Mwet Shepherd Wo, Lahm luhn God
Jisus Kraist El pahngon kuht ke Puhsrwacl ac Inel. El suk ac orekuhtweni nuh sie. El luti kuht lah fuhkuh kuht ac karihngihn ke luhngse.
Tamuhlwel ac tahmtahel sacohk, kom nuh sun puhlakihnyacn koflah in mutullac ac srihke in nuhnak oacoac sip? Ke sip fihsracsracsr uh ahtu tuhpal kalkal, kom oek: 1, 2, 3, … 245, 246, … 657, 658 …1
Nuh sihk, oacoac sip uh tiacna oruh ngacn mwetkweli. Nga fosrngah muh ac tuhlac kuh wacngihnlac sie, ac ma se ingacn oruh nga ngwetngwet na.
Ke tuhlihk mukul shepherd se suc eklac sie tohkohsrah, kuht fahk:
“Leum God El mwet shepherd luk; wanginna ma nga ac kena kac.
“El oru nga in ona in ima folfol insroa: El kolyula nu sisken kof mihs.
“El akkeyala ngunik.”2
Ke pacl in Istuh se inge, kuht ahkfuhlwactye Mwet Shepherd Wo, suc oacyacpac pa Lahm luhn God. Ke inmahsrlon sifac muhtahl nuhkwewa Lal, wacngihn sahyac ma ahkkahlwemye ke luhngse yohk kuh ahkuhtweyac wo. Kuht lotwelah ma pucspucs sin Mwet Lahngo lasr ke El sramsram kacl Sifacna oacna Mwet Shepherd Wo ac ke kahs in pahluh ke luhlahlfongi Kacl lah El pa Lahm luhn God. Kunohkohn ac mwe akucl inge ahkkweye ohiyac wo inmahsrlon sie sin sie—suc wo liki Shepherd Wo in kahsruh kais sie lahm sacohk, ac suc wo liki in Shepherd Wo lasr yohk liki na Lahm luhn God?
“Tuh God El luhngse facluh, ohinge el acse Wen sefanna nahtuhl,” ac Wen Sefanna Nuhtin God El sang moul Lal ke insese in ahkos Pahpah Tuhmwacl.3 Jisus El fahkwack lah, “Nga Mwet Shepherd Wo: mwet shepherd wo suc ahkolah in misac ke sip uh.”4 Oasr kuh Lal Jisus in sang moul Lal ac oasr kuh Lal in sifilpac eis.5 Tuhkweni wi Pahpah Tuhmwacl, Mwet Lahngo lasr El ahkinsewowoye kuht, kwewana ke Mwet Shepherd Wo lasr ac ke Lahm luhn God.
Oacna Mwet Shepherd Wo lasr, Jisus Kraist El pahngon kuht ke Puhsrwacl ac Inel. El suk ac orekuhtweni nuh sie. El luti kuht lah fuhkah kuht ac karihngihn ke luhngse. Lwelah kuht in motko ke ohiyac tolu inge, muhtwacwacack ke El pahngon kuht ke Puhsrwacl ac Inel.
Ma se met, Mwet Shepherd Wo El “pahngon sip nahtuhl sifacna ke inelos. … Elos etuh puhsrwacl.”6 Ac “ke inel sifacna el pahngon kowos, suc pa inen Kraist.”7 Ke kuht suk ke inse pwacye in fahsr tukun Jisus Kraist, mwe mokle wo tuhkuh in oruh ma wo, in luhngse God, ac in Kuhlwacnsapwacl.8 Ke kuht lutlut, motko, ac pruhe; ke kuht ahksasucye wuhlweacng ke kuhfa luhn Leum ac tempuhl; ke kuht suli mwet nuhkwewa in tuhkuh nuh ke wosasuc Lal ac akwuck Lal, kuht porongo Puhsrwacl.
Ke lwen inge, Prestuhn Russell M. Nelson el luti kuht in pahngon inen Alu sifilpac sramtweyuckyak se ke inen Jisus Kraist tuh ahkkahlwemyeyuck: Alu luhn Jisus Kraist luhn Mwet Luhlahlfongi ke Lwen-Sahflah.9 Leum El fahk, “Kuhtwena ma kowos fah oruh, kowos fah oruh ke inek; ke ma inge kowos fah pahngon alu uh ke inek; ac kowos fah pahngon Pahpah ke inek tuh el fah ahkinsewowoye alu uh ke srihpuck.”10 Fin facluh nohfohn, ke insiyacsr ac lohm sesr, kuht paghon Pahpah ke inen Jisus Kraist. Kuht sruikihn mwe insewowo kuhlwacng ke influwen lohm uh, alu tahpuhkyuck sin Alu uh, lutlut ke wosasuc, ac mukwikwi wowo luhn sucu.
Ahkluo, Mwet Shepherd Wo lasr El suk ac orekuhtweni nuh ke u se Lal. El siyuck, “Kain mwet fuhkah kowos an, nahtuh sip siofok, fin tuhlac soko selos, kowos ac tiac fihliyac ma yucngucul yuc ah yen mwesis, ac som suk ma soko ma tuhlac ah, ne ke kowos sokwack?”11
Mwet Lahngo lasr El saplakyang nuh sin sie ac nuh sin yucngucul-ac-yuc, inkaiyacn pacl uh ke pacl sefanna. Ke kuht luti, kuht akihlen yucngucul-ac-yuc suc tu na kuh ac tiac mukwikwi, finne ke kuht ahsor sin el suc tuhlac. Ke Leum lasr suk ac pwenkuhtlac “liki kain in acn nuhkwewa,”12 “ke srowasrihk ahkosr fin facluh.”13 El orekuhtweni nuh sie ke wuhlweacng muhtahl ac ke srahn iwaclah Lal.14
Mwet Lahngo lasr El fahk nuh sin mwet tuhmal lutlut ke Wuhlweacng Sasuc Lal, “Oasr kuhtuh pac sip nuhtihk, suc tiac muhta in kalkal se inge.”15 Fin acn Macrike, Leum suc sifilpac moulyak El fahkwack nuh sin wuhlweacng nahtuhl Lehi, “Kowos sip luhk.”16 Ac Jisus El fahk lah oasr pac sip sahyac suc ac porongo Puhsrwacl.17 Mwe insewowo tuh Puk luhn Mormon pa siepac wuhlweacng ma ahklohye puhsren Jisus Kraist!
Jisus Kraist El suli Alu uh in eis elos nuhkwewa suc porongo Puhsrwacl18 ac karuhnguhnwack masap Lal. Mwe luti luhn Kraist weacng pac ke pacptais ke kof ac ke e ac ke Nguhn Muhtahl.19 Nephi el siyuck, “Fin Lahm luhn God, El suc muhtahl, El enenuh in pacptaislac ke kof, in ahkpwacyeiye suwohswohs nuhkwewa, O na, fuhkah luhpan enenuh pac lasr, ma tiac muhtahl, in pacptaislac, ahok, finne ke kof!”20
Mihsenge Mwet Lahngo lasr El kena tuh ma kuht oruh ac suc kuht ac fahfahlac in oacna uh ac fah suli mwet sahyac in tuhkuh, fahsr Tohkohl. Tuhkuh konwacack luhngse, unwe, kuhpahsr inmahsrlo, ac wuhlweacng muh ma Lal, weacng pac ke tempuhl muhtahl luhn God, yac akwuck muhtahl ke molwelah uh kuh in ahkinsewowoye mempucr nuhkwewa luhn sucu, ohinge oracni nuh sie Israel ke kwewana lacfuhl ke acn lihsrlihsr.21
Ahktolu, oa “Shepherd luhn Israel,”22 Jisus Kraist El ahkkahlwemye ohiyac ma mwet shepherd Israel elos luti ke luhngse. Ke Leum lasr El siyuck kuht fin luhngse El, oacna ke El tuh oruh nuh sel Simon Peter, Mwet Lahngo lasr El kwacfe: “Kihte lahm luhk. … Kihte sip luhk. … Kihte sip luhk.”23 Leum El olwelah tuh ke mwet shepherd Lal kihte lahm ac sip Lal, elos suc oasr ke kalkal Lal “fah tiac sifilpac sahngweng, kuh lut, ac fah wacngihn ma elos kena kac.”24
Mwet Shepherd Wo lasr El ahkkahlwemye lah mwet shepherd fin acn Israel enenuh na in tiac alsracngwacsr,25 kuh foroht forma kuh oruh sip uh in tuhlac,26 kuh sifacna ngwet nuh sesr sifacna in ahkkahsruhpye kuht sifacna.27 Mwet shepherd luhn God enenuh in ahkfokokoye, unwe, kapriyac ma muh kaptwaclihk, sifilpac use ma suc kahingwelihk, suk ma tuhlac.28
Leum El oacyacpac ahksensenkackihn ke mwet orekma ma moliyuck nuh se, suc “tia nunku ke sheep uh,”29 ac “mwet pahluh kikiacp, suc tuhkuh nuh yuruwos nukum nuknuk in kulun sip, tuhsruhk ke insiyaclos elos kosro ngalngucl masrinsrwacl.”30
Mwet Shepherd Wo lasr El engan ke kuht oruh sukohsohk in sulwaclah lasr kais sie ke srihpac wo ac luhlahlfongi. Elos suc oasr in kalkal Lal ngwet nuh sin Mwet Lahngo lasr ke inse kuloh nuh ke iwaclah in kihsac Lal. Kuht olweacng in fahsr Tohkohl, tiac suwollac na ukwe, lohsr na ukwe, kuh ukwe oacna sip uh, tuhsruhk in kena ke insiyacsr ac nuhnak lasr kwewa in luhngse God ac mwet tuhlan lasr, in sruhk ma toasr luhn sie sin sie ac kaksyak ke engan luhn sie sin sie. Ke Kraist El sukohsohk sang kena Lal nuh ke kena luhn Pahpah, ohinge kuht puhsisacl in eis nuh facsr Inel. Kuht engan in suk in welah orekma Lal in oracni nuh sie ac luti tuhlihk nuhkwewa nuhtin God.
Tamuhlwel ac tahmtahel, Jisus Kraist El pa Mwet Shepherd Wo suwohswohs lasr. Ke srihpen El fihliyac moul Lal kacsr ac ingena El pa wolacna in sifil moulyak, Jisus Kraist El oacyacpac Lahm suwohswohs luhn God.31
Lahm in kihsac luhn God tuh palyeyuck ac ke na muhtwacwacackiyac ah. Lihpufacn sac fahk nuh sel Adam lah kihsac lal “pa sie ma lemlem ke kihsaclah luhn Wen Sefanna Nuhtin Pahpah,” muh suli kuht in “auliyak ac pahngon God ke inen Wen nwe tok ma pahtpaht.”32
Pahpah Abraham, suc oraclah wuhlweacng in insewowo nuh sin muhtuhnfacl nuhkwewa fin facluh, el puhlakihn kalmeyac in kihsaci wen se nahtuhl.
“Ac Isaac el sramsram nuh sel Abraham suc pa pahpah tuhmwacl, ac fahk, Pahpah Tuhmuhk: ac el fahk, Nga pa inge, wen nuhtihk. Ac el fahk, Liye e ac otong uh: tuhsruhk piyac lahm …?
“Ac Abraham el fahk, wen nuhtihk, God El fah sifacna use soko lahm ah.”33
Mwet sap ac mwet pahluh tuh fahkwack tari met ac kaksyak ke orekma ma akwucki na met ke Lahm luhn God. John ke Facl Mahtuh ac Nephi ke Facl Sasuc fahkwack ke “Lamb nutin God,”34 “ahok, finne Wen nuhtin Pahpah Ma Pahtpaht[,] … Mwet Molwelah luhn facluh.”35
Abinadi el fahkwack ke iwaclah in kihsac luhn Jisus Kraist: “Kuht nuhkwewa, oacna sip, tahfonglac ke fahsr; kais sie sesr forlah nuh ke inkacnek lal sifacna; ac Leum El eis nuh facl [ma koluk] lasr nuhkwewa.”36 Alma el pahngon kihsac yohk ac sahflah se luhn Wen nuhtin God pa “sie ma suc yohk srihpac liki ma nuhkwewa.” Alma el ahkkweye, “Luhlahlfongi ke Lahm luhn God”; “tuhkuh ac tiac sahngweng.”37
Kawuck sacohk se akacsruhi kac lah el eis fuhkah luhlahlfongi sacohk lal ke Iwaclah luhn Jisus Kraist. El mahtuhyak luhlahlfongi na muh ma koluk uh kwacna pwen kalye upac, ac oan kuht sifacna. El kwacfe nuh sin God in eis kahlwem ke ac kuh in eis nuhnakmuhnahs muhtahl. El pruhe in kahlwem ac etuh lah Jisus Kraist El kuh in nuhnak muhnahs fuhkah nuh selos suc auliyak, lah pahkotwen ac kuh in ahkfalye fuhkah nuhnuhnkuh uh.
Sie lwen ah pruhe se lal ah topukyucklac ke sie ma puhlakihnyuck ke nguhn ma oruh el eklac. Mukul fuhsr fosrngahlah se kahsruhsr tufoklac liki stoh in moul mongo se in us pack luo ke mongo. El kahsruhsr nuh ke inkacnek puhslac stosah kahsruhsr kac, manager se ke stoh sac ukwacl, sruokilyac ac muhtwacwacack sasa ac acnwuck. El tiac nuhnuhnkuh mukul fuhsr sahngweng sac muh el sie mwet pihsrapasr, kawuck se luhk inge puhlahkuhnwack lah el lut sesseslah ke pahkomuhta yohk nuh sel. Ke wacngihn sahngweng kuh elyah ke ohiyac sef lal, el fahsr nuh ke mukul akuhkuhin luo ingacn. El fahk nuh sin mukul luo ah, “Ngac moli mongo an. Nuhnakmuhnahs fuhlwelah elan som. Nuhnak muhnahs lwelah ngacn moli mongo an.”
Mokleyuck ke Nguhn Muhtahl ac sesseslah ke luhngse muh el soenna puhlakihn met me, kawuck se luhk inge fahk, “Ma nga kena oruh pa in kahsruh ac loangwelah mukul fuhsr sac.” Kawuck se luhk ah fahk lah el muhtwacwacack in kahlwem Jisus Kraist ac Iwaclah Lal—fuhkah ac efuh ke luhngse nwacsnwacs ac suwohswohs Jisus Kraist El insese in kihsaclah in Mwet Lahngo lal ac Mwet Molwelah lal, ac lah efuh el kena tuh Elan oruh.38
Pa oruh kuht on:
Liye, Mwet Shepherd Wo El suk,
Suk lahm ma tuhlac,
Usaclosme ke kaksyak,
Pain moullac ke molo ma wacngihn sahflahiyac.39
Oacna Lahm luhn God, Mwet Lahngo lasr El etuh ke kuht puhlakihn ke kuht muhkwena, muhnahslah, ahlohloh, kuh sahngweng. Ke aruhrruhma, Nephi el tuh liye kuh luhn Lahm luhn God “[puhtati] nuh fin mwet luhlahlfongi ke alu luhn Lahm, ac fin mwet wuhlweacng luhn Leum.” Finne elos “fahsrelihk nuh fin facluh nohfohn … elos nuklac ke suwohswohs ac ke kuh luhn God ke wolacna yohk.”40
Olweacng ke finsrak ac ahkkweye se inge wi pac pacl lasr uh.
Yac kom muhkwena mempucr luhn Alu uh ke sucu, lutlut, acn in orekma, kuh mura lom an? Yac pracns lom an kuhtuh pacl uh oacna in srihklac kuh srenglah? Kom nuh mukwilac muhta ke sie acn sasuc, sahp ke kahs kuh facsin ma kom tiac etuh? Sahp ohiyacn moul lom an eklac, ac ma muh kom tiac pahngon muh ac kuh uh inge sun kom? Mwet Lahngo lasr El ahkkweye kuht, oacna sie ohiyacsr, oacna sie sesr, ke kahs lal Isaiah: “El fah oracni lahm uh ke pahol, ac kafihselosyak nuh inniwacl, ac fah kahkahsrihk kol ma fuhsr.”41
Tamuhlwel ac tahmtahel, Mwet Shepherd Wo lasr El pahngon kuht ke Puhsrwacl ac ke Inel. El suk, oracni, ac tuhkuh nuh yurin mwet Lal. Ke mwet pahluh moul Lal ac kais sie sesr, El suki mwet nuhkwewa in suk mihslac, srihpac, unwe, ac kaksyak ke fohnlah luhn wosasuc sifilpac fohlohkihnyuckyak Lal ac ke inkacnek in wuhlweacng Lal. Ke mwe srihkasrak, El luti mwet shepherd luhn Israel in luti ke luhngse Lal.
Oa Lahm luhn God, orekma muhtahl Lal Jisus tuh ahkoeyucklac na met ac kaksyakihnyuck sin mwet sap ac mwet pahluh. Iwaclah Lal, wacngihn sahflahiyac ac nwe tok ma pahtpaht, yohk srihpac nuh ke plwacn in engan ac ke srihpac luhn oreklac. El ahkkweye kuht lah El us kuht na sisken heart Lal uh.
Tamuhlwel ac tahmtahel sacohk, lwelah kuht in kena in “insepuhsisacl suc fahsr tukun God ac Lahm,”42 sahp sie lwen in sihmlac inesr ke puk in moul luhn Lahm,43 in onkihn on luhn Lahm,44 in suliyuck nuh ke kuhfa luhn Lahm.45
Oa Mwet Shepherd ac Lahm, El pahng: Sifilpac tuhkuh “nuh ke etwacack pwacye … luhn Mwet in Molwelah [lom], … mwet shepherd wolacna ac pwacye [lom].”46 El olwelah lah “ke luhng kuhlwacng lal [kuht] kuh in muh kuh in ahksuwohsyeyucklac ke Kraist.”47
Ke pacl in Istuh se inge, kuht kahsakuhnuhl:
“Suwohs pa Lahm se!”48
“Osanna nuh sin God ac Lahm!”49
Nga fahkwack Kacl, Mwet Shepherd Wo suwohswohs lasr, Lahm suwohswohs luhn God. El pahngon kuht ke inesr, ke Inel—finne inen sacohk ac muhtahl luhn Jisus Kraist—amen.