Top ke Pruhe
Pahpah el etuh kacsr, etuh mwe enenuh lasr, ac fah kahsrwe kuht wo.
Sie ma suhmuhslah yohk srihpac ac wolacna ke wosasuc luhn Jisus Kraist pa luhngse suwohs luhn Pahpah Tuhmasr Inkuhsrao nuh sin tuhlihk Nahtuhl. Ke srihpen luhngse suwohs se ingacn, El ahkinsewowo ye kuht tiac ke kena ac enenuh fal lasr tuh oacyacpac ke lahlmwetmwet fahlacna fal Lal. Ke fwackyuck sel mwet pahluh Nephi, “ Nga etuh lah [God] el luhngse tuhlihk nahtuhl.”1
Sie ohiyac sikyak ke luhngse suwohs sacn pah wi luhn Pahpah Tuhmahsr Inkuhsrao ke ma pwacye ke moul lasr finne ke kuht tiac etuh kac kuh kahlwem kac. Kuht suk kolyuck wo luhn Pahpah ac kahsruh ke pwacye, pruhe pwacye. Ke kuht ahkfuhlwactye olwelah ma kuht orwaclah ac kampare in oacna Mwet Lahngo yohk, kuht lwelah ke sie infacl2 wo fahsr la ke kolyuck wo luhn kuhiyac ac kena ke Nguhn Muhtahl.
Ma suhmuhslah luti kuht, “Papa tomowos etuh tari ma kowos enenuh met liki kowos siyuck sel,”3 ac El etuh kwewa ma, ke kwewana ma suc an oasr met [Yohrohl].”4
Mwet pahluh Mormon el sie mwe srihkasrak nuh ke ma se inge. El tiac na moul in liye ma sikyak ke orekma lal. Tuh el etuh lah Leum el taran na in kohlohl. Ke el puhlah kena in sang puhlwet srihsrihk lal Nephi wi ma suhmuhslah lal, Mormon el suhmuhslah: “Ac nga oruh ma inge ke srihpac lahlmwetmwet; tuh ohinge mahmah nuh sihk, fal nuh ke orekma luhn Nguhn luhn Leum suc oasr in nga. Ac inge, nga tiac etuh ma nuhkwewa; tuhsruhk Leum El etuh ma nuhkwewa suc ac fah tuhkuh; ohinge, El orekmakihnyuc in oruh fal nuh ke luhngse Lal.”5 Ne ohinge Mormon el tiac etuh ke tuhlac tok luhn pages sihmlac 116, Leum el etuh kac, ac ahkolah sie innek in kuhtanglah ma upac se ingacn met liki sikyak.
Pahpah el etuh kacsr, etuh mwe enenuh lasr, ac fah kahsrwe kuht wo. Kuhtuh kahsruh se ingacn utuckuh ke pacl sac na pwacye kuh kuh in tukun kuht siyuck ke kahsruh wo. Kuhtuh pacl uh kena pwacye ac sacohk lasr tiac toplac ke ohiyac se kuht finsraki, tuhsruhk kuht konwacack lah oasr mwe insewowo luhn God tuhpan kuht ke pacl fahsruh. Ac kuhtuh pacl uh kena muhtahl lasr tiac utuckuh nuh sesr ke moul se inge. Nga fah akacsruhi, ke sramsram tolu, ohiyac ma Pahpah tuhmasr Inkuhsrao fah topuk pruhe pwacye lasr nuh Sel.
Mukul fuhsr nahtuhl el pahngonyuck in kuhlwacnsap ekihn sie misineri fin acn France Paris Misin. Ke ahkolah in kuhlwacnsap, kuht som moli ma enenuh suc pa fohrohk, suits, taes, ac saks, ac coat loeloes se nukumyuck ke pacl ohu. Koluk ohiyac, overcoat se el ke ah tiacna kuhkwackihnyuck sais se el enenuh ah. Ne ohinge, clerk se ke stoh se fahk lah overcoat se ingacn fah oasr ke kuhtuh wik ekahsr tok ac fah suhpweyucklac nuh ke acn in lutlut luhn misineri center e Provo met liki oacyak luhn wen nahtuhsr nuh France. Kuht molwelah coat sac ac tiac nuhnak tukun kuht molwelah.
Wen nahtuhsr ilyak nuh ke misineri training center ke June, ac overcoat sac suhpweyucklac lwen se met liki pacl in ai lal ke August. El tiac srihkacacng coat sac tuh el silahklahk orwacni nuh ke mwe nweinyuck lal wi nuknuk lal ac ma lal sahyac.
Ke winter el apkuhran e Paris, acn wen nahtuhsr kuhlwacnsap kac, el sihm fahk nuh sesr lah el eislah overcoat sac ac srihkacacng ac konwacack lah ahluhkwelah srihklaclac. Na kuht enenuh in fihliyac luhpah sahyac ke bank account lal tuh lacn kuh in molwelah sie coat sahyac ah e Paris, suc el oruh. Ke kuhtuh kasrkuhsrak, nga sihm fahk nuh sel ac fahk nuh sel in srihke sang coat sac nuh sin mwet sahyac, fin el tiac kuh in orekmakihn uh.
Tohk kuht eis email se inge sel: “Arlac, arlacna ohu acn se inge. ... Oacna eng ngwe in tuhkuh suwohs nuh yohrohsr, ne ohinge coat sasuc se luhk uh yohk ac toasr kuhtuh. … Nga sang ma mah se luhk ah nuh sin sie [misineri sahyac se ke acn in muhta lasr] suc fahk lah el pruhe in suk innek in eis sie coat wo ah. El sie mwet sucu nuh ke alu uh ac ninac na kiacl pa oasr yohrohl … ac misineri suc pacptaiselah elos pa kahsrwel ke misin lal ac tuh coat sac el top ke sie pruhe, oruh nga puhlah engan kac.”6
Pahpah Inkuhsrao etuh lah misineri se inge, suc kuhlwacnsap e France ke maels 6,200 (10,000 km) liki acn sel, fah sana in enenuh sie overcoat sasuc nuh ke pacl ohu ke winter e Paris tuhsruhk lah misineri se inge fah tiac oasr mani in molwelah sie ma sasuc ah. Pahpah Tuhmasr el oacyacpac etuh lah wen nahtuhsr fah eis ke stoh in nuknuk e Prove, Utah, overcoat se ma fah tiac arulacna srihk. El etuh lah misineri luo inge fah tuhkweni kuhlwacnsap e Paris ac coat se ingacn fah top ke pruhe fihlpacp ac pwacye luhn misineri se suc oasr enenuh sa lal.
Mwet Lahngo El luti:
“Tuh kowos ku in molela won sparrow luo ke ipin cent sena? a tia siefanna sin sparrow inge ku in putatla nu infohk uh Papa inkuhsrao El fin tia lela.
“Tuh finne aunsifowos oacoaclah tari.
“Nik kowos sangeng, tuh kowos arulana soak liki won sparrow puspis.”7
Ke ohiyac sahyac, ke kena sacohk lasr tiac utuckuh ke ohiyac se kuht finsrak kac, fah mwe enenuh na sahflah pwacye lasr. Mwe srihkasrak. Joseph wen nahtuhl Jacob el lwemtaiyuck ac sruhngwacyuck sin tamuhlwel lal tuh elos in oruh sie plwacn in unilyac Joseph. Sahyac na, elos kuhkwackuhnuhllah ekihn sie mwet kuhlwacnsap luhn Egypt.8 Fin sie mwet el fah puhlah lah pruhe lal tiac toplac ke ohiyac se el finsraki, kuh in oacna Joseph. Ke ma pwacye, koluk ohiyac kahlwem lal sikyak ke mwe insewowo yohk nuh sel ac molwelah sucu lal liki nguhlnguhl. Tok, tukun tuhkuh sie mwet kol luhlahlfongiyuck fin acn Egypt, ke luhlahlfongi yohk ac lahlmwetmwet el fahk nuh sin tamuhlwel lal:
“Nimet komtal oela ku likiya mu oasr koluk lomtal ke sripen komtal tuh kukakinyula nu yenu. God pa supweyume meet liki komtal, ngan tuh molela moul lun mwet uh.
“Sracl se inge tuhfahna yac akluo fin acn uh: ac yac limekosr lula ma ac fah wangin taknelik ku kosrani.
“Ac God El supweyume meet liki komtal in tuh molikomtalla fin facluh ac in molikomtalla ke lumah na usrnguk se inge.
“Ouinge tia komtal pa supweyume nu inge, a God.”9
Ke college, wen mahtuh nahtuhsr el sulohsohlah nuh ke sie orekma wolacna luhn tuhlihk lutlut ma oasr kuhiyac wo in kol nuh ke sie orekma wolacna, orekma ma ac pucrmenacn tukun sahflah ke lutlut. El orekma upac orekma luhn tuhlihk lutlut se inge yac ahkosr, tuhkuh etuh na pwacye, ac oacyacpac ahkfuhlwactyeyuck sin mwet weluhl orekma ac mwet kahsruh. Sahflahiyacn senior yac lal, apkuhran in God el plwacnwelah innek sacn (fal nuh ke ma wen nahtuhsr nuhnkuh kac), pucrmenacn posision sac ikacklah, ac el pa mwet se ma an emet, ke kwewana sain ac kena kac, kahlwem, el fah eis orekma se ingacn.
Tuh, el tiac na aeriyucki. Tiac sie sesr kahlwem kac. El ahkolah wo, wona interview, pa mwet se ma fal wo e meet, ac pruhe ke finsrak ac kena yohk! El lut ac suhpwacrlac, tiac sesr etuh lah srihpacn meac el tiac aeriyucki. Efuh God el oruh koluk nuh sel ke kena muhtahl se lal uh?
Tiac tukun yac ekahsr tok top se ingacn tuhkuh arulacna kahlwem. Tuh fuhnuh el eis orekma se ma el nuhnkuh muh wo tukun el graduate, luhkuhn el fah tiacna eis sie orekma wo liki ma ahkkahlwemyeyuck ingena pa ma nuh ke wo lal ac mwe insewowo lal ma pahtpaht. God el etuh muhtwacwacackiyac nwe ke sahflah (oacna El etuh pacl nuhkwewa kac), ac ke ohiyac se inge, top nuh ke pruhe muhtahl puhs fah tiac top, tuh kain atac ingacn kuh in sikyak.
Ac kuhtuh pacl uh, top ke pruhe ma kuht ahkfuhlwactye, kena yohk, ac suk na pwacye tiac utuckuh ke moul se inge.
Tahmtahel Patricia Parkinson el osweyucklac wona mwe ngwetngwet lal, tuh ke el yac itkohsr el ohkohklah. Ke el yac yuc, Pat el muhtwacwacack wi lutlut Utah ke acn in Sohlohng kahs ac Ohkohk e Ogden, Utah, ke kuht mael 90 (145km) liki lohm sel, suc oruh enenuh nuh sel in muhta ke acn lutlut—suc oruh kwewana sruhnfuhsr luhn sie matwac yac- uc kuh in puhlakihn.
Ke yac 11, wacngihnlac na pwacye liye lal. Pat el fohlohk nuh lohm se muhta we key ac 15 in wi aeskul ke acn sel. El som college ac sahflah ke degree luhn communication disorders ac psychology, ac tukun pacl upac yohk lal ke lutlut, el ilyak nuh ke lutlut ac ahksahfyelah ke master degree ke speech language pathology. Pat el ingena orekma ke elementary skul 53 ac mwet in kahsruh ke kain in kahs ahkosr ke acn in lutlut lal. Oasr lohm sel sifacna ac stosah okwacl sifacna, suc kawuck lal ac mempucr ke sucu lal wucnuhl ke Pat el enenuh mwe kahsruhsr.
Key ac 10, Pat el reklac pacl lal in oasr pacl in ono in liye ke ohkohklah luhn muhtahl. Pahpah ninac kiacl ah kwacna fahk nuh sel ma sikyak ke puhlan pacl in ono lal, tuhsruhk ke kuhtuh srihpac elos tiac fahk nuh sel ke ma ahkolah in orek ke ono inge. Ke ninac pahpah kiacl fahkwacng nuh sel lah ono lal ah kohtlah, Pat, ke kahs luhn ninac kiacl, “fosrngahlah nuh pwacye.” Pat el kahsrohsr liki rum sac tuh fohlohk ac fahk nuh sin pahpah ninac kiyacl ac fahk ke kuhiyacl, “Lwelah ngan fahk ma se. Nga etuh na, God el etuh kac, ac kom oacyacpac etuh pac kac. Nga ac ohkohk ke moul luhk nohfohn!”
Yac puhs somlah, Pat el som nuh California muhtwacta yurun mempucr luhn sucu lal suc muhta we. Ke el oasr likunum wi tuhlihk muhtwacn nuhtin tamuhlwel lal yac tolu, el fahk nuh sel, “Ninac Pat, efuh kom te siyuck sin Pahpah Lucng el in usot ahtron muhta sasuc lom? Mweyen kom fin siyuck sin Pahpah Lucng, El fah usot oacna sie ma kom ke. Kom siyuck nuh Sel.”
Pat el fahk lah el lut ke kihsen siyuck sac ac tiac top, “Koacl, kuhtuh pacl Pahpah Lucng el tiac oruh kain se ingacn. Kuhtuh pacl uh El enenuh kom in lotwelah kuht ma uh, ac tuh El tiac usot kwewa ma kom ke. Kuhtuh pacl uh kom enenuh in tuhpan. Pahpah Lucng ac Mwet Lahngo etuh ma fal ma wo nuh sesr ac ma kuht enenuh. Na Elos tiac kuh in usot kwewa ke lom ke pacl sena kom ke kac.”
Nga etwacl Pat ke yac puhs ac ingena fahk nuh sel ingena lah nga luhngse pwacye ke el wo ac engan pacl nuh kwewa. El topuk, “Koacl, kom tiac oasr yuruk lohm sihk, kuh kom? Oasr pacl luhk. Oasr pacl upac nga puhlakihn, ac nga tuhng na upac.” Ne ohinge, el fahk, “Ke pacl se muhtuhk muhtwacwacack ohkohklah, upac, tuhsruhk nga etuh lah Pahpah Lucng ac Mwet Lahngo elos wi sucu luhk ac nga. Kuht karihngihn ke ohiyac wo kuht kuh kac, ac ke nuhnak luhk sifacna, kuht karihngihn ke ohiyac pwacye se. Nga sikyak sie mwet suhksesful fal se, ac yohkna nga mwet engan se. Nga esam El sang kahsruh lal in ma nuhkwewa. Nuh selos suc siyuck sihk fin nga ahngyahng mweyen nga ohkohk, nga topuk, ‘Suc nga uh ngan ahngyahng kac? Pahpah Lucng el oasr in nga; nga tiac muhkuh. El oasr yuruk pacl nuhkwewa.’”
Ke ohiyac se inge, kena lal Pat in fohlohkohnwack mwe liye la fah tiac ituckyang nuh sel ke moul se inge. Tuhsruhk puhluh kahs lal, lotwelah sin pahpah tuhmwacl, pa “Kuhtanglah mwe srihkasrak luhn moul uh”10
Prestuhn Henry B. Eyring el fahk, Pahpah el oasr etuh keim, puhla lom, ac nguhn ac enenuh luhn mahno luhn mwet nuhkwewa raunikomyak.”11 Ma yohk ac wolacna pwacye se inge kuh in sukokyak ke ohiyac tolu nga akacsruhi kac.
Tamuhlwel ac tahmtahel, kuhtuh pacl pruhe lasr sana in toplac ke sikyak kuht finsrak kac. Kuhtuh pacl pruhe lasr tiac toplac ke ohiyac kuht finsrak kac, tuh ke kuhtuh pacl kuht fah lotwelah lah oasr plwacn yohk ac insewowo luhn God el ahkolah nuh sesr liki ma kuht kena kac. Ac kuhtuh pacl siyuck muhtahl lasr nuh sin God fah tiac utuckuh ke moul se inge.12 Ke Elder Neal A. Maxwell el fahk, “Luhlahlfongi enenuh in luhlahlfongi ke pacl luhn God.”13
Oasr fahk lah ke ohiyac Lal ac pacl Lal sifacna, Pahpah Lucng el fah ahkinsewowoye kuht ac ahkwoye kwewa nuhnak, nuhnuhnkuh, ac fohswack lasr.
In fahk kahs lal Tohkohsrah Benjamin: “Ac yohk liki, nga kena tuh kowos in motko ke mwe insewowo ac ohiyac engan lalos suc liyacacng masap luhn God. Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao, tuh ohinge elos fah muhta yurun God ke sie ohiyac engan wacngihn sahflahiyac. O esam, esam lah ma inge pwacye; tuh Leum God El sramsramkihn.”14
Nga etuh lah God el topuk pruhe lasr.15 Nga etuh lah sie Pahpah etweyuck, luhngseyuck, El topuk pruhe lasr wo, fal nuh ke lahlmwetmwet ma pahtpaht Lal, ac ke ohiyac ma fah mwe enenuh sahflah ac insewowo lasr. Nga fahkwack ke inen Jisus Kraist, amen.