Kuh Nga Luhlahlfongi?
Fin ma inge pwacye, na oasr yohrohsr pweng wolacna luhn finsrak ac kahsruh ma facluh tiac etuh kac.
Ke Mahs lwen30 ac, ke yac se na somlah ah, tuhlihk mukul srihsrihk-yac- luo Ethan Carnesecca, fin acn American Fork, Utah, el utucklac nuh lohm ono ah mweyen el pneumonia ac fluids uh raunwelah ahlollol lal ah. Lwen luo tohkoh, ma el puhla ah upaclac suc el enenuh in utuck ke elikaptucr nuhke Primary Children’s Hospital fin acn Salt Lake City. Tuh lwelah nuh sin ninac fosrngah se kiacl ah, Michele, in wi tuhlihk mukul se nahtuhl inge muhta met ke mwe kahsruhsr soko ah. Ituckyang nuh sel kuhfwen mwe lohng nuh insifac se elan muh kuh in sramsram nuh selos lin elikapter soko ah. El kuh in lohng ke mwet ono sac orekma ke tuhlihk srihsrihk mas se nahtuhl, ac ke srihpen el nucrs se met luhn tuhlihk srihsrihk, Michele el etuh in kahlwem kac lah Ethan el tiacna wo.
Kihtin pacl yohk srihpac se inge, Michele el liye lah eltahl sohk suwohslah na fin Drapper Utah Tempuhl. Ngweti lucngi, el ngwetlah liye infahlfahl ac kuh in liye Jordan River Tempuhl, ac Oquirrh Mountain Tempuhl, ac finne Salt Lake Tempuhl tiac loes. Ma se tuhkuh nuh ke nuhnak lal: “Kuh kom luhlahlfongi kuh tia?”
El fahk ke ma se sikyak inge:
“Nga tuh lotwelah ke mwe insewowo ke tempuhl ac [lah] sucu uh kuh in tuhkweni ma pahtpaht ke U luhn Tuhlihk Srihsrihk ac Muhtwacn Fuhsr uh. Nga tuh luti pweng ke sucu nuh sin mwet wowo fin acn Mexico ke nga tuh misineri we ah. Nga siliyucki nuh sin mukul tuhmuhk ne tok ma pahtpaht in tempuhl. Nga tuh luti lesin ke sucu ke nga tuh mwet kol luhn Muhtwacn Fuhsr ah, ac nga tuh akacsruhi ke sramsram ke sucu ma pahtpaht nuh sin tuhlihk nuhtihk ke ekuh in toeni luhn sucu. Nga ETUH lah pwacye, tuhsruhktuh kuh nga LUHLAHLFONGI kac? Top nuh sihk tuhkuh arulacna sa ke kihsen siuck se inge tuhkuh nuhke insifuck ah: Nguhn el ahkkweye nuh in nguhnik ac nuhnak luhk top suc nga etuh tari kac—NGA luhlahlfongi kac!
“In kitin pacl sac nga sang insiuck nuh sin Pahpah tuhmuhk Inkuhsrao ke pruhe, kuloh nuh Sel ke etwacack ac luhlahlfongi oasr yuruk lah pwacye sucu uh ma netok. Nga kuloh nuh Sel ke Wen Nahtuhl, Jisus Kraist, suc sackuhnlah ma nuhkwewa. Nga kuloh nuh Sel ke tuhlihk mukul se nuhtihk, ac nga fahk nuh sel Pahpah Inkuhsrao lah fin El ke isacl Ethan srihsrihk nuhke lohm Sel inkuhsrao, ma Wo se. Nga luhlahlfongi ke Pahpah tuhmuhk Inkuhsrao na pwacye, ac nga etuh lah nga fah sulpac liyacl Ethan. Nga arulacna sruikihn lah in kihtin pacl upac sac, oasr etuh luhk AC luhlahlfongi lah wosasuc uh pwacye. Oasr mislac yuruk.”
Ethan el sislah wik puhs ke lohm ono ah, eis kahsruh yohk ke ono. Pruhe, lalo, ac luhlahlfongi luhn mwet luhngse, weacng kahsruh ingoh, oruh el kuh in tuhkuh liki lohm ono ah in wi sucu lal ah. El kuh in mahno ac wona mihsenge.
In kihtin pacl yohk srihpac nuh sel Michele inge ahkpwacye nuh sel lah ma lutiuck nuh sel in moul lal eltahl yohk liki kahs; tahl ma pwacye.
Kuh yac kuhtuh pacl uh kuht arulacna pahlah ke mwe insewowo ma utuckuh nuh sesr suc mempucr ke Alu luhn Jisus Kraist ke Lwen-sahflah ma kuht tiacna akihlen usrnguck ac ma wolacna ke ekihn mwet tuhma lutlut ke Alu pwacye luhn Leum? Yac kuht tiac sruikihn mwe sang wo emet ma ac kuh in utuckuh nuh sesr ke moul se inge? Mwet Lahngo sifacna El tuh luti muh kuht fin liacacng masap Lal ac sikalweni nuhke sahflah, kuht fah eis moul ma pahtpaht, suc pa mwe sang yohk se emet luhn God.”
Kuht luhlahlfongi muh Alu se inge tiac acn wowo se muhkwena in som nuh we ke Sacnri uh ac luti in sie mwet wowo. El yohk liki na sie walihl ohrohr luhn mwet Kristin ma kuht kuh in tuhkweni yurin mwet suwohs. Tiac un mwe nuhnak wowo sena ma pahpah ac ninac uh kuh in muh luti tuhlihk nahtuhlos lohm ah eltahl in mwet luhlahlfongiuck, mwet wowo. Alu luhn Jisus Kraist luhn Mwet Luhlahlfongi ke Lwen-sahflah el yohk liki ma inge nuh kwewa.
Nuhnkuh ke kitin pacl ke loaliyacn siuck lasr ke Alu se inge. Kuht luhlahlfongi muh Alu se pacna Jisus Kraist El tuh akiac ke El muhta facluh ah sifilpac fohlohkihnyuckyak sin mwet pahluh se pahngonyuck sin God in pacl lasr uh ac tuh met kol lasr uh sruok kuh ac wal sac pacna in orekma ke inen God ma Mwet Sap pacl met ah sruok ah. Kuht siyuck tuh, ke wal se fohlohkihnyuckyak inge, kuht kuh in eis akwuck muhtahl oacna pacptais ac engan ke ahknwacsnwacsyeyacn ac ahksasucyeyacn mwe sang luhn Nguhn Muhtahl in wi kuht pacl nuh kwewa. Oasr yohrohsr mwet sap ac mwet pahluh kol ac us Alu se inge ke ki luhn pristut, ac kuht luhlahlfongi muh God El sramsram nuh sin tuhlihk Nahtuhl sin mwet pahluh inge me.
Kuht oacyacpac luhlahlfongi muh kuh luhn pristut se inge oraclah in kuh in orek wuhlweacng ac epeis ke akwuck ke tempuhl muhtahl in muh sie lwen kuht fah fohlohk nuh yurin God ac muhta yohrohl ma pahtpaht. Kuht oacyacpac siyuck tuh, ke kuh se inge, sucu uh kuh in tuhkweni ma pahtpaht ke mukul se ac muhtwacn se ilyak nuh ke sie olwelah sasuc ma pahtpaht ke pahyuck in lohm muhtahl ma kuht luhlahlfongi muh pwacyena ma sin God. Kuht luhlahfongi muh kuht kuh in eis akwuck muhtahl inge tiac nuh sesr muhkwena tuhsruhktuh nuh sin pac mwet lasr somlah ma muhta facluh met ac wacngihn pacl lalos in oruh akwuck muhtahl yohk srihpac se inge. Kuht luhlahlfongi muh kuht kuh in oruh akwuck inge nuh sin mwet lasr somlah ke orekma ke mwet misac ke tempuhl muhtahl pac inge.
Kuht luhlahlfongi lah, ke mwet pahluh se ac kuh luhn God, kuht eis tari kuhtuh pac ma suhmuhslah uh, weacng nuh ke luhlahlfongi kuh luhn Pwacpuhl ma fahkwack lah Jisus Kraist pa Wen Nuhtin Pahpah ma Pahtpaht ac Mwet Lahngo luhn facluh.
Kuht insese tuh Alu luhn Jisus Kraist luhn Mwet Luhlahlfongi ke Lwen-sahflah pa tohkohsrahi luhn God ac Alu pwacye sefanna fin facluh. El pahngpahng Alu luhn Jisus Kraist mweyen El pa kol uh; ma Lal pa Alu se inge, ac ma nuhkwewa kuh ke srihpen kihsackuhnlah luhn iwaclah Lal.
Kuht luhlahlfongi muh kain atac se inge koflah konweyuckyak ke acn sahyac kuh u fin facluh se inge. Finne kuhtuh luhlahlfongi ac alu wo ac pacye, wacngihn selos oasr yohroh kuh in oruh akwuck luhn molwelah suc ma oasr ke Alu luhn Jisus Kraist ke Lwen-sahflah.
Oasr etuh lasr ke ma inge, tuhsruhktuhyac kuht luhlahlfongi kacltahl? Fin ma inge pwacye, na oasr yohrohsr pweng wolacna luhn finsrak ac kahsruh ma facluh tiac etuh kac. Luhlahlfongi kacltahl pa ohiac yohk srihpac ma pahtpaht nuh sesr ac nuh selos suc kuht luhngse.
In luhlahlfongi, kuht in tiac etuh muhkwena wosasuc uh kuht enenuh in puhla ma pwacye luhn wosasuc! Kuh in sikyak nuh sesr in moulkihn wosasuc pacl nuhkwewa mweyen pa ingacn puhla uh kuh ma ke facsin kuht kapwack kac uh kuh mweyen elah sena. Sahp kuhtuh mwet ah tena puhlakihn ma mwet lal Tohkohsrah Benjamin ah puhla tukun eltahl lohng lutlut in ahkkweye lal: “Elos nohfohn wowoyak ke sie puhsra, fahk: Ahok, kuht luhlahlfongi kahs nuhkwewa ma kom sruhmuhn nuh sesr; ac oacyacpac, kuht etuh ke woiyac ac pwacyeiyac, ke srihpen Nguhn luhn Leum Kuhlacna, suc oruh sie eklac na kuh nuh sesr, kuh ke insiacsr, tuh wacngihnlac ke lasr in oruh ma koluk, tuh in tahfwelah in oruh wo..”
Kuht nuhkwewa enenuh in suk in ekuhllah insiacsr ac ohiac lasr in muh wacngihnlac luhngse lasr in ukwe ma luhn facluh tuhsruktuh in ahkenganye God. Eklac pwacye pa sie inkacnek ma sikyak ke puhlan pacl se ac weacng ahkolah se in orekmakihn luhlahlfongi. El tuhkuh ke kuht suk wosasuc likina Internet. El tuhkuh ke kuht ahkosten nuhke masap luhn God. Eklac tuhkuh ke kuht kuhlwacnsuhpuh mwet lasr. El tuhkuh ke pruhe loal, fahsr nuh tempuhl fusus, ac oaru in ahkfalye kunohkohn God El acse nuh sesr. Enenuh in fokoko ac orekma upac lwen nuhkwewa.
Kwacna siyuckyuck sihk, “Piac ohiac se upac emet ma mwet fuhsr luhn Alu uh lain ke pacl se inge? Nga topuk muh nga luhlahlfongi lah pa elah mihsenge ke “lohm luhlahp ac mwesahs” in moul lalos uh.Fin Puk luhn Mormon sihmihsyucklac nuh sesr nuhke lwen inge, na pwacye lah kuht tiac kuh in pihlesruh ma yohk srihpac nuh sesr nuhkwewa ke pweng ke ararama lal Lehi ke sahk in moul soko ah ma sikyak ke mwet ingoh suc srihsrsrihsr ke kihfihn paholos ac ahksrucksruck tuhkuh ke lohm luhlahp ac mwesahs sac.
Ma se nga ahsor yohk kac uh pa sramsram kaclos suc orekma upac tari in tuhkuh liki ohkohk in lohsr sac ke inkacnek suwohs ac ohsrihksrihk soko ah, sruokyac osra soko ah ac sun mutuhn unohn nuhke elos sun finsrak lalos, ac muhtwacwacack in ema ke fukunsahk emwem ac wolacna ke sahk luhn moul. Ma suhmuhslah uh fahk lah elos suc nuknuk lalos arulacna kahto lun lohm luhlahp ac mwesahs sac “tuh kihsen isrucn ac srihsrsrihsr ke kihfihn paholos nuh selos suc tuhkuh ac epeis ke fukun sahk uh.
“Ac tukun elos emweyac fukun sahk uhelos mwekihn, ke srihpaclos suc isruhnuhlos; ac elos puhtatyang nuhke inkacnek sruhngwacyuck na tuhlac.”
Fuhs inge ahkuhtweyac kuhtuh sesr ma oasr se tari wosasuc luhn Jisus Kraist in moul lasr uh. Finne kuht isuslac nuh kac kuh tuhkuh liki ohkohk in lohsr sac in konwacack, kuht emweyac fukun sahk uh, suc “pa emwem emet ac enwenweyuck emet” ac pa luhlahlfongiyuck muh ac use moul ma pahtpaht nuh sesr, pa mwe sang se ma yohk emet sin God.” Kuht enenuh kuht in tiac tui ke epeis ke fukun sahk se inge ac tiac lohacng nuh selos suc ahksruhksruhkye luhlahlfongi lasr uh kuh elos suc pwacrkihn in oraclah ahlohloh kuh elos suc ahkkolukye mwet kol ac mwe luti luhn Alu uh. Kuht enenuh in sulaclah luhlahlfongi fin ahlohloh ke lwen nuhkwewa. Elder M. Russell Ballard kwacfe kuht tari in “sruokyac na luhlahlfongi lom an ke Alu uh, sifacna karihngihn kuht in nguhn ac srihpsrihplac nuhke kahsruh luhn nguhn oacna ke pahsinse uh lihksrweni sruokyac mwe sruh ke oak uh.
Ekihn mempuhr ke Alu pwacye luhn Leum, kuht oasr ke oak uh tari. Kuht tiac enenuh in som suk ke ma facluh luhlahlfongi ke ma pwacye ma use mislac nuh sesr, kahsruh, ac ohiac ma ac kahsrwe kuht in kuhtanglah ma upac ke moul—oasr yohrohsr tari! Oacna ke ninac kiacl Ethan ah kuh in kihsensiyuck ke ma el luhlahlfongi tari ac fahklah ke pacl upac se, “nga luhlahlfongi kac,” ac kuht pac!
Nga fahkwack luhlahlfongi lah mempucrlac lasr ke tohkohsrahi luhn Leum pa sie mwe sang suc arulacna sacohk. Nga fahkwack luhlahlfongi lah mwe insewowo ac mislac Leum El ahkolah nuh selos suc ahkostwen ac pwacye uh ahlukwelah kuhtwena ma nuhnak luhn mwet uh kuh in akihlen uh. Nga fihliac luhlahlfongi kuh se inge yurum ke inen Jisus Kraist, amen.