![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F56%2F2e%2F562e30517e08b7755f088dc5f99cc742ddecfb82%2F562e30517e08b7755f088dc5f99cc742ddecfb82.jpeg/full/!250,/0/default)
Mwet Kol Wowo Emet uh Pa Mwet Fahsr Tohkoh Wowo Emet uh
Oasr pacl ke inkacnek met uh oacna in lohsr, tuhsruhk tuh ukwe na Mwet Lahngo. El etuh inkacnek uh; tuh pwacye, El painkacnek uh.
Ke nga yac 12 matwac ah, pahpah tuhmuhk ah usyuc sruh kosro finohl ah. Kuht nguhtwaclihk ke ao 3:00 ke lututacng ah, ahkolah ohsr ukwacsr uh, ac muhtwacwacack fuhfahsryucsr pe finohl nuklac ke sahk uh ke lohsr na upac. Finne fuhkah luhpan luhngse yohk luhk in sruh kosro wi pahpah tuhmuhk uh, ke pacl sacn nga luhman puhla tuhfal. Nga sonna som nuh finohl inge met, ac nga koflah liye acn in fahsr uh—ac nga koflah in liye na pwacye ma sahyac uh! Ma se muhkwena nga kuh in liye uh pa lahmsahrom srihsrihk se pahpah tuhmuhk ah us ke ana srweyac kahlwem ke sahk pine met liki kuht uh. Mac fin ohsr nuhtihk uh ukori ac puhtatlac—yac el kuh in liye acn elac som nuh we uh? Tuhsruhk nuhnak se inge ahkkweyeyuc: “Pahpah el etuh acn el fahsr nuh we uh. Fin nga fahsr tohkohl, ma nuh kwewa fah WONA.”
Ac ma nuh kwewa WONA. Kihtin pacl, faht uh tuhkuh, ac kuht tuhkweni eis lwen na wowo se. Ke kuht muhtwacwacack in fohlohk nuh lohm ah, pahpah tuhmuhk ah srihsrngiyac sie fin mahngon ohl na usrnguck, ananlah ma luhman siena atac ah. “Pa ingacn Windy Ridge,” el fahk. “Pa ingacn acn wo in sruh kosro we uh.” In pacl sacna, nga etuh lah nga kena fohlohk ac fanuhkyac Windy Ridge sie lwen.
Ke yac ekahsr tohkohyang, nga kwacna lohng pahpah tuhmuhk ah sramsramkihn Windy Ridge, tuhsruhk kuht sonna fohlohklac—sahyacn lwen se ngwe, yac 20 tohkoh, nga pahngon pahpah tuhmuhk ah ac fahk, “Kuht som nuh Windy.” Na sifilpac kuht ahkolah ohsr ukwacsr uh ac muhtwacwacack fahsr nuh pe finohl ah. Nga ingena etwaclah kahsruhsr ke nga yac 30 kuhtuh uh, tuh nga lut in puhla kain tuhfal se pacna ke nga sie tuhlihk mukul matwac yac 12 ah. Tuhsruhk pahpah tuhmuhk uh etuh inkacnek uh, ac nga fahsr tohkohl.
Sahflahiyac ah kuht orwaclah nuh fin mahngon Windy. Acn kom tu we ngwetlac uh kahto na pwacye, ac puhla wowo luhk ah pa ngwacn sifil fohlohk—tiac keik ke pacl se inge tuhsruhk nuh sin muhtwacn kiyuck ac tuhlihk nuhtihk uh. Nga kena elos in puhlakihn ma nga tuh puhla ah.
Ke yac ekahsr somlah ah, oasr pacl na pucspucs wowo in kol wen ac tuhlihk mukul fuhsr sahyac uh nuh fin finohl ah, oacna pahpah tuhmuhk ah pwenyuc ah. Puhlakihnyuck inge mokleyuc in motko kalmeyacn in kol—ac mac kalmac in fahsr tohkoh.
Jisus Kraist, Mwet Kol Wowo Emet ac Mwet Fahsr Tohkoh Wowo Emet
Nga fin siyuck suwos, “Suc mwet kol moul wowo emet uh?”—meac kowos ac fahk? Top uh, pwacyena, pa Jisus Kraist. El fihliyac srihkasrak suwohs ke ohiyac in mwet kol kuh in motkweyucklac nuh kwewa.
Tuhsruhk meac nga fin siyuck sum, “Suc mwet fahsr tohkohmoul wowo emet uh?”—yac top uh ac tiac sifil pa Jisus Kraist? El pa mwet kol wowo se ke srihpenEl pa mwet fahsr tohkoh wowo se emet uh—El ukwe Pahpah Tuhmwacl arlac suwohs, ke ma nuh kwewa.
Facluh luti lah mwet kol wowo uh enenuh in fokoko; Leum El luti lah elos enenuh in puhsisacl. Mwet kol luhn facluh eis kuh ac mokleyuck uh ke talan, etuh, ac kahsruhp. Mwet Kol oacna Kraist uh eis kuh ac mokleyuck ke pahtokyuck, ke muhtweng in kweok, ke fihsrwacsr ac ke puhsisacl, ac ke luhngse tiac kikiacp.1
Ke liye luhn God, mwet kol wowo emet uh kwacna pa mwet fahsr tohkoh wowo emet uh.
Lwelah ngan akacsruhi luo puhlakihnyuck ke tuhfahna ohsun se luhk yurin mukul fuhsr ke Alu uh ma lutiyuc ke in kol ac in fahsr tohkoh uh.
Kuht Nuh Kwewa Mwet Kol
Nga ac muhtwacn kiyuck uh tuhfahna wi sie miting in sackruhmacn sahyacn ward lasr ah. Met likina miting sac muhtwacwacack ah, sie mukul fuhsr sunyuc ac siyuck sihk fin nga kuh in kahsruh pahsi sackruhmacn. Nga fahk, “Nga engan in oruh.”
Nga eis siyah luhk sisken tikin sahyac uh ac siyuck sin tikin se ma muhta siskuck ah, “Meac kunohkohn luhk uh?” El fahk nuh sihk in muhtwacwacack pahsi e tok lohm alu sac ke infulwac ah ac lah el fah oruh lwacyacn se sahyac ke acn sac pacna, ac tuhkweni kuht fah fahsr ne met ah.
Nga fahk, “Nga tiac oruh ma inge ke pacl na loeloes se.”
El fahk, “Macnsis WONA. Kom fah oruh wo. Nga puhla oacpacna ke nga tuh muhtwacwacack ah.”
Tok tikin fuhsr se emet ke u sac, tuhfahna akmuhsralah ke wik met ah, oruh sie sramsram ke miting in sackruhmacn. Tukun miting ah, tikin sahyac ah raunwellah in fahk nuh sel luhpan yuckihn lalos ke welah lalos in mempucr ke u sac.
Ke nga muhtwacta yohrohlos ke lwen sacn, nga lotwelah lah kais sie wik mempucr ke u luhn Aaronic Pristut nuh kwewa ke ward sac muhtwacta yurin mukul fuhsr sahyac uh ac solwaclos in ip ke u lalos uh.
Mukul fuhsr inge mwet kol wowo nuh kwewa. Ac oasr kahlem wolacna selos in tahpuhk-ke-atacn mwet sruok Melchizedek Pristut, pahpah ninac, ac mwet sahyac uh suc kahsrwelos ke kunohkohn lalos uh. Mwet mahtuhyak luhngse oacna inge liye mukul fuhsr uh ac tiac ataclos na, tuhsruhk ma elos kuh in eklac nuh kac. Ke elos sramsram nuh sin kuh ke mukul fuhsr uh, elos tiacna lohacng nuh ke ma suhfal lalos uh. Sahyacna, elos ahkyohkye luhman ohiyen mwet kol wowo elos oruh uh.
Mukul fuhsr, pa inge ohiyac Leum El liye kowos kac uh. El suli kowos in sifacna liye kowos ke ohiyac se inge. Ac fah oasr pacl ke moul lowos ac pahngonyuck kom in kol . Ke pacl sahyac uh, kowos fah enenweyuck in fahsr tohkoh. Tuhsruhk pweng nuh suwos mihsenge pa lah finne meac pahng lowos, kowos srwackna sie mwet kol, ac kowos fah mwet fahsr tohkoh pacl nuh kwewa. In kol sie ohiyac luhn mwet tuhma lutlut—pwacyena sie ohiyac in kahsruh mwet sahyac uh in tuhkuh nuh yurun Kraist, suc pa ma mwet tuhma lutlut pwacye uh oruh. Fin kowos fuhsrweacng in sie mwet fahsr tukun Kraist, na kowos kuh in kahsruh mwet sahyac uh Ukwacl ac kowos kuh in sie mwet kol.
Kuh lowos in kol tiacna tuhkuh ke sie ohiyacn mwet luhlahlfongiyuck, suhmaht ke mukwikwi, kuh finne sie talan ke pah in kacs inwuclihl. Ac tuhkuh ke fuhsrweacng lom in ukwe Jisus Kraist. Ac tuhkuh ke kena lom in, oacna kahs lal Abraham, “sie mwet fahsr tohkoh wowo ke suwohswohs.”2Kowos fin kuh in oruh ma ingacn—finne kowos tiacna suwohswohs kac, tuhsruhk kowos srihke—na kowospamwet kol.
Kuhlwacnsap ke Pristut Pa In Mwet Kol
Ke siepacna pacl, nga oasr New Zealand muhtwacta nuh lohm sin sie ninac lolacp nahtuh tuhlihk fuhsr tolu. Ma mahtuh sac yac 18 ac tuhfahna eis Melchizedek Pristut ke Sacnri na met ah. Nga siyuck lah el nuh kuh in ahkyohkye pristut se inge tari. El fahk, “Nga tiacna kahlwem lah meac kalmac.”
Nga fahk nuh sel lah ingena el sruok wal in sang sie mwe insewowo ke pristut in ahkkweye kuh unwelah. Nga ngwetwacng nuh sin ninac kiyacl ah, suc soenna oasr sie mwet sruok Melchizedek Pristut siskacl ke yac pucspucs. “Nga muh ac ma wolacna se,” nga fahk, “kom fin kuh in sang nuh sin ninac kiom an sie mwe insewowo.”
El fahk, “Nga nihkihn lah ac orek fuhkah.”
Nga ahkuhtweyac lah el kuh in sang pahol nuh ke insifacn ninac kiyacl ah, fahk inel, fahk lah el sang sie mwe insewowo ke wal luhn Melchizedek Pristut, fahk oacna sie ma Nguhn sang nuh in nuhnak lal ac insiacl uh, ac kaliyac ke inen Jisus Kraist.
Lwen tohkoh ah, nga eis sie email sel. Ritiyuck, ke ip inge: “Ofong nga ahkinsewowoye ninac kiyuck uh…. Nga puhla arulacna, tuhfal ac suhfallac, oruh nga kalweni in pruhe in liye lah Nguhn wiyuc, ke srihpen nga tiac kuh in sang sie mwe insewowo sahyac. Ke nga muhtwacwacack, nga muhlkihnyuclac na pwacye ac mwe muhnahs luhk uh. … Nga [tiac pahngon] nguhn yohk ac kuh fokoko nga puhla ah. … Tohkoh nguhn in luhngse uh nwekyuclac nga koflah kutong ma nga puhla uh, oruh nga sruokyac ninac kiyuck ah ac tuhng oacna sie ahwowo. … Finne ke nga sihmihs ma inge, [nga puhlakihn] Nguhn [arlac yohk oruh] nga tiacna ke sifil oruh ma koluk. … Nga luhngse wosasuc se inge.”3
Yac tiac usrnguck in liye sie atacn mukul fuhsr oacyac in kuh in oraclah ma wowo yohk ke kuhlwacnsap luhn pristut, finne ke el puhla suhfal uh? Nga tuhfahna lotwelah lah elder fuhsr se inge eis sie pahng ke misin ac fah som nuh ke acn in ahkpah luhn misineri uh mahlwem lutu uh. Nga luhlahlfongi lah el fah kol nguhna pucspucs nuh sin Kraist ke srihpen el lotwelah in ukwe Kraist ke kuhlwacnsap in pristut lal—muhtwacwacack in lohm sel sifacna, ma srihkasrak lal uh oruh sie mokleyuck na wowo nuh sin tamuhlwel matwac yac 14 se wiyacl.
Tamuhlwel, finne kuht akihlenwack kuh tiac, mwet uh ahkfuhlwactye kuht—mwet ke sucu, kawuck, finne mwet sac uh. Tiacna fal nuh sesr mwet sruok pristut uh in tuhkuh na nuh yurin Kraist; ma kunacsr ingena pa in “suli mwet nuh kwewain tuhkuh nuh yurin Kraist.”4Kuht koflah in falkihn eisyacn mwe insewowo ke nguhn uh nuh sesr sifacna; kuht enenuh in kol mwet kuht luhngse uh nuh ke mwe insewowo se pacna—ac in mwet tuhma lutlut luhn Jisus Kraist, kuht enenuh in luhngse mwet nuh kwewa. Mwet Lahngo El sapkihn nuh sel Piter elan sapkihn pac nuh sesr: “Ke kowos ac eklac uh, ahkkweye tamuhlwel wiyowos an.”5
Ukwe Mukul Galilee sac
Oasr pacl ke inkacnek met uh oacna in upac, tuhsruhk ukwe na Mwet Lahngo. El etuh inkacnek uh; tuh pwacye, El painkacnek uh.6 Ke yohk asrasr lom in tuhkuh nuh yurin Kraist uh, ac loal pac kena lom in fah kahsruh mwet sahyac uh in wi puhlakihn ma kom puhlakihn uh. Siepac kahs nuh ke puhla se inge pa luhngse muhtahl, “ma [Pahpah El] sang nuh fin mwet nuh kwewa suc ukwe pwacye luhn Wen Nahtuhl, Jisus Kraist.”7Na kowos fah sokwack lah ke mukwikwi se pacna ke ukwe Kraist ingacn, kowos oacyacpac kol mwet sahyac uh nuh Sel, oacna Prestuhn Thomas S. Monson el fahk ah, “Ke kuht ukwe Mukul Galilee ingacn—finne Leum Jisus Kraist—mokleyuck lasr sifacna uh fah puhlakihnyuck ke ma wo acn nuh kwewa kuht oasr we uh, finne meac kunohkohn lasr uh.”8
Nga fahkwack mwe loh lah pa inge Alu pwacye luhn Kraist. Kuht kolyuck sin sie mwet pahluh luhn God, Prestuhn Monson—sie mwet kol wowo suc pa sie pac mwet fahsr tohkoh pwacye luhn Mwet Lahngo. Ke inen Jisus Kraist, amen.