![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F02%2Fa3%2F02a37e6521efc1979fc04a6ec1d1df2f145740d7%2F02a37e6521efc1979fc04a6ec1d1df2f145740d7.jpeg/full/!250,/0/default)
Ahkolah in Eis Ma Enenweyuck Nuhkwewa
Mwe ahkinsewowo fah tuhkuh ke kuht kacfweacng in ahkfalyelah ma kunacsr kais sie in lotwelah ac luhngse wosasuc fohlohkihnyuckyak luhn Jisus Kraist.
Prokrwacm ac mukwiwi ke Alu luhn Jisus Kraist luhn Mwet Luhlahlfongi ke Lwen-Sahflah ahkfahsryeyuck yohk ke lohm akwuck ac Alu ahkkweyeyuck, oacna ke akihlenyuck ke kais kuhtuh nahweyuck ahkkahlwemyeyuck ke toeni luhlahp se ingena ah. Prestuhn Russel M. Nelson el fahk nuh sesr: “Oasr suhnuhn ma yohk fah tuhkuh. … Eis ono in ahkkweye. Eis monglac lom. Ac tuhfah engan.”1
Nga pruhe kac ac ngihsrwe kahsruh luhn Nguhn Muhtahl ke kuht tuhkweni nuhnak ke kuhtuh mwe nuhnak yohk ke nahweyuck ahkkoeyuck inge ke Alu fohlohkihnyuckyak luhn Leum uh.
Etwacack ke Wosasuc in Lohm-Akwucki ac Alu-Ahkkeyeyuck
Elder Craig C. Christensen pa companion luhk ke pacl sac ke sie toeni luhn mwet kol ke pristut, ac el tuh orekmakihn kihsen siyuck luo in sang akihlenyac mwe luti in ekihn lohm akwucki ac Alu ahkkweyeyuck uh. El ngihsrwe tuh likina in fohlohk nuh lohm sesr ah tukun miting luhn Alu ke Sacnri nge ac siyuck, “Meac kom lotwelah kacn Mwet Lahngo ac wosasuc Lal eke Alu ah?” kuht enenuh in siyuck ke pacl in miting in Alu lasr lah, “Meac kom lotwelah kacn Mwet Lahngo ac wosasuc Lal ke wik se inge in lohm sum ah?” Ngwetngwet fal luhn Lwen Sahpuht, mwe luti sasuc, ac pacl oreklac ke miting nuhkwewa kahsrwe kuht in lotwelah wosasuc kwewana in lohm sesr ac eke alu ac.
Kais sie mempucr ke Alu luhn Jisus Kraist luhn Mwet Luhlahlfongi ke Lwen-sahflah oasr ma kuhnac sifacna in luti ac moulkihn mwe luti luhn Leum ac in eis sin wal fal ke akwuck luhn molwelah ac moul ma pahtpaht. Kuht enenuh in tiac epacl nuh ke Alu uh muh pa luti kuht ac fahk nuh sesr ma nuhkwewa kuht enenuh in etuh ac oruh in ekihn mwet fahsr tohkohl ac puhlaik in kacfweacng nuh ke sahflah.2 Likina, ma kunacsr kais sie pa in etuh ma kuht enenuh in luti, moulkihn oacna ke ma kuht enenuh in moulkihn, ac in eklac oacna sie mwet ma Mwet Kol El ke kuht in oacna uh. Ac in lohm sesr pa acn wo se emet nuh ke etwacack lasr, moul lasr, ac in oacna.
Ke el srihk ah, Joseph Smith el eis etwacack ke God sin sucu lal ah. Kampare lal in suk ma luhngse luhn God nuh sel pwacnwacng Joseph elan suk ma pwacye inmahsrlon kain in alu luhn mwet Kristin, kwacfweacng in nuhnak yohk ke ma suhmuhslah, pruhe ke insiyacl nuh sin God. Ke Joseph Smith fuhsr el fohlohk nuh lohm sel liki Insack Muhtahl se muh Pahpah ac Wen sikyang nuh sel ah, el sruhmuhn nuh sin ninac kiyacl ah emet. Ke el “mayak nuh ke acn in ta e sac, ninac [kiyacl] ah siyuck lah meac oasr elyah. [Joseph] el topuk, ‘Macnsis, ma nuhkwewa wo—nga puhla wolac tari.’ [El] fahk nuh sin ninac kiyacl, ‘nga etwacack sihk sifacna.’”3 Ma se sikyak nuh sel Joseph ah use pactuhn na kuh se ke etwacwack ma kuht kais sie enenuh in etahin. Kuht enenuh pac in eis etwacack nuh sesr sifacna.
Inkacnwek nuh ke srihpac ke plwacn luhn Pahpah tuhmasr Inkuhsrao pa ma nuh sin tuhlihk Nahtuhl in eklac oacna El. Ke ma inge, El use nuh sesr pacl wowo yohk lasr in kapwack ac fahsr nuh met. Kihsackuhnlah lasr in luti ac moul fal nuh ke ma pwacye pa ahkyohkye ma yohk srihpac ke facluh se ma “oasr in tihkuclkucl la”4 ac fah fohs ac koluk ma pahtpaht. Kuht tiac kuh in epacl na in wi miting luhn Alu uh ac wi tuhkweni ke kais sie prokrwacm ac kac eis mwe luti luhn nguhn ma fah kahsrwe kuht in “tu na kuh ke pacl koluk.”5
“Pahpah se ac ninac se ma na muhtahl se nuh selos in tuhfahlah tuhlihk nahtuhlos ke luhngse ac suwohswohs.”6 Mwet kol ahkkweyeyuck ke Alu, mwet luti, ac mukwikwi uh kahsruh srihke luhn sie mwet ac sucu in kapkapwack ke nguhn. Ac na kuht nuhkwewa enenuh kasruh in fasrweacng nuh ke inkacnwek in olwelah, ip yohk kunac in muhsahelah kuhiyac in nguhn ac nuhnak kuh in oan fwacsr kais sie.
Esamwack ke Nephi, wen nuhtin mwet pahluh Lehi, kena in liye, lohng, ac etuh sel sifacna ke kohkoh kuh luhn Nguhn Muhtahl ke ma nuhkwewa ma pahpah tuhmwacl ah etuh ke aruhrruhma lal ke sahk in moul soko ah. Ma na kahlwem se lah Nephi el enenweyuck ac ahkinsewowoyeyuck ke moul in fuhsr lal ke srikasrak ac luti luhn “pahpah ac ninac wowo kiyacl.”7 Inge, oacna Joseph Smith, el kena luti ac etuh nuh sel sifacna.
Fin kowos nohfohn kuh nga etuh kacl Jisus Kraist ac wosasuc fohlohkihnyuckyak Lal pa ma mwet sahyac luti kuht kuh fahk nuh sesr, na pwelucng ke luhlahlfongi lasr Kacl ac orekma wolacna Lal ke lwen-sahflah pa muhsahiyuckyak fin pohkpohk.8 Kuht tiac kuh in epacl yohk nuh kac kuh eis kahlwem luhn wosasuc ac etwacack sin mwet sahyac—finne sin elos suc kuht luhngse ac luhlahlfongi.
Yohk srihpac, Mwet Pahluh Joseph el luti lah kais sie Mwet Luhlahlfongi ke Lwen-ahflah enenuh in kahlwem kacl sifacna ke “luhmah ac srihpac luhn God ke tuhkuh lasr nuh fin facluh se.”9
“Kuht kuh in riti ac kahlwem ke ma nuhkwewa ma sihmlac ke pacl lal Adam, nuh ke kuhpahsr luhn mwet nuh sin God ac lupufacn ke sie acn fah tuhkuh, kuht enenuh in etuh kuhtuh srihsrihk kac. Ke kuht riti ma sikyak nuh sin mwet sahyac, kuh fwackyuck ituckyang nuh selos, tiacna kuh in utuckuh nuh sesr sie ngwetngwet kahlwem nuh ke ma kuht oasr kac ac kuhpahsr pwacye lasr nuh sin God. Kahlwem ke ma inge kuh in ituck muhkwena ke ma sikyak ke akwuck luhn God ma El oakiyac nuh ke srihpac sacn.”10
Lwelah nuh ke ahkfahsryeyacn orekma luhn nguhn se inge nuh sin mwet se ac sucu se pa sie srihpac yohk ma prokrwacm ac mukwikwi ke Alu luhn Jisus Kraist luhn Mwet Luhlahlfongi ke Lwen-sahflah oruh ke lohm akwuck ac Alu ahkkweyeyuck ke puhlan pacl se ke fihl se ke pacl fohnlah se inge.
Mwe Nguhsr ke Etwacack luhn Lohm-Akwuck ac Alu-Ahkkweyeyuck
Lwelah nuh sihk in fwackohlohiyac kuhtuh mwe nguhsr yohk ke etwacack luhn wosasuc ma ahkyohkye lohm akwuck ac Alu ahkkweyeyuck uh.
Nien ahkpah yohk luhn misineri uh oasr in lohm sesr; acn in ahkpah ahkluo luhn misineri oasr fin acn Provo, Manila, Mexico City, ac ke yen sahyac. Kuhlahs in luti wo emet lasr ke Sacnri Skul enenuh in pa mwe lutlut lasr kais sie ac sucu se ke acn in muhta lasr; kahsruh kuhlahs in Sacnri Skul ahkluo lasr pa ahkfahsryeyuck ke lohm in miting lasr.
Acn in orekma ke sucu oasr in lohm sesr ingena. Kahsruh sahyac nuh ke ma orekma sukok ke ma luhn sucu oacyacpac oasr ke lohm in miting lasr.
Kuhlahs yohk srihpac in ahkkoekuhtlac nuh ke tempuhl sikyak in lohm sesr; yohk srihpac tuh kuhlahs ahkluo ke ahkkoeyacn tempuhl oacyacpac sahp kuh in ahkfahsryeyuck kais kuhtuh pacl ke lohm in miting lasr.
Oruh lohm in muhta sesr in acn se ma kuht kuh in “tu ke acn muhtahl”11 yohk srihpac ke lwen sahflah inge. Ac oacna ke yohk srihpaciyacn etwacack ke lohm-akwuck ac Alu-ahkkweyeyuck pa ahkkweye nguhn lasr ac mwe karihngihnyuck mihsenge, ma fah yohk srihpac pac finne nuh ke pacl fasruh uh.
Etwacack ac Ahkkoeyacn Tempuhl ke Lohm-Akwuck ac Alu-Ahkkweyeyuck
Nuhnak muhnahs nuhnkuh lah fuhkah mwe luti se ke “lohm akwuck ac Alu ahkkweyeyuck” in orekma fal nuh ke ahkolah lasr kais sie ac suwohswohs in eis akwuck muhtahl ac olwelah ke lohm sin Leum.
Ahok, ahkkoeyacn tempuhl pa yohk eklac kac emet in lohm sesr. Tuhsruhk mempucr puhkantwen ke Alu uh tiac arlac etuh ke ma fal ac ma tiac fal in fwack ke ma sikyak lun tempuhl lihkihn tempuhl uh.
Prestuhn Ezra Taft Benson el ahkuhtweyac lah efuh ma tiac kahlwem uh oasr:
“Tempuhl uh pa acn muhtahl se, ac akwuck loac uh ma ke ohiyac muhtahl. Ke srihpen muhtahliyac kuhtuh pacl uh kuht tahfuh luo in fahk kuhtwena ma ke tempuhl nuh sin tuhlihk nahtuhsr ac tuhlihk nuhtin tuhlihk nahtuhsr.
“Ma sikyak kac, puhs mwet tiac oraclah kena pawcye la in som nuh tempuhl, kuh ke elos som nuh we, elos oruh tiac ke elos ahkolah nuh selos mwe enenuh nuh ke ma kuhnac ac olwelah elos puhtatyang nuh ke.
“Nga luhlahlfongi ke sie kahlwem kuh acn ma ac tiac kuh in srihkasrak uh in kahsruh ahkolah tuhlihk fuhsr lasr ke tempuhl uh … [ac] fah karihngihn kena lalos in suk mwe ahkinsewowo luhn pristut oacna ke Abraham el suk ac.”12
Mwe kolyuck luo kuh in kahsrwe kuht sun kahlwem fal se ahkuhtweyucki sel Prestuhn Benson.
Mwe kolyuck #1. Ke srihpen kuht luhngse Leum, kuht kwacna enenuh in sramsram efahl ke lohm muhtahl Sel. Kuht tiac enenuh in oruh in etweyuck kuh ahkuhtweyac akucl sacohk kuhpahsr nuh ke olwelah ma kuht eis ke mukwikwi muhtahl luhn tempuhl. Kuh finne kuht tiac enenuh in sramsramkihn mwe fahkwack muhtahl muh kuht olwelah lun tempuhl muh in tiac ahkkahlwemyeyuck.
Mwe Kolyuck #2. Tempuhl pa lohm sin Leum. Ma nuhkwewa ke tempuhl kol kuht nuh yurin Mwet Lahngo lasr, Jisus Kraist. Sahp kuht ac sramsramkihn srihpac yohk kac ac ma suhmuhslah muhtahl ac mwe luti kuhpahsr nuh ke akwuck ac olwelah luhn tempuhl.
Prestuhn Howard W. Hunter el luti: “Lwelah kuht in akacsruhi nuh sin tuhlihk nahtuhsr ke puhlakihnyacn nguhn kuht eis lun tempuhl uh. Ac lwelah kuht in lotwelos in kena yohk ac puhla wo ke ma fal kuht kuh in fahk ke srihpac luhn lohm sin Leum uh.”13
Ke fihl lal puhs, ke fihl lal Mwet Pahluh Joseph Smith fasruh nuh ke fihl lal Prestuhn Russel M. Nelson uh, srihpac luhn mwe luti muhtahl ke akwuck ac olwelah luhn tempuhl tuh tuhtahflah in lutiyuck sin mwet kol ke Alu uh.14 Mwe nwenyuck koanong se ke kuhfa ma oasr in print, mwe lohng, petsac mukwikwi, ac kuhtwena atac sahyac in kahsrwe kuht in etuh ke akwuck in lweah, mwe sang sacohk, macruht, ac kuhtuh pac akwuck ke sil.15 Mwe fahkwack ke ukweyacn Mwet Lahngo oacyacpac oasr pa in eis ac ahkfuhlwactye olwelah in liyacacng masap luhn ahkostwen, masap luhn kihsac, masap luhn wosasuc, masap ke tiac kosro, ac masap luhn mwe insewowo.16 Mempucr nuhkwewa luhn Alu uh enenuh in akihlen kuhfa wowo oasr ke temples.churchofjesuschrist.org.
Prestuhn Russel M. Nelson el ahkuhtweyac ke luhpan oacna sie yohk inmahsrlon luhmah muhtahl ke mukwikwi luhn tempuhl ac mwe fahkwack yohk srihpac ke tempuhl oreklac sin Alu uh ma pwacye, fal, ac oasr uh. El ahkuhtweyac: “Nga ngihsrwe tuh mempucr … in riti ma sihmlac ke Bible Dictionary muh kuhpahsr nuh ke tempuhl, pa nuh ke ‘Akmuhsra,’ ‘Olwelah,’ ‘Kihsackuhnlah,’ ac ‘Tempuhl.’ Mwet se sahp luhngse pac in riti Exodus, sapta 26–29, ac Leviticus, sapta 8. Wuhiweacng Mahtuh, oacyacpac puk lal Moses ac Abraham ke Pearl of Great Price, kotaiyac luhpan muh mahtuh met ah ke orekma luhn tempuhl ac tuhtahflah ke atac sac ke akwuck la.”17
Na, petsacelah ke tuhlihk mukul se kuh tuhlihk muhtwacn se nuhtum siyuck, “Oasr mwet se eke lutlut ac fahk nuh sihk lah siena nuknuk pa nukumyuck ke tempuhl uh. Pwacye ma sacn?” Petsac mukwikwi fototo se oasr ke temples.churchofjesuschrist.org sifac kac uh pa “Sacred Temple Clothing.” Mwe kahsruh wolacna se inge ahkuhtweyac lah fuhkah mukul ac muhtwacn ke pacl met ah sruokyacna on muhtahl, kain in ohiyacn pruhe, akucl ke nuknuk muhtahl, ohiyac, ac facsin in ahkkahlwemye puhla insepwacye lalos ke luhngse nuh sin God. Ohinge, Alu uh ahkkweye ahkolah lohm-akwuck nuh ke mwe ahkinsewowo wolacna luhn tempuhl ke mwe ahkuhtweyac ac mwe kahsruh wowo pa nuh ke petsac mukwikwi se inge. Mwe fahkwack yohk eneneyuck ikacklah nuh sum.18
Ke kuht kampare in fahsr ke pahkotwen luhn Nguhn luhn Leum,19 kuht fah ahkinsewowoyeyuck in kahlwem ac eis in lohm sesr luhpah enenweyuck inmahsrlon ma fal ac ma tiac fal in sramsramkihnyuck ke akwuck muhtahl lun tempuhl ac olwelah uh..
Olwelah ac Testimoni
Nga liye tuh kuhtuh suwos sahp kuh in nuhnkuh lah etwacack lom ke wosasuc uh kuh in oraclah lohm akwucki se ac Alu Ahkkweyeyuck se. Sahp kom pa mempucr sefanna ke Alu uh in lohm sum an, kuh tahfweyom suhkahsrweacng, kuh kom tiac pahyuck, kuh kom muhkwena muhta kuh Mwet Luhlahlfongi ke Lwen-sahflah sahf se, ac sahp asr siyuck lom kac lah oacna mwe luti inge fal nuh sum. Kom ac sahp ekihn mukul tuhma ac muhtwacn kiyac se suc angetwacni nuh sie ac siyuck, “Kuht kuh in oruh ma se inge?”
Ahok, kom kuh in oruh ma inge! Nga olwelah tuh mwe ahkinsewowo kuh in utuckoht uh fah kahklah nuh ke ac fah akihlenyucki in moul lom. Sruhnguhl uh fah ikacklah. Kahlwem uh fah tohlwack. Kuhiyom fah yohkwaclihk in kacfweacng ac muhtwacnglah in karihngihn.
Nga engan in wi loh lah fohlohkihnyacn mwe ahkinsewowo fah tuhkuh ke kuht kacfweacng in ahkfalyelah ma kunacsr kais sie in lotwelah ac luhngse wosasuc fohlohkihnyuckyak luhn Jisus Kraist. Pwacyena kuht kuh “in ahkolah in eis mwe enenyuck nuhkwewa.”20 Nga olwelah na pwacye ac fahkwack ke inen Leum Jisus Kraist, amen.