![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe0%2F85%2Fe085e8552cfe374feb441aed7797f9020caafb7d%2Fe085e8552cfe374feb441aed7797f9020caafb7d.jpeg/full/!250,/0/default)
Mwe Enenweyuck ke Kuh luhn Pristut
Yac oasr kena lasr in pruhe, lalo, lutlut, suk, alu, ac kuhlwacnsap mwet luhn God kuht in muh kuh in eis kain kuh luhn pristut inge?
Mahlwem ohnkohsr tari ah ke Ohktohpa 2015 ke toeni luhlahp, nga sramsram nuh sin tahmtahel ke Alu uhke kunohkohn lucng ke muhtwacn nuhtin God. Nga ke sramsram nuh suwos tamuhlwel ke kunohkohn lucng lowos ke mukul nuhtin God. Ke nga fuhfahsryucsr nuh ke facluh, nga lut ke kuh ac ohiyac wo luhn mukul ac mukul fuhsr ke Alu se inge. Wacngihn ohiyac in sangoacklah pihsen insiyacn mwet kowos ahkkweyelah ac moul ma kowos sruhkwack. Kuloh!
Ke pweng luhk ke toeni sahflah, nga ahkuhtweyac ke mukwikwi luhk ke yac puhspuhs somlah, ke nga heart surgeon se, nga tiac kuh in molwelah tuhlihk muhtwacn luo. Ke lwelah luhn pahpah tuhmwaclos, nga ke sruhmuhn kuhtuh pac ke sucu sacn.
Congenital heart disease pa mas se ahkkweokye tuhlihk tolu suc isuslac sel Ruth ac Jimmy Hatfield. Tuhlihk mukul se met, Jimmy Jr., el misac ac wacngihn ma lohoh ke onweyacl. Nga falyang nuh ke pacl se pahpah ac ninac kiyacn tuhlihk muhtwacn luo inge sukok kasruh nuh selos, Laural Ann ac ma fuhsr luhkwel, Gay Lynn. Nga ahsor nuh pwacye ke kwewana tuhlihk muhtwacn luo inge misac tukun operation lalos.1 Ke kahlwem, Ruth ac Jimmy ahkmuhnahsyeyucklac ke ma luhn nguhn.
Tukun pacl uh, nga etwacack lah elos sruokyac na toasrlah laltal nuh sihk ac Alu uh. Ke apkuhranyang nuh ke yac onngoul, nga tiac puhla wo ke ohiyac sacn ac ahsor kacn sucu Hatfields. Nga srihke ke mahlwem puhs in sramsram yohrohlos, ac wangihn eklac.
Na, sie fong ke Mei tari ah, nga acskmaklac ke srihpen muhtwacn luo ingen ke moul tok. Nga ne tiac liyaclos kuh lohngohlos ke ma luhn mahno, nga puhla elos oasr. Ke ma luhn nguhn, nga lohng siyuck lalos. Pweng lalos arulacna fototo ac kahlwem: “Tamuhlwel Nelson, kuht tiac siliyucklac nuh sin kuhtwena mwet! Kuh kom kuh in kahsre kuht?” Tiac path tohkoh, nga etwacack lah ninac kiyaclos fahna misac, tuhsruhktuh pahpah tuhmwaclos ac mukul fuhsr wiyaclos srackna moul.
Moklweyuck ke siyuck lal Laural Ann ac Gay Lynn, nga sulpac srihke in pahngon pahpah tuhmwaclos, suc nga etwacack lah el muhta yurin mukul nahtuhl Shawn. Ke pacl se inge elos insese in ohsun yuruk.
Ke Jun, nga sikuckmuhtuhntei ye muhtahl Jimmy, ingena matwac yac 88, ac ke insiyac-nuhke-insiyac nqa sramsram nuh sel. Nga sramsramkihn siyuck luhn tuhlihk muhtwacn nahtuhl ac fahk nuh sel lah nga sruikihn in oruh akwuck in siliyac sucu lal. Nga oacyacpac ahkuhtweyac lah ac enenuh pacl yohk ac kena yohk lal ac ip lal Shawn pac in ahkolah ac nwacsnwacs in utyak nuh ke tempuhl, mweyen elos kwewana soenna eis akwuck ke mwe sang muhtahl.
Nguhn luhn Leum puhla arulacna fokoko ke toeni se ingen. Ac ke Jimmy ac Shawn kwewana insese nuh ke siyuck luhk, nga engan nuh pwacye! Elos oaru in orekma yurin prestuhn luhn stek, pisap, mwet forfor luti, ac mwet kol luhn ward misin lal, ac wi pac misineri fuhsr ac mahtuh. Na, tiac pacl loes somlah ah, ke Payson Utah Temple, nga eis pacl wo in sililyac Ruth nuh sel Jimmy ac tuhlihk ahkosr nuh selos. Wendy ac nga tuhng ke kuht wi mukwikwi wolacna se ingen. Insiyac puhspuhs ahkkweyeyucklac ke lwen se ingen!
Ke ngetnget luhk, nga lut ke Jimmy ac Shawn ac ma elos kena oruh. Elos pa mwet kuhtanglah nuh sik. Nga fin kuh in eis mwe luhngse luhk, nga kena kais sie mukul mahtuh ac fuhsr ke Alu se inge kuh in ahkkahlwemye kain puhlaik, kuh, ac inse puhsisacl luhn pahpah ac wen nahtuh se inge. Elos insese in sang nuhnak muhnahs ac tohllah mwe kweok mahtuh ac mwe pahlah. Elos insese in eis kolyuck sin mwet kol luhn pristut lalos tuh Iwaclah luhn Jisus Kraist kuh in ahknwacsnwacsyaclos ac ahkyohkyaclos. Kais sie kena in eklac nuh ke mukul se suc nwacsnwacs in sruok pristut an “tukun ohiyac muhtahl luhn God.”2
Kalmac in sruok pa in tahpuhk ma toasr ma usyuck. Pa luhlahlfongi muhtahl in sruok pristut, ac pa kuh ac wal wolacna luhn God. Nuhnkuh ke ma inge: pristut ma ahkkweyeyucklac sesr pa kuhac wal oacna sie ma God orekmakihn in oraclah facluh se inge ac puhslac sahyac, kol inkuhsrao ac facluh, ac sang ma pahtpaht Yohrohl nuh ke tuhlihk ahkostwen Nahtuhl.3
Pacl fototo somlah ah, Wendy ac nga oasr ke toeni ke mwet sritacl ohkohn muhta ahkolah in sritacl on in ikacslah. Muhtahl oasr ke puk in on, ac pahol oasr ke ki ah. El muhtwacack in kahlyac ki ah, tuhsruhktuh wacngihn puhsra. Nga mahmah nuh sel Wendy, “Wacngihn kuh kacl.” Nga nuhnkuh lah oasr ma tilokihnyac fasr luhn sahromrom nuh ke ohkohn sacn.
Na, Tamuhlwel, ke oacna sie ohiyac, nga sahngweng lah oasr puhslac mukul suc eis wal luhn pristut tuhsruhktuh srihklac kuh luhn pristut ke srihpen kuh luhn pristut kohsrkohsrlah ke srihpen ma koluk oacna alsracngwesr, ohiyacn kikiacp, inse fuhlwact, ma fohkfohk, kuh yohk pacl ac nuhnak ke ma luhn facluh.
Nga sahngweng lah puhslac mwet sruok pristut suc oruh srihk kuh wacngihn ma in oruh kapwack kuhiyac lalos in orekmakihn kuh luhn inkuhsrao. Nga elyah ke mukul nuh kwewa suc oasr koluk nuhnak la, puhla la, kuh mukwikwi kuh suc ahkkolukye muhtwacn kiyaclos kuh tuhlihk nahtuhlos, na wacngihnlac kuh luhn pristut la.
Nga sahngweng lah puhslac mukul sang sukohsohk in sulwaclah lalos nuh sin mwet lokoalok ac fahk ke mukwikwi lalos, “Nga ke oruh luhngse luhk likina sruok kuh luhn Mwet Lahngo in ahkinsewowoye mwet sahyac.”
Nga sahngweng, tamuhlwel, lah kuhtuh sesr fah acsmaklac sie lwen ac akihlen ma pwacye ke kuh luhn pristut ac sun auli luhlahpl lah elos sang pacl yohklac nuh ke sukyen kuh fuhlwact luhn mwet kuh ke orekma likina fuhkah in lotwelah in orekmakihn suwohs kuh luhn God.4 Prestuhn George Albert Smith el luti lah “kuht tiac oasr misenge in sano pacl ke moul lasr na som nuh ke acn ma pahtpaht; tuhsruhktuh kuht oasr in ahkwekuht sifacna lwen nuh ke lwen nuh ke kunohkohn ma Pahpah tuhmasr el kena kuht in ahkfalye ke moul fahsruh.”5
Efuh kuh kuhtwena mwet kuhnaus pacl lal ac puhtatyang nuh ke fohs lall Esau6 ke oasr ohiyac el kuh in eis mwe insewowo nohfohn lal Abraham?7
Nga siyuck yohk nuh sin kais sie sesr in moul fal nuh ke mwe lwelah lasr ke mwet sruok pristut. Ke sie lwen tok, mukul muhkwena suc karihngihn pwacye pristut lalos, ke oaru in suk in lutiyuck sin Leum Sifacna, ac kuh in ahkinsewowoye, kol, karihngihn, ahkfokokoye, ac ahkkweye mwet sahyac. Mukul se fanna suc ahkfalye ma nuh kwewa ke kuh luhn pristut kuh in us usrnguck nuh sin mwet el luhngse ac karihngihn pahyuck ac sucu lal in pain moul, ingena ac nuh ke ma pahtpaht.
Meac enenweyuck in oruh kapwack kain kuh luhn pristut se inge? Mwet sap mahtuh luhn Mwet Lahngo, Peter—Peter oacna sie suc James ac John ahkkweye Pristut Melchizedek nuh sel Joseph Smith ac Oliver Cowdery8—fahkwack talan ma kuht enenuh sokwack in “ku wi ipeis ke moul mutal su ma lun God sifacna.”9
El fahkwack luhlahlfongi, ma wo, lahlmwetmwet, kuh in sifacna, mong fihsracsr, ohiyacn God, kuhlwacng, luhngse pwacye, ac oaru.10 Ac tiac muhlkuhnlah inse puhsisacl!11 Na nga siyuck, mempucr ke sucu lasr, kawuck, ac mwet orekma kacsr ac nga ac oruh fuhkah in kapwack mwe sang luhn nguhn inge ac sahyac?12 Ke ma inge yohkwelihk, kuh luhn pristut lasr ac fah ahkyohkyelihk pac.
Kuht kuh pac in ahkyohkye kuh luhn pristut lasr uh fuhkah? Kuht enenuh in pruhe ke insiyacsr. Sramsram fihsracsr ke ma sikyak tari ac ma soenna sikyak, ac sahflahiyac wi siyuck ke kuhtuh mwe insewowo, te kuh in oraclah kain sramsram yurin God ma use kuh pahtpaht. Yac kowos kena pruhe in etuh fuhkah in pruhe ke kuh yohk likina? Leum El fah luti kowos.
Yac kowos kena in suk ma suhmuhslah ac mongo kihn yohk kahs luhn Kraist13—in lutlut yohk in oruh in oasr kuh yohk likina? Kowos fin ke ahkenganye insiyen muhtwacn kiyowos, lwelah tuh elan sokack lah kowos orekmakihn Internet in lutlut ke wosasuc luhn Kraist14 kuh riti ma suhmuhslah lowos!
Yac kowos kena alu lun tempuhl kais kuht pacl? Leum El luhngse in oruh mwe luti Lal sifacna ke lohm muhtahl Lal. Nuhnkuh ke ohiyacn engan Lal kowos fin siyuck Sel in luti kowos ke ki luhn pristut, wal, ac kuh ke kowos orekmakihn akwuck luhn Pristut Melchizedek lun tempuhl muhtahl an.15 Nuhnkuh ke kuh luhn pristut lom uh kuh in yohkwelihk. .
Yac kowos kena in ukwe srihkasrak lal Prestuhn Thomas S. Monson in kuhlwacnsapuh mwet sahyac? Ke yac puhspuhs el som leoslac, el kolyuck ke kohkoh luhn Nguhn in som nuh ke sruhngucl luhn sie mwet ac lohng kahs suc fahk oacna, “Kuh kom etuh fuhkah lah mihsenge pa anniversary ke misac luhn muhtwacn nuhtihk?” kuh “Kuh kom etuh fuhkah lah mihsenge pa lwen luhk?” Ac kowos fin kena pwacye tuh in yohkwelihk kuh luhn pristut lowos, kowos fah luhngse ac karihngihn muhtwacn kiyowos, in porongo nuh sel ac mwe fahk lal.
Ingena, fin ma inge nuh kwewa luhman ahluhkelah ma fal, nuhnak muhnahs nuhnkuh lah fuhkah eklac ke akuhpahsri lasr nuh sin muhtwacn kiyacsr, tuhlihk nahtuhsr, ac mwet kuht orekma yohroh kuht fin elyah ke ahkyohkye kuh luhn pristut lasr oacna ke kuht elyah ke kapkapwack ke orekma kuh ahkyohkye mani lasr ke bank account. Kuht fin inse puhsisacl in epahsr lah ye muhtuhn Leum ac siyuck Sel in luti kuht, El ac fah ahkkahlwemye fuhkah in ahkyohkye lwelah lasr nuh ke kuh Lal.
Ke lwen sahflah inge, kuht etuh ac fah oasr kusrusr ke oacna sie acn.16 Sahp lohm sesr uh ac fah oana sie sin acn, suc ma asr emtuhng, ma luhn mani, kuh “kusrusr” ke ma luhn nguhn kuh in sikyak we. Kuh luhn pristut kuh in ahkmihsye meoa ac ahkkweye srasr ke facluh. Kuh luhn pristut kuh in oacyacpac ahkmihsye nuhnak ac ahkkweye srasr lun insiyacn mwet kuht luhngse.
Yac oasr kena lasr in pruhe, lalo, lutlut, suk, alu, ac kuhlwacnsap mwet luhn God kuht in muh kuh in eis kain kuh luhn pristut inge? Ke srihpen muhtwacn srihsrihk luo kena in siliyucklac nuh ke sucu lalos, pahpah tuhmwaclos ac mukul wiyaclos oasr kena in moli ma enenweyuck in sruok Pristut Melchizedek muhtahl.
Tamuhlwel sacohk wiyuck, kuht eis luhlahlfongi muhtahl—wal luhn God in ahkinsewowoye mwet sahyac. Lwelah kais sie sesr in tuyak ekihn mukul se ma God el akmuhsraikuhtlac nuh kac—ahkolah in sruok pristut luhn God ke puhlaik, ac oasr kena yohk in oruh ma nuh kwewa enenweyuck in ahkyohkye kuh lal ke pristut. Ke kuh se inge, kuht kuh in kahsruh ahkolah facluh nuh ke Tuhkuh Ahkluo luhn Mwet Lahngo lasr, Jisus Kraist. Pa inge Alu Lal, kolyuck sin mwet pahluh Lal, Prestuhn Thomas S. Monson, suc nga luhngse yohk ac ahkkweye. Nga fahkwack ke inen Jisus Kraist, amen.