Kraist: Kahlwem Ma Tohlwack Lohsr uh
Fin kom puhla muh kuhiyacn luhlahlfongi lom an muhtwacwacack in muhnahslah ac lohsr uh apkuhranme, puhlaiklac. Sruokyac na olwelah lom nuh sin God.
Ke ohfuhs luhk ke acn in orekma luhn Rilif Sosaiti, kom kuh in ngwetlah liye arulacna kahto Salt Lake Tempuhl. Fong nuhkwewa, oacna pacl nuhkwewa, lahm lihkihnihm tempuhl uh ohniyucki ke lohsrwacni uh. Tempuhl uh oacna sie mwe acsmak kahlwem ke lihkihn winto luhk ah.
Ke sie fong somlah ke Fepweri, ohfuhs luhk ah arulacna lohsr ke pacl se faht ah tihli ah. Ke nga ngwetlah nuh ke winto ah, tuh na tempuhl sac lohsr. Lahm ah tiac ohniyucki. Nga lihksrweni na ahsorkihn. Nga tiac kuh in liye spires luhn tempuhl ma nga liye kais sie lwen ke lusen yac puhs.
Ke nga liye lohsr ke acn se ma nga pahngon muh ngac liyacack kahlwem we ah akacsmakihnye yuc lah oasr sie ma enenuh yohk kuht eis in ahkkapye pa in kuhpahsryang nuh ke ma oraclah kahlwem lasr—Jisus Kraist. El pa pwelucng luhn kuh lasr, Kahlwem, ac Moul luhn Facluh. Fin wacngihn kuhpahsr fototo nuh Sel, kuht e muhtwacwacack in misac in nguhn. Etuh lah, mwet Satan el suk in ahkkolukye ma upac ma kuht sun fin facluh. El srihke in ahklohsrye kahlwem lasr uh, ahkkolukye inmahsrlo, suhpohklah kuhpahsr nuh ke kuh ma utuckuh, fihlikuhti muhkwena ke acn lohsr. Ma upac inge puhlakihnyuck ke moul fin facluh, tuhsruhk Setuhn el srihke in srikuhtlac ac fahk nuh sesr lah kuht muhkwenna pa puhlakihn ma inge.
Kuhtuh Sesr Tiac kuh in Mukwikwi ke Ahsor.
Ke ma upac uh tuhkuh sun kuht, ke moul uh ahkngalye kuht oruh kuht tiac kuh in momong, ke kuht uniyuck oacna mukul se ma uniyuck ke innek nuh Jeriko ac fihliyucki in misac, Jisus el tuhkuh ac ukwi kaki nuh ke kihnet kacsr, sruhkkuhtyak, uskuhtyak nuh in lohm uh, ac liyekuhtyang.1 Nuh selos suc muhta in ahsor El fahk: “Nga fah … ahkmuhlahlahye ma toasr ma oan finpusowos, tuh kowos tiac kuh in puhla fintukuwos, … tuh kowos in etuh na pwacye lah Nga, Leum God, muhtwacta yurun mwet Luhk ke kweok lalos.”2 Kraist El unwelah kihnet.
Kuhtuh Sesr Arulacna Ullac
Elder Jeffrey R. Holland el fahk: “Tiac ma oreklac tuh kuht in kahsruhsr muhi liki na kuhiyacsr. … Tuhsruhk [sahyacn na] ma ingacn, nga etuh pohs suhna suwos kahsruhsr [arulacna,] arulacna muhi ac [tuh] kuh ac ma puhlakihnyuck ma utuckuh oacna in apkuhran in lihsr.”3 Ke ma kuht finsraki uh apihn kuhtlac uh, kuht kuh in sis falkacsr nuh tok ac siyuck sin Pahpah Lucng lah meac kuht ac fuhlwelah in som uh. Kuhtuh ma kuht puhlakihn ke moul lasr uh pa in lotwelah lah meac kuht ac tiac oruh. Finne ke ma inge, kuhtuh pacl moul uh kuh in oruh kuht in ullac. Jisus ek ahkkweye kuht, “Fahsruh nuh yuruk, kowos nuh kwewa suc orekma ac tohtohlah, ac nga fah usot nuh suwos monglac.”4
Kraist El kena wi kuht ke ma upac an ac ul kuht in ahkmuhlahlahye ma toasr lasr. Kraist El nien monglac.
Kuhtuh Sesr Puhla Muh Kuht Tiac Fal nuh ke Ohiyac Ma Akwucki Tari
Ke kain in srihpac, kuht tiac puhlakihn in welah kuh in insese in wi. Wuhlweacng Sasuc ahkkahlwemye ma wo pucspucs Jisus El oraclah in ahsroelah pahol nuh sin kain in mwet nuhkwewa: mwet lepa, mwet oracni mani ke tax, tuhlihk srihsrihk, mwet Galilea, muhtwacn kosro, muhtwacn, mwet Pharisee, mwet koluk, mwet Samaria, katinmas, solse Rome, mwet kosro, mwet oruh ohiyac tiac nwacsnwacs. Apkuhran ke mwe sramsram nuhkwewa, El saplakyang nuh selos suc tiac wi un mwet uh.
Luke 19 sruhmuhn sramsram soko ke mwet kol luhlahp se muhta oracni mani ke tax fin acn Jericho suc inel pa Zacchaeus. El fanwack sahk soko elacn kuh in liyacl Jisus ke Elac fahsryak ah. Zacchaeus el mwet orekma se luhn government fin acn Rome, el etweyuck muh el mwet kuhtasrihkac koluk se. Jisus El ngwetwack nuh lucng ke sahk soko ah ac pahnglol, fahk, “Zacchaeus, suhlahklahk fani; mweyen misenge nga ac muhta in lohm sum.”5 Ac ke Jisus El liye woiyacn insiacl Zacchaeus ac ma el oruh nuh sin mwet sahyac ah,El eis mwe sang lal, ac fahk muh, “Mwet nuhkwewa lohm uh loangweyucklac, [tuh] el oacyacpac ma in fihlihn tuhlihk nahtuhl Abraham.”6
Kraist El sramsram ke puhsra muhlahlah nuh sin mwet Nephi, “Nga sapkihn tuh wacngihn kuhtwena suwos in som.”7 Peter el tuh liye sie aruhruhma na fokoko oasr ke Orekma 10 ke el fahk muh, “God El ahkkahlwemye nuh sihk nga in tiac pahngon muh kuhtuh [mwet] uh tiac nwacsnwacs.”8 Pacl na enenweyuck in tu na kuh luhn mwet tuhma lutlut Kristin ac mwet luhlahlfongi ke lwen sahflah in ahkkahlwemye luhngse pwacye nuh sin sie sin sie.9 Jisus El sifilpac tahfwelah suli se pacna ingacn nuh sesr ma El oruh nuh sel Zacchaeus: “Liye, Nga tuc ke motonoac uh, ac towohlwack: fin [kom] lohng puhsrwek, ac ikucslah motonoac uh, Nga fah utyak nuh [yurum], ac mongo [yurum], ac [kom] mongo Yuruk.”10 Kraist El liye kuht ke sahk suhnacsr an.
Kuhtuh Sesr Oasr Kihsensiyuck Srihsrihk Puhs La.
Tiac paht ke yac ekahsr somlah, nga toasrlacna ac kasrkuhsrak ke kihsensiuck ma nga tiac kuh in sokwack top nuh kac. Toang na ke in lututwacng in Sactte se nga oruh mwemwe fototo se. Ke mwemwe sac nga kuh in liye lohm srihsrihk in muhtwacta ke pacl suhmer, ac nga kahlwem kac lah nga enenuh in utyak tu loac. Raunlac ke sahk lihmekohsr ma raun kuhruh acn e lucng kac, tuhsruhk tuh winto ah oreklac ke yot. Nga tohrkahskahs ke mwemwe, tiac luhngse utyak nuh loac mweyen arulacna ohsrihksrihk srihklac rum sac. Na nuhnak se tuhkuh nuh sihk lah tamuhlwel lal Jared el mongfihsrwacsr in oruh muhlwesrlac yot ah nuh ke kuhlahs na kahlwem ngwetngweta. Kuhlahs uh pa yot ma ohiyac la uh eklac. Ke Leum El kahlyac yot lal tamuhlwel se lal Jared ah, yot ah tohlwack in kahlwem oak lohsr luhlahp soko ah.11 In pacl sac na nga arulacna ke muhta lun lohm srihsrihk in suhmer sac liki na kuhtwena acn sahyac. Acn sepacna inge—acn se fanna—nuh sihk in “liye” na pwacye. Kihsensiyuck soko na ma wakreyuc ah tiac wacngihnlac, tuhsruhk ma kahlwem ke nuhnak luhk uh pa kihsensiyuck soko ke tukun nga tuhkahkwek: “Kom e ahkyohkye fuhkah luhlahlfongi lom an, oacna tamuhlwel lal Jared, tuh yot lom an in eklac nuh ke kahlwem?”12
Brain suhkawihl lasr uh oreklac in suk kahlwem ac yohksrihpaciyacn ma los tahklac . Nga tiac etuh kewa srihpac uh lah efuh nuknuk lihsrlihsr se ke moul suhkawihl uh arulacna mahtoltol. Tiac pa inge pacl se ke fihlin kapkapwack ma pahtpaht lasr ma ac oasr yohrohsr top nuhkwewa uh. Pa inge pacl se ma kuht ac ahkyohkye luhlahlfongi (kuh kuhtuh pacl uh finsrak) ke ma kuht tiac kuh in liye. Luhlahlfongi uh tuhkuh ke ohiyac ma tiac fihsrwacsr in ahkuhtweyac, tuhsruhk oasr kahlwem ke lohsr lasr uh. Jisus El fahk, “Nga pa kahlwem, ac moul, ac pwacye luhn facluh.”13 Nuh selos suc suk ma pwacye, met ac oacna in liyeyuck muh ma ahkikustwen lahlfon muh winto uh oreklac ke yot. Tuhsruhk ke mongfihsrwacsr ac oaru in siyuck, Jisus El kuh in ekuhllah winto in yot nuh ke kuhlahs ac kahlwem. Kraist pa kahlwem in liyeyuck.
Kuhtuh Sesr Puhla Muh Kuht Tiac kuh in Wo Pacl Nuhkwewa.
Ke sruhsrah fohkfohk se ke Wuhlweacng Mahtuh ah tiac kain in tuhn tuhsruhk oacyacpac tuhn ma koflah wacngihnlac, kalmac pa tuhn ma arulacna kahlwemkohniyac ac sremlah nuh ke nuknuk wool ac tiac kuh in eflah finne owo pacl pucspucs.14 Setuhn el orekmakihn srihpac se inge in oacna sie kuhluhp: nuknuk wool fasrfasr ma tuhnuhlac ke tuhn sruhsrah fohkfohk uh tiac kuh in fohlohklac fasrfasr. Tuhsuhk Jisus Kraist El fahk, “Inkacnek Luhk [uh] fuhlwact liki inkacnek lowos,”15 ac usrnguck ke luhngkuhlwacng Lal pa ke kuht auliyak ke ma koluk lasr, srah sruhsrah fohkfohk Lal fohlohkihnkuhtlac nuh ke nwacsnwacs. Tiac ma insesekihnyuck se, tuhsruhk ne ohinge ma pwacye se.
Petsac ke iStock.com/iinwibisono
“Kowos tuhn sruhsrahlah ke ma koluk lowos, tuhsruhktuh Nga fah oulkowoslac in fasrfasr oacna snow; finne sruhsrah fohkfohk, ac fah nwacsnwacslah oacna unen sheep.”16 Lweum El fahk yohk in kahlwem: mukul kuh muhtwacn “suc auliyak ke … ma koluk, mwet sepacna ingacn el eis nuhnak muhnahs, ac Nga, Leum, tiac sifilpac esam ma ingacn.”17 Yohk na: Fahsruh, kuht in tuhkweni nuhnkuh.18 Kom oraclah tahfonglac; mwet nuhkwewa tuhkuh fototolac.19 Tuhkuh nuh yuruk ac auliyak.20 Nga e fah tiac sifilpac esam ma koluk lom.21 Kom kuh in ahkkweyeyucklac.22 Oasr orekma Nga ac usot nuh sum in oruh.23 Kraist pa unen sheep ma ahkfasrfasryeyucklac.
Tuhsruhk meac inkacnek wo uh? Meac ki se ma e ahkfototoye kuht nuh ke kuh lal Jisus Kraist ke kuht muhnahslah uh? Prestuhn Nelson el fahk arulacna kahlwem: “Ki sacn pa in oruh ac liyacacng wuhlweacng muhtahl. … Tiac na inkacnek upac se.”24 Oruh in Kraist pa yohk srihpac emet ke moul lom an.25
Fin kom puhla muh kuhiyacn luhlahlfongi lom an muhtwacwacack in muhnahslah ac lohsr uh apkuhranme, puhlaiklac. Sruokyac na olwelah lom nuh sin God. Siyuck kihsensiyuck lom an. Mongfihsracsr muhta na ke innek sacn. Forlah nuh yurun Jisus, suc srackna luhngse kom.
Jisus el fahk, “Nga pa kahlwem [suc] tohlwack acn lohsr uh, ac lohsr uh tiac kuh in lain.”26 Kalmac pa finne lohsr uh srihke upac, lohsr uh tiac kuh in afuhnlah kahlwem uh. Tiac kuh. Kom kuh in luhlahlfongi lah kahlwem Lal ac oasr yurum.
Kuht, kuh mwet kuht luhngse, sahp e lohsrlah kihtin pacl. Ke ma se sikyak Salt Lake Tempuhl ah, mwet liyacacng iwac sac, Tamuhlwel Val White, el sa na eis pahng se. Mwet uh liyacack. Meac sikyak ke lahm ke tempuhl uh. Ma se met, mwet orekma uh som nuh ke acn sahrom nuhkwewa ke tempuhl uh ac sifacna ohniyac in fohlohkuhnwack kahlwem uh. Ac elos ahollah pactre automatic ke sahrom uh ac srihke lah meac se oruh kunlac ah.
Arulacna upac in fohlohkuhnwack kahlwem uh fin kom sifacna. Kuht enenuh kawuck. Kuht enenuh sie sin sie. Oacna mwet orekma ke tempuhl ah, kuht kuh in tuhkuh wi, ahkmoulyeack pactre ke ip luhn nguhn, ahkwoyelah ma tahfonglac uh.
Lahm lasr sifacna uh kuh pacna in pa lahm se fanna oan ke sahk soko. Tuhsruhk kuht srwackna kuh in tohlwack ke lahm srihsrihk lasr uh, ac kuht kuh in pwacnlah muhtuhn mwet miliacn nuh ke lohm sin Leum. Wo emet, oacna ke Prestuhn Nelson el ahkkweye kuht, kuht kuh in us kahlwem luhn Mwet Lahngo nuh sesr sifacna ac nuh sin mwet ma yohk srihpac nuh sesr ke orekma na fihsrwacsr se ma in liyacacng wuhlweacng lasr. Ke kain in inkacnek pucspucs, Leum El sang mwe sang ke oaru in orekma ke kuh ac engan.27
Nga fahkwack lah kom luhngseyuck. Leum El etuh lah kom srihke na upac. Kom kapkapwack in etwaclah. Fahsr na nuh met. El liye iwaclah lom kom okanlah ac wek ma wo lom ac ma wo lalos suc kom luhngse. Orekma lom an tiac wacngihn srihpac. Kom tiac muhkwena. Ke Innel, Emmanuel, kalmac pa “God El oasr yohrohsr.”28 Pwacyena lah El wi kom.
Eis kuhtuh pac falkom ke inkacnek in wuhlweacng, finne arulacna lohsr in liye loesuhlah. Kahlwem uh ac fohlohkyak. Nga fahkwack ke ma pwacye ke kahs lal Jisus, ac ma inge nwacnwaclah ke kahlwem: “Fototo nuh Yuruk ac Nga ac fah fototo nuh yurum; oaru in sukyuc ac kom e fah sukyucyak; siyuck, ac kom e fah eis; towol, ac e ikacklah nuh sum.”29 Ke inen Jisus Kraist, amen.