![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F01%2F76%2F0176958ba87b028d87fff5c5bcc76b0f9182b6c2%2F0176958ba87b028d87fff5c5bcc76b0f9182b6c2.jpeg/full/!250,/0/default)
Sucu Ma Pahtpaht
Ma akwucki ke pristut lasr uh pa in fihliyac sucu lasr uh ac sucu luhn mwet raunikuhtyak uh ke infulwen nuhnak lasr uh.
Nga srui in wi kowos ke ekuh se inge ke tuhkweni luhlahp luhn pristut ke Alu luhn Jisus Kraist luhn Mwet Luhlahlfongi ke Lwen-sahflah uh. Pa inge sie pacl yohk emet ke ma mahtuh luhn Alu uh. Yac siofok alngucul luo somlah, ke 1834, fin acn Kirtland, Ohio, mwet sruok pristut nuh kwewa pahng in tuhkweni ohsun lun sie lohm lutlut sahk ke foot 14-nuhke-14 (4.2-nuhke-4.2-m). Ke miting sacn Mwet Pahluh Joseph Smith el ripohrtiyuck in fahk: “Kowos tiac etuh yohk fuhfahsryucsr luhn Alu se ac tohkohsrahi se inge likina sie ahwowo muhta fin yepan ninac kiyac. Kowos tiacna kahlwem kac. … Ma inge pa kihtin un mwet sruok Pristut muhkwena pa kowos liye ofong inge, tuhsruhk Alu se inge fah nwacklah North ac South America—ac fah nwacklah facluh.”1
Miliacn sin mwet sruok pristut uh, ke puhs liki muhtuhnfacl 110 uh, ac fahsrweni ke tuhkweni se inge. Sahp Mwet Pahluh Joseph el tuh liye pacl se inge ac pacl wolacna fahsruh ma ac fah tuhkuh nuh yohrohsr uh.
Pweng luhk ofong uh pa in srihke in ahkuhtweyac pacl fahsruh se ingacn ac ma kuht enenuh in oruh in sie ip ke plwacn in engan Pahpah tuhmasr Lucng El ahkolah nuh sesr uh. Met liki kuht isuslac ah, kuht muhta yurin sie sucu yurin Pahpah fuhlwactlacna ac ma pahtpaht tuhmwacsr Lucng. El akmuhsraelah sie plwacn ma kuht kuh in kapwack ac orwaclah wo in eklac oacna El. El oruh ohinge ke srihpen El luhngse kuht. Srihpac luhn plwacn sacn pa in lwelah pacl wowo nuh sesr in moul ma pahtpaht oacna moul luhn Pahpah tuhmasr Lucng. Plwacn ke wosasuc se inge use nuh sesr sie moul ke mahno ma kuht fah srihkeyuck. Sie olwelah ituckyang ke Iwaclah luhn Jisus Kraist, fin kuht ahkostwen nuh ke masap uh ac akwuck luhn pristut ke wosasuc, kuht fah eis moul ma pahtpaht, mwe sang yohk se emet ke mwe sang nohfohn Lal uh.
Moul ma pahtpaht pa kain moul ma God Pahpah Ma Pahtpaht tuhmasr Lucng El moulkihn. God El tuh fahk lah orekma ac wolacna lal pa in ahkfahsrye moul kawihl ac ma pahtpaht luhn mwet uh”(Moses 1:39). Srihpac yohk emet luhn mwet sruok pristut nuh kwewa uh, ohinge, pa in tahpuhk ke orekma in kahsruh mwet uh eis moul ma pahtpaht.
Kuhiyen pristut nuh kwewa ac akwuck luhn pristut nuh kwewa oreklac in kahsruh tuhlihk nuhtin Pahpah Lucng in eklac ke Iwaclah luhn Jisus Kraist in mempucr ke un sucu fohnlah se. Ma inge fahk lah “orekma yohk luhn mwet nuh kwewa pa in luhlahlfongi wosasuc, in liyacacng masap uh, ac in orwaclah ac fohnohslah sie sucu ma pahtpaht,”2ac in kahsruh mwet sahyac uh in oruh oacna.
Ke ma ingacn pwacye uh, ma nuh kwewa kuht oruh uh enenuh in oasr pahyuck celestial ke lohacng yohk ac srihpac. Kalmac pa kuht enenuh in kwacfweacng in siliyucki nuh sin sie companion ma pahtpaht lun tempuhl luhn God. Kuht enenuh pac in ahkkweye mwet sahyac in orwaclah ac liyacacng olwelah ma orwacni sie mukul ac muhtwacn kiyac nuh sie, yurin sucu lalos, ke moul se inge ac ke moul se fahsruh uh.
Efuh ma inge yohk srihpac na pwacye nuh sesr kais sie—fuhsr kuh mahtuh, tikin kuh prist fuhlwact, wen kuh pahpah uh? Ke srihpen ma akwucki ke pristut lasr uh pa in fihliyac sucu lasr uh ac sucu luhn mwet raunikuhtyak uh ke infulwen nuhnak lasr uh. Sulaclah yohk nuh kwewa uh enenuh in orek ke srihpen ac kahsruh sie sucu in fal nuh ke moul yurin Pahpah Lucng ac Jisus Kraist. Wacngihn kuhlwacnsap ke pristut lasr uh ma yohk srihpac oacna ma inge.
Lwelah ngan fahk nuh sum kalmeyacn ma inge nuh sin sie tikin lohng ofong oacna sie mempucr ke sie un sucu ac ke sie met kol ke pristut mempucr uh.
Ke sucu lal ah, sahp oasr kuh wacngihn pruhe lwen nuh kwewa luhn sucu kuh ekuh in toeni luhn sucu fusus. Fin pahpah tuhmwacl an, kahlwem ke kunohkohn inge, pahngonweni sucu an nuh ke pruhe kuh ritiyacn ma suhmuhslah, tikin sacn kuh in silahklahk in oruh ip lal ke sie isrwacsr. El kuh in ahkkweye tamuhlwel ac tahmtahel wiyacl an in wi ac kaksyakihn elos ke elos oruh uh. El kuh in siyuck sin pahpah tuhmwacl an ke sie mwe insewowo ke lutlut an muhtwacwacack kuh ke siepac pacl in enenuh.
Pahpah tuhmwacl an kuh in srihklac luhlahlfongi la. Tuhsruhk kena yohk se emet luhn insiyacl nuh ke puhlakihnyuck ingacn fah use kuh luhn inkuhsrao nuh sin mwet raunwellah an ke srihpen luhlahlfongi lal. Mwet ingacn fah suk ke moul in sucu ma tikin sacn kena ke insiyacl nohfohn uh.
Mwet luti ke Aaronic Pristut uh kuh in kahlwem ke mwe luti ke forfor luti yurin sucu lal oacna sie pacl wowo in kahsruh Leum ekuhllah moul luhn sie sucu. Leum El fahk lun Doctrine and Covenants lah:
“Ma kunacn mwet luti se in karihngihn, in wi ac ahkkweyacltahl;
“Ac liye lah wacngihn ma koluk ke Alu uh, weacng pac akuhkuhin yurin sie sin sie, oacyacpac kikiacp, lwesrihk, kuh kahskahs koluk” (D&C 20:53–54).
Oacpacna, prist ke Aaronic Pristut ituckyang kunohkohn la uh:
“Kunohkohn luhn prist pa in fahkwack, luti, ahkuhtweyac, kwacfe, ac pacptais, ac in karihngihn kuhfa luhn Leum,
“Ac muhtwacta nuh lohm sin kais sie mempucr, ac sang kahsruh kaelos in pruhe ke puhsra ac in lukmac ac wi ke kunohkohnnuh kwewa luhn sucu” (D&C 20:46–47).
Kom kuh in nuhnkuh, oacna ke nga oruh ke nga sie mwet luti ac prist fuhsr ah, ohiyac fuhkah facluh nga kuh in ahkfalye ma upac ingacn. Nga tiacna kahlwem ke ohiyac nga kuh in kwacfe ke sie inkacnek ma fah mokle sie sucu nuh ke moul ma pahtpaht sahyacn ahkkasrkuhsrakye kuh oacna in ahkkolukye. Nga lotwelah lah kwacfe sefanna ma ac ekuhllah insiyac uh tuhkuh sin Nguhn Muhtahl. Ma ingacn kwacna sikyak ke kuht fahkwack luhlahlfongi lasr ke Mwet Lahngo, suc tuh ac pa mempucr suwohswohs ke sucu. Ke kuht lohacng nuh ke luhngse lasr nuh Sel, engan ac mihs fah kapwack in lohm kuht muhtwacta we uh. Nguhn Muhtahl fah kahsrwe kuht in kuhlwacnsap nuh sin sucu uh.
Mwet sruok pristut fuhsr uh enenuh in, ke inkacnek uh el pruhe, ke inkacnek el sramsram, ke inkacnek uh el ahkkweye mempucr ke sucu, use moklweyuck ac srihkasrak luhn Mwet Lahngo nuh in nuhnak ac insiyaclos.
Sie mwet kol pristut lahlmwetmwet ahkkahlwemye nuh sihk lah el kahlwem kac. El siyuck sin tuhlihk mukul fuhsr se intihk in kol ke sie forfor muhtwacta yurin sucu. El fahk lah sucu an kuh in lain kwacfe lal an, tuhsruhk el nuhnkuh tuh luti ac fahkwack luhlahlfongi fihsrwacsr luhn sie tuhlihk mukul kuh in tilyak loal nuh insiaclos .
Meac elder fuhsr sacn kuh in oruh in kahsruh ke orwaclah sie sucu ma pahtpaht? Sahp el kuh in som nuh ke misin fil an. El kuh in pruhe ke insiyacl nohfohn tuh el fah kuh in sokwack, luti, ac pacptaisi sucu uh. Nga srwackna esam ke sie lwen ah sie mukul fuhsr kahto wi muhtwacn kiyacl na kahto se ac tuhlihk muhtwacn kahto luo nahtuhlos wiyuc muhta ac misineri companion se luhk ah. Nguhn Muhtahl tuhkuh ac fahkwack luhlahlfongi nuh selos lah wosasuc luhn Jisus Kraist fohlohkihnyuckyak. Elos luhlahlfongi fal oruh elos sifilpac siyuck fin kuht kuh in sang nuh sin tuhlihk muhtwacn luo nahtuhlos ah sie mwe insewowo ma elos liye orek ke sie miting in kuhfa luhn Leum lasr ah. Oasr tari sie kena lalos nuh sin tuhlihk nahtuhlos uh in ahkinsewowoyeyuck, tuh elos soenna kahlwem lah mwe insewowo fuhlwact uh oasr muhkwena lun tempuhl luhn God tukun elos orwaclah olwelah uh.
Nga srwackna puhla ahsor ke nga nuhnkuh ke siyacnyacn sac ac tuhlihk muhtwacn srihsrihk ingacn, sahp ingena mahtuhlah, tiacna olwelah ke sie sucu ma pahtpaht. Pahpah ninac kiyaclos sahp oasr kihtin kahlwem ke mwe insewowo ma kuh in oreklac nuh selos. Finsrak luhk pa lah elos ke kuhtuh srihpac, ke sie acn kuh in soenna eis pacl wowo in fal nuh ke sucu ma pahtpaht.
Elder sahyac ma som nuh in fil uh fah puhlakihn engan ma Matthew tuhlihk mukul se nuhtihk ah puhlakihn. El ac companion se lal ah sokwack sie katinmas wi tuhlihk 11 ke ohiyac puhsisacl muhta ke acn mesahs mihs se. El kena selos ma kom kena uh—in eis sie sucu ma pahtpaht. Nuh sin tuhlihk mukul se nuhtihk ah, oacna in upac kuh oacna in koflah ke pacl sac.
Nga muhtwacta nuh ke kihtin city sacn yac ekahsr tukun tuhlihk mukul se nuhtihk pacptaiselah katinmas sac, ac el suliyuc in ohsun nuh sin sucu lal ah ke alu ah. Nga enenuh in tuhpan kuhtuh ke srihpen inkaiyen tuhlihk nahtuhl ah, wi nuhtin nahtuhl, tuhkuh ke kain in lohm alu puhkantwen ke acn sac. Sie tuhlihk mukul nahtuhl an kuhlwacnsap ke luhlahlfongi ke sie pisaprik, ac puhs sin tuhlihk nahtuhl an tuh ahkinsewowoyeyuck ke olwelah tempuhl, ac el siliyucki ke sie sucu ma pahtpaht. Ke nga som liki tahmtahel sacohk se inge ah, el fihliyac pahol finpihsuck (el arlac fototo, oruh el apkuhran na nuh infulwuck) ac fahk, “Nuhnak muhnahs, fahk nuh sel Mateo elan fohlohkoh nuh Chile met liki nga misac.” Ituckyang nuh sel, ke srihpen elder yohk luhlahlfongi la ingacn, pwacrack engan ke mwe sang yohk emet luhn God uh.
Oasr ma sie elder, ke el fohlohk liki misin lal an, enenuh in oruh in pwacyena nuh ke olwelah lal in suk moul ma pahtpaht nuh sel sifacna ac nuh sin mwet el luhngse. Olwelah yohk srihpac se emet ke pacl ac ma pahtpaht uh pa pahyuck. Kom lohng tari kahs in kahsruh lahlmwetmwet in orwaclah pahyuck uh sie plwacn yohk srihpac ke misin se. Mwet kuhlwacnsap luhlahlfongi ke pristut uh fah oruh arlac lahlmwetmwet.
Ke nuhnkuh ke pahyuck, el fah liye lah el sulwaclah pahpah ninac luhn tuhlihk nahtuhl ac usru elos fah eis uh. El fah orwaclah sulaclah ke insacnweacng in suk ac fah nuhnak in pruhe. El fah liye ahkwoyac lah mwet se el pahyuck se uh ac oasr pac la ohiyac ke sucu ac muhngnguh lal ke srihpac luhn Leum nuh ke pahyuck ac lah muhtwacn sacn pa mwet se ma el fah kena in luhlahlfongi engan luhn tuhlihk nahtuhl an.
Prestuhn N. Eldon Tanner el sang kahs lahlmwetmwet uh: “Pahpah ninac ma kom enenuh in ahkfuhlwactye likina pahpah ninac sahyac uh pa pahpah ninac ke tuhlihk nuhtum pacl fahsruh uh. Tuhlihk ingacn ituckyang nuh se pahpah ninac wo emet ma kuh nuh suwos in sang nuh selos—pahpah ninac suwohswohs uh.”3Nwacsnwacs fah mwe karihngihnyuck lom ac mwe karihngihn luhn nuhtum. Kom misac nuh selos ke mwe insewowo ingacn.
Ingena, oasr kuhtuh mukul tuhma ac pahpah ma lohng ofong. Meac kom kuh in oruh? Finsrak luhk pa kena lom in yohkwelihk in orwaclah eklac nuh sum ac sucu lom an in moul ke tohkohsrahi celestial sie lwen. Ke sie pahpah pristut, wi muhtwacn kiyom an siskom, kom kuh in mokle insiyacn kais sie mwet ke sucu an in ahkkweyaclos in rahrah nuh ke lwen sacn. Kom fah wi miting ke kuhfa luhn Leum wi sucu lom, kom fah oruh miting luhn sucu ma Nguhn Muhtahl suliyuck, ac kom fah oruh yurin muhtwacn kiyom ac sucu an, ac kom fah ahkoe komlac sifacna in us sucu lom an nuh tempuhl. Kom fah mukwikwi weluhlos ke inkacnek nuh ke lohm sin sucu ma pahtpaht uh.
Kom fah oruh nuh sin muhtwacn kiyom ac tuhlihk nuhtum an inkacnek Pahpah Lucng El oruh nuh sum uh. Kom fah ukwe srihkasrak ac kolyuck luhn Mwet Lahngo in kol sucu lom ke inkacnek Lal.
“Wacngihn kuh kuh moklweyuck kuh kuh enenuh in karuhnguhnwacng ke ma wo luhn pristut,sahyacn ke kwacfe, ke muhtweng, ke ohi ac puhsisacl ac mongfihsracsr, ac ke luhngse pwacye;
“Ke kuhlwacng, ac nuhnak nwacsnwacs, ma ac fah ahkyohkye nguhna uh yohk sahyacn wosounkacs ac kuhtasrihk—
“Kom fin moklweyuck sin Nguhn Muhtahl in kalyei sie mwet, ahkkahlwemye met tukun sie yohkwelihk ke luhngse nuh sin mwet se kom kalyei elan tiac nuhnkwe kom oacna sie mwet lokoalok (D&C 121:41–43).
Leum El fahk nuh sin pahpah pristut uh kain mukul tuhma fuhkah elos enenuh in oruh uh. “Leum El fahk lah sie mukul enenuh in luhngse muhtwacn kiyacl ke insiyacl nohfohn ac enenuh in fungyang nuh sel muhkwena” (D&C 42:22). Ke Leum El sramsram nuh sin kwewana mukul ac muhtwacn kiyac, El sapkihn nuh selos, “In tiac… kosro, … kuh oruh kuhtwena ma oacna” (D&C 59:6).
Nuh sin mwet fuhsr, Leum El oakiyac ohiyac fal uh. “Tulik, kowos in akos papa tomowos ac nina kiowos pacl nukewa: tuh ma inge mwe insewowoye God” (Colossae 3:20), ac “sunakin papa tomom ac nina kiom” (Exodus 20:12).
Ke Leum El sramsram nuh sin mwet nuh kwewa ke sucu uh, kahs in kahsruh Lal pa in luhngse ac ahkkweye sie sin sie.
El siyuck sesr in “kwacfweacng in ahksuwohsye moul luhn kais sie [mempucr ke sucu uh]; [in] ahkkweye mwet muhnahs; molwelah [suc] mwet tuhlac lasr], ac engan ke ahksasucyeyacn ac ahkfokokoyeyacn nguhnalos.”4
Leum El oacyacpac siyuck tuh kuht in oruh ma nuh kwewa in kahsruh mwet misac lasr in wi kuht ke lohm ma pahtpaht sesr uh.
Mwet kol u luhn prist fuhlwact suc oaru in orekma in kahsruh mwet uh sokwack mwet somlah lalos uh ac uslah ine nuh tempuhl uh molwelah mwet suc misac uh. Ac fah oasr kuloh fin facluh in tuhkuh nuh sin prist fuhlwact ingacn, ac nuh selos suc sang akwuck an, ke srihpen elos tiacna muhlkuhnlah sucu lalos sano facl luhn nguhn uh.
Mwet pahluh uh tuh fahk: “Ma yohk srihpac emet ke orekma luhn Leum ma kom fah oruh uh fah pa orekma kom fah oruh lun sinkac in lohm sum sifacna uh. Forfor luti yurin sucu, orekma luhn pisap, ac kunohkohn sahyac ke Alu uh nohfohn yohk srihpac, tuh ma yohk srihpac emet uh pa lun lohm sum sifacna uh.”5
In lohm sum ac ke kuhlwacnsap luhn pristut lom, ma yohk srihpac se emet fah oasr ke mukwikwi srihsrihk ma kahsrwe kuht ac mwet kuht luhngse orekma nuh ke moul ma pahtpaht. Mukwikwi ingacn finne luhman srihklac ke moul se inge, tuhsruhk elos fah use mwe insewowo ma pahtpaht ne tok.
Ke kuht luhlahlfongi yohk ke kuhlwacnsap lasr in kahsruh tuhlihk nuhtin Pahpah Lucng uh in som nuh lohm ah nu Yohrohl, kuht fah faseni nuh ke pahyuck kuht nuh kwewa kena in lohng ke kuht ahksahfye luti facluh lasr uh. Pa inge kahs uh: “Kom mwet kulansap wo ac oaru, Wona orekma lom: Kom oaru in liyaung ma puhs, inge nga ac fah sot tuh kom in karingin ma pus: fahsru ac wiyuc engankihn mwe insewowo luhn leum” (Matthew 25:21).
Inmahsrlon “ma puhkantwen” ingacn pa olwelah luhn sie fihlin tuhlihk wacngihn sahflah. Mwe pruhe luhk tuh kuht nohfohn kuh in ahkfalye ac kahsruh mwet sahyac in fal nuh ke mwe insewowo inkuhsrao ke lohm sin Pahpah tuhmasr Lucng ac Wen Kuloh Nahtuhl, Jisus Kraist. Ke ine muhtahl luhn Jisus Kraist, amen.