Oaru Lain Soaru
Ke fahsrwelihk luhn pwacr luhn facluh se inge sruokyacna ma koluk, kuht enenuh in kampare srihke in tu na kuh ke inkacnek ma e kol kuht nuh yurun Mwet Lahngo lasr.
Nga tuh liyacack sihm se ke winto se ma fahk, “Engan, $15.00.” Nga arulacna elyah in etuh lah engan fuhkah se nga kuh in molwelah ke $15 oruh nga utyak in liye. Ma nga sokwack ah pa mwe nahweyuck srihk molo ac mwe soh puhkantwen pac—tiac sie ma nga liye ah kuh in use engan se ma sulkackihnyuck ah! Ke lusen yac puhs, nga nuhnkuh pacl puhs ke sihm sac ac fuhkah fihsrwacsriyac in suk engan ke ma fihsrwacsr molo ac suhkawihl. In ekihn mempucr ke Alu luhn Jisus Kraist luhn Mwet Luhlahlfongi ke Lwen-sahflah, kuht ahkinsewowoyeyuck in etuh lah ac fuhkah ac engan pwacye uh sukokyak oyac. Sukokyak ke kuht oaru in moulkihn wosasuc ma oakiyucki sin Leum ac Mwet Lahngo lasr, Jisus Kraist, ac ke sikalweni in oacna El.
Oasr kawuck sacohk se lasr suc el ekihn train engineer se. Sie lwen ah el wuhn train soko ke innek soko, el liye stosah soko tui metah ke inkacnek in train soko el kahsruhsr we ah. El sa na in akihlacnwack lah stosah soko ah srwemlah ke inkacnek in train sac ac koflah in yuclac liki. El sa na sang train soko ah in sensen tui, ma oruh in brake kais sie pohk in train soko ah suc lusac kac mile tolu tahfuh ahkosr (1.2 km), ma us kahko ton 6,500 (5,900 metric tons). Wacngihn finsrak muh train soko ah kuh in tui met liki e fakihsyac stosah soko ah, na wi na. Wo ohiyac nuh sin mwet ke stosah soko ah, elos lohng ke sensenkackihnyuck luhn train sac osos tuhkuh ah ac elos kahinglac liki stosah sac met liki akihsrucngi. Ke engineer sac sramsram nuh sin policeman ah, muhtwacn ahngyahng se fahsryahk nuh yohrohltahl. El sasa fahk muh el liye nohfohn ma sikyak ah na fahk lah engineer sac tiacna srihke in kihfucs liki inkacnek in train ah in tiac fakihsyac stosah soko ah!
Kahlwem lah, fuhnuh engineer sac kihfucslah in som liki inkacnek in train sac in kahingkuhnlah accident sac, el ac train soko ah nohfohn luhkuhn fuhllac sun ohngaiyac ac train soko ah in foslac ac sa na tui. Wo ohiyacl, osra ke inkacnek in train soko ah sruokyacna wil ke train soko ah in ahkwot na nuh met nuh ke acn elos e kahsruhsr nuh we uh finne oasr ma kohsrwaclah inkacnek uh. Wo ohiyacsr, kuht oasr pac ke inkacnek soko, inkacnek in wuhlweacng se ma kuht pacptaislac mempucr ke Alu luhn Jisus Kraist luhn Mwet Luhlahlfongi ke Lwen Sahflah. Sahp kuht ac sun ma upac puhs ke inkacnek uh, inkacnek soko inge ac oruh kuht in fahsr na nuh met nuh ke acn wolacna ma pahtpaht sesr kuht fin muhtana kuh ke inkacnek uh.
Aruhruhma se ke sahk in moul sac ahkkahlwemye nuh sesr lah ma tuhkuh ke soaru lasr kuh in uskuhtlac liki inkacnek luhn wuhlweacng. Motko ke kahs luhn God ac ke inkacnek suwohs ac ohsrihksrihk soko ah, kuht ke inkacnek luhn wuhlweacng, ma kolyucklac suwohs nuh ke sahk in moul, ma mwe insewowo nuhkwewa utuckuh sin Mwet Lahngo lasr ac Iwaclah Lal oasr nuh selos suc oaru. Liyeyuck pac ke aruhruhma sac pa infacl in kof se ma ahkkahlwemye ke fohkfohkiyacn facluh. Ma suhmuhslah uh ahkuhtweyac lah infacl soko uh “ukwacma na siskacn” inkacnek se tuh tuhkuh ahluhkwelah “sisken” sahk soko ah, tiac nuh kac. Facluh sesseslah ke ma lusrohngtwen ma kuh in kiyacpwelah finne mwet wo, oruh tuh elos in soaru ke moulkihn olweacng lalos—tuhsruhk in usaclosme in fototo nuh ke sahk sac, tuhsruhk tiac nuh kac. Kuht fin tiac oaru in moul ke wuhlweacng lasr ke suwohswohs, soaru lasr uh kuh in kol kuhtlac nuh ke inkacnek sruhngwacyuck kuh in weluhlos suc utyak tari nuh ke lohm luhlahp ac mwesahs sac. Fin tiac oaru, kuht kuh in walomlah ke infacl loal fohkfohk sac.1
Oasr inkacnek in oaru ac sie inkacnek in soaru in oruh ma nuhkwewa, weacng pac in moulkihn wosasuc uh. Ke kuht motko ke olwelah lasr nuh sin Mwet Lahngo, yac kuht oaru kuh soaru? Ke srihpen kuht moul suhkawihl, yac kuht tiac kuhtuh pacl uh srihke in ahkuhtweyac elahsr, kuhtuh pacl kuht oruh in nuhmuh mukwikwi lasr uh wo kuhtuh, kuh oruh ma wo ke ma koluk ah? Oacna sie pacl kuht fahk, “tuhsruhk,” “sahyacn,” kuh “tuh” ke pacl se ma ac ukwe kahsruh luhn mwet pahluh kol lasr kuh in oaru in ukwe wosasuc, pwacyena kuht fahk, “Kahs in kahsruh sacn tiac ma nuh sihk.” Kuht kuh in srihke in ahkuhtweyac, tuhsruhk ma pwacye uh pa, wacngihn sie inkacnek pwacye in oruh ma koluk!
Sifac se luhn mwet fuhsr ke yac 2019 tuhkuh ke John 14:15, ma Leum El luti fahk, “Kowos fin luhngse nga, kowos ac ahkos masap luhk.” Kuht fin luhngse El oacna kuht fahk uh, yac kuht kuh in ahkkahlwemye luhngse sacn ke kuht srihke in oaru in moulkihn masap Lal?
Oaru in moulkihn masap Lal ke wosasuc uh tiacna kalmac in orek mahngol kuh fihlacng. Kalmaciyac an pa in wo nuhnak lasr uh ac wo elahsr oacna mwet tuhmal lutlut luhn Jisus Kraist. Ke kuht nuhnkuh ke sienalac luhn oaru ac soaru ke muhtana in moul lasr ke wosasuc, pa inge kuhtuh mwe nuhnak in nuhnkuh:
Yac kuht oaru ke lwen in Sahpuht lasr ac ke ahkolah lasr in ipeis kuhfa luhn Leum ke kais sie wik?
Yac kuht kuh in oaru nuh ke pruhe lasr ac lutlut ke ma suhmuhslah kuh in mukwikwi yohk ke Come, Follow Me—For Individuals and Families?
Yac kuht oaru ke alu lasr ke tempuhl uh, ac yac kuht oaru in moulkihn wuhlweacng lasr ma kuht orwaclah ke kuht pacptaislac ah ac ke som nuh tempuhl? Yac kuht oaru ke luhmahsr ac atacn nuknuk lasr uh, yohkna ke yen muhtahl ac pacl muhtahl? Yac kuht oaru ke kuht nukum karmacn muhtahl ke tempuhl uh? Kuh stael luhn facluh oruh kuht soaru tiac liyacacng in wo elahsr?
Yac kuht oaru in liyacacng lah kuht kuhlwacnsap luti fuhkah nuh sin mwet sahyac ac lah kuht oruh kuhlwacnsap lasr uh fuhkah ke Alu uh, kuh lah kuht tiac nuhnkuh kuh soaru nuh ke pahngyak lasr in kuhlwacnsap?
Yac kuht oaru kuh soaru ke ma kuht riti kuh ke ma kuht liye ke TV ac ke cellphone kuh mobile sahyac nahtuhsr uh? Yac kuht oaru ke ma kuht muhta fahk uh? Kuh kuht soaru apihsyac ma suhfal ac kahskahs koluk?
Ke For the Strength of Youth ma sihm suc nwacnwacnk ohiyac wo ma, fin oaru in ukweyuck, ac fah use ac mwe insewowo wolacna ac kahsrwekuht in muhta na ke inkacnek luhn wuhlweacng. Finne sihmlac in ma wo se nuh sin mwet fuhsr uh, ohiyac wo inge tiac tui ke kuht som liki program luhn Mukul Fuhsr ac Muhtwacn Fuhsr inge. Elos ma nuh sin kais sie sesr pacl nuhkwewa. Sifilpac liye ohiyac wo inge kuh in sramtweack kuhtuh ohiyaac oaru yohk in moul lasr nuh ke wosasuc moul.
Kuht tiac kihlyac ohiyac wo lasr in fal nuh kac kuh oruh sie mwet in puhla wo. Kuht mwet tuhmal lutlut luhn Jisus Kraist, ac ohinge kuht enenuh in ahkkapye mwet sahyac, in sruhkuhltahlwack in sun acn fuhlwact, muhtahl se ma elos ac kuh in kosrwacni mwe insewowo yohk.
Nga suli kais sie suwos in suk kolyuck luhn Nguhn Muhtahl in etuh lah ekyek fuhkah kuht enenuh in oraclah in moul lasr uh in suwohswohsyang na nuh ke olweacng lasr. Nga oacyacpac ngihsrwe nuh sum in tiac nuhnuhnkuh mwet sahyac suc oasr ke fuhfahsryucsr se inge. “Nuhnuhnkuh uh ma luhk, Leum El fahk.”2 Kuht kais sie oasr ke pacl in mahtuhyak ac eklac.
Nga luhngse sramsram soko ma sruhmuhnyuck ke Puk luhn Mormon kacl mwet pahluh Amlicites. In ahkkahlwemye nuh sin mwet sahyac lah elos tiac na sifil kuhpahsr nuh sin Jisus Kraist ac Alu Lal, elos sang akucl sruhsrah se nuh motonsrolos mwet nuhkwewa in liye.3 Ke inkacnek se sahyac ah, ac oacna mwet tuhmal lutlut luhn Jisus Kraist, kuht ac akucliikuhti fuhkah? Yac mwet sahyac kuh in liye akucl Lal ke atacsr ac etuh lah suc kuht ukwe ke kuht oaru in moul lasr uh?
Oacna mwet luhn wuhlweacng, kuht tiac arulacna tuhkuh in tuh wi facluh se inge. Kuht pahngonyuck oacna mwet sollac se4—fuhkah woiyac! Ke fahsrwelihk luhn pwacr luhn facluh sruokyucki ke ma koluk, kuht enenuh in kampare suk in suhmaht in tu na kuh ke inek soko ma e kol kuht nuh yurin Mwet Lahngo, srwaclihk in maelihk inmahsrlon moul in wuhlweacng lasr ac ma luhn facluh se inge.
Ke nga motko ke eisyacn engan yohk, nga akihlwacnwack lah kuhtuh pacl uh kuht sifacna akihlwacnwack lah kuht tuhlac. Lohsr mahtoltol uh oasr na ke kuht oruh fuhfahsryucsr lasr ke inkacnek luhn wuhlweacng. Mwe sruhf ac soaru lasr uh kuh in oruh kuht ekuhllah inkacnek lasr nuh ke lohsr luhn facluh ac liki inkacnek luhn wuhlweacng. Ke pacl ma ma se inge ac sikyak uh, mwet pahluh sacohk lasr, Prestuhn Russell M. Nelson, el kwacfe kuht in sifil fohlohkyang nuh ke inkacnek luhn wuhlweacng ac in oruh in sa. Fuhkah kuloh luhlahp luhk ke mwe sang ke auliyak ac ke kuh luhn Iwaclah luhn Mwet Lahngo lasr.
Tiac fihsrwacsr in moulkihn sie moul suwohs. Mwet sefanna pa kuh in moulkihn moul suwohswohs se inge uh ke el tuh muhta ke facl telestial. El pa Jisus Kraist. Finne kuht tiac suwohs, tamuhlwel ac tahmtahel, kuht kuh in fal wo: fal in ipeis kuhfa luhn Leum, fal in eis mwe insewowo ke tempuhl, ac fal in eis fwackyuck la sifacna.
Tohkohsrah Benjamin el fahkwack ke mwe insewowo ac engan ma tuhkuh nuh selos suc oaru in fahsr tukun Mwet Lahngo: “Ac yohk liki, nga kena tuh kowos in motko ke mwe insewowo ac ohiyac engan lalos suc liyacacng masap luhn God. Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao, tuh ohinge elos fah muhta yurun God ke sie ohiyac engan wacngihn sahflahiyac.”5
Yac engan uh kuh in moliyucklac ke $15? Moh, tiac kuh. Engan pwacye ac ma pahtpaht tuhkuh ke kampare ac oaru in moulkihn wosasuc luhn Jisus Kraist. Ke inen Jisus Kraist, amen.