“Caring for Those in Need,” Liahona, Sept. 2023.
ຂ່າວສານປະຈຳເດືອນ Liahona, ເດືອນກັນຍາ 2023.
ການດູແລຄົນຂັດສົນ
He Healed Many of Diverse Diseases [ພຣະອົງໄດ້ປິ່ນປົວຫລາກຫລາຍພະຍາດສາລະພັດ], ໂດຍ ເຈ ເຄີກ ຣິເຈີດ, ຫ້າມລອກແບບ
ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາເຮັດຕາມຄຳສອນຂອງພຣະຜູ້ເປັນເຈົ້າໃນການດູແລຄົນຂັດສົນ. ເຮົາດູແລຄົນອື່ນໂດຍການຮັບໃຊ້ພວກເຂົາ, ຊ່ວຍເຫລືອໃຫ້ພວກເຂົາກຸ້ມຕົນເອງ, ແລະ ແບ່ງປັນສິ່ງທີ່ເຮົາມີ.
ຕົວຢ່າງຂອງພຣະເຢຊູຄຣິດ
ພຣະເຢຊູຄຣິດຊົງຮັກ, ປອບໂຍນ, ແລະ ອະທິຖານເພື່ອຄົນທີ່ຢູ່ອ້ອມຂ້າງພຣະອົງ. ພຣະອົງ “ໄດ້ໄປທຸກຫົນທຸກແຫ່ງເຮັດຄຸນງາມຄວາມດີ” (ກິດຈະການ 10:38). ເຮົາສາມາດເຮັດຕາມຕົວຢ່າງຂອງພຣະອົງໄດ້ໂດຍການຮັກ, ການປອບໂຍນ, ການຮັບໃຊ້, ແລະ ການອະທິຖານເພື່ອຄົນທີ່ຢູ່ອ້ອມຂ້າງເຮົາ. ເຮົາສາມາດຊອກຫາວິທີທີ່ຈະຊ່ວຍເຫລືອຄົນອື່ນໄດ້ສະເໝີ.
ການປະຕິບັດສາດສະໜາກິດ
ຄໍາວ່າ ການປະຕິບັດສາດສະໜາກິດ ແມ່ນຖືກໃຊ້ໃນພຣະຄໍາພີ ແລະ ໃນສາດສະໜາຈັກຂອງພຣະຜູ້ເປັນເຈົ້າ ເພື່ອອະທິບາຍວ່າ ເຮົາດູແລກັນແລະກັນແນວໃດ. ຜູ້ດຳລົງຖານະປະໂລຫິດໄດ້ຖືກມອບໝາຍໃຫ້ເປັນອ້າຍນ້ອງຜູ້ປະຕິບັດສາດສະໜາກິດຕໍ່ສະມາຊິກເປັນບຸກຄົນ ຫລື ເປັນຄອບຄົວໃນຫວອດ ຫລື ສາຂາ. ເອື້ອຍນ້ອງຜູ້ປະຕິບັດສາດສະໜາກິດແມ່ນໄດ້ຖືກມອບໝາຍໃຫ້ດູແລແມ່ຍິງຜູ້ໃຫຍ່ແຕ່ລະຄົນ. ອ້າຍເອື້ອຍນ້ອງຜູ້ປະຕິບັດສາດສະໜາກິດຊ່ວຍໃຫ້ແນ່ໃຈວ່າ ສະມາຊິກທຸກຄົນໄດ້ຮັບການຈົດຈໍາ ແລະ ໄດ້ຮັບການດູແລ.
ການຊ່ວຍໃຫ້ຄົນອື່ນກຸ້ມຕົນເອງ
ເຮົາສາມາດຊ່ວຍສະມາຊິກໃນຄອບຄົວ ແລະ ໝູ່ເພື່ອນໃຫ້ ກຸ້ມຕົນເອງ ໂດຍການຊຸກຍູ້ໃຫ້ເຂົາເຈົ້າພົບວິທີແກ້ໄຂບັນຫາໄລຍະຍາວ. ຈາກນັ້ນ ເຮົາກໍສາມາດສະໜັບສະໜູນເຂົາເຈົ້າ ຂະນະທີ່ເຂົາເຈົ້າເຮັດວຽກເພື່ອເປົ້າໝາຍຂອງຕົນ. ຊອກຫາຂໍ້ມູນເພີ່ມເຕີມກ່ຽວກັບການກຸ້ມຕົນເອງໄດ້ໃນ Liahona ເດືອນສິງຫາ 2023 Gospel Basics article.
ການຮັບໃຊ້ຄົນອື່ນ
ມີຫລາຍວິທີທີ່ເຮົາສາມາດຮັບໃຊ້ຄົນທີ່ຢູ່ອ້ອມຂ້າງເຮົາ ແລະ ຊ່ວຍສະໜອງຄວາມຕ້ອງການທາງໂລກ, ທາງວິນຍານ, ແລະ ທາງອາລົມຂອງພວກເຂົາ. ການຮຽນຮູ້ກ່ຽວກັບຄົນອື່ນສາມາດຊ່ວຍໃຫ້ເຮົາຮູ້ວ່າ ເຮົາຈະສາມາດຮັບໃຊ້ພວກເຂົາໄດ້ດີຂຶ້ນໄດ້ແນວໃດ. ເຮົາຍັງສາມາດອະທິຖານຂໍການນຳພາ ເພື່ອໃຫ້ຮູ້ເຖິງສິ່ງທີ່ເຮົາສາມາດເຮັດໄດ້ເພື່ອທີ່ຈະຊ່ວຍເຫລືອ.
ການແບ່ງປັນສິ່ງທີ່ເຮົາມີ
ເຮົາສາມາດຮັບໃຊ້ຄົນອື່ນໄດ້ໂດຍການແບ່ງປັນສິ່ງທີ່ພຣະເຈົ້າໄດ້ອວຍພອນເຮົາ. ຍົກຕົວຢ່າງ, ເຮົາສາມາດບໍລິຈາກ ເງິນຖືສິນອົດເຂົ້າ ຢ່າງເອື້ອເຟື້ອ ຫລື ທຳການບໍລິຈາກໃຫ້ກອງທຶນການຊ່ວຍເຫລືອມະນຸດສະທໍາຂອງສາດສະໜາຈັກ. ເຮົາຍັງສາມາດຮັບໃຊ້ໃນຊຸມຊົນຂອງເຮົາ ແລະ ໃນ ການເອີ້ນ ຂອງສາດສະໜາຈັກຂອງເຮົາໄດ້ເຊັ່ນກັນ.
ໜ້າທີ່ຂອງຜູ້ນໍາໃນສາດສະໜາຈັກ
ອະທິການຄວບຄຸມການດູແລຄົນຂັດສົນໃນຫວອດຂອງຕົນ. ເພິ່ນສາມາດໃຊ້ເງິນຈາກການຖືສິນອົດເຂົ້າ ເພື່ອຊ່ວຍເຫລືອສະມາຊິກທີ່ຂັດສົນ. ຜູ້ນໍາຄົນອື່ນໆ, ລວມທັງທີ່ປຶກສາຂອງເພິ່ນ ແລະ ຝ່າຍປະທານສະມາຄົມສະຕີສົງເຄາະ ແລະ ຝ່າຍປະທານກຸ່ມແອວເດີ, ຊ່ວຍສະມາຊິກພົບແຫລ່ງຊ່ວຍເຫລືອທີ່ເຂົາເຈົ້າສາມາດໃຊ້ເພື່ອຕອບສະໜອງຄວາມຕ້ອງການຂອງເຂົາເຈົ້າ.
ໂຄງການຊ່ວຍເຫລືອມະນຸດສະທໍາຂອງສາດສະໜາຈັກ
ສາດສະໜາຈັກຊ່ວຍເຫລືອຜູ້ຄົນທົ່ວໂລກ ດ້ວຍການຕອບສະໜອງຕໍ່ເຫດການສຸກເສີນ, ໂຄງການໃນຊຸມຊົນ, ແລະ ໂຄງການອື່ນໆເຊັ່ນ: ໂຄງການນໍ້າສະອາດ ແລະ ໂຄງການສັກຢາປ້ອງກັນ. ເພື່ອຮຽນຮູ້ເພີ່ມເຕີມ, ໃຫ້ເບິ່ງ Dallin H. Oaks, “Helping the Poor and Distressed,” Liahona, Nov. 2022, 6–8.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, September 2023. Language. 19047 331