![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F76%2Ffb%2F76fb609466ceb05c3151cac1e5664acc02c3294c%2F76fb609466ceb05c3151cac1e5664acc02c3294c.jpeg/full/!250,/0/default)
“Fahsruh, Ukwe Yuc”
Jisus Kraist el suli kuht in sruokyac inkacnek in olwelah fohlohk nuh lohm sesr nuh yurun Pahpah ac Ninac kiyacsr Inkuhsrao ac wi mwet suc kuht luhngse.
Tamuhlwel ac tahmtahel sacohk wiyuck, nga ac muhtwacn kiyuck engan in wi kowos olutu ke lwen Sabbath se inge. Oasr na ma yohk sikyak tukun toeni luhlahp sahflah se lasr ah. Tempuhl sasuc kihsackihnyucklac fin acn Concepción, Chile, Barranquilla, Columbia, ac Rome, Italy. Kuht puhlakihn yohk nguhn ukiyuckmwe nuh fwacsr ke kain pacl sacohk se inge.
Nga kaksakihn muhtwacn ac mukul pucspucs suc ingena riti Puk luhn Mormon ac konwacack engan ac mwe kahsruhp wihklac. Moklweyuck nga ke eisyacn mwe fahkwack usrnguck.
Nga fwefwelac sin tuhlihk mukul ma yac 11 suc, ingena ekihn deacon, suwohs in kahsruh tahfwelah kuhfa luhn Leum ke kais sie Sacnri inge. Eltahl som nuh tempuhl wi tuhlihk muhtwacn nahtuhsr ma yac 11 pacna, suc ingena sruasra in eis etwacack ac kuhlwacnsap ekihn Beehives Kewana mukul ac muhtwacn fuhsr tuhkweni fahkwelihk ma pwacye ke wosasuc ke kahlwem ac insepwacye.
Nga engankihn tuhilhk srihsrihk ac mwet fuhsr suc ma kahsruh luti wosasuc in lohm selos oacna ke elos orekma wi ninac ac pahpah in ukwe mwe lutlut oreklac e lohm ah, koanon mwe lutlut ahkkweyeyucklac ke Alu uh.
Kuht eis petsac se inge kacl Blake tuhilhk yac ahkosr se, suc, toang na ke sie lututacng in Sacnri ah, el sruhkwack puk in Alu se ac fahk, “Nga enenuh in kihtweyac nguhn luhk!”
Blake, kuht wi kom engan ac mwet sahyac ma sulwaclah in kihtwe nguhn lalos pa in mongo ke ma pwacye ke wosasuc fohlohkihnyucyak se luhn Jisus Kraist uh. Ac kuht engan in etuh lah puhs mwet eis kuh luhn God ke moul lalos ke elos ahkfuhlwactye ac kuhlwacnsap lun tempuhl.
Oacna ke inkaiyowos etuh, oasr fahsrwelihk na emtohng se sikyak nuh sin sucu lasr ah ke mahlwem tolu somlah ah ke tuhlihk muhtwacn se nahtuhsr Wendy el wacngihnlac liki moul kawihl se inge. Ke lwen sahflah lal el ke el lain mas cancer lal, ahkinsewowoyeyuck nga in oasr pacl wo sahflah se lasrtacl in oruh sramsram in pahpah-tuhlihk muhtwacn lasr.
Nga sruokyac pahol ac fahk nuh sel luhpan luhngse luhk nuh sel ac luhpan srui luhk lah nga pa pahpah tuhmwacl uh. Nga fahk: “Kom pahyuckyak lun tempuhl ac ahkmuhtahlye olwelah lom ke luhlahlfongi. Kom ac mukul tomom paing tuhlihk itkohsr nuh in lohm sumtacl ac tuhfahltahllah in kihsackuhnuhltahllah in mwet fahsr tukun Jisus Kraist, mempucr fokoko ke Alu uh, ac wi oruh ma kunwaclos ke acn selos. Ac eltahl sulwaclah tahfweyaclos ke pacna etwacack lalos. Pahpah tomom uh arulacna, arulacna engan kom. Kom use engan yohk nuh sihk!”
El kahkahsrihk na tohpohkohllah fahk, “Kuloh nuh sum, Pahpah.”
Pacl na fakpwacp, emtuhng se nuh sesr. Ke yac ahk 67 lal, kuht tuhkweni orekma, tuhkweni on, ac kwacna tuhkweni lallal ke snow ah. Tuhsruhk ke ekuh sac, kuht sramsramkihn yohk ma elyah emet, pa nuh ke olwelah, akwuck, ahkostwen, luhlahlfongi, sucu, suwohs, luhngse, ac moul ma pahtpaht.
Kuht ahsrwelah yohk tuhlihk muhtwacn se nahtuhsr ah. Ohinge, ke srihpen wosasuc fohlohkihnyuckyak luhn Jisus Kraist, kuht tena elyah sel. Ke kuht tahfwelah in ahkmuhtahlye olwelah lasr nuh sin God, kuht moulkihn finsrak in weluhl muhta sie pacl. Ke pacl se pacna inge, kuht kuhlwacnsuhpuh Leum nge ac el kuhlwacnsuhpuh Leum ingoh—in paradise.1
Pwacye, muhtwacn kiyuck ac nga som muhtwacta e Paradise ke muhtuhn yac se inge—Paradise, California, pa ngacn. Oacna ke sikyak ah, pacl in muhtwacta lasr we ah tuh srihk liki ao 40 ma tukun tuhlihk muhtwacn se nahtuhsr ah wacngihnlac liki facluh se inge. Kuht, wi Elder Kevin W. Pearson ac muhtwacn kiyacl, June, tuh ahkkweyeyuck sin Mwe Luhlahlfongi ke Stake luhn Chico California. Kuht eis etwacack ke luhlahlfongi yohk lalos, kahsruh lalos, ac ma usrnguck ma sikyak finne ke inmahsrlon ma wacngihnlac lalos ma muhsahllah ke fihrihryak luhn acn selos fin acn California.
Ke pacl sacn, kuht sramsram nuh sin polismacn fuhsr se, John, suc puhlaik inmahsrlon mwet ma emet in som kasruh. El esam ke lohsr mahtoltol ma puhtati fin acn Paradise ke Nohfohmpuh 8, 2018, ke pacl se ma e ac apact ah sohkwelihk osrwaclihk tahun ah, esuhkwack ma luhn mwet ah oacna in kuhnahoslah ac tiac fihliyac sie fanna ma oan luhlah sahyacn yol in apact ac sralsrallah luhn blocks lun acn in tae ah.
Sun ao 15 ma, John el kahsruhsr lun lohsr mahtoltol se ukwaclah na kahlwem srihsrihsrk ke mulut ah suc kahsrwelah mwet nuh ke mwet, sucu tukun sucu in pain moullac—sikyak ke pacl na upac se ke moul lal sifacna. Ke el puhlakihn tari fohrohti ke keokiyacn kahsruh lal, sie ma ahksahngwengyacl yohk ah pa kihsensiyuck nackuhllah-nuhkwewa: “Piyac sucu luhk uh?” Tukun ao loeloes, ahktuhfal ke upaciyac kuh keokiyac, el tuhfah som nuh ke acn in tifoklac lalos.
Koanon ma sruhmuhnyuck ke elyah lal John sin sucu lal ah pihrihk yuc ngacn sramsramkihn mihsenge wi kowos suc sahp siyakwack ke kom apkuhran in sun sahflahiyacn moul lom an, “Piyac sucu luhk uh?” Ke lwen se fah tuhkuh ke kom fah sun sahflahiyacn moul suhkawihl lom ac ilyak nuh ke facluh luhn nguhn, ac fah utuckoht kihsen siyuck nuh ye motom ac ilucs insiom: “Piyac sucu luhk uh?”
Jisus Kraist el luti ke inkacnwek in fohlohk nuh ke lohm ma pahtpaht sesr. El kahlwem ke plwacn luhn God ke kapkapwack ma pahtpaht liki oacna sie sesr. Tukun ma nuhkwewa, el pa ki yot nuh ke ma nuhkwewa. El pa Mwet in Molwelwah lasr, Mwet in Ahkkweyelah lasr, ac Mwet Lahngo lasr.
Eke pacl se na ma Adam ac Eve lihllihllac liki Imac Eden, Jisus Kraist el tuh ahsrwelah paho kuhlacna Lal in kahsruh mwet nuhkwewa ma sulwaclah in fahsr Tohkohl. Kalweniyuck na, ma suhmuhslah fahkwack tuh macnsiskihn na ma koluk luhn kain mwet nuhkwewa, paho Lal srwackna ahsrweyucklac.2
Nguhn oan in ikoasr oasr na in kena eis luhngse luhn sucu in oan ma pahtpaht. On in luhngse uh tahfwelah finsrak kikiacp muh luhngse uh pa kom enenuh emet uh fin kom ke tuhkweni ma pahtpaht. Ac kuhtuh yohkna luhlahlfongi kac lah Sifil Moulyak luhn Jisus Kraist uh sang olwelah se ma mwet nuhkwewa fah wi mwet eltahl luhngse tukun misac.
Ke ma pawcye uh, Mwet Lahngo sifacna tuh oraclah in lihksrweni na kahlwem muh ke Sifil Moulyak Lal ahkkweye la hmewt nuhkwewa suc fah moul fah ahok sifil moulyak ac eis moul ma pahtpaht,3 yohk ma eneneyuck fin kuht luhngse in eis pacl wowo se luhn moul ma pahtpaht. Moul ma pahtpaht pa elyah luhn sie mwet, moul ma pahtpaht pa elyah luhn sucu se pac.
Porongo kahs fwackyucklac sin Leum Jisus Kraist nuh sin mwet pahluh Lal: “Olwelah muhtahl nuhkwewa, contracts, kuhpahsr, ma kunac,olwelah in ahkkweye orekma, olwelah nuh ke ohiyac fal, mukwikwi, tuhkweni, u, kuh finsrak, ma tiacna oreklac ac ilyak nuh loac ac siliyucki sin Nguhn Muhtahl luhn olwelah … ma wacngihn srihpac, nwacsnwacs, kuh kuh ke ac tukun sifil moulyak liki misac; nuh sin mwet nuhkwewa ma tiac oraclah nuh ke sahflah se inge oasr sahflahiyac ke mwet uh misac.”4
Na, meac eneneyuck nuh sin sucu in eis moul ma pahtpaht? Kuht oraclah sun pacl wowo se ingacn ke kuht oraclah olwelah lasr sin God, liyacacng olwelah ingacn, ac eis akwuck yohk srihpac uh.
Pwacye ma se inge eke na muhtwacwacackiyacn pacl uh. Adam ac Eve, Noah ac muhtwacn kiyacl, Abaham ac Sarah, Lehi ac Sariah, ac mwet insacnweacng in fahsr tukun Jisus Kriast nuhkwewa—eke pacl se na ma facluh oreklac ah—tuh oraclah pacna olwelah se inge sin God. Eltahl eis olwelah se pacna ingacn ma kuht mempucrs ke Alu fohlohkihnyuckyak luhn Leum mihsenge: wuhlweacng ingen eis ke kuht pacptaislac ah ac lun tempuhl.
Leum el suli kuht in fahsr Tohkohl nuh lun kof in pacptais ac, ke pacl, in oraclah sang pac olwelah nuh sin God lun tempuhl ac eis ac in luhlahlfongi nuh ke akwuck yohk srihpac fah tuhkuh tok pac. Ma inge kewa eneneyuck fin kuht luhngse moul wi sucu lasr ac God ma pahtpaht.
Keok luhn insiyuck uh pa ke puhs mwet suc nga luhngse, suc nga kaksakihn, ac ahkfuhlwactye tena eis solsol se Lal inge. Eltahl ngwetlah liki nguhsr luhn Jisus Kraist ke El ahkkahlwemye muh, Fahsruh, fahsr Tukuk.”5
Nga kahlwem kac lah efuh God el tuhng.6 Nga oacyacpac tuhngi kawuck ac sucu luhk. Eltahl mokul ac muhtwacn na wowo, sang pacl laltahl nuh sin sucu lalthal ac nuh ke ma kunwaclos ke acn selos. Eltahl luhngkuhlwacng ke pacl, kuhiyac, ac mwe kahsruh lalos. Ac faclah puhlakihn wo liki met ah ke kampare lalos. Tuhsruhk eltahl tiacna sulwaclah eltahl in in oraclah olwelah lalos nuh sin God. Eltahl sonna eis akwuck ma eltahl kuh in moul wi sucu laltahl ac oracltahlweni nuh sie in tuhkweni ma pahtpaht.7
Ngac finsraki fuhkah ngacn muhtwacta yohrohlos ac solwacltahl in nuhnkwelah ahkwoyac ke eisyacn masap luhn Leum. Nga nuhnkuh lah meac fal ngacn fahk eltahl in muh Kuhn puhla luhpan luhngse yohk luhn Mwet Lahngo nuh seltahl, etuh lah fuhkah luhpan luhngse luhk nuh seltahl, ac kuh in akihlwen lah fuhkah ohiyac in liyacacng olwelah ma muhtwacn ac mokul uh kuh in eis sie “fohnlah luhn engan” uh.8
Eltahl enenuh in kahlwem kac lah oasr sie acn ahkolah nuh selos tok—wi mukul ac muhtwacn wolacna suc oacyacpac tiac sulwaclah in oraclah olwelah la nuh sin God—tiac pa ingacn acn se ma sucu uh fah sifil tuhkweni ac ituckyang pacl wowo se in moul ac kapkapwack ma pahtpaht. Tiac pa ingacn tohkohsrahi se ma eltahl fah puhlakihn fohnlah luhn engan sac—ma wacngihn tui la ac engan la.9 Eisyacn mwe insewowo ingacn kuh in tuhkuh ke kuht weluhl God muhta moulkihn tohkohsrahi Lal, Pahpah Ma Pahtpaht tuhmasr; wen Nahtuhl, Jisus Kraist; ac mempucr ke sucu wolacna, suwohswohs, ac pwacye lasr.
Nga puhla tuh ngacn fahk nuh sin kawuck suhkahs luhk:
“Ke moul se inge, kom tena akwucki nuh ke pacl ahkluo lom ke oacna sie ma. Sikyak tari, ke kom lusrong napwacye in sruokyac wosasuc sifil fohlohkyak luhn Jisus Kraist, kom sulwaclah tuh kom in akwucki nuh ke wo ahkluo.
“Mwet Lahngo el fahk, ‘Pukanten acn in muta in lohm sin Papa tumuk.’10 Ohinge, ke kom tena sulwaclah in oruh olwelah lom nuh sin God, kom akwucki nuh ke lohm ma tena sunyucki nohfohn acn lucng kac se ke lusen moul lom kewa .”
Ngac tiac fuhlweack in ngihsrwe kawuck suhkahs luhk in fahk:
“Okwacoht insiom nuh sin God. Siyuck Sel lah ma inge pwacye. Oraclah pacl lom in lutlut ke kahs Lal. Lutlutkihn in pwacye! Fin kom luhngse na pwacye sucu lom ac fin kom kena tuh kom in weluhlos muhta neke moul pahtpaht, ahkfalyelah ingena—ke lutlut kac in pwacye ac insepwacye in pruhe—in etuh ma pwacye ma pahtpaht ke ma inge ac na in moulkihn.
“Fin kom tena arlac kac finne kom luhlahlfongi ke God, muhtwacwacack inse nge. Kahlwem kac lah kom ne liye lah God el wacngihn, tuh wacngihn sie mwet kuh in tahfuh luokihn oasr luhn God. Na, eiskomyang sifacna nuh ke sie acn an in muhtwacwacack puhlakihn ma inge kwewa Kacl. Ahkpuhsisaclye kom sifacna. Pruhe tuh in oasr ahtron muhta lom in liye poun God ke moul lom ac ke facluh se raunikomlac an. Siyuck Sel in fahkoht lah pwacye El oasr—fin El etwekom. Siyuck lah fuhkah puhla keim. Ac na prorongo.”
Sie kawuck sacohk luhk tuh puhlakihn muhnahslah lal sin God. Tuhsruhktuh el ahsrwelah wi muhtwacn kiyacl suc wacngihnlac. El siyuck sihk in kahsrwel. Nga ahkkweyacl in ohsun sin misineri lasr elacn Kuhn kahlwem ke mwe luti yohk luhn Kraist ac eis etwacack ke olwelah, akwuck, ac mwe insewowo ke wosasuc uh.
Ac El orwaclah. Tuh el tuhfal muh inkacnwek eltahl sang in kahsrwel ah sahp ac enenuh in oruh eklac ma puhkantwen ke moul lal. El fahk, “Masap ac olwelah ingacn arulacna upac nuh sihk. Oacyacpac, tiac fihsrwacsr nuh sihk in moli sie tafuh singucul, ac wacngihn pacl luhk in kuhlwacnsap ke Alu uh.” Na el siyuck sihk, “Pacl se na nga misact uh, nuhnak muhnahs oraclah orekma lun tempuhl ma eneneyuck nuh sihk ac muhtwacn kiyuck kuht in muh kuh in sulpac tuhkweni tok.”
Nga kuloh kihn lah, tiac nga pa mwet in nuhnuhnkuh luhn mukul se inge. Tuh nga kihsensiyuck kihn yohk srihpaciyacn aholyacn mwet in oruh mukwikwi lun tempuhl luhn sie mukul suc tuh oasr pacl se la in pacptaislac ke moul se inge—akmuhsralha ke pristut ac eis mwe insewowo luhn tempuhl ke moulkihn moul suhkawihl se inge—tuh suc etwacl in oruh sulwaclah lal in kahingkihn inkacnwek pwacye sac.
Tamuhlwel ac tahmtahel sacohk wiyuck, Jisus Kraist El suli kuht in sruokyac inkacnek in olwelah fohlohk nuh lohm sesr nuh yurun Pahpah ac Ninac kiyacsr Inkuhsrao ac wi mwet suc kuht luhngse. El suli kuht in “fasruh, ukwe yuc.”
Inge, ekihn Prestuhn ke Alu Lal, nga kacfwe sum suc ahkloesyekomlac liki Alu uh ac suc wi kom sonna arlac ke suk in etuh lah Alu luhn Mwet Lahngo fohlohkihnyuckyak tari. Oruh orekma luhn nguhn in suk komyak sifacna, ac nuhnak muhnahs muhtwacwacack oruh ingena. Lihsr pacl uh.
Nga fahkwack tuh Jisus El moul! Jisus El pa Kraist. Alu Lal ac fohnlah luhn wosasuc Lal fohlohkihnyuckyak in ahkinsewowoye moul lasr ke engan, inge ac nuh tok. Nga fahkwack ke inen Jisus Kraist, amen.