Mongo ke Kahs luhn Kraist
Mongo ke kahs luhn Kraist kuh in sikyak ke oacna sie pacl ac oacna sie toeni fin kuht ahkolah insiyacsr in eis ma inge.
Pahpah Tuhmasr Inkuhsrao El luhngse kuht. El ahkolah plwacn suwohswohs nuh sesr in engankihn mwe insewowo Lal. Ke moul se inge, kuht nuhkwewa suliyuck in tuhkuh nuh yurin Kraist ac eis wosasuc fohlohkyaj ke Jisus Kraist ke pacptais, eis mwe sang luhn Nguhn Muhtahl, ac oarui in moulkihn wosasuc. Nephi el ahkuhtweyac olweacng lasr in pacptais ekihn ilyak ke “innek suwohs ac ohsrihksrihk soko,” ac el acsmakihnye kuht in fasreacng in “ahkwot nuh met ke luhlahlfongi kuh in Kraist, … mongo ke kahs luhn Kraist, ac muhtweng ne ke na sahflah,” ke akwuck in eis mwe insewowo nuhkwewa Pahpah Tuhmasr Inkuhsrao El akiyac nuh sesr (2 Nephi 31:19–20).
Nephi el sifilpac ahkuhtweyac nuh sesr lah fin kuht sifilpac “mongo ke kahs luhn Kraist,” elos “ac fah fahk [nuh sesr] ma nuhkwewa ma [kuht] enenuh in oruh” (2 Nephi 32:3) ac lah ac utuckuh nuh sesr kuh in kuhtanglah “mwe pihsr fihrihr luhn mwet lain tiac pac kuh in kuhtanguhltahllah elos in lohsrlah” (1 Nephi 15:24).
Meac Mongo?
Ke nga fuhsr ah, nga nuhnkuh muh mongo pa in mongo na luhlahp se wi rais, sushi, ac soyu. Nga ingena etuh lah kahs pwacye ke mongo pa in engankihn mongo na yucyuc se. Puhla na wowo se in engan, in ahkkweye, ahkfuhlwact, akacsruhi, fahkwack luhngse nuh sin sucu ac elos suc luhngseyuck, sramsramkihn kuloh lasr nuh sin God, ac muhsaheack kuhpahsr ke engan ke ma puhkantwen, wolacna ke mongo yucyuc. Nga luhlahlfongi muh ke kuht mongo ke kahs luhn Kraist, kuht kolyuck in nuhnkuh ke puhla sefanna pacl nuhkwewa. Mongo ke kahs ke ma suhmuhslah pa in tiac riti muhkwena. Enenuh in us kuht nuh ke engan pwacye ac muhsahi kuhpahsr lasr nuh sin Mwet Lahngo.
Ma inge fwacklac arulacna kahlwem ke Puk luhn Mormon. Esam ke mweimwei lal Lehi ke el liye sahk soko ah “ma fahko ah [pa] luhngkihnyuck in oruh sie mwet in engan.” Fukunsahk se inge ahol luhngse luhn God, ac ke Lehi el emwa fukunsahk se inge, “ma inge … emwem, liki ma nuhkwewa ma [el] ema met.” Oruh “nwacklah nguhn[uhl] ke engan na yohk” ac pa sie ma el luhngse akacsruhi nuh sin sucu lal (1 Nephi 8:10–12).
Ke kuht mongo, kuht oacyacpac sokwack luhpah kuh kain mongo ma kuht eis muh tiac elyah fin insiyacsr nwacnwaclah ke kuloh. Sucu lal Lehi elos moulkihn ikoac tahkmwek ke yen mwesis, tuhsruhk Nephi el ahkuhtweyac ke ongaiyac na upac, fahk, “Arulacna yohk mwe insewowo luhn Leum” lah “muhtwacn kiyacsr … elos fokoko” ac kuh in “fungyang nuh ke fuhfahsryucsr lalos ac tiac tohrkahskahs” (1 Nephi 17:1–2).
Mongo uh kuhtuh pacl uh wi pac mwe etweyuck ac mwe emweyac. Alma el sramsram ke fihtac wowo se muh ukwiyucki ke insiyacsr. Ke kuht srihke ma inge, kuht ac kahlwem fihtac se muhtwacwacack “in yuc” (liye Alma 32:28-33).
Mongo ke Kahs luhn Kraist
Mwe insewowo ke mongo ke kahs luhn Kraist pa kuh ac moul ekyek. Oasr tolu selos nga luhngse suli kom in orekmakihn ke moul lom an.
Ma se meet, kahs luhn Kraist kuh in kahsrwekuht “ahkyohkye ke ip luhn nguhn [lasr] in eis nwacnwaclah ke mwe fwackyuck” (Russell Nelson, “Revelation for the Church, Revelation for Our Lives,” Liahona, Mei 2018, 96) ac moliyucklac in kol kuht ke moul lasr uh. Mormon el luti lah kahs luhn God oasr “fokoko in kohllah mwet uh in oruh [suc] suwohs,” ac lah elos oasr kuh yohk ac oacna sie “katlas uh” kuh in ahksahfyelah (Alma 31:5). Ac ke nga suk lahlmwetmwet in luti mwe etwacack sin God ke orekma nuh sihk sifacna ke mwe srihkasrak, pacl nuhkwewa, ke nga srihke ke “ma wo ke kahs luhn God” (Alma 31:5), nga puhla moliyucklac ac kuh in oruh sulwaclah wo, in kuhtanglah mwe sruhf, ac ahkinsewowoye moul luhk ke kapwack luhn luhlahlfongi ke Kraist ac luhngse elos suc rauniyuclac. Mwet pahluh lasr, Russell M. Nelson, el luti kuht lah “ke lwen ac fah tuhkuh, tiac m se pa in ip luhn Kuhn in moullac liki kolyuck, pwenyuck, ahkkeye, ac tiac eklac in oasr akihlenyac ke Nguhn Muhtahl” (“Revelation for the Church, Revelation for Our Lives,” 96). Enenweyuck fwackyuck ma ac tuhkuh ke kuht srihke “ma wo ke kahs,” ac kahs se ingacn in yohk kalmeyac liki oacna sie ma kuht kuh in oruh kuh in nuhnkuh.
Ahkluo, ke kuht tiac kuh in eklac sesr sifacna ac luhlahlfongi kacsr sifacna, “kahs wolacna luhn God” (Jacob 2:8) ke ma suhmuhslah ac kahsrwekuht etuh lah suc nuh pwacye kuht uh ac use kuh nuh fokoko nuh sesr sifacna. Sifacna etwacack lah suc nga uh ekihn tuhlihk nuhtin God pa sie pacl na wowo nga puhlakihn tari. Ke pacl fuhsr luhk met ah, nga tiac etuh oacna sie ma ke lutlut ke Mwet Lahngo. Ke pacl se emet nga riti Wuhlweacng Sasuc, kahs luhn Kraist ahkwelah na pwacye kihnet in nguhnihk. Nga akihlen lah nga tiac muhkwena ac lah nga tuhlihk nuhtin God. Ke nga akihlen lah pwacye lah suc nga uh nuh sin God, nga akihlen pac ma oreklac arulacna wo ke Iwaclah luhn Kraist.
Enos el akacsruhi ke puhla lal sifacna ke kahlem lal sifacna suc tuhkuh ke motko lal ke kahs luhn Kraist. Ke Enos el sang kahs luhn pahpah tuhmwacl in lotwel ke “moul ma pahtpaht, ac ke engan luhn mwet luhlahlfongi, [tihli] loal nuh [insiyacl],” nguhnihk “masrinsrwacl; ac [el] sikuck muhtuhnte ye muhtuhn Mwet Oraclah [lal] … wowoyak in pruhe” (Enos 1:3–4). Ke pruhe se inge el tuhkuh in etuh Mwet Lahngo ac lotwelah lah kuht oasr suhna sesr, kuht luhngseyuck ac kuh in nuhnak muhnahs nuh sesr ke tahfonglac lasr, ac kuht tuhlihk pwacye nuhtin God.
Ahktolu, kuht kuh in tahpuhkwack moul luhn mwet sahyac ke kahs luhn Kraist. Oacna kacl Enos el eis pacl na wowo lal ac eis kahs luhn Kraist sun insiyacl ah, Leum lasr El ac tuhfah oruh acn Lal in kahlyac insiyacsr kwewa suc kuht finsraki in akacsruhi ke wosasuc Lal. Pohs suhna sesr sahp puhlakihn muhnahs ke kuht srihke in suli mwet se in lohng ke wosasuc mweyen ma kahlwem sesr uh kuht tiac ukwe. Ke ma kahlwem tari, Leum El suli kuht in ikucslah oacluhsr ac sramsramkihn pweng ke wosasuc nuh selos.
Yac luo somlah, Leum El kahlyac insiyacn ninac kiyuck, suc kahsrwel in sulwaclah in eis akwuck ke pacptais. Nga muhta sano lwen se inge in ahol apkuhran in sun yac 35. Ke akwuck in oruh sulwaclah lal, puhkantwen sin mempucr ke Alu uh arulacna kahsrwel ke sulwaclah lal nuh sel Kraist. Sie sacnri ah, el puhla muh el enenuh in som nuh ke alu ah. El ukwe kolyuck sac. Ke el muhta ke tahk soko emet ac sano pacl in kuhfa luhn Leum in muhtwacwacack, tuhlihk yac ahkosr se tulac met luhkwel ac liyacl. El painuhl ke isrwacsr se. Tuhlihk mukul srihsrihk sac som liki acn el muhta kac ac fohlohk nuh ke acn el muhta we, suc pa ke acn se sahyac oacna acn el muhta we acn muh ninac kiyuck muhta we. Tuhlihk mukul srihsrihk se inge sruhkwack ma se ke siah lal ah ac sifil fohlohklac ac sang nuh sin ninac kiyuck puk in on se ac fohlohklac ke siah lal ah. Ninac kiyuck ah lohacng nuh kac lah puk in on inge oan oasr ke siah nuhkwewa lun lohm alu ah. El kuh in na fihsrwacsr nuh sel in sruhkwack sie ke siah soko siskacl ah. Tuhsruhktuh, el arulacna lut ke orekma luhn tuhlihk mukul sac ke kuhlwacng lal, suc el lotwelah ke lohm sel ah ac alu ah. Pacl na sacohk se nuh sel. Oasr sel puhla na fokoko se lah God El solwacl in tuhkuh ac ukwe Mwet Lahngo. El puhla muh el enenuh in pacptaislac. Tuhlihk mukul srihsrihk se inge tiac lohacng ac etuh ke ma el oruh ah, tuhsruhk el kampare in oruh in moulkihn kahs luhn God ac luhngse mwet tuhlan lal. Kuhlwacng lal oraclah yohksripaciyac ekuhllah insiyacn ninac kiyuck.
Kahs luhn Kraist ac tuhfah sun insiyacn mwet ac ikucslah muhtahlos elos suc soenna Liyacl. Ke inkacnek nuh Emmaus, mwet tuhma lutlut luo fahsr weluhl Jisus. Elos suhpwacr ac tiac kahlwem kac lah Leum el kuhtanglah misac. Ke ahsor lalos, elos tiac akihlen lah Kraist moul El weluhlos fahsr. Finne Jisus El “ahkuhtweyucki nuh selos ke ma suhmuhslah kwewa ma nuhkwewa fwacklac kacl,” elos srwackna tiac akihlen El oacna Leum suc moulyak nwe ke na elos muhta ac kuhnsaclihk bread Weluhl. Na ikacklah “muhtahlos.” Ke kuht—kuh kawuck lasr, mwet wi orekma, ac mwet tuhlan—mongo ac kuhnsaclihk bread Weluhl, muhtahsr in kahlwem in ikacklah. Ke pacl luhn mwet tuhma lutlut motko ke pacl lalos yurin Leum moulyak ke acn Emmaus, elos fahk lah insiyacsr tiac fucsrfucsryak ke engan oacna sie ac tayak in kuht El ikacslah ma suhmuhslah nuh selos (liye Luke 24:27–32). Ma inge ac pwacye nuh sesr nohfohn.
Ahksahfye
In ahksahfye, nga fahkwack ke puhla luhk lah mongo ke kahs luhn Kraist kuh in sikyak ke oacna sie pacl ac oacna sie toeni fin kuht ahkolah insiyacsr in eis ma inge. Mongo ke kahs luhn Kraist ac use moul in ahkkweye fwackyuck, ahkpwacye ma lasr sifacna ac yohk suhna sin God ekihn tuhlihk Nahtuhl, ac kol kawuck lasr nuh yurin Kraist ac moul sacohk ma pahtpaht. Use nuh sihk in fahkwack ke mwe suli ke Nephi ke el fahk: “Kowos enenuh in ahkwot nuh met ke luhlahlfongi kuh in Kraist, oasr kahlwem suwohs luhn finsrak, ac luhngse God ac mwet nuhkwewa. Ohinge, kowos fin ahkwot nuh met, mongo ke kahs luhn Kraist, ac muhtweng ne ke na sahflah, liye ohinge Pahpah El fahk: Kowos fah moul ma pahtpaht” (2 Nephi 31:20). Ke inen Jisus Kraist, amen.