr luhlahlfongi la ke Jisus Kraist tuh puhlakihn. Eltahl puhlakihn Nguhn Muhtahl, ac elos puhlakihn lah elos oasr ke sie acn muhtahl. Elos puhlakihn na pwacye lah elos tuhkweni ma se fanna.
Puhla usrnguck sacn pa ma kuht nuhkwewa kena in lohm sesr uh. Pa puhla se ma tuhkuh ke, oacna Paul el ahkuhtweyac, nuhnak in nguhn uh.”1
Srihpac luhk mihsenge uh pa in luti ma nga etuh kac lah kuht ac fal fuhkah in eis puhla sacn pacl nuhkwewa ac suli in an paht in sucu lasr uh. Oacna kom etuh ke oruh lom, ma sacn tiac fihsrwacsr in oruh. Amacin, inse fuhlwact, ac ma koluk uh enenuh in fihliyucki na lacoh liki kom. Luhngse pwacye luhn Kraist enenuh in tuhkuh nuh insiaclos ma oasr in sucu lasr uh.
Adam ac Eve, Lehi ac Sariah, ac kuhtuh pac pahpah ninac kuht etuh ke ma suhmuhslah uh konwacack lah mwe kwacfe na upac se. Inge oasr mwe srihkasrak in ahkkweye ke patokyacn engan yohk ke sucu ac lohm uh in ahkkweye kuht. Ac mwe srihkasrak ingacn oruh kuht in liye ohiyac kuh in sikyak nuh sesr ac sucu lasr uh. Kom esam sramsram se ke 4 Nephi ah:
“Ac tukun ma inge wacngihn fohs fin acn uh, ke srihpen luhngse luhn God ma oasr ke insiacn mwet uh.
“Ac wacngihn sok, kuh akuhkuhin, kuh fohs, kuh orek kosro, kuh kikiacp, kuh ahkmas, kuh kuhtwena ohiyac fohkfohk; ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God.
“Wacngihn mwet pihsrapasr, kuh mwet ahkmas, tiac pac mwet Laman, kuh kuhtwena kain in un mwet; tuhsruhk elos ma sefanna, tuhlihk nuhtin Kraist, ac mwet in usrui tohkohsrahi luhn God.
“Ac fuhkah insewowoiyaclos! “Tuh Leum El tuh ahkinsewowoyaclos ke ma nuhkwewa elos oruh; ahok, finne elos ahkinsewowoyeyuck ac kapkapwack ne ke na yac ahksiofok ac singucul tuh somlah; ac fihl se emet tukun Kraist El tuh misac, ac wacngihn fohs fin acn ah nohfohn.”2
Oacna ke kom etuh uh, pacl pwacr uh tiac fahlac na ne tok. Sramsram se ke 4 Nephi uh ahkuhtweyac ke mwacta sahflah ke muhnahslah in nguhn inmahsrlon sie un mwet wo. Pa sie atac ma sikyak ke fihlin un mwet nuhkwewa, ke u in alu, ac, ke ahsor emet, ke sucu uh. In lutlut ke atac sacn, kuht kuh in liye lah kuht ac kuh in karuhnguhnwacng fuhkah ac finne ahkyohkye puhla luhn luhngse ke sucu lasr uh fuhkah.
Pa inge atac se ke muhnahslah ma sikyak tukun yac 200 in moulkihn mihslac wowo ma wosasuc use uh.
Insefuhlwact utyak nuh kac.
Mwet uh tilac akacsruhi ke ma oasr yohrohlos nuh sin sie sin sie.
Elos muhtwacwacack in liyaclos sifacna muh elos fuhlwact kuh puhsisacl liki sie sin sie.
Elos muhtwacwacack in muhnahslah ke luhlahlfongi lalos ke Jisus Kraist.
Elos muhtwacwacack in sruhnga.
Elos muhtwacwacack in oruh kain in ma koluk nuhkwewa.
Pahpah ninac lahlmwetmwet ac topangi in wo in etuh akucl ingacn pacl se elos sikyak inmahsrlon mwet ke sucu lalos uh. Elos ac, pwacye in, fosrngah kac. Tuhsruhk elos ac etuh lah muhtwacwackiyacn srihpac sacn pa oruh lal Setuhn in srihke in kohllah mwet wowo nuh ke soko innek nuh ke ma koluk ac ohinge in eslah kolyuck luhn Nguhn Muhtahl. Na pahpah ninac lahlmwetmwet uh ac liye lah pacl wowo uh pa in kol kais sie tuhlihk, ac eltahl sifacna, in eis na pwacye suliyuck luhn Leum in tuhkuh nuh Yohrohl.
Kom ac kuh in tulokihnyac oruh sacn ke kom pahngon sie tuhlihk in auliyak, oacna, liki insefuhlwact. Kom kuh in srihke in kwacfe tuhlihk an in akacsruhi ke ma oasr selos ke kuhlwacng yohk. Kom kuh in siyuck selos in tulokihnyac puhla se ma muh elos wo liki sie mwet sahyac ke sucu uh. Tuhsruhk inge kom tuhkuh nuh ke akucl ma nga ahkuhtweyucki piacngah oacna, “Elos muhtwacwacack in muhnahslah ke luhlahlfongi lalos ke Jisus Kraist.”
Oasr ki se in kol sucu lom an in kihluckyak nuh ke acn nguhnnguhn ma kom kena nuh selos—ac nuh sum in oasr we weluhlos. Ke kom kahsrwelos in kapwack ke luhlahlfongi lah Jisus Kraist pa Mwet in Molwelah luhngseyuck lalos, elos ac puhla ac kena in auliyak. Ke elos oruh uh, insepuhsisacl ac muhtwacwacack in ahollah insefuhlwact. Ke elos muhtwacwacack in puhla ma Leum El sang nuh selos, elos ac ke akacsruhi ke kuhlwacng yohk. Aorekmai in fuhlwact liki kuh akihlenyuck uh ac srihkeni. Sruhnga uh ac sinucklac sin luhngse. Ac sahflah, oacna orek nuh sin mwet eklac sel Tohkohsrah Benjamin, kena in oruh ma wo ac kosrwacloslac liki mwe sruhf in oruh ma koluk. Mwet lal Tohkohsrah Benjamin ah fahkwack lah “wacngihnlac ke lasr in oruh ma koluk.”3
Na muhsahi luhlahlfongi ke Jisus Kraist pa muhtwacwackiyacn furohkohnlah muhnahslah in nguhn ke sucu lom ac in lohm sum. Luhlahlfongi sacn sahp kuh in use auliyak liki na luti in lain kais sie akucl luhn muhnahslah in nguhn uh.
Kom ac kol wo ke srihkasrak uh. Mwet ke sucu ac mwet sahyac enenuh in liye kom kapwack ke luhlahlfongi lom sifacna ke Jisus Kraist ac ke wosasuc Lal. Kom tuhfahna eis kahsruh na yohk. Pahpah ninac ke alu uh tuh ahkinsewowoyeyuck ke sie tahk in mwe luti mokleyuck na wowo nuh sin sucu ac kais sie mwet. Ke kom orekmakihn, kom muhsaheack luhlahlfongi lom ac luhlahlfongi luhn tuhlihk nuhtum ke Leum Jisus Kraist.
Kapwack ke Luhlahlfongi
Luhlahlfongi lom ke Mwet Lahngo kapwack ke kom ukwe nguhsr lal Prestuhn Russell M. Nelson in sulpac riti Puk luhn Mormon. Kom mahki fuhs ac kahs ma fahk ke Mwet Lahngo Luhlahlfongi lom ke Jisus Kraist kapwack. Tuhsruhk oacna soko sahk sasuc, kain luhlahlfongi ke Jisus Kraist se ac uli fin kom tiac konweyuckyak in tahfwelah na ahkwoyeyac an in nuhnkuh ac pruhe in ahkyohkye.
Srihkasrak lom ke kapkapwack ke luhlahlfongi uh sahp ac tiac etahiyuck sin mempucr ke sucu lom an ingena. Tuhsruhk kom in puhla fokoko ke oruh se lal Alma fuhsr ah. Ke kweok ke enenuh lal in auliyak ac nuhnakmuhnahs, el esamwack luhlahlfongi luhn pahpah tuhmwacl ke Jisus Kraist. Tuhlihk nuhtum uh kuh in esam luhlahlfongi lom ke Mwet Lahngo ke pacl se elos fosrngahlah enenuh auliyak uh. Alma el fahk ke kain pacl se inge:
“Ac tukun ma inge ke nga tuh toasrlacna ke kweok, ke nga sowack ke mwe acsmakihn luhn ma koluk pucspucs luhk, liye, nga oacyacpac esam in lohng kahs in pahluh luhn pahpah tuhmuhk nuh sin mwet uh ke tuhkuh luhn sie Jisus Kraist, Wen nuhtin God, in iwaclah ma koluk luhn facluh.
“Inge, ke nuhnak luhk sruokyac na nuhnak se inge, nga pruhe ke insiuck: O Jisus, Kom Wen nuhtin God, pahkotwen nuh sihk, suc oasr in mwen luhn sruhnga, ac rauniyucklac ke mwe kapihr luhn misac ma pahtpaht.
“Ac inge, liye, ke nga nuhnkuh ma inge, nga tiac sifilpac esam kweok luhk; ahok, nga tiac sifilpac sowack ke mwe acsmakihn luhn ma koluk luhk.”4
Pruhe ke Luhngse
In weacng srihkasrak lom ke kapkapwack ke luhlahlfongi, pruhe lom ekihn sucu se kuh in oruh sie ip na yohk srihpac in oruh lohm uh sie acn muhtahl. Mwet se pa wacna sollac in fahk kahs in pruhe luhn sucu uh. Pacl pruhe sacn kahlwem sin God in ahol mwet ma sikuckmuhtuhntei ac lohng ah, luhlahlfongi uh kapkapwack kaclos kwewa. Elos kuh in puhla ahkkahlwemyeyacn luhngse nuh sin Pahpah Inkuhsrao ac nuh sin Mwet Lahngo. Ac ke mwet se ma pruhe ah fahk kwaclos ma sikuckmuhtuhnte raunlac ke sucu sacn ma oasr enenuh la, nohfohnna kuh in puhla luhngse nuh selos ac nuh sin kais sie mwet ke sucu sacn.
Finne pacl mwet ke sucu tiac muhta lohm ah, pruhe uh kuh in oraclah kuhpahsr luhn luhngse uh. Pruhe ke sucu uh kuh in sun facluh nohfohn. Puhs liki pacl se ke nga etwacack lah mwet ke sucu ma muhta loeslac tuh pruhe ke pacl sepacna ac ke srihpac sepacna ma nga pruhe kac. Nuh sihk, fahk mahtuh se “Sucu ma tuhkweni pruhe uh tuhkweni muhta” kuh in tuhtahflah nuh ke “Sucu ma tuhkweni pruhe uh elos tuhkweni, finne elos muhta loessuhlah.”
Luti in Sa Na Auliyak
Ke srihpen wacngihn sesr suwohs ac puhla uh fihsrwacsr in ngalyak, sucu uh kuh in eklac acn muhtahl muhkwena ke kuht sa na auliyak ac ke inse pwacye uh. Pahpah ninac kuh in akiyac sie srihkasrak an. Kahs isrlacl kuh nuhnak sekuhlwacng uh kuh in sa na auliyak kac ac ke inse pwacye. Ma na fihsrwacsr se “Sislah koluk luhk” kuh in unwaclah ac suli kwewana nuhnakmuhnahs ac luhngse.
Mwet Pahluh Joseph Smith pa sie mwe srihkasrak nuh sesr ke el tuh sun ongaiyac ke lainyuck el upac, sin mwet tuhkahk, ac ke pac tiac insese inmahsrlon sucu lal. El sa in nuhnakmuhnahs, finne el etuh lah mwet lainuhl uh ac sulpac tuhkuh. El siyuck ke nuhnakmuhnahs, ac el sang ke sukohsohk.5
Ahkyohkye Nguhn luhn Misineri
Wen nahtuhl Mosiah sulwaclah in sang wosasuc nuh sin mwet nuhkwewa. Kena se inge tuhkuh ke puhlakihnyuck lalos sifacna ke auliyak uh. Elos tiac puhla wo in nuhnkuh ke oacna sie mwet in kweokkihn mwactacn ma koluk uh oacna nuh selos ah. Na elos foracng nuh ke lusen yac ma elos sruhngacyuck, sun ma upac, ac sun ma sensen in sang wosasuc luhn Jisus Kraist nuh sin mwet lokoalok lalos. Ke oruh sac, elos konwacack engan yurin mwet na puhs ma auliyak ac puhlakihn engan ke nuhnakmuhnahs ke Iwaclah luhn Jisus Kraist.
Mwet ke sucu lasr uh ac kapkapwack ke kena lalos in akacsruhi ke wosasuc ke elos puhla engan ke nuhnakmuhnahs uh. Ma sacn kuh in tuhkuh finne ke elos ahksasucye olweacng uh ke pacl se elos ipeis ke kuhfa luhn Leum. Nguhn luhn misineri ac kapwack in lohm sesr uh ke tuhlihk ac pahpah ninac puhlakihn engan ke nuhnakmuhnahs ke alu in ipeis kuhfa luhn Leum uh. Ke srihkasrak in ahkfuhlwact lalos, kwewana pahpah ninac ac tuhlihk an kuh in kahsruh sie sin sie in puhlakihn engan sacn. Engan sacn kuh in som loes in furohklah lohm sesr nuh ke acn in ahkpah luhn misineri. Nohfohn kuh in tiac kuhlwacnsap ke misineri, tuhsruhk nohfohn ac puhla kena in akacsruhi wosasuc, ma tuh usaclosme in puhla nuhnakmuhnahs ac mislac. Na lah ingena kuhlwacnsap fohnlah ke pacl kuh tiac, nohfohnna kuh in puhlakihn engan in sang wosasuc nuh sin mwet sahyac.
Muhtwacta ke Tempuhl
Kwewana nuh sin pahpah ninac ac tuhlihk, tempuhl pa pacl wowo se emet in eis sie puhla ke ac luhngse ke acn wolacna uh. Ma sacn pwacye yohkna ke pacl se tuhlihk uh fuhsr uh. Tuhlihk uh isuslac ke Kahlwem luhn Kraist. Finne ahwowo se kuh in puhla lah tempuhl uh muhtahl. Ke srihpen pahpah ninac luhngse tuhlihk srihsrihk nahtuhltahl, tempuhl uh sang nuh selos finsrak lah elos kuh in luti tuhlihk nahtuhlos in luhngse sucu ma pahtpaht—netok.
Kuhtuh suwos oasr petsac ke tempuhl lun lohm suwos an. Ke oasr tempuhl sulpac weacng fin facluh nohfohn, kuh nuh sin pahpah ninac pucspucs in muhtwacta ke acn luhn tempuhl wi sucu lalos. Kuhtuh na ac kuh in wi ke ikacklah luhn tempuhl uh ke muhsahlah uh. Pahpah ninac kuh in siyuck sin tuhlihk an lah eltahl puhla fuhkah in apkuhran kuh oasr lun tempuhl uh.
Pahpah ninac nuhkwewa kuh in fahkwack luhlahlfongi lah meac kalmacn sie tempuhl nuh sel. Prestuhn Ezra Taft Benson, suc luhngse tempuhl, wacna sramsram ke el liye ninac kiyacl kahkahsrihk aeni nuknuk nuh tempuhl lal.6 El sramsram ke esam lal ke el sie tuhlihk mukul el liye sucu lal ke elos som liki lohm sel in utyak nuh tempuhl.
Ke el tuh Prestuhn luhn Alu uh ah, el fahsr nuh tempuhl ke lwen sacpacna ke kais sie wik. El wacna oruh orekma ke tempuhl luhn sie mwet somlah. Sikyak yohk ke srihkasrak luhn pahpah ninac kiyacl.
Kahs in Luhlahlfongi Luhk
Kom ac konwacack kuhtuh engan yohk lom ke srihke lom in oruh lohm sum an in sie acn luhn luhlahlfongi ke Jisus Kraist ac sie acn ma sesseslah ke luhngse, luhngse pwacye luhn Kraist. Fohlohkyak luhn wosasuc uh muhtwacwack ke siyuck na puhsisacl se motkweyuck ke sie lohm puhsisacl, ac kuh in oacna inge ke kais sie lohm sesr ke kuht sikalweni in akiyac ac orekmakihn mwe luti yohk ke wosasuc uh we. Pa inge finsrak luhk ac kena loal luhk ke nga tuh sie tuhlihk mukul srihsrihk ah. Kowos nuhkwewa oasr liye la ke kain lohm se. Puhs suwos, ke kahsruh luhn Leum, tuh oraclah.
Kuhtuh srihke ke inse pwacye nuh ke mwe insewowo sacn, tuh soenna ituckyang. Olwelah luhk nuh suwos pa sie mempucr ke U luhn Mwet Sap Singucul Luo sie pacl ah tuh oraclah nuh sihk. Nga tuh fahk nuh sel lah, ke srihpen sulaclah luhn kuhtuh sesr oraclah in sucu lasr uh, nga ahlohloh lah kuht kuh in tuhkweni ke facl se ac tuhkuh uh. El fahk, oacna ke nga kuh in esam uh, “Kom fosrngah ke elyah stuhuh sacn. Kom in moul na fal nuh ke tohkohsrahi celestial, ac tahkuhnlah nuh ke sucu an ac fah wolacna liki ma kom kuh in nuhnkuh kac an.”
Nga luhlahlfongi lah el ac tahfweoht finsrak engan sacn nuh sin oacna sie sesr ke moul suhkawihl se ma oruh ma nuhkwewa kuht kuh in oruh kuht in fal ac mwet ke sucu lasr nuh ke moul ma pahtpaht. Nga etuh lah plwacn Lal Pahpah Lucng pa plwacn in engan. Nga fahkwack lah plwacn Lal uh oruh kuh nuh sin kais sie sesr ma oruh kuhiyacsr in siliyuck ke sie sucu netok.
Nga etuh lah ki luhn pristut uh fohlohkyak nuh sel Joseph Smith tuh tuhfahlah ke soko tahk tiacna wotlac fahfahlac nuh sel Russell M. Nelson. Ki ingacn oruh kuh in siliyucki sucu uh mihsenge. Nga etuh lah Pahpah Lucng El luhngse kuht, tuhlihk nguhn Nahtuhl, ke sie luhngse suwohs. Nga etuh lah ke srihpen Iwaclah luhn Jisus Kraist, kuht kuh in auliyak, ahknwacsnwacsyeyucklac, ac eklac fal in moul yurin sucu luhngse netok wi Pahpah tuhmasr Inkuhsrao ac wi Wen Kuloh Nahtuhl, Jisus Kraist. Nga fahkwack ke inen Jisus Kraist, amen.