Meac Kuht Fah Oruh?
Kuht muhsaheack tohkohsrahi ke kuht ahkkweye mwet sahyac uh. Kuht oacyacpac muhsaheack tohkohsrahi ke kuht kahskahs fahkwack luhlahlfongi ac fahkwack ma pwacye.
Tiac paht tukun Moulyak ac Sowack luhn Jisus, Mwet Sap Peter el luti, “Lwelah mwet kwewa … in arulana etu kalwem, lah Jisus se inge suc kowos sruhpuhsrwack fin sahksihn, pa God El orwaclah tuh elan Leum ac Kraist!” Arulacna fakihsyac insiyacn mwet lohng ac elos siyuck sel Peter ac mwet ngiac, “Mwet lili, mea kut fah oruh?” Na elos tuh ahkohs mwe luti lal Peter ke engan.
Sacnri in Istuh pa lutu, ac nga finsrak tuh in fokoko pac insiacsr in akihlen Mwet Lahngo, auliyak, ac ahkos ke engan.
Ke toeni luhlahp se inge, kuht ac lohng kolyuck mokleyuck sin mwet kol ke Alu uh, kwewana mukul ac muhtwacn. Etuh lah insiyacsr ac fah pihrihkyuck ke kahs lalos, Nga siyuck suwos ofong, “Muhtwacn ac tahmtahel, meac kuht ac oruh uh?”
Prestuhn luhlahp luhn Rilif Sosaiti Eliza R. Snow el tuh fahk yac 150 somlah ah, “Leum El acse nuh sesr ma kunac na yohk srihpac.” Nga fahkwack luhlahfongi lah kahs lal pwacye ne mihsenge.
Alu luhn Leum enenuh muhtwacn kolyuck sin Nguhn suc orekmakihn mwe sang sacohk lalos in ahkkweye, sramsram in kahsruh, ac in lihksrweni fahkwack ke ma pwacye luhn wosasuc. Mokleyuck ac etwacack lasr pa ip yohk in muhsaheack tohkohsrahi luhn God, suc kalmac na pwacye pa in oruh ip lasr in use molwelah nuh sin tuhlihk nuhtin God.
Muhsaheack Tohkohsrahi ke Ahkkweye
Kuht muhsaheack tohkohsrahi ke kuht ahkkweye mwet sahyac uh. Tuhsruhk, tuhlihk se emet nuhtin God kuht enenuh in muhsaheack wosasuc fohlohkihnyuckyak sac pa kuht sifacna. Emma Smith el fahk, “Nga kena Nguhn luhn God in etuh ac kahlwem keik sifacna, ngan muh kuh in kuhtanglah oacna sie ke facsin kuh ahkkweye ma ac tiac kol nuh ke kapkapwack luhk.” Kuht enenuh in orwaclah sie pwelucng ke luhlahlfongi ke wosasuc luhn Mwet Lahngo ac fahsr nuh met, ahkfokokoyeyuck ke olwelah luhn tempuhl, nuh ke kapkapwack.
Meac fin kuhtuh sin facsin lasr uh wacngihn ke acn nuh ke wosasuc fohlohkyak luhn Jisus Kraist uh? In fuhlwelah ma ingacn ac enenuh kahsruh ke suhpwacr ac ahkkweye luhn mwet sahyac, oacna orek nuh sihk ah.
Ke nga isuslac ah, ninac pahpah tuhmuhk elos tuh yukiyac sahk magnolia soko oruh in oasr ros magnolia ke ahkfuhlwactyeyacn pahyuck luhk ah, orek in lohm alu Protestant luhn mwet mahtuh luhk. Tuhsruhk, ke lwen in macruht luhk ah, wacngihn ninac pahpah siskuck ac wacngihn ros magnolia, ke srihpen nga mempucr sasuc yac se ke Alu uh, nga kahsruhsr nuh ke acn Salt Lake, Utah, in eis mwe sang ke tempuhl luhk ac in siliyucki nuhsel David, fiancé luhk.
Ke nga som liki acn Louisiana ac sun acn Utah, nga muhtwacwacack in puhla sruhnfuhsr . Met liki macruht uh, Nga fah tuh muhta yurun ninac mahtuh kiacl David, suc etweyuck luhngse oacna Aunt Carol.
Nga pa inge, mwet sasuc se nuh Utah, fah muhta lun lohm sin mwet sac met liki nga ac fah siliyucki—nuh tok ma pahtpaht—nuh sin sie sucu nga tuhfahna etuh kac. (Wo sruhk lah Nga tuh luhngse ac luhlahlfongi mukul suc ac fah ma tuhmuhk ac Leum!)
Ke nga tu motonoac in sruhnguhl lohm sel Aunt Carol ah, nga kena wihklac. Ikacklah sruhnguhl ah—Nga tu insac oacna racpet sahngweng soko—ac Aunt Carol, tiac na kahs, saplakme ac srukyucwi in pahol. El, suc wacngihn tuhlihk nahtuhl sifacna, el etuh—inse in ahkkweye lal uh etuh—lah Nga enenuh sie acn in luhngseyuck. O, ahkkweyeyuck ac kuhlwacng luhn pacl sacn! Sahngweng luhk wacngihnlac, ac tuhkuh nuh sihk kena se in kawuck wo nuh ke sie acn sef nguhn kac.
Luhngse pa in orwaclah in oasr acn mwesahs in moul lowos nuh sin mwet sac, oacna Aunt Carol el oruh nuh sihk ah.
Ninac uh pwacyena ahkmwesahsye mahnolos in ahkkweye sie ahwowo sonna isuslac—ac finsrak in sie acn ke insiyaclos in karuhnguhnuhlos—tuhsruhk ahkkweye uh tiacna sruokyuck nuh ke tuhfahlah tuhlihk. Eve el pahngonyuck sie “ninac” met liki el orek tuhlihk. Nga luhlahlfongi lah “in ninac” kalmac pa “in sang moul.” Nuhnkuh ke inkacnek puhs kom kuh in sang moul. Ma ingacn kuh in sang moul in nuhnak nuh sin mwet wacngihn finsrak la kuh moul in nguhn nuh sin mwet ahlohloh. Ke kahsruh luhn Nguhn Muhtahl, kuht kuh in orwaclah acn in ahkwoye nuh sin mwet sruhngwacyuck, mwet lainyuck, ac mwet sac uh. Ke ohiyac kuhlwacng fokoko inge, kuht muhsaheack tohkohsrahi luhn God. Tahmtahel, kuht kwewa tuhkuh nuh facluh ke mwe sang luhn moul,tuhfahlah,mwe sang luhn tuhfahlah luhn ninac ke srihpen pa ingacn plwacn luhn God.
In uhkwe plwacn Lal ac ekihn sie mwet muhsah luhn tohkohsrahi enenuh kihsac puhsisacl. Elder Orson F. Whitney el suhmuhslah: “Ma nuh kwewa kuht kweokkihn ac ma nuh kwewa kuht muhtwacnglah, yohk na ke kuht mongfihsrwacsr in muhtweng, … ahknwacsnwacsye insiyacsr … ac oruh kuht in kuhlwacng ac wo na pwacye liki met ah. … ac ke … orekma ac ma upac, tuh kuht eis etwacack … ma ac fah oruh kuht in oacna Pahpah tuhmasr ac Ninac kiyacsr inkuhsrao.” Ma upac ahknwacsnwacsyeyuck inge us kuht nuh yurin Kraist, suc kuh in kol kuht ac orekmakihn kuht yohk ke orekma in molwelah.
Muhsaheack Tohkohsrahi ke Sramsram ac Fahkwack
Kuht oacyacpac muhsaheack tohkohsrahi ke kuht sramsram ac fahkwack ke ma pwacye uh. Kuht ukwe atac luhn Leum. El sramsram ac luti ke kuh ac wal luhn God. Tahmtahel, kuht kuh pac in oruh. Muhtwacn uh inkaiyen pacl uh luhngse in sramsram ac tuhkweni! Ke kuht orekma ke aholyen wal luhn pristut utuckuh nuh sesr uh, sramsram ac tuhkweni kapkapwack nuh ke luti ac kolyuck luhn wosasuc uh.
Tahmtahel Julie B. Beck, prestuhn mah luhlahp luhn Rilif Sosaiti, el luti: “Kuh se in ahkolah, eis, ac orekma ke fwackyuck sifacna uh pa ma yohk srihpac emet ma kuh in eisyuck ke moul se inge. …Ac enenuh orekma yohk srihpac.”
Fahkwack la sifacna ke Nguhn Muhtahl ac fah moklweack kuht in lutlut, sramsram, ac mukwilac ke ma pwacye—ma pwacye luhn Mwet Lahngo. Kuht fin ukwe Kraist yohk, na kuht ac fah puhla luhngse ac kolyuck Lal yohk pac; kuht fin puhla luhngse ac kolyuck Lal yohk, na kuht ac fah kena yohk in sramsram ac luti ma pwacye oacna El oruh, finne ke kuht sun mwe lain.
Kuhtuh yac somlah, nga tuh pruhe ke kahs in karuhnguhnwacng ohiyacn ninac uh ke nga eis sie pahng lukmac.
Mwet pahng sac siyuck, “Kuh kom pa Neill Marriott, ninac se kiacn sie sucu luhlahp?”
Nga topuk ke engan, “Ahok!” kena in lohng sel ke el fahk oacna ma inge, “Koacl, arlac wo!”
Tuhsruhk moh! Ngwac tiac muhlkuhnlah kahs lal ke puhsrwacl sramsram ke tacluhfon ah: “Nga sruhnga na pwacye lah kom oswelah tuhlihk puhslac inge nuh fin facluh tihngtihng se inge!”
“O,” Nga tuh fahk, “Nga kahlwem ke puhla lom an.”
El muhlat topuk, “Moh—kom tiacna!”
Na Nga topuk, “Koacl, sahp Nga tiacna.”
El muhtwacwacack tohrkahskahs ke sulaclah lahlfon luhk in ninac se. Ke el som sokolac ah, nga muhtwacack in pruhe ke kahsruh ac sie nuhnak fihsrwacsr tuhkuh nuh sihk: “Meac Leum El fah fahk nuh sel?” Na Nga puhlah moklweyuck ngan tuna fokoko ac ngan eis puhlaik ke nga nuhnkuh kacn Jisus Kraist.
Nga topuk, “Nga engan in sie ninac, ac Nga olwelah nuh sum Nga fah sang kuhiyuck nohfohn in tuhfahlah tuhlihk nuhtihk ke sie ohiyac ma fah oruh facluh in wo liki met ah.”
El topuk, “Koacl, Nga finsrak kom in oruh!” ac el fihliyac.
Tena ma yohk se—tukun ma nuhkwewa, Nga tu na wo lun inum sihk sifacna! Tuh ke inkacnek luhk sifacna, Nga kuh in sramsram wo in karuhnguhnwacng sucu, ninac uh, ac mwet tuhf tuhlihk ke srihpac luo: (1) Nga kahlwem ac luhlahlfongi mwe luti luhn God nuh ke sucu uh, ac (2) Nga tuh pruhe ke kahs in fahkwack ma pwacye inge.
In sesahlah ac siena liki muhtwacn fin facluh ac fah orwaclah ahkkolukyeyuck, tuh kuht enenuh in kawuckihn kuhti sifacna nuh ke ip ma pahtpaht ac fahkwack kaclos, finne fuhkah top luhn facluh.
Ke kuht siyuck sesr sifacna, “Meac kuht fah oruh?” lwelah kuht in motko ke kihsen siyuck se inge: “Meac Mwet Lahngo El oruh pacl nuh kwewa?” El ahkkweye. El orwaclah. El kahsruh ke kapkapwack ac ma wo. Muhtwacn ac tahmtahel, kuht kuh in oruh ma inge! Tuhlihk muhtwacn ke U Luhn Tuhlihk Muhtwacn Srihsihk, kuh oasr mwet ke sucu lom an ma enenuh luhngse ac kuhlwacng lom an? Kom muhsaheack tohkohsrahi ke ahkkweye mwet sahyac pac.
Orwaclah facluh sin Mwet Lahngo, ye kolyuck luhn Pahpah Tuhmwacl, pa sie orekma luhn ahkkweye. El acse sie acn nuh sesr in kapkapwack ac eis luhlahlfongi ke kuh in iwaclah Lal. Luhlahlfongi ke Jisus Kraist ac Iwaclah Lal pa acn sahflah wo emet luhn ahkwoye ac finsrak. Kuht nohfohn enenuh sie puhla luhngseyuck ke acn luhn nguhn ac mahno. Kuht, tahmtahel ke matwac nuh kwewa, kuh in orwaclah ma se inge; finne in sie acn muhtahl.
Ma kunac yohk srihpac emet Lasr pa in muhtwacn suc ukwe Mwet Lahngo, ahkkweye ke mokleyuck, ac moulkihn ma pwacye ke tiac sahngweng. Ke kuht siyuck Pahpah Inkuhsrao El in oruh kuht in mwet muhsah luhn tohkohsrahi Lal, kuh Lal ac fah tuhkuh nuh sesr ac kuht fah etuh ohiyac in ahkkweye yohk na ekihn mwet oacna ninac pahpah inkuhsrao tuhmasr. Ke inen Jisus Kraist, amen.