Iwaclah luhn Jisus Kraist

Elder Tad R. Callister

Prestuhn Luhlahp luhn Sacnri Skul Tuhfahna in Ahkkweyeyucklac

Iwaclah luhn Mwet Lahngo tiac ma nwe tok pahtpaht tuh kuh in kahsruh kais sie pac.

Ke puhlan pacl se ke yac se inge kuht nuhnkuh ac engan yohkna ke Iwaclah luhn Mwet Lahngo. Pwacye lah pa mwe luti lucng me, ahknuhnak, moklweyuck se emet ma facluh se inge kuh facluh nohfohn kuh in etuh kac. Pa use finsrak ac srihpac nuh ke moul lasr uh.

Ma se ma yohk emet an pa Iwaclah luhn Jisus Kraist. Ke ohiyac sacn, pa sie tahklac ke ma sikyak ma tuh muhtwacwack ke Imac Gethsemane, tahfwelah fin sahksing soko ah, ac som sahflah ke Sifilmoulyak luhn Mwet Lahngo liki kuclyuck uh. Tuh moklweyuck ke sie luhngse upac in akihlenyuck nuh sin kais sie sesr. Enenuh sie mwet ma wacngihn ma koluk la; ma asr kuh lucng me la fin ma uh—finne misac uh; ma asr kuh wacngihn sahflah kac in kweokkihn ma tuhkuh ke ma koluk ac mas lasr nuhkwewa; ac suc pwacye puhtati nuh ye ma nuhkwewa.¹ Pa inge fuhfahsryucsr se lal Jisus Kraist ac—pa inge Iwaclah se Lal ah.

Na meac srihpac la uh? Pa in oruh in kuh nuh sesr in fohlohk nuh yurin God, eklac oacna El, ac eis sie fohnlah luhn engan uh. Oreklac ma se inge ke kuhtangyucklac luhn ma ahkosr:

Misac luhn mahno
Misac in nguhn tuhkuh ke srihpacl Adam ac ke ma koluk lasr
Mwe kweok ac mas lasr uh
Muhnahs ac sesuwohs lasr uh

Tuhsruhk Mwet Lahngo El oraclah fuhkah ma se inge ac in tiac kuhnahoslah ma sap luhn suwohs uh?

Petsac

Puhtatlac liki oaksohk

Nuhnkuh ke kihtin pacl mukul se el nuhnkuh in oruh sie ahtu mwe na pwacr oraclah sulaclah na sa se sifacna ahtulac liki aksohk srihsrihk soko. Tukun el oruh ah, el sana akihlacnwack lahlfoniyacn oruh lal ah. El ke lan sef sun acn ah, tuhsruhk asr oasr ma se kohsraclah—masap luhn gravity. Ke lut yohk el moklwe pahol in pihsrpihsr, finsrak lan sohk, tuhsruhk tiacna kahsruh. El oruh mahnol in muhlahlah kuh kahkasrihk ke puhtat uh, tuhsruhk ma sap luhn gravity uh tiac fuhlweack ac tiac pahkomuhta. El srihke in suk kahsruh sin ma sap luhn kuh se inge: “Tahfonglac se. Ngwac tiac sulpac oruh.” Tuhsruhk siyuck lal tiacna lohngyuck. Ma sap luhn gravity uh tiac etuh ke pahkomuhta, wacngihn lwelah sahyac. Wo ohiyac, ne fuhkah, mukul sac sana puhlahack ma se fintohkohl. Kawuck se lal ke aksohk ah, akihlen ohiyac lahlfon sac, fihliyac rakkuhsa se kac met liki na ahtulac sac. El konwacack kohrt in rakkuhsa sac na ulyac. Mwesahslah, el puhtati sef nuh ke acn uh. Kuht kuh in siyuck, “Kuh ma sap luhn gravity uh kuhnanuclac, kuh lah rakkuhsa sac orekmakihn ma sap sac in oruh sie puhtati sef ah?”

Petsac

Rakkuhsai puhtati nuh ke sie acn sef

Ke kuht oruh ma koluk, kuht oacna mukul lahlfon se ma ahtu ke aksohk soko ah. Wacngihn ma ke ma kuht sifacna oruh uh, tuhwi in muhsahlllah muhkwena se pa sanwe kuht uh. Kuht ahkfuhlwactye ma sap luhn suwohs uh, suc, oacna ma sap luhn gravity uh, el pwacye ac tiac nuhnakmuhnahs. Kuht kuh in sef muhkwena mweyen Mwet Lahngo, ke Iwaclah Lal, ke pahkotwen use nuh sesr sie kain in rakkuhsa luhn nguhn. Fin asr luhlahlfongi lasr ke Jisus Kraist ac auliyak (kalmac kuht oruh ip lasr ac ulyac kohrt in rakkuhsa uh), na kuh nuhke karihngihn luhn Mwet Lahngo uh taltallah ke srihpacsr na kuht kuh in puhtati tiac ngalyak in nguhn.

Ma se inge kuh muhkwena, ohinge, mweyen Mwet Lahngo El kuhtanglah mwe kosraclah ahkosr ma kuh in tulokihn kapwack luhn nguhn lasr uh.

1. Misac. El kuhtanglah misac uh ke Sifil Moulyak wolacna Lal. Mwet Sap Paul el luti: “Kacl Adam mwet nuhkwewa misac, in luhmah sacna kacl Kraist mwet nuhkwewa fah ahkmoulyeyuckyak.”²

2. Ma koluk. Mwet Lahngo El kuhtanglah ma koluk ac mwacta lalos kwewa ma auliyak. Loal ac yohk molo kuh luhn ahknwacsnwacs Lal ma Isaiah el olwelah kac, “Kowos tuhn srusrala ke ma koluk lowos, nga fah oulkowosla in fasrfasr oana snow.”³

Asr pacl, nga ohsun nuh sin Mwet Luhlahlfongi wowo ma upac nuh se in nuhnakmuhnahs nuh selos sifacna, suc wacngihn koluk la tuhsruhk tahfonglac ahksrihkye kuh ke molwelah luhn Mwet Lahngo. Ke tiac etuh, elos ekuhllah sie Iwaclah wacngihn sahflahiyac nuh ke sie ma tiac paht ma ke ohiyac sahyac ac suhfal nuh ke ma koluk ac muhnahs na lalos. Tuhsruhk pa Iwaclah wacngihn sahflah la se mwen el afuhnlah ac raunwelah ma koluk ac muhnahs nuhkwewa, oacyacpac ahkoluk ac ngal orek sin mwet sahyac uh.

Truman G. Madsen el oraclah ngetnget na wowo se:

“Fin asr kuhtuh suwos ma kiacpweyucklac in luhlahlfongi muh kowos som ahluhkwelah , … lah asr suwos pwacsin luhn ma koluk uh ma oruh upac in sulpac asr ke ma kom tuh kuh in asr kac ah—na lohng yuc.

“Nga fahkwack luhlahlfongi luhk lah kom tiac kuh in som loeslac liki kahlwem ac lahlmwetmwet luhn Jisus Kraist kuh in som. Nga fahkwack luhlahlfongi lah fin ac asr sie spark srihsrihk luhn kena in auliyak ac suk, el oasr we. El tuh tiac puhtati na nuh ke ohiyac lowos an; el puhtati nuh yac ah, ‘tuh elacn kuh in asr yohrohlos kwewa ac ke ma nuhkwewa, pa kahlwem luhn ma pwacye.‘ [Doctrine and Covenants 88:6.]”⁴

Sie srihpac ma arlac enenweyuck in kahlwem ke Iwaclah luhn Mwet Lahngo ac enenuh wacngihn sahflahiyac la uh pa ke yohkwaclihk kahlwem uh sikyak yohkwaclihk luhn kena in nuhnakmuhnahs nuh sesr sifacna ac mwet sahyac uh.

Finne kuht kuh in luhlahlfongi ke kuh in ahknwacsnwacs luhn Kraist, kihsensiyuck se wacna sikyak: “Nga etuh fuhkah fin nga eis nuhnakmuhnahs ke ma koluk luhk uh? Fin kuht puhla Nguhn na pa ngwacn mwe loh lasr lah kuht eis nuhnakmuhnahs, kuh orekma oruh luhn ahknwacsnwacs uh. Prestuhn Henry B. Eyring el luti, “Fin kom puhla mokleyuck luhn Nguhn Muhtahl ... , kom kuh in eis muh mwe ahkpwacye muh Iwaclah uh orekma ke moul lom an.”⁵

Petsac

Sahflahiyacn innek

Kuhtuh siyuck, “Fin nga eis nuhnakmuhnahs efuh nga srackna puhla mwacta?” Sahp ke pahkotwen luhn God esam lah mwacta uh pa sie mwe sensenkackihn, sie sain in tui ke kain se ma, finne pacl se na, salah ke kuhtuh pac mwe sruhf uh tuhkuh nuh sesr uh. “Nimet som ke inkacnek soko an. Kom etuh ngal ac kuh in tuhkuh kac an.” Ke ohiyac se, el orekma oacna in mwe acsmak se, tiac mwe kaiyuck se.

Na ac kuh, na, in esam ma koluk lasr an in mwesahslah ke mwacta uh?

Alma el esam ma koluk lal, finne yac puhs tukun el auliyak ah. Tuhsruhk ke el pahng nuh sin Jisus in eis pahkotwen, el fahk, “Nga tiac sifilpac esam kweok luhk; ahok, nga tiac sifilpac sowack ke mwe acsmakihn luhn ma koluk luhk.”⁶

El kuh in esam ma koluk lal fuhkah uh lan tiac puhla kweok kuh mwacta? “Mweyen ke kuht auliyak uh, kuht sifilpac “isuslac ke God.”⁷ Kuht eklac, oacna ma suhmuhslah fahk, “mwet moul sasuc”⁸ ke Kraist. Ke suwohswohs pwacye kuht kuh in inge fahk, “Tiac nga pa mukul kuh muhtwacn se ma oraclah ma koluk somlah ah. Nga sie mwet sasuc ac eklac.”

3. Mwe kweok ac mas. Alma el palyei lah Kraist El “fah som, kweok ke kain in waek ac ongaiyac ac mwe sruhf nuhkwewa.” Efuh? “Tuh Insiac in sesseslah ke pahkotwen, ... tuh elacn kuh in etuh fal nuh ke mahno lah El ac kahsruh fuhkah mwet Lal fal nuh ke mas lalos.”⁹

El oraclah fuhkah ma se? Kuhtuh pacl uh El eslah mwe kweok uh, kuhtuh pacl uh El ahkweye kuht in muhtweng, ac kuhtuh pacl uh El use nuh sesr sie ngetnget ne tok in ahkwoye kahlwem lasr ke oiyacn facluh in pacl inge uh Ke Joseph Smith el tuh asr in muhnahs ke Liberty Jail ke sahp mahlwem luo, el sahflahiyac wowoyak, “O God Kom piac?”¹⁰ Liki na in silahklahk kahsrwel, God el topuk, “Wen nuhtihk, mislac in wi nguhnum, Mwe lokoalok lom ac mwe kweok lom ma na nuhke kihtin pacl,ac na, fin kom muhtwacnglah, God El fah sruhkomyak nuh lucng.”¹¹

Joseph el inge kahlwem kac lah puhlakihnyacn mwen se inge tiac yohk tuhsruhk pa tul se na ke sroal uh. Ke wolac luhn liye se inge,el sihm ke iwen srohoh nuh sin Mwet Luhlahlfongi uh, “Mukul sacohk wiyuck, lwelah kuht in oruh ma nuhkwewa ke engan ma an ye kuh lasr; na kuht in tu tiac nukwikwi. Ke sie etuh na yohk, in liye molwelah luhn God.”¹² Ke srihpen Iwaclah luhn Mwet Lahngo, kuht kuh ln eis sie ngetnget ne tok ma use kalmac nuh ke mwe srihke nuh sesr ac finsrak nuh ke mwesahslah lasr uh.

Mwe muhnahs ac sesuwohs. Ke srihpen Iwaclah Lal, Mwet Lahngo El eis kuh in oruh uh, kuhtuh pacl etweyuck muh pa kuhlwacng, ma kuh in kahsre kuht kuhtanglah mwe muhnahs ac sesuwohs lasr uh ac ohinge kahsre kuht ke suk lasr in eklac oacna El uh.¹³

Moroni el luti: “Ahok, tuhkuh nuh yurun Kraist, ac ahksuwohsyeyucklac Kacl, … tuh ke luhng kuhlwacng Lal kowos kuh in ahksuwohsyeyucklac ke Kraist.”¹⁴ Oacna in asr suhngan inkacnek luo kuh ohiyac in kosrwekuhtlac sifacna liki kuh in oruh ma kuh in ahknacsnwacs—finne ahksuwohsye—kuht.

Ma se met, akwuck luhn molwelah. Ma suhmuhslah fahk nuh sesr, “Ke akwuck kac uh, kuh luhn suwohswohs uh ahkahlwemyeyuck.”¹⁵ Asr pacl, kuht kuh in nuhnkuh ke akwuck uh oacna sie mwe ukweyuck—enenweyuck nuh ke moul yurin God uh; tuhsruhk pwacye lah kais sie tuhlahlah kuh suwohs se ma kahsre kuht eklac oacna Kraist uh. In mwe srihkasrak:

Ke kuht pacptaislac ac eis mwe sang luhn Nguhn Muhtahl, kuht ahknwacsnwacsyeyucklac—na muhtahllac oacna God.
Oacyacpac, ke kuht eis Nguhn Muhtahl, nuhnak lasr uh kahlmwelihk ac insiacsr fihsrwacsrlah oruh kuht kuh in nuhnak ac puhla yohk oacna El.
Ac pacl kuht sil ekihn mukul ac muhtwacn kiyac kuht usrui suwohs nuh ke “tron, tohkohsrahi, wal, ac kuh”¹⁶ tuh in mwe sang sin God me.

Suhngan inkacnek ahkluo nuhke kuh in oruh inge pa mwe sang ke Nguhn. Ke srihpen Iwaclah luhn Kraist, kuht fal in eis mwe sang luhn Nguhn Muhtahl ac mwe sang ke nguhn kac an. Mwe sang inge pa ohiyac luhn nuhnak suwohs, ohinge, kais sie pacl kuht eis sie mwe sang ke Nguhn uh, kuht eklac kuhtuh oacna God. Wacngihn ahlohloh pa oruh ma suhmuhslah uh sapkihn nuh sesr ke pacl puhs in suk mwe sang inge.¹⁷

Prestuhn George Q. Cannon el luti, “Wacngihn mwet enenuh in fahk, ‘O nga tiac kuh in kahsruh ma se; pa ohiyac luhk uh.‘ El tena ahksuwohsyeyucklac kac, nuhke srihpac ma God El olwelah in ... sang ma ac eslah [muhnahs lasr uh]. … Fin asr sesr tena suwohs, ma kunacsr in pray ke mwe sang ma ac oruh kuht in suwohs uh.”¹⁸

Ke fahk fototo, Iwaclah luhn Mwet Lahngo use nuh sesr moul liki misac, “kahto liki apact,”¹⁹ unwelah liki ngal, ac suwohswohs liki muhnahs. Pa antidote tuhkuh inkuhsrao me nuh ke mwe kosraclah ac ma upac ke facluh se inge.

Ke wik sahflah luhn Mwet Lahngo fin facluh ah, El fahk, “Ke kowos muta faclu kowos ac keok. Tusruktu kowos in pulaik na; Nga kutangla faclu tari.”²⁰ Ke srihpen Mwet Lahngo El oraclah Iwaclah Lal, wangihn kuh sahyac kuh ma sikyak kuh mwet—wacngihn ma koluk kuh misac kuh sahf—ma kuh in kosrwekuhtlac in te eis moul ma pahtpaht uh, utuckuh kuht liyacacng ma sap luhn God uh. Ke etuh sacn, kuht fahsr na nuh met ke puhlaik ac etuh na pwacye lah God El wi kuht ke fuhfahsryucsr inkuhsrao me se inge.

Nga fahkwack loh luhk lah Iwaclah luhn Mwet Lahngo uh tiac wacngihn sahflahiyac muhkwena ke liye la uh tuhsruhk kais sie ma kuh an—lah tiac fohlohkihn kuht lac muhkwena nuh yurin God, tuhsruhk oruh kuht kuh in eklac oacna El—twefuroh luhn finsrak ke Iwaclah luhn Kraist. Ke ma inge nga fahkwack kuloh luhk ac mwe loh luhk ke inen Jisus Kraist, amen.