Luhngse Yohk nuh sin Tuhlihk Nuhtin Pahpah Tuhmwacsr
Luhngse pa ip yohk se ac srihpen luti ac srihpac muhtahl ma utuckuh kunwacsr sin mwet pahluh sacohk lasr.
Tamuhlwel ac tahmtahel wiyuck, pacl na sesseslah ac yohk srihpac se pa inge ke fihlin pacl uh. Kuht ahkinsewowoyeyuck in moul ke lwen sahflah inge met liki Tuhkuh Ahkluo luhn Mwet Lahngo. Apkuhran nuh ke muhtwacwackiyacn fihlin pacl sahflah inge ke yac 1829, yac se met liki alu uh tuh akwucki, sie fwackyuck sachohk tuh eisyuck sulkackihnyuck lah sie “orekma na wowo” ac “apkuhran tuhkuh.” Fwackyuck se inge akiyac tuh elos suc kena in kuhlwacnsuhpuh God in wo fal nuh ke kunohkohn an ke “luhlahlfongi, finsrak, kahsruh ac luhngse, in ngwetwacng na siyac nuh ke wolacna luhn God.”1 Luhngse Muhtahl, pa “luhngse suwohs luhn Kraist,”2 weacng pac luhngse netok ma pahtpaht luhn God nuh sin tuhlihk nuhkwewa Nahtuhl.3
Srihpac luhk ke lututacng se inge pa in ahkkahlwemye in wo ip yohk srihpac se ke kain in luhngse se ingacn ke orekma luhn misineri, orekma ke tempuhl ac ke fihlin tahk in sucu, ac mukwikwi ke Alu ma sucu uh oruh lohm selos. Luhngse luhn Mwet Lahngo ac luhngse luhn mukul ac muhtwacn wiyacsr uh4 pa ip yohk se ac srihpen luti ac srihpac muhtahl5 ma utuckuh kunwacsr sin mwet pahluh sacohk lasr, Prestuhn Russell M. Nelson, ke mwe fahkwack ituckyang ke yac 2018.
Srihke luhn Misineri in Oracni Fahsrwelihk luhn Israel
Nga liye inmahsrlon orekma luhn misineri ac luhngse uh emet me na in moul luhk. Ke nga matwac yac 11 ah, nga eis mwe insewowo ke patriarch sin sie mwet suc el pa pahpah mahtuh tuhmuhk.6 Mwe ahkinsewowo se ingacn fahkwack sie ip kac ah, “nga ahkinsewowoye kom ke luhngse yohk nuh sin mwet tuhlan lom, tuh kom fah pahngonyuck in usaclihk wosasuc nuh fin facluh in uslah moul nuh yurun Kraist.”7
Nga srihk na kahlwem kac lah akacsruhi ke wosasuc uh akwucki ke luhngse yohk nuh sin tuhlihk nuhkwewa nuhtin Pahpah Lucng.
Ke General Authority ma srihsrngiyucki in orekma ke Preach My Gospel ke yac 15 somlah, kuht otwelah muh ip yohk ke luhngse uh yohk srihpac nuh ke orekma luhn misineri ke pacl lasr mihsenge uh, oacna ke kwacna sikyak uh. Sapta 6, ke ip yohk ma wo oacna Kraist, weacng luhngse muhtahl ac luhngse, pa sapta se kwacna eye emet inmahsrlonmisineri uh.
Oacna mwet ahol Mwet Lahngo, inkaiyacn misineri puhlakihn kain in luhngse se inge, ac ke elos puhlakihn, srihke lalos uh ahkinsewowoyeyuck. Ke mempucr an elos liye ke kain in luhngse se inge, suc yohk srihpac in kahsruh Leum ke srihpac Lal, orekma luhn Gd ac fah oreklac.
Arulacna wo nuh sihk in eis sie ip srihsrihk ke mwe srihkasrak wolacna ke kain in luhngse se inge. Ke nga tuh kuhlwacnsap ekihn Eria Prestuhn ke fintuhka Pacific, nga tuh eis sie pahng sel Prestuhn R. Wayne Shute. Ke el mukul fuhsr ah, el oruh misin lal fin acn Samoa. Tok, el fohlohk nuh Samoa ekihn sie misin prestuhn.8 Ke el tacluhfon nuh sihk, tuh el pa prestuhn ke Apia Samoa Tempuhl ah. Sie sin misineri fuhsr lal ah, ke el tuh misin prestuhn ah, pa Elder O. Vincent Haleck, suc ingena el pa Eria Prestuhn fin acn Pacific. Prestuhn Shute el luhngse yohk ac suhnakuhnuhl Vince ac nohfohnna sucu lal Haleck ah. Inkaiyacn sucu sac mempucr ke Alu uh, tuhsruhk pahpah tuhmwacl Vince ac, Otto Haleck, sifen sucu sac (ke sucu ma tuhkuh ke Germany ac Samoa), tuh tiacna mempucr. Prestuhn Shute el etuh lah ngwac som wi toeni luhn stek ac miting pac sahyac fin acn American Samoa, ac el siyuck sihk fin nga luhngse muhta lohm sel Otto Haleck ah in liye lah nga kuh in akacsruhi ke wosasuc nuh sel.
Nga ac muhtwacn kiyuck, Mary, tuh muhta yohrohl Otto ac muhtwan kiacl ah, Dorothy, ke lohm kahto se seltahl ah. Ke pacl in mongo in lututacng nga akacsruhi ke sie pweng ke wosasuc ac solwacl Otto in ohsun nuh sin misineri ac. El kuhlwacng, tuhsruhk el tu na kuh, in fohlohkohnlah nguhsr se luhk ah. El fahk muh el engan lah puhs mwet ke sucu lal wi Mwet Luhlahlfogi ke Lwen-Sahflah. Tuhsruhk el lihksrweni fahk lah kuhtuh sin mwet mahtuh ke sucu luhn ninac Samoa kiyacl ah elos mwet sana welah mwet Kristin luti fin acn Samoa, ac el puhlakihn muh fototo inmahsrlol nuh ke alu Kristin.9 Ne ohinge, ke kuht fohlohk ah kuht srackna kawuck wo.
Tohkoh, ke Prestuhn Gordon B. Hinckley el ahkolah in kihsacelah Suva Fiji Tempuhl, el fahk secretary se lal ah, Tamuhlwel Don H. Staheli,10 elacn pahngonyuc e New Zealand kuht in pwlacn lac. Prestuhn Hinckley el tuh ke sohklah Fiji lac nuh American Samoa In ohsun nuh sin Mwet Luhlahlfongi ac. Hotel se ma tuh orekmakihnyuck ke muhtwacta se met ah tuh motkweyuck. Nga siyuck lah nga kuh in oruh sie pacna plwacn ah. Tamuhlwel Staheli el fahk, “Kom pa Eria Prestuhn uh; wo na.”
Nga silahklahk pahnglol Prestuhn Shute ac fahk nuh sel lah sahp oasr pacl wo ahkluo lasr kuht in ahkinsewowoye kawuck se lasr inge Otto Haleck ke nguhn. Pacl se inge, misineri uh pa Prestuhn Gordon B. Hinckley Nga siyuck sel lah el nuhnkuh tuh fal nuh sin sucu lal Heleck ah in fosrngahkihn u se weluhl Prestuhn Hinckley forfor inge.11 Prestuhn ac Tahmtahel Hinckley, tuhlihk muhtwacn nahtuhltahl Jane, ac Elder ac Sister Jeffrey R. Holland oacyacpac wi u in fuhfahsryucsr sac. Prestuhn Shute, suc wi sucu ac orekma , el oraclah kwewa mukwikwi kac an.12
Ke kuht ai tuhkuh Fiji me, tukun kihsacelah tempuhl ah, kuht painyuck wo.13 Kuht sramsram ke ekuh sac nuh sin mempucr tausin fin acn Samoa, na kuht fah som nuh lohm sin sucu lal Haleck. Ke kuht toeni in mongo ke lututacng se tok ah, Prestuhn Hinckley ac Otto Haleck eklac kawuck wowo. Nga fwefwelac kac lah sramsram se lalos ah oacpacna sramsram se luhk Otto ke lusen yac se kuhtuh somlah ah. Ke Otto el ahkkahlwemye luhngse lal ke Alu lasr uh tuhsruhk el sifilpac ahkweye olweacng lal nuh ke alu se el wi ac, Prestuhn Hinckley el fihliyac pahol ke finpihsacl Otto ac fahk, “Otto, tena fal, kom enenuh na in mempucr ke Alu uh. Pa inge Alu luhn Leum uh.” Kom kuh na in liye ke kwekweiyacn lain lal puhtatlac luhkwel Otto ah ac ikacklah nuh ke ma Prestuhn Hinkley el fahk ah.
Pa inge muhtwacwacyacn luti luhn misineri ac sie puhsisacl in nguhn ma lwelah Otto Haleck lan pacptaislac ac ahkweyeyucklac ke yac se kuhtuh tok ah. Yac se tohkoh, sucu lal Heleck tuh sil nuh ke sucu netok ma pahtpaht ke tempuhl.14
Ma se ma moklweack insiyuck ke ma wo puhlakihnyuck inge pa luti wolacna ke luhngse ma ahkkahlwemyeyuck sel Prestuhn Wayne Shute nuh sin kawuck misineri ke pacl met ah, Elder Vince Haleck, ac kena lal in liye nohfohn sucu lal Haleck in tuhkweni oacna sie sucu ma pahtpaht.15
Nuh ke fahsrweni luhn Israel, kuht enenuh in ma sefanna ke insiyacsr ke kain in luhngse se inge ac mukwilac liki ma puhlakiihnyuck uh16 kuh puhlakihn mwacta koluk nuh ke ma puhlakihnyuck ke luhngse ac in wi akacsruhi muhtahl ke pweng luhn Mwet Lahngo, luti ac misin Lal fin facluh.17
Ekihn mempucr kuht kuh in ahkkahlwemye luhngse lasr nuh sin Mwet Lahngo ac nuh sin tamuhlwel ac tahmtahel wiyacsr fin facluh nohfohn in oruh solsol na fihsrwacsr uh.. Pacl in miting sasuc ke Sacmri an use pacl wowo nuh sin mempucr an in wo ohiyac ac ke luhngse suli kawuck ac mwet tuhlan in tuhkuh ac liye ac mokleyuck ke ma puhliihnyuck ke Alu uh.18 Miting muhtahl ke pacl in sacrament, finsrakkihnyuck oacna ke ma Elder Jeffrey R. Holland el ahkuhtweyac ekeah ah, fah tahfweyucklac ke minit 50 miting se in lohacng yohk nuh ke Olweacng Mahtuh ac Mwet Lahngo kuh toeni ahkkahlwemyeyuck ma kuhpahsryang oacyacpac som yohk nuh kacn Mwet Lahngo ac mwe luti yohk Lal.
Kuhtuh tahmtahel ke Rilif Sosaiti motko lah efuh soenna ituckyang nuh selos sie kunohkohn in “oracni” wi mempucr ke u luhn pristut uh. Oasr srihpen ma inge, Prestuhn Nelson el tahkuhnlah inkaiyen ma inge ke toeni yohk se somlah ah. El topuk, “Kuht tiac kuh in oracni Israel kom fin tiac wi.”19 Ke lwen sahflah lasr uh kuht ahkinsewowoyeyuck lah percent 30 sin misineri kuhlwacnsap uh elos tahmtahel. Ma inge use enenuh se pac ac srihpac wo nuh sin tahmtahel ke Rilif Sosaiti in luhngse akacsruhi wosasuc uh. Ma enenwweyuck uh pa sie luhngse, pahkotwen, insacnweacng ke nguhn luhn kais sie sesr—mukul, muhtwacn, mwet fuhsr, ac tuhlihk—in akacsruhi wosasuc luhn Jisus Kraist. Kuht fin ahkkahlwemye luhngse, kuhlwacng, ac puhsisacl, mwet pucspucs ac insese nuh ke solsol lasr uh. Elos suc sulwaclah in tiac insese nuh ke solsol lasr uh ac srwackna kawuck lasr.
Kampare nuh ke Tempuhl ac Sramsram Mahtuh luhn Sucu nuh ke Fahsrweni luhn mwet Israel.
Luhngse uh oacyacpac pa ip yohk se ke tempuhl ac sramsram mahtuh ke sucu in oracni Israel ke lacfahl se sahyac ke lihsrlihsr uh. Ke kuht luti ke ongaiyac ac ma upac ma mwet mahtuh lasr ah sun, luhngse ac tarilacna lasr nuh selos uh yohkwaclihk. Kampare orekma lasr ke tempuhl ac tahk sucu uh ahkfokokoyeyuck yohk liki met ah ke ma aholyucklac ke kwewana tahk in miting ke Sacnri ac kihluckyak luhn mwet fuhsr ke kuhlahs ac u an. Ma aholyucklac inge sana ahkfahsrye ac ahkweye in lihksrweni na lohacng nuh ke lutlut ke sucu mahtuh lasr somlah ac oracni mwet Israel ke kwewana orekma ke lacfahl se sahyac ke acn lihsrlihsr uh. Kwewana orekma ke tempuhl ac tahk in sucu arulacna ahkwoyeyuck.
Internet uh kuhfa na fokoko se; lohm sesr uh pa yohk na acn in oruh tahk in sucu lasr. Mempucr fuhsr lasr uh suhmaht na pwacye ke sukyacn tahk in sucu ac moklweyuck ke nguhn in oruh pacptais luhn sucu mahtuh somlah lalos, suc elos etwacack in luhngse ac tarilacna selos. Ekena pacl se tuhlihk matwac yac 11 kuh in som in wi akwuck luhn pacptais nuh sin mwet misac, prestuhn luhn tempuhl fin facluh nohfohn sulkackihn lah arulacna puhseni mwet som nuh tempuhl. Sie prestuhn luhn tempuhl el fahk nuh sesr lah “arulacna puhseni na pwacye mwet som in pacptais … ac weacng tuhlihk matwac yac 11 us kuhtuh sucu ah pac tuhkuh. … Finne ke matwac [fuhsr] lalos, liye oacna elos in puhlakihn ohiyac ac srihpac yohk ke akwuck ma elos oruh. Ma se inge arulacna kahto in tuniyuck!”20
Nga etuh lah mwet kol ke U luhn Tuhlihk Srihsrihk ac mwet fusr an ac fah tahfwelah na ke kampare yohk in oruh na tahk in sucu ac orekma luhn tempuhl. Tahmtahel ke Rilif Sosaiti ac tamuhlwel ke pristut an kuh in kahsruh ke luhngse in oraclah ma kunaclos ke tempuhl ac tahk in sucu lalos kais sie ac oacyacpa in kahsruh mokle tuhlihk ac mwet fuhsr an in oracni Israel ke lacfahl se sahyac ke acn lihsrlihsr uh. Ma se inge arulacna yohk srihpac nuh lohm ah ac ke lwen Sahpuht. Nga olwelah muh ke kom luhngse in oruh akwuck nuh sin mwet mahtuh somlah uh fah karuhnguhnwacng ac ahkfokokoye mwet fuhsr ac sucu lasr ke sie facl ma upaclah kolukiyac uh. Nga oacyacpac sifacna fahkwack lah Prestuhn Russell M. Nelson el eis fwackyuck ma arulacna yohk srihpac ma kuhpahsr nuh ke tempuhl ac orekma luhn tempuh.
Ahkoelah Sucu Ma Pahtpaht ac Kais Sie Mwet in Muhta Yurin God
Ma yohk srihpac sasuc ke luti lohm ah ke wosasuc ac moul lasr uh ac mwe kahsruh ma tuckuh sin Alu uh pa sie pacl na wo in luhngse ahkolah sucu ma pahtpaht ac kais sie mwet in ohsun nuh sin ac muhta yurin God.21
Ke mukul se ac muhtwacn se siliyucki lun tempuhl, elos sil nuh ke akwuck muhtahl luhn macruht ke wuhlweacng sasuc ac ne tok ma pahtpaht, suc pa sie akwuck ke pristut.22 Elos tuhkweni na eis mwe insewowo ke pristut ac kuh in kol mukwikwi luhn sucu lalos. Oasr orekma wo luhn muhtwacn ac mukul oacna ke tahkihnyucklac ke “Sucu: Sie Mwe Fahkwack nuh fin Facluh,”23 tuhsruhk oacna sie woiyacn orekma lalos ac yohk srihpac.24 Oacna sie luhpan kuh oasr selos in eis fwackyuck nuh sin sucu lalos. Ke elos tuhkweni orekma ke luhngse ac suwohs, sulwaclah lalos an ahkinsewowoyeyuck inkuhsrao me.
Elos suc suk in etuh ke luhngse luhn Leum ekihn mwet se ac sucu lalos enenuh in srihke in suwohs, fihlpacp, kuhlwacng, ac luhngse. Insepuhsisacl ac luhngse pa ma yohk srihpac emet selos suc suk in oruh luhngse luhn Leum, yohk na nuh sin sucu laos.
Ahksuwohsye kuht sifacna, oruh kuht sifacna in wo fal nuh ke mwe insewowo ke wuhlweacng, ac ahkolah in ohsun nuh sin God, pa ma kunen kais sie mwet. Kuht enenuh in kuh in sifacna ac lihksreni eiskuhtyang in oruh lohm sesr uh in sie acn sef liki pahkah ma raunikuhtlac25 ac “sie acn muhtahl luhn luhlahlfongi uh.”26 Oasr ma kunwacn ninac ac pahpah in luti tuhlihk nahtuhlos ke luhngse. Lohm sesseslah ke luhngse uh sie mwe kaksak, mwe ahkengan, ac pwacye na oacna inkuhsrao se fin facluh.27
On soko ma ninac kiyuck ah luhngse emet pa “Love at Home.”28 Oacna sie pacl ma el lohngwack lain soko emet an, ma fahk muh “Oasr ma kahto raunwelah acn uh ke oasr luhngse lohm ah uh,” el ac mokleyuck ac sroninmuhtayak. Ke kuht tuhlihk ac kuht akihlen lah kuht muhta ke kain in lohm se ingacn; pa ingacn sie ma yohk srihpac emet nuh sel.29
In weacng pac sie acn ma oasr luhngse in lohm ah, Prestuhn Nelson el lohacng nuh ke ahksrihkye orekmakihnyacn ma ke internet ma ahkfohsye srihpac yohk emet nuh sesr uh.30 Sie ma kuh in eklac ma ac ahkweye oacna sie sucu an pa in oruh internet, social media, ac tv in mwe kuhlwacnsap likina in sie mwe ahklusrohngtwen kuh, finne koluk liki, sie mwet kol moul lom an. Mweun luhn nguhnin mwet nuhkwewa, tuhsruhk yohk na nuh sin tuhlihk an, inkaiyacn pacl uh sikyak lohm ah. Ninac ac pahpah an enenuh in liyacacng tuh koanon mwe liyeyuck ke tv kuh lohngyuck an kwewana in wona, fal nuh ke matwaclos, ac fahsr fal nuh ke acn luhgkihnyuck se kuht srihke in oraclah an.
Luti in lohm sesr uh enenuh na in kahlwem ac pahtokyuck31 tuhsruhk enenuh pac in muhtahl, pwacr, ac sesseslah ke luhngse.
Nga olwelah lah ke kuht lohacng nuh ke luhngse lasr nuh sin Mwet Lahngo ac ke Iwaclah Lal, oruh tuh in El pa ma yohk srihpac se emet ke kampare lasr in oracni Israel ke kwewana lacfahl ke acn lihsrlihsr, luti mwet sahyac, ac kais sie mwet ahkolah in ohsun nuh sn God, mokleyuck luhn mwet lokoalok sac ac fah srihkeni na kaksak engan, ac mislac luhn wosasuc ac fah ahkwoyelah lohm sesr ke luhngse ma oacna Kraist.32 Nga fahkwack ke olweacng luhn mwe luti inge ac fahkwack lohoh pwacye ke Jisus Kraist ac kihsac in Iwaclah Lal kacsr, ke inen Jisus Kraist, amen.