2010–2019
Ngwet nuh sin Jisus Kraist
Toeni Luhlahp ke Eprel 2019
2:3

Ngwet nuh sin Jisus Kraist

By Elder Kim B. Clark

Ke U luhn Itngucul

Fin kuht ngwetwacng nuh sin Jisus Kraist, El ac fah kahsre kuht moulkihn olwelah lasr ac ahkyohkye kunohkohn lasr ekihn elder luhn Israel.

Ke Jisus El fahsr ke soko inkacnek apkuhran nuh Capernaum1 ke sie u na puhs ke mwet raunwellah, sie muhtwacn maskihn sie ohiyac na upac ke lusen yac 12 saplaklac ac kahlyac puhluhn nuknuk Lal ah. Kihtin pacl ah na el kwelac.2

Ma suhmuhslah fahk lah Jisus, El akihlen “lah [kuh tuh] som [Luhkwel],”3 “Ei forla nu inmasrlon mwet uh”4 ac “ngetot ngetma … suk la su oru ma sac”5 “Mutan sac akilen lah eteyukyak ma el oru,”6 el “putati nu ke nial Jisus, ac fahk pwayeyen ma nukewa nu Sel.”7

Jisus El fahk nuh sel, “Acn nutik, lulalfongi lom akkeyekomla, som in misla.”8

Jisus Kraist El molwelah muhtwacn sac. El unweyucklac ke mahnol, tuhsruhk ke Jisus El forlah in liyacl, el fahkwack luhlahlfongi lal Kacl na El unwaclah insiyacl.9 El sramsram nuh sel ke luhngse, ahkkahlwemye insese Lal, ac ahkinsewowoyacl ke mihslac Lal.10

Mukul wiyuck, ekihn mwet sruok pristut muhtahl, kuht eis orekma luhn molwelah. Ke yac sahflah sac, Leum El fihliyac kolyuck luhn orekma se inge ke suwohs fin pihsen elder luhn Israel.11 Kuht eis sie kunohkohn na kuh sin Leum—wi tahmtahel lasr orekma, kuht in karihngihn ke sie ohiyac muhtahl, ahksayelah orekweni luhn Israel ke kwewana siskac ke lihsrlihsr uh, akiyac lohm sesr ekihn acn in alu luhn luhlahlfongi ac lutlut ke wosasuc, ac ahkoelah facluh nuh ke tuhkuh ahkluo luhn Jisus Kraist.12

Oacna ke ma nuhkwewa, Mwet Lahngo El use nuh sesr ohiyac uh: kuht in ngwet nuh sin ac kuhlwacnsuhpuh Jisus Kraist oacna ke El ngwet nuh sin ac kuhlwacnsuhpuh Pahpah Tuhmwacl.13 Mwet Lahngo El fahk ohinge nuh sel Mwet Pahluh Joseph:

“Ngwet nuh Sihk ke nuhnak nuhkwewa; tiac ahlohloh, tiac sahngweng.

“Liye kihnet ma fakihsyac sikuck, ac oacyacpac iken osra ke pouk ac niyuck; kowos in oaru, liyacacng ma sap Luhk, na kom fah usrui tohkohsrahi luhn inkuhsrao.”14

Ke facl luhn nguhn, Jisus El tuh olwelah nuh sin Pahpah Tuhmwacl lah El ac oruh ma luhngse luhn Pahpah Tuhmwacl ac in Mwet Lahngo ac Molwelah lasr. Ke Pahpah Tuhmwacl siyuck, “Suc Nga ac suhpwaclah uh?”15 Jisus El topuk:

“Nga pa ngwe, suhpweyuclac.”16

“Pahpah, luhngse lom in orek, ac wolacna fah ma lom netok.”17

Ke moul in mahno Lal nohfohn, Jisus El moulkihn olwelah sacn. Ke puhsisacl, fakpacp, ac luhngse, El luti mwe luti luhn Pahpah Tuhmwacl ac oruh orekma luhn Pahpah Tuhmwacl ke kuh ac wal Pahpah Tuhmwacl sang nuh Sel.18

Jisus El sang Insiyacl nuh sin Pahpah Tuhmwacl. El fahk:

“Nga luhngse Pahpah.”19

“Nga oruh pacl nuhkwewa ma suc Ahkenganyacl.”20

“Nga tuhkuh tiac in oruh ma luhngse Luhk sifacna, tuhsruhk luhngse luhn [Pahpah, suc] suhpweyucme.”21

Ke kweok Lal Gethsemane, El pruhe, “Ne ohinge tiac ke luhngse luhk tuhsruhk luhngse Lom, in orek.”22

Ke Leum El pahngon elder Israel in “ngwet nuh Sihk ke nuhnak nuhkwewa” ac “liye iken kihnet” ke mahno sifil moulyak Lal, pa sie pahng in forlah liki ma koluk ac facluh ac in for nuh Sel ac luhngse ac Ahksol. Pa sie pahng in luti mwe luti Lal ac oruh orekma Lal ke ohiyac Lal. Pa, ohinge, sie pahng in luhlahlfongi na pwacye, fuhlweack luhngse lasr ac sang insiyacsr nuh Sel, ac ke kuh in molwelah Lal eklac oacna El.23

Mukul wiyuck, fin kuht ngwet nuh sin Jisus Kraist, El ac ahkinsewowoye kuht inelder Israel Lal puhsisacl, fakpacp, etatwen, sesseslah ke luhngse Lal.24 Na kuht ac use engan ac mwe insewowo ke wosasuc ac Alu Lal nuh sin sucu lasr ac tamuhlwel ac tahmtahel ke kwewana siskac ke lihsrlihsr uh.

Prestuhn Russell M. Nelson el pahngon kuht in ngwetwacng nuh sin Jisus Kraist ke ohiyac se inge: “Tiac ma fihsrwacsr kuh fototo se in eklac nuh ke mwet tuhma lutlut fokoko inge. Lohacng lasr uh enenuh in fungyang nuh sin Mwet Lahngo ac wosasuc Lal. Upac fin tiac fas in kwacfweacng in ngwet nuh Sel ke nuhnak nuhkwewa. Tuhsruhk ke kuht oruh uh, ahlohloh ac sahngweng uh wacngihnlac.”25

Rivet pa sie kahs na yohk. Kalmac pa in kapsreni sucu, in eis ac sruokyac in kuh.26 Kuht sruokyac lohacng lasr ke Jisus Kraist ac wosasuc Lal uh ke moulkihnyacn olwelah lasr uh.

Ke kuht moulkihn olwelah lasr uh, ac pihrihk ma nuhkwewa kuht oruh ac fahk uh. Kuht moulkihn sie moul in olwelah27 sesseslah ke akucl, mukwikwi in luhlahlfongi ke lwen nuhkwewa ma ahklohye kuht nuh sin Jisus Kraist: pruhe ke insiyac ke Inel, kuhfa ke kahs Lal, forlah nuh Sel in auliyak ke ma koluk lasr, liyacacng ma sap Lal, ipeis ke kuhfa luhn Leum ac liyacacng Sabbath Lal in muhtahl, alu ke tempuhl muhtahl Lal in puhs ke pacl kuht kuh an, ac orekmakihn pristut muhtahl Lal in kuhlwacnsuhpuh tuhlihk nuhtin God.

Mukwikwi in kihsac ke olwelah inge ikacslah insiyacsr ac nuhnak lasr nuh ke kuh ke molwelah luhn Mwet Lahngo ac pihrihkyuck ke ahkmuhtahl luhn Nguhn Muhtahl. Kais kuhtuh na, Mwet Lahngo El ikihl ohiyac na pwacye lasr uh, fahlac na eklac lasr nuh Sel uh, ac olwelah lasr uh moulyak.28

Olwelah kuht oraclah nuh sin Pahpah tuhmasr Inkuhsrao uh eklac sulwaclah na fokoko, kena loal emet lasr. Olwelah luhn Pahpah Inkuhsrao uh nwekkuhtlac ke kuloh ac engan.29 Olwelah lasr uh tui tilac ma sap kuht ukwe ac eklac ip yohk luhngkihnyuck ma pihrihk ac kol kuht ac orwacni nuhnak lasr nuh sin Jisus Kraist.30

Mukwikwi in kihsac inge oasr nuh sin nohfohn, fuhsr ac mahtuh. Kowos mukul fuhsr ma sruok Aaronic Pristut muhtahl, ma nuhkwewa nga fahk ofong uh ma nuh suwos. Nga kuloh nuh sin God keiwos. Kom oruh akwuck muhtahl ac olwelah uh oasr nuh sin miliacn sin Mwet Luhlahlfongi ke Lwen-Sahflah ke wik nuhkwewa. Ke kowos ahkoelah, ahkinsewowoye, kuh pahsi sackracmacn; karihngihn; pacptais lun tempuhl; suli sie kawuck nuh ke sie mukwikwi; kuh fohlohkohnma sie mempucr ke u lowos an, kowos oruh orekma luhn molwelah. Kom kuh pac in ngwet nuh sin Jisus Kraist ac moulkihn olwelah lom lwen nuhkwewa. Nga olwelah nuh sum lah fin kom oruh, kom ac mwet kuhlwacnsap luhlahlfongiyuck se luhn Leum, ke sie lwen, elder fokoko luhn Israel.

Mukul wiyuck, nga etuh lah puhsra inge kuh in ahksahngweng. Tuhsruhk esam kahs luhn Mwet Lahngo inge: “Nga tiac muhlkihnyucklac, mweyen Pahpah El wiyuc.”31 Na oacpacna inge nuh sesr. Kuht tiacna muhlkihnyucklac. Leum Jisus Kraist ac Pahpah tuhmasr Inkuhsrao luhngse kuht, ac Elos wi kuht.32 Ke srihpen Jisus El ngwet nuh sin Pahpah Tuhmwacl ac ahksahfyelah kihsac in Iwaclah yohk sac, kuht kuh in ngwet nuh sin Jisus Kraist ke sie etuh lah El ac kahsrwe kuht.

Wacngihn sie sesr suwohs. Kuhtuh pacl kuht tuloki. Kuht kuhflah kuh fuhlweack. Kuht ikori. Tuhsruhk kuht fin ngwet nuh sin Jisus ke sie inse auliyak ah, El ac sruhk kuhtyak nuh lucng, oulkuhtlac liki ma koluk, nuhnakmuhnahs nuh sesr, ac unwelah insiyacsr. El muhtweng ac kuhlwacng; Luhngse in molwelah Lal tiacna tui ac tiacna kuf.33 El ac kahsrwe kuht moulkihn olwelah uh ac ahkyohkye ip kunacsr uh ekihn elder Israel.

Ac Pahpah El fah ahkinsewowoye kuht ke ma nuhkwewa enenweyuck in oraclah srihpac Lal uh—“kwewana ma inkuhsrao ac fin facluh, moul ac kahlwem, Nguhn ac kuh, suhpweyuckme ke luhngse luhn Pahpah kacl Jisus Kraist, Wen Nahtuhl.”34

Ke kahlwem ac kuh lucng me kahklah nuh in moul lasr, ma usrnguck tolu sikyak:

Ma se met, kuht kuh in liye! Ke fwackyuck kuht muhtwacwacack in liye oacna Jisus El tuh liye muhtwacn sac: ahliki fac ah nuh insiyacl.35 Ke kuht liye oacna Jisus El liye, El ahkinsewowoye kuht in luhngse elos ma kuht kuhlwacnsuhpuh ke luhngse Lal. Ke kahsruh Lal, elos ma kuht kuhlwacnsuhpuh uh ac liye Mwet Lahngo ac puhla luhngse Lal.36

Ahkluo, oasr sesr kuh luhn pristut! Kuht eis wal ac kuh in oruh ke inen Jisus Kraist “in ahkinsewowoye, in kol, karihngihn, ahkfokokoye, ac unwe mwet sahyac” ac use usrnguck nuh selos kuht luhngse ac liyacacng macruht lasr ac sucu in sef.37

Ahktolu, Jisus Kraist El wi kuht som! Acn kuht som nuh we, El som. Ke kuht luti, El luti. Ke kuht ahkwoye, El ahkwoye. Ke kuht ahkinsewowoye, El ahkinsewowoye.38

Mukul wiyuck, yac tiac oasr srihpac lasr in engan? Oasr lasr! Kuht sruok pristut muhtahl luhn God. Ke kuht ngwet nuh sin Jisus Kraist, moulkihn olwelah lasr, sruokyac in kuh lohacng lasr nuh facl, kuht ac wi tahmtahel lasr ac karihngihn ke sie ohiyac muhtahl liki na, oracni mwet ma fahsrelihk ke kwewana siskac luhn lihsrlihsr uh, ahkfokokoye ac siliyac sucu, ac ahkoelah facluh nuh ke Tuhkuh Ahkluo luhn Leum Jisus Kraist uh. Ac fah sikyak. Nga fahkwack na pwacye.

Nga kaliyac ke pruhe se ke insiyuck inge, tuh kuht nuhkwewa, kais sie nuhkwewa, fah ngwet nuh sin Jisus Kraist ke nuhnak nuhkwewa. Tiac ahlohloh. Tiac fosrngah. Ke inen Jisus Kraist, amen.

Mwe Ahkkahlwemye

  1. James E. Talmage el fahk kacl Jisus “apkuhran nuh Capernaum” ke unwaclah sac sikyak ah (liye Jesus the Christ [1916], 313).

  2. Liye Luke 8:43–44; liye pac Matthew 9:20–21; Mark 5:25–29.

  3. Luke 8:46.

  4. Mark 5:30.

  5. Mark 5:32.

  6. Luke 8:47.

  7. Mark 5:33.

  8. Luke 8:48.

  9. James E. Talmage el sihmihs lah ma yohk srihpac kuhtuh nuh sin muhtwacn sac likina unweyuck luhn mahno pa in etuh lah Mwet Lahngo El sang kena luhn insiyacl, ac lah luhlahlfongi lal El insese kac (liye Jesus the Christ, 318). Jisus El unwelah mahnol ac nguhnal ac ikacslah nuh sel inkacnek nuh ke molwelah.

  10. Kuh in ahkuhtweyucki lah Jairus, sie mwet kol ke iwen lohlngohk, tuh weluhl Jisus ke unweyuck se inge sikyak ah. Jisus El tuh fahsr nuh lohm sel Jairus, ma El ac ahkmoulyeack tuhlihk muhtwacn natuhl Jairus liki misac ah. Muhtwacn se ma Jisus El unwelah ah sahp sisi liki iwen lohlngohk uh ke srihpen mas lal. Ke Jisus El unwacllah ah, El oruh pac in kahlwem nuh selos kwewa ma oasr ah, weluhlwacng Jairus, lah el muhtwacn luhngseyuck se, muhtwacn luhlahlfongi se, ac kwelac ke mahno ac nguhn.

  11. Liye D. Todd Christofferson, “The Elders Quorum” (Liahona, May 2018, 55–58) ke sie asramsrami ke nahweyuck in oraclah u se ke Melchizedek Pristut ke ward se. Srihpac luhn eklac se ingacn tuh ahkuhtweyucki ohinge ke Frequently Asked Questions section ke Ministering website: “In oasr u sena ke Melchizedek Pristut oracni mwet sruok pristut in oraclah ma nuhkwewa ma oasr ke orekma luhn molwelah, weacng orekma ke tempuhl ac ma mahtuh ke sucu ma tuh kahsrweyuck sin mwet kol ke u luhn high prist” (“This Is Ministering: Frequently Asked Questions,” question 8, ministering.ChurchofJesusChrist.org).

    Eklac se tuhkuh tok inge fihliyac misin leader ke ward ac mwet kol sasuc ke tempuhl ac family history ke ward ye kolyuck luhn prestuhnsi luhn u luhn elder. In muhtwacta yurin sucu ma an tari ye kolyuck luhn prestuhnsi sac, eklac inge fihliyac kolyuck ke orekma luhn molwelah nuh sin u luhn elder, wi kahsruh sin Rilif Sosaiti. Pwacye, el sruok key nuh ke orekma luhn molwelah ke ward, tuhsruhk el tahfwelah kunohkohn ac ke orekma sacn nuh sin prestuhn ke u luhn elder in muh yohk pacl lal pisap in kuhlwacnsap nuh sin sucu lal sifacna, ahkkweye mwet fuhsr, ac kuhlwacnsap ekihn judge se luhn Israel.

  12. Liye Russell M. Nelson, “Let Us All Press On,” Liahona, May 2018, 118–19; Russell M. Nelson, “Becoming Exemplary Latter-day Saints,” Liahona, Nov. 2018, 113–14; Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Nov. 2018, 8–12.

  13. Pahpah El suhpwaclma Jisus Kraist nuh facluh (liye John 17:18).

  14. Liye Doctrine and Covenants 6:36–37.

  15. Liye Abraham 3:27.

  16. Liye Abraham 3:27.

  17. Liye Moses 4:2.

  18. Puhs fuhs in kahsruh ke ma suhmuhslah ma sihmlac fahk Jisus El oraclah ke oruh orekma luhn Pahpah Tuhmwacl ac luti mwe luti luhn Pahpah Tuhmwacl. Liye, ke srihkasrak, John 5:19 (Jisus El oruh ma El liye Pahpah oruh); John 5:36 (Pahpah sang orekma nuh sin Wen Nahtuhl); John 8:26 (Jisus El luti ma el eis sin Pahpah Tuhmwacl); John 14:28 (Jisus El fahk, “Pahpah Tuhmuhk kuh liki Yuc”); 3 Nephi 11:32 (Mwe luti Lal pa mwe luti ma Pahpah Tuhmwacl sang nuh sel.).

  19. John 14:31.

  20. John 8:29.

  21. John 6:38; oacyacpac liye John 5:30.

  22. Luke 22:42.

  23. Kahs se look ke fuhs se inge (liye Doctrine and Covenants 6:36–37) oasr kalmac la ma fal nuh ke pahng luhn Leum: in ngwetwacng (kuh foracng); in kohlah sie loh luhn mwet nuh ke; in epacl nuh kac; in suk; in sano ke finsrak; in oasr in nuhnak la oacna sahflah se; in sano kuh ahkolah (liye merriam-webster.com, “look”).

  24. Liye Doctrine and Covenants 121:41–42. Ohiyac luhn Kraist uh fwack ke ma suhmuhslah uh pa mwe sang luhn Nguhn ma tuhkuh ke pahkotwen ac kuhlwacng luhn Jisus Kraist. Pa ma oruh elder luhn Israel uh elder Lal uh.

  25. Russell M. Nelson, “Drawing the Power of Jesus Christ into Our Lives,” Liahona, May 2017, 41.

  26. Liye merriam-webster.com, “rivet.”

  27. In mwe sramsram nuh ke nuhnak ke sie moul in olwelah uh, liye Donald L. Hallstrom, “Living a Covenant Life,” Ensign, June 2013, 46–49. Mwe sramsram se tuh itucklac ke soko sramsram loes kuhtuh orek ke Brigham Young University–Idah ke Mei 2011 ac. Ke ma loes kuhtuh, liye Donald L. Hallstrom, “A Covenant Life” (Brigham Young University–Idaho devotional, May 10, 2011), byui.edu.

  28. Liye Jeremiah 31:31–33, yen ma Leum El fahkwack lah El ac otaclah sie olwelah sasuc nuh sin tuhlihk nuhtin Israel sihmlac ke insiyaclos. Luhmweyuck se ke olwelah uh sihmlac ke insiyacsr, kuh olwelah ma tuhkuh ke insiyacsr uh, el oacyacpac konweyuck ke sihm lal Paul (liye Luo Corinth 3:3; Hebrews 8:10). Nuh ke sie sramsram ke eklac ac insiyac, liye David A. Bednar, “Converted unto the Lord,” Liahona, Nov. 2012, 106–9.

  29. Pruhe ke sackracmacn nuh ke pret ahkkahlwemye wo kuhpahsr ke ohiyacn olwelah lasr nuh sin Pahpah tuhmasr Inkuhsrao uh. Ke plwacn in molwelah luhn Pahpah, kuht oraclah olwelah yurin Pahpah tuhmasr Inkuhsrao, tuhsruhk srihpac luhn olwelah uh akihlenyuck ac kuht fal in eis, mwe insewowo uliyuck kacn Leum Jisus Kraist; El pa Mwet Iwe uh. Ke akwuck ke kuhfa luhn Luem, kuht mwet loh kac nuh sin Pahpah (srihpac an, oruh sie olwelah Yohrohl in sasuc) tuh kuht insese in eis nuh facsr inen Jisus Kraist, esamuhl pacl nuhkwewa, ac liyacacng ma sap Lal, tuh Nguhn Lal in wi kuht pacl nuhkwewa (Nguhn Muhtahl) in wi kuht.

    Mwe sang ke olwelah luhn Pahpah tuhkuh ke kuh in molwelah ac ahkfokoko luhn Jisus Kraist. In mwe srihkasrak, oacna Prestuhn Russell M. Nelson el luti, Jisus Kraist “pa acn se ma engan nuhkwewa tuhkuh we uh” (liye “Joy and Spiritual Survival,” Liahona, Nov. 2016, 82). Ohinge, sruokyac kuh lohacng lasr nuh sin Jisus Kraist uh use engan nuh ke moul lasr wacngihn ma ke ma kuht oasr kac uh.

  30. Prestuhn Ezra Taft Benson el eis fungulyuck ke eklac se inge ke elah ac etuh ke el fahk, “Pacl se ahkostwen uh tilac sie mwe ahngyahng ac eklac sie mwe suk lasr, pacl sacn God El ac fihliyac kuh nuh facsr” (in Donald L. Staheli, “Obedience—Life’s Great Challenge,” Ensign, May 1998, 82).

  31. John 16:32.

  32. In weacng sramsram ke ma pwacye ke nuhnak ke Pahpah ac Wen, engan kac luhngse kac, ac wi ke moul lasr, liye Jeffrey R. Holland, “The Grandeur of God,” Liahona, Nov. 2003, 70–73; Henry B. Eyring, “Walk with Me,” Liahona, May 2017, 82–85. Liye pac Matthew 18:20; 28:20; Doctrine and Covenants 6:32; 29:5; 38:7; 61:36; 84:88.

  33. Liye Rome 8:35–39; Sie Corinth 13:1–8; Moroni 7:46–47.

  34. Liye Doctrine and Covenants 50:27. Liye lah Leum El sang nuh sin kais sie suc akmuhsraelah ac tahfwelah olwelah se inge ma wi, ac fal nuh ke, kunohkohn sefanna ma utuckyang nuh sel:

    “El pacna sulwacyucklac in yohk emet, finne el srihk ac kuhlwacnsap nuh sin kais sie.

    “Ke srihpac se, oasr yohrohl ma nuhkwewa, tuh ma nuhkwewa som nuh sel, kwewana inkuhsrao ac fin facluh, moul ac kahlwem uh, Nguhn ac kuh, suhpweyuckme ke luhngse luhn Pahpah kacl Jisus Kraist.

    “Tuhsruhk wacngihn mwet eis ma nuhkwewa sahyacna el ahknwacsnwacslah ac nwacsnwacslah liki ma koluk nuhkwewa.

    “Ac fin kom ahknwacsnwacsyeyuck ac nwacsnwacslah liki ma koluk nuhkwewa, kom fah siyuck oacna sie ma kom kena ke inen Jisus na ac fah oreklac.” (Doctrine and Covenants 50:26–29).

  35. Liye 1 Samuel 16:7; Sie Corinth 2:14. In mwe srihkasrak ke mwe insewowo luhn liye oacna Jisus inge, liye sramsram se kacl Prestuhn Henry B. Eyring ke oruh se lal ekihn pisap luhn sie mwet fuhsr suc tuh oraclah ma koluk se. Leum El fahk nuh sel pa Pisap Eyring, “Ngwac usot kom in liyacl oacna nga liyacl” (“Walk with Me,” 84).

  36. Pa inge olwelah ac orekma Mwet Lahngo El sang nuh sin mwet ke tempuhl Bountiful ac. El sapkihn nuh selos in moulkihn na pwacye kahlwem Lal ac srihkasrak Lal in oasr selos, elos in muh kuh in kohlohlwack nuh lucng oacna kahlwem se nuh facluh ke moul lalos ac ke solsol lalos nuh sin mwet sahyac in tuhkuh nuh Yohrohl. Oacna mwet tuhma lutlut Lal tuh moul ac suli, mwet sahyac el puhla El ac liye El sin mwet kuhlwacnsap luhn Leum. (Liye 3 Nephi 18:24–25.)

  37. Liye Russell M. Nelson, “The Price of Priesthood Power,” Liahona, May 2016, 68.

  38. Liye Doctrine and Covenants 84:88.