“Vahehongofulú: Ko Hono Fakahaaʻi ʻo ʻEtau Tuí,” Liahona, Fēpueli 2024.
Vahehongofulú: Ko Hono Fakahaaʻi ʻo ʻEtau Tuí
Naʻá ku loto-mamahi ʻi he ʻikai ke lava ʻo fakafoʻou ʻeku lekomeni temipalé, ka naʻe toe ʻomi ʻe heʻeku tui ke kamata moʻui ʻaki ʻa e fono ʻo e vahehongofulú ha ngaahi tāpuaki mo ha nonga lahi.
Ko e fiefia ʻa e fāmili Tetilé ʻi ha ʻekitivitī poulingi. ʻI he kei iiki ʻa e fānaú, naʻe faingataʻa kia Brother Tetile ke totongi vahehongofulu koeʻuhí ko e tōlalo ʻene pisinisí. Naʻá ne fokotuʻu mo hono uaifí ha taumuʻa ke na totongi vahehongofulu kakato.
Laʻitā naʻe maʻu ʻi he angalelei ʻa e tokotaha faʻutohí
ʻI he ngaahi taʻu kuohilí, ʻi he kei iiki ʻeku fānaú, naʻá ku ʻalu ki heʻeku taki lakanga fakataulaʻeikí ke fakafoʻou ʻeku lekomeni temipalé. Ka ʻi heʻene ʻeke mai pe ʻoku ou totongi vahehongofulu kakató, naʻe pau ke u talaange ʻikai. Naʻá ku fakaʻamu ke totongi vahehongofulu kakato, ka naʻe faingataʻa ke u totongi vahehongofulu koeʻuhí ko ha fili hala ne u fakahoko ʻi ha pisinisi naʻe ʻikai ola lelei.
Hili e fanongo ʻeku taki lakanga fakataulaʻeikí ki hoku ngaahi faingataʻaʻiá mo fehuʻi mai fekauʻaki mo ʻeku ngaahi fiemaʻu fakapaʻangá, naʻá ne fakamanatu mai ʻi he angaʻofa mo e manavaʻofa ʻa e mahuʻinga ke tui ki he ʻEikí mo e hoko ko ha tokotaha totongi vahehongofulu kakató. Naʻá ma fakamanatu fakataha leva ʻa e meʻa ʻoku hiki ʻi he Malakai 3:10: “Pea mou ʻahiʻahiʻi ai au, ʻoku pehē ʻe [he ʻEiki], ʻo e ngaahi kau taú, pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai.”
Naʻá ne pehē, “ʻOku mahino kiate au ʻoku fakamamahi ʻa e ʻikai fakafoʻou hoʻo lekomeni temipalé he taimi ní. Ka ʻe toe lahi ange ʻa e fiefia te ke ongoʻí pea mo e ngaahi tāpuaki te ke maʻú, hili hoʻo totongi kakato hoʻo vahehongofulú. Te ta lava ʻo toe fakataha mai ʻi ha māhina ʻe tolu ki he ono mei heni ke fakafoʻou ʻa e lekomeni temipalé.”
Hili ʻa e ʻinitaviu ko iá, ne u talanoa mo hoku uaifí peá ma lotua ia. Naʻá ma fakapapauʻi naʻe ʻafioʻi ʻe he Tamai Hēvaní ʻa e lahi ʻo ʻema fakaʻamu ke toe foki ki he temipalé ke kau ʻi he ngaahi ouau toputapú. ʻOku fuʻu mahuʻinga ʻaupito kiate kimaua ʻa e ʻalu ki he temipalé. ʻI he fale ʻo e ʻEikí, ʻoku ʻikai ngata pē ʻi heʻetau lava ʻo fai ha tokoni ki hotau ngaahi ʻofaʻanga kuo mavahe atú, ka ʻoku tau aʻusia foki ai ha fiefia lahi, fiemālie, mo ha nonga. Ko e ngaahi tāpuaki mahuʻinga fau ʻeni ʻe lava ke tau maʻu mei hono fakahoko mo tauhi e ngaahi fuakava ʻo e temipalé mo fakahoko ai ʻa e ngaahi ouau toputapú. Naʻá ma fakapapauʻi ʻoku ʻikai ko e meʻa mahuʻinga ʻi he vahehongofulú ʻa e paʻangá ka ko ʻema tui ki he Tamai Hēvaní mo Sīsū Kalaisí. Pea naʻá ma fokotuʻu ha taumuʻa ke totongi vahehongofulu kakato pea foki ki he temipalé.
ʻI heʻema fakakaukau ki he ongo taumuʻa ko ʻení, naʻá ma ongoʻi ke fakatau atu ʻema kaá. Ko e founga pē ia ʻe taha ne ma maʻu ke fefonongaʻaki fiemālie ai homau fāmilí, ka naʻá ma tui ʻe tāpuakiʻi kimautolu ʻe he ʻEikí kapau te mau fakahoko ʻa e feilaulau ko ʻení. Naʻá ma ʻiloʻi ʻe faingataʻa ke ma fefonongaʻaki pasi mo ha kauleka fefine ʻe toko tolu lolotonga iá ʻe toe tokangaʻi foki ʻe hoku uaifí ʻemau ʻū kató, ka naʻá ma ʻiloʻi ko e meʻa totonu ia ke fai ke aʻusia ʻema ngaahi taumuʻá. Naʻe kamata ke ma totongi vahehongofulu kakato.
Hili ha māhina ʻe tolu, ne u toe fakataha mo ʻeku taki lakanga fakataulaʻeikí ke fai ha ʻinitaviu vakaiʻi. Naʻá ne fehuʻi mai fekauʻaki mo ʻeku fakamoʻoni ki he vahehongofulú, pea naʻá ku lava ʻo talaange kiate ia ʻoku ou totongi vahehongofulu kakato.
Naʻe faifai peá u toe fakafoʻou mo hoku uaifí ʻema lekomeni temipalé, peá ma foki leva ki he temipalé. Ne ma aʻusia ʻema taumuʻa ke foki ki he temipalé ke fakahoko ha ngaahi fuakava mo maʻu ha ngaahi ouau maʻa ʻema ngaahi kuí. Naʻe kamata ke fakaava e ngaahi matapā ʻo e langí. Naʻe kamata ke taumalingi hifo e ngaahi tāpuakí. Naʻe ʻikai lava ke fakamatalaʻi ʻeku ongoʻi fiefia mo e nonga ʻi hoku lotó.
Naʻa mau kei fefonongaʻaki pē ʻo fakaʻaongaʻi ʻa e pasí pea faʻa lele ia ʻo fakalaka homau hifoʻangá he taimi ʻe niʻihi he naʻa mau tō kimautolu ʻo mohe, ka ko e fiefia ʻi he totongi vahehongofulu kakató mo e ngaahi tāpuaki ʻo e moihū ʻi he temipalé naʻe mahulu ange ia ʻi ha toe faingataʻa fakatuʻasino.
Naʻe hokohoko atu ʻa e ngaahi tāpuakí. Hili ha māhina ʻe ono, naʻe fokotuʻu au ki ha tuʻunga māʻolunga ange ʻi he ngāué, ʻa ia naʻe ʻikai ngata pē ʻi heʻeku maʻu ha vāhenga māʻolunga angé ka naʻá ku feʻunga foki ki he ngaahi monū ke ngāue ʻaki ha meʻalelé. Hili ha māhina ʻe ono, naʻe ʻomi ʻe he ʻEikí ha meʻalele foʻou kiate kimaua—naʻe toe ʻi ai ha meʻalele homau fāmilí, ʻo fakafiemālie ange ia ʻi he meʻa naʻa mau fakatau atú.
Naʻe tauhi ʻe he ʻEikí ʻEne ngaahi talaʻofa kiate aú, pea ʻi heʻeku tauhi ʻEne ngaahi fekaú, ʻoku ou tauhi foki ai ʻeku ngaahi palōmesi kiate Iá.
ʻOku nofo ʻa e tokotaha naʻá ne faʻú ʻi Lakuna, ʻOtu Filipaini.