![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F65%2F92%2F6592746842948fe0d8507bf5701b98451be90179%2F6592746842948fe0d8507bf5701b98451be90179.jpeg/full/!250,/0/default)
Wosasuc Pwacye, Nwacsnwacs, ac Fihsrwacsr luhn Jisus Kraist
Luhngse God ac luhngse mwet tuhlan lasr pa pwelucng luhn mwe luti ke kuhlwacnsap luti; lutlut lohm ah ma Alu uh ahkkweye; alu ke lwen Sahpuht; ac orekma luhn molwelah.
Tamuhlwel ac tahmtahel sacohk wiyuck, upac nuh sihk nga in luhlahlfongi lah ke lusen yac 71 somlah ah, ke 1948, nga sie misinacri fin acn England ac yac 44 somlah ah, nga ac Barbara, us sucu lasr som nuh Canada ke nga tuh prestuhn luhn Canada Toronto Misin. Ke kunohkohn we ke Eprel 1976, nga tuh pahngyak nuh ke U Se Met luhn Itngucul, ac ke yac 1985, kuht lut ke nga tuh pahngyak nuh ke U luhn Mwet Sap Singucul Luo. Siena liki pahng luhk met ah, ma wi na fihliyucklac ke kunohkohn ke lusen pacl fahsruh uh, pacl in fihliyucklac nga ke kunohkohn se luhk inge in som nuh ke Singucul Luo tiac pa wo emet ke pacl se ingacn; tuhsruhk, nga pruhe tuh pacl sacn in tuhkuh tukun nga ahksahfyelah ma nuhkwewa ma Leum El pahngonyucyak in oruh.
Ke nga nuhnkuh ke yac 43 somlah luhk ke kuhlwacnsap ekihn General Authority ac pacl wowo luhk in kuhlwacnsapuh tuhlihk nuhtin Pahpah Lucng, nga akihlwacnwack na pwacye lah El kena tuh tuhlihk nahtuhl nuhkwewa in sokwack mislac, kaksak, ac engan in moul lalos an.
Mwet pahluh Nephi el luti, “Mukul [ac muhtwacn] uh moul, tuh elos in kuh in engan.”1 Oasr srihpac pucspucs ma oruh mislac, kaksak, ac engan in kahingkihn kuht ke moul se inge, weacng suhkahsruhp, mweun, ongaiyac ke facluh, ac pacl ma kuht sun ma upac ke tilac orekma, mas, ac inmahsrlon sucu an.
Tuhsruhk finne wacngih kuh lasr in oruh kuhtwena ma sikyak in moul lasr fin facluh, ke kuht srihke in eklac mwet tuhmal lutlut oaru luhn Leum Jisus Kraist, kuht kuh in sokwack mislac, kaksak, ac engan finne mwe lokoalok luhn facluh pihnpihn rauni kuht lac.
Sie sin tuhlihk nuhtihk ah tuh fahk sie pacl ah, “Pahpah, nga motko lah ngwac kuh in oraclah.” Nga top fahk, “Ma na Pahpah Lucng El siyuck kuht in oruh uh pa in oruh kuhiyacsr nohfohn ke kais sie lwen.” Tamuhlwel ac tahmtahel, oruh kuhiyom ke ma kom oruh an ke kais sie pengana lwen, ac met liki kom etwacack, kom ac fah akihlacnwack lah Pahpah tomom Inkuhsrao El etwekom ac El luhngse kom. Ac ke kom etuh lah—arulacna etuh—pwacyena lah ac fah oasr srihpac ac kalmeyacn moul lom an, ac kom fah sesseslah ke kaksak ac mislac.
Oa Kahlwem luhn Facluh, Mwet Lahngo El fahk lah elos nuhkwewa suc fihliyac luhlahlfongi lalos in Nga fah tiac muhta na in lohsr.2
“Jisus Kraist El pa ine se ma ituckyang sin Pahpah, ac wacngihn kuhtwena ine sahyac ma utuckuh ma [kuht] kuh in moliyucklac kac;
Ohinge, mukul [ac muhtwacn] nuhkwewa enenuh in eis nuh faclos ine se ma ituckyang sin Pahpah.3
Ma suhmuhslah an luti kuht lah Setuhn el kena kohllah mwet uh nuh in lohsr uh. Srihke nuhkwewa lal an pa in konwelah kahlwem ac ma pwacye luhn Jisus Kraist ac wosasuc Lal. Oacna ke Lehi el luti tuhlihk nahtuhl, setuhn el “suk tuh mwet nuhkwewa in kuh in suhpwacr oacna el sifacna.”4 Fin “orekma ac … wolacna” luhn Pahpah Lucng pa in ahkfahsryelah moul kawihl ac moul ma pahtpaht luhn [mukul ac muhtwacn],5 orekma lal Lucifer an pa in ahkfahsrye ohiyac kweok ac suhpwacr ma wacngihn sahflahiyac nuh sin tuhlihk nuhtin God. Ma koluk ac tahfonglac uh ahklohsryelah Kahlwem luhn Kraist in moul lasr uh. Pasis srihpac yohk lasr uh pa in ayuck ke Kahlem luhn Kraist, ma use mislac, kaksak, ac engan.
Ke lusen mahlwem 18 somlah ah, Leum El mokleack mwet pahluh ac Mwet Sap Lal in akiyac kuhtuh eklac wolacna ah. Tuhsruhk, nga fosrngah tuh srihpac muhtahl luhn eklac inge ac kuh na in tuhlac ke pwacrack ke ma eklac pac na inge.
Joseph F Smith el fahk lah: “Wosasuc pwacye, nwacsnwacs, ac fihsrwacsr luhn Jisus Kraist sifilpac fohlohkihnyuckyak. Ma kunacsr in karuhnguhnwacng wo fin facluh.”6 El fahk pac lah wosasuc pwacye, nwacsnwacs, ac fihsrwacsr uh pa mwe luti in molwelah luhn Kraist.”7
Ke Ip Yohk ke Luhlahlfongi, Mwet Pahluh Joseph Smith el luti lah “ke Iwaclah luhn Kraist, mwet nuhkwewa kuh in moliyucklac, ke ahkostwen nuh ke masap ac akwuck ke Wosasuc.”8
Ip yohk se emet ke wosasuc uh pa in luhlahlfongi ke Leum Jisus Kraist, auliyak, pacptais, mwe sang luhn Nguhn Muhtahl, ac muhtweng ne ke na sahflah. Tamuhlwel se wiyacl ah Hyrum el luti fahk: “Kalweni na in luti ma inge pacl nuhkwewa: kom ac etwacack lah tukun lwen nuh ke lwen, nuhnak sasuc ac kahlwem yohk ke ma inge ac fah ahkkahlwemyeyuck nuh sum. Kom kuh in nuhnkuh yohk ma ingacn … in kahlwem na pwacye kac. Na kom ac fah kuh in oruh in kahlwem yohk nuh selos suc [kom] luti.”9
Ohiyac ma wo emet nuh sesr in liye srihpac muhtahl luhn God pa in muhta na ke luti pwacye, nwacsnwacs, ac fihsrwacsr luhn Kraist ac in orekmakihn masap yohk luo luhn Mwet Lahngo: “Kom in luhngse Leum God lom ke insiom kwewa. … “Kom in luhngse mwet tuhlan lom oacna kom lungse kom sifacna.”10
Ahkostwen nuh ke masap yohk luo ingacn use sie ohiyac in puhlakihn mislac ac engan yohk. Ke kuht luhngse ac kuhlwacnsuhpuh Leum ac kuhlwacnsuhpuh mwet tuhlan lasr, kuht ac fah puhlakuhwack engan yohk ma tuhkuh nuh yohrohsr ke ohiyac wo na pwacye se inge.
Luhngse God ac luhngse mwet tuhlan lasr pa pwelucng luhn mwe luti ke kuhlwacnsap in luti; lutlut lohm ah ma Alu uh ahkkweye; alu ke lwen Sahpuht; ac orekma luhn molwelah nuh ke kwewana lacfahl ke mwe lihsrlihsr ma kahsreyuck sin Rilif Sosaiti ac u luhn elder an. Ma inge nuhkwewa tuhkuh na ke masap muhtahl in luhngse God ac in luhngse mwet tuhlan lasr. Yac oasr ma fal liki, yohk srihpac liki, ac fihsrwacsr liki na ma se ingacn?
Moulkihn wosasuc pwacye, nwacsnwacs, ac fihsrwacsr an ac fah use pacl yohk lasr in muhtwacta yurun katinmas, tuhlihk suhkahpahsrlah, mwet muhkwena muhta, mwet mas, ac mwet suhkahsruhp. Kuht ac fah sokwack mislac, kaksak, ac engan in moul lasr uh ke kuht kuhlwacnsuhpuh Leum ac mwet tuhlan lasr.
Ma eklac ke lwen Sahpuht an ma ahkyohkye lutlut lohm ah ma Alu uh ahkkweye lutlut ke wosasuc uh pa sie pacl wowo in ahksasucye nguhnasr ac insacnweacng lasr nuh sin God lun pihsinkacn lohm sesr an. Oasr ma fihsrwacsr, yohk srihpac, ac wo liki na? Tamuhlwel ac tahmtahel, yac kom kuh in liye lah lutlut ac luti wosasuc ke sucu lasr uh pa sie inkacnek na yohk srihpac in sokwack kaksak ac engan in moul lasr uh?
Sramsramkihn Sahpuht, Mwet Lahngo El fahk muh tuh pwacyena lwen se inge pakpucki nuh sum in monglac liki orekma lom, ac in sang insacnweacng lom nuh sin El suc Fuhlwact Liki Nuhkwewa.11 El tahfwelah in fahk, “lah tuh engan lom in fohnlah … [ke] kaksak ac puhruhe … kom [enenuh] in oruh ma inge ke sang kuloh, ke inse pwacr ac pwacr lomom … [ac] ke inse engan ac engan lomom.”12
Nuhnak muhnahs liye kuhtuh sin kahs yohk srihpac ke fwackyuck se inge: engan, kaksak, sang kuloh, inse pwacr, inse engan, ac engan lomom. Nuh sihk oacna in muh akihlenyacn lwen Sahpuht uh ac oruh isrwacsr srihsrihk muhtahsr.
Ke kuht kuhlwacnsap ke ohiyac fuhlwact ac muhtahl, nuhnak muhnahs motko yohk srihpaciyac tuh kuht in paing mwet nuhkwewa suc tuhkuh wi miting ke Alu lasr uh, yohk na nuh sin mempuhr sasuc ac mwet muhtwacta. Kuht nohfohn enenuh in engan in on ke puk in on ac lihksreni porongo ke inse ikacklah ac nuhnak ikacklah nuh ke kihsen pruhe ke kuhfa luhn Leum.
Kahs in luhlahlfongi ke miting in lalo ac fahkwack luhlahlfongi uh kolyuck sin mempuhr ke bishopric, suc akacsruhi ke sie mwe fahkwack fototo ke luhlahlfongi ma srihsrngiyac na plwacn luhn engan ac wosasuc pwacye, nwacsnwacs, ac fihsrwacsr luhn Kraist. Mwet nuhkwewa enenuh in ukwe mwe srihkasrak se ingacn. Kuht enenuh in esam lah oasr acn wo fal sahyac in sruhmuhn sramsram kuh akacsruhi ke ma sikyak ke forfor an. Ke kuht oruh in fihsrwacsr kahs in luhlahlfongi lasr uh ac lohacng na nuh ke wosasuc luhn Kraist, El fah ahksasucye nguhn ke kuht akacsruhi ke kahs in luhlahlfongi lasr nuh sin sie sin sie.
Kuhlwacnsap luti wo uh liyeyuck wo emet ke mwe intei ma srihsrngiyac na God luhng ac mwet tuhlan luhng an. Fahk fihsrwacsr, kuht luti ke srihpen kuht luhngse Pahpah tuhmasr Inkuhsrao ac tuhlihk Nahtuhl. Kampare ke kuhlwacnsap luti lasr uh ac fah eis kuhtanglah yohk kuht fin oruh kuhlwacnsap luti lasr uh in fihsrwacsr. Kaksak yohk emet uh tuhkuh ke ma fihsrwacsr ke moul uh, pasis kuht enenuh in karuhnguhnwacng na in tiac motko muh oasr ma pac sahyac enenuh in ituckyang nuh ke oacna sie ma eklac ma kuht eis in muhsaheack luhlahlfongi ac kahs in luhlahlfongi fokoko ke insien tuhlihk nuhtin God.
Lwelah kuht in tiac oruh in upac ke ma ituckyang pac in weacng miting, ma finsrakkihnyuck, kuh ma enenweyuck. Oruh in fihsrwacsr. Fihsrwacsr se ingacn pa kom ac fah sokwack mislac, kaksak, ac engan ma nga sramsramkihn uh.
Ke lusen yac puhs, srihpen kolyuck luhn Alu uh, oacna ke sihmlac ke Handbook 2, pa lwacne ma kahlwem ac fihsrwacsr, ma nga fahk oacna:
“Mwet kol an ahkkweye mempuhr nuhkwewa in eis akwuck yohk srihpac nuhkwewa luhn pristut, liyacacng wuhlweacng kac, ac oruh in wo fal nuh ke enganwack ac moul ma pahtpaht. …
“Mwet mahtuh an: Ahkkweye kais sie mwet mahtuh an in wo fal in eis akwuck luhn tempuhl. Luti mwet mahtuh nuhkwewa in srihsrngiyac tahk in sucu lalos ac oruh kain in akwuck luhn tempuhl nuh selos.
Mwet fuhsr: Kahsruh kais sie mukul fuhsr an in ahkolah in eis Melchizedek Pristut, in eis akwuck luhn tempuhl, ac in fal wo in kuhlwacnsap ke full-time misin. Kahsruh kais sie muhtwacn fuhsr in ahkolah in fal wo in oraclah ac liyacacng na wuhlweacng muhtahl ac eis akwuck luhn tempuhl. Ahkfokokoye mwet fuhsr an ke elos wi oruh mukwikwi ma yohk srihpac.
“Mempuhr Nuhkwewa: Kahsruh mwet kol luhn pristut ac kais sie u an, u in kahsruh ke ward an, misineri ke ward ac full-time misineri, ac mempuhr an tuhkweni orekma in molwelah kais sie mwet, ahkfokokoye sucu ac un Alu an, ahkyohkye mukwikwi luhn pristut, ac oracni Israel ke forlah welah Alu, esam na, ac muhtwacwacack mukwikwi. Luti mempuhr an in karihgihn enenuh lalos sifacna ac sucu lalos an ac in kahsruh mwet suhkahsruhp ac mwet oasr enenuh la ke inkacnek luhn Leum.”13
Kunohkohn luhk ke Alu uh ahkinsewowoyeyuc ke ma puhlakihnyuck puhs wo ac sacohk in nguhn. Nga sie mwet loh lah Leum El kol Alu Lal in oraclah srihpac Lal. Nga eis kolyuck muhtahl ma ahluhkwelah kuhiyuck. Kaksak ke muhta na ke wosasuc uh akwucki ke mwe luti ac wosasuc pwacye, nwacsnwacs, ac fihsrwacsr luhn Jisus Kraist.
Nga tuh kuhlwacnsap ye ki ac kohkoh luhn mwet pahluh ohnkohsr ac Prestuhn luhn Alu uh muhtwacwacack sel Spencer W. Kimball ne kacl Russell M. Nelson. Nga fahkwack lah kais sie selos pa mwet pahluh suleyucklac sin God. Elos luti kuht ip yohk srihpac luhn Alu ac wosasuc ac mwe luti luhn Kraist. Prestuhn Nelson el kol orekma luhn Leum in pihsrpihsr fahsr na nuh met. Nga fahk muh pihsrpihsr ke srihpen el muhkwena pa mahtuh liki yuc sin Mwet Sap, ac upac nuh sihk nga sihpihsrpihsrlac in weluhl na! Nga sie mwet loh lah ki luhn pristut ac kot luhn mwet pahluh luhn God an facl. Prestuhn Nelson el luti wosasuc pwacye, nwacsnwacs, ac fihsrwacsr luhn Jisus Kraist. Nga fahkwack kahs in luhlahlfongi luhk lah Jisus pa Kraist, ac pa inge Alu Lal—suc nga fahkwack ke puhsisacl ke inen Jisus Kraist, amen.