![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fcc%2Fee%2Fcceeace9e2bf9e1c119ae59d6f03ff760402dcfc%2Fcceeace9e2bf9e1c119ae59d6f03ff760402dcfc.jpeg/full/!250,/0/default)
Ahkpahye Muscle luhn Nguhnasr
Oacna in riti ac lutlutkihn muscle an suhfal in ahkfokokoye muscle an, riti ac lutlutkihn luhlahlfongi ac wacngihn mukwikwi suhfal in oraclah luhlahlfongi.
Nga sruikihn mwe insewowo in oasr mahno luhk, ac ma sacn mwe insewowo yohk sin Pahpah tuhmasr Inkuhsrao. Oasr muscle puhs likina 600 ke mahnosr.1 Muscle puhkantwen enenuh in ahsrosr kuht in muh kuh in oruh mukwikwi lasr lwen nuh kwewa. Kuht kuh in orekmakihn kuh yohk in riti ac lutlutkihn muscle an, tuhsruhktuh kuht fin nuhnkuh ma sacn kuh in ahkfokokoyaclos, kuht ac fah ahsorlac. Muscle lasr uh kapwack muhkwena ke kuht orekmakihn.
Nga fah fahsruh in kahlwem muh mwe sang luhn nguhn kuh in orekma ke ohiyac sac pac. Elos enenuh ahsrosr in kapwack. Mwe sang luhn nguhn ke luhlahlfongi, sie srihkasrak, itac puhla muhkwena se; pa ip yohk ke mukwikwi ac sikyang pacl puhkantwen fototo nuh ke kahs ahsrohsr.2 Oacna in riti ac lutlutkihn muscle an suhfal in ahkfokokoye muscle an, riti ac lutlutkihn luhlahlfongi ac wacngihn mukwikwi suhfal in orwaclah luhlahlfongi.
Ke nga yac 16, tamuhlwel mahtuh emet wiyuck, Ivan, el yac 22 ke pacl sac, el fohlohk nuh lohm sesr sie lwen ah ac akacsruhi pweng se nuh sin sucu lasr. El sulwaclah in pacptais nuh ke Alu luhn Jisus Kraist luhn Mwet Luhlahlfongi Lal ke Lwen-Sahflah. Ninac pahpah kiyacsr fohsack, ac nga tiacna arulwacna kahlwem kac lah meac ma el fahk ah. Yac se kuhtuh somlah, el fahk nuh sesr pweng se sahyac: el sulwaclah in wi misin ke Alu uh, kalmac an pa kuht ac tiac liyacl ke lusen yac luo. Ninac pahpah kiyuck tiacna engan ke pweng se inge; tuhsruhk, nga liye muh el sruasra muh ahkyohkye taptap luhk kacl ac ke sulwaclah lal.
Mahlwem tohkoh, ke Ivan el oasr ke misin lal, oasr pacl luhk in plwacn muhtwacta yurin matwuck in oruh muhtwacta se. Kuht ke ahkfuhlwactye sahflahiyacn pacl in lutlut lasr ac muhta lwen ekahsr in muhtwacta likihnpot uh.
Nga suhmuhslah lwacta se nuh sin tamuhlwel wiyuck suc wi misin in fahk plwacn in muhtwacta luhk ke pacl luhn summer. El sihm fohlohk nuh sihk muh el kuhlwacnsap in ahksahfyeluhllah pa inge. Nga sulwaclah muh ac sahp wo fin nga tui yohrohl ac muhtwacta yohrohl. Tiac paht tohkoh nga etwaclah muh sucu luhn misineri se tiac kuh in muhtwacta yohrohlos.
Nga ahkolah ke pacl sac. Nga esam ke nga muhta ke bus soko nga nuhnkuh ke ma pwacr nuhkwewa Ivan ac nga fah tuhkweni oruh ke lwen faht kahto se inge. Kuht fah mongo, sramsram, srihtacl ke pohkpohk ah, rek kolo sasuc—meac pacl na pwacr se lasr!
Ke bus soko tui ke acn aksohk ah, nga liyacl Ivan tu sisken mukul fuhsr se sahyac, kwewana nukum wes fasrfasr ac necktie. Nga srolah ke bus soko ah, kuht sruokyac sie sin sie, ac el ahkutweyac kawuck se lal ah. Kuht tiac eislah minit se sahyac, ac nga fahk nuhsin tamuhlwel wiyuck plwacn luhk ke lwen sac, tuhsruhk nga tiac etuh lah meac plwacn lal Ivan. El liyeyuc, isrwacsr, ac fahk, “Ahok! Tuhsruhk, kuht enenuh in oruh orekma srihsrihk met. Kom kuh in wikuht?” Nga insese, ac nga nuhnkuh muh yohk pacl in som nuh lihkihn pot uh piyacng uh.
Ke lwen sac, yohk likina ao 10, nga fahsr ke inkacnek luhn acn sac yohrohl tamuhlwel wiyuckac kawuck se lal. Nga iswacsr nuh sin mwet lwen fohn se ah. Nga sramsram nuh sin mwet nga tiacna ohsun met. Kuht sramsram nuh sin mwet nuhkwewa, tongol sruhnguhl luhn mwet sahyac, ac muhtwacta yurin mwet ma tamuhlwel wiyuck ac kawuck se lal ah luti ah.
Ke sie pacl in muhtwacta ah, tamuhlwel wiyuck ac kawuck se lal ah elos luti ke Jisus Kraist ac plwacn in molwelah. Na, Ivan el tui ac ngwetma. Nga lut, ac el siyuck sihk in fahk nuhnak luhk ke mwe luti lalos. Mwet nohfohn lun infuckihl uh tui in sramsram ac ngwetma. Finne upac nuh sihk, nga konwacack kahs fal ac fahk puhla luhk ke Mwet Lahngo. Nga nihkihn lah ma nga fahklah ah pwacye kuh suhtuhuh. Tamuhlwel wiyuck el tiac ahkpwacyeyuc; tuh, el fahk kuloh nuh sihk mweyen nga fahk nuhnak ac puhla luhk.
Ke pacl lasr tuhkweni, tamuhlwel wiyuck ac kawuck se lal ah tiac sislah minit se in lutiyuc sifacna, tuh nga eis etwacack puhs ke kuht sramsram ah. Nga liyacack mwet eklac wolac ke elos eis kahlwem in nguhn ke moul lalos. Nga liyacack sin kuhtuh selos sokwack finsrak ke pweng inge, ac nga lotwelah in kuhlwacnsuhpuh mwet sahyac ac muhlkihnyuclac ac kena luhk sifacna. Nga oruh ma Mwet Lahngo El luti: “Mwet uh fin fahsr tukuk, lwelah elan lahfwekihn el sifacna.”3
Ngwetlah nuh tok, nga kahlwem muh luhlahlfongi luhk kapwack ke lwen sac mweyen tamuhlwel wiyuck use pacl nuh sihk in orekma. Nga orekmakihn luhlahlfongi luhk ke kuht riti ma suhmuhslah, suk mwet in luti, fahkwack luhlahlfongi, kuhlwacnsuhpuh mwet sahyac, ac ma sahyac. Kuht tiac is pacl lasr in rek kolo sasuc ke lwen sac, tuhsruhk insiyuck eis kahlwem sin inkuhsrao. Nga tiac liye finne sie pohkpohk in meoa uh, tuhsruhk nga puhla luhlahlfongi luhk kapwack oacna fihtac mustard se.4 Nga tiac oruh ma pwacr ke lwen kahto sac oacna mwet muhtwacta se, tuhsruhk puhla na wowo, ac finne nga tiac etuh ke pacl sac, nga pa misineri—finne nga soenna wi Alu uh!
Pacl in Ahkkweye Muscle luhn Nguhn
Ke srihpen Fohlohkihnyuckyak luhn wosasuc uh, kuht kuh in kahlwem lah fuhkah Pahpah tuhmasr Inkuhsrao kuh in kahsrwe kuht eis mwe sang luhn nguhn. Oacpacna lah El fah use nuh sesr pacl in ahkyohkye mwe sang inge ac tiac use ma inge fin wacngihn orkema in nguhn ac mahno. Fin kuht lohacng nuhke Nguhn Lal, kuht ac fah lotwelah in sokwack srihpac ac mukwikwi nuh kac.
Fin kuht ke muhtweng, sahp kuht enenuh in ahkpah in sanno ke top. Fin kuht ke ahkyohkye luhngse lasr ke mwet tuhlan lasr, kuht kuh in muhta sisken mwet sasuc lun lohm alu uh. Oacna ke luhlahlfongi: ke kuht tahfuh luo ke insifacsr, yohk srihpac kuht in luhlahlfongi ke olwelah luhn Leum in muhtweng. Kuht fin oruh ma inge, kuht orekmakihn muscle luhn nguhnasr ac ekuhllah ma inge nuhke ma fokoko ke moul lasr.
Sahp tiacna fihsrwacsr ke muhtwacwacackiyac, ac sahp ac muh tuhkuh tuh ma upac se. Kahs luhn Leum, sel mwet pahluh Moroni, ma nuh sesr mihsenge: “Ac mwet uh fin tuhkuh nuh Yuruk Nga fah ahkkahlwemye nuh selos muhnahs lalos. Nga fah sang muhnahs nuh sin mwet uh tuh elos in kuh in inse puhsisacl; ac luhng kuhlwacng luhk fal nuh sin mwet nuhkwewa suc ahkinsepuhsisaclyaclos sifacna ye muhtuhk; tuh elos fin ahkinsepuhsisaclyaclos sifacna ye muhtuhk, ac oasr [kuh orekma] luhlahlfongiyuc, na Nga fah oruh ma muhnahs uh in ma fokoko nuh selos.”5
Nga sruikihn ke tamuhlwel wiyuck Ivan, suc akacsruhi wosasuc uh nuh sihk ac suliyuc in moulkihn wosasuc ac liye mwe muhnahs luhk. El kahsrweyuc in oruh suliyuck sin Mwet Kol: “Fahsruh, fahsr tukuk”6—in fahsr oacna Mwet Lahngo El fahsr, suk oacna Mwet Lahngo El suk, ac luhngse oacna Mwet Lahngo El luhngse kuht. Mahlwem ekahsr somlah, tukun pacl luhk yurin misineri, nga sulwaclah in pacptais ac som wi misin pac.
Lwelah kuht in eis solsol lal Prestuhn Russell M. Nelson ac tuhkuh nuh Mwet Lahngo ke inse pwacye7 ac suk muscle lasr muh muhnahs in nguhn ac ahkpah ma inge. Pa inge akuhtuhn loes tiac akuhtuhn moi, oruh met muhlkuhnlah ma srihsrihk luhn nguhn muh kuh in ahkkweye muscle yohk srihpac in nguhn uh. Fin kuht ke ahkyohkye luhlahlfongi lasr, lwelah kuht in oruh ma enenuh ke luhlahlfongi.
Nga fahkwack luhlahlfongi luhk muh kuht tuhlihk luhngselacna nuhtin Pahpah tuhmasr Inkuhsrao. Wen Nahtuhl, Jisus Kraist, El luhngse kuht. El tuhkuh nuh facluh in ahkkahlwemye inkacnek pwacye nuh sesr ac sang moul Lal in use finsrak nuh sesr. Mwet Lahngo El suli kuht in ukwe srihkasrak suwohs Lal, in orekmakihn luhlahlfongi lasr kacl ac Iwaclah Lal, ac ahkyohkye mwe sang in nguhn nohfohn lasr ma kuht ahkinsewowoyeyucklac kac. El pa inkacnek uh. Pa inge fahkwack luhlahlafongi luhk ke inen Jisus Kraist, amen.