Naʻe Fēfē ʻEku Moʻui Taʻekau ai ʻa e Tohi ʻa Molomoná?

Fai ʻe Romeu Flávio Balanga, Luanitā, ʻAngikola

Kuo tokoniʻi au ʻe heʻeku ako fakafoʻituitui mo fakafāmili ʻa e Tohi ʻa Molomoná ke u ongoʻi ha nonga, poupou, mo ha ʻamanaki lelei.

ʻĪmisi

fāmili ʻoku nau lau fakataha ʻa e folofolá

Laʻitā naʻe maʻu ʻi he angalelei ʻa e tokotaha faʻutohí

ʻI ha taimi kimuʻa atu, naʻá ku tohi kole mo haku kaungāmeʻa ki ha polokalama fakaako. Naʻá ku maʻu ha loto-falala ʻe fili au. ʻI he taimi naʻe maʻu ai e olá, naʻá ku loto-mamahi ʻi he fili hoku kaungāmeʻá kae ʻikai fili aú. Naʻá ku ongoʻi naʻe hala ʻa e ngāué he naʻá ku pehē naʻe totonu ange hano fili au ʻi hoku kaungāmeʻá.

ʻI he momeniti ko iá, naʻá ku vakai ki hoku kaungāmeʻá ko haʻaku fili pe ko ha taha kuó ne toʻo ha meʻa naʻe ʻaʻaku. Hili ha ngaahi ʻaho siʻi mei ai, lolotonga ʻeku ako ʻa e Sēkope 2 ʻi he Tohi ʻa Molomoná, naʻá ku lau ai kau ki hono valokiʻi ʻe Sēkope hono kakaí koeʻuhí ko ʻenau ngaahi angahalá. Ko e taha ʻo e ngaahi angahala ko iá ko e hīkisiá.

Naʻe hoko ʻa e ngaahi akonaki ʻa Sēkopé ke u fakatokangaʻi ai naʻá ku tofanga ʻi he angahala ʻo e loto-hīkisiá ki hoku kaungāmeʻá ʻi heʻeku fakakaukau naʻe totonu ke u maʻu ha meʻa naʻe foaki maʻana. Naʻe hoko a e ngaahi lea ʻa Sēkopé ko ha fakahā kiate au:

“ʻOua naʻa tuku ke hanga ʻe he loto-hīkisiá ni ʻa homou lotó ʻo fakaʻauha ʻa homou laumālié!

“Fakakaukau ki homou kāingá ʻo hangē pē ko kimoutolú” (Sēkope 2:16–17).

Naʻá ku lotu ki he Tamai Hēvaní ke fakamolemoleʻi au pea tokoniʻi au ke u fakaʻehiʻehi mei he angahala ʻo e loto-hīkisiá ʻi he kahaʻú. Naʻá ku talanoa leva ki hoku kaungāmeʻá fekauʻaki mo e ongo naʻá ku maʻú peá u kole ange ke ne fakamolemoleʻi au. Naʻá ku ongoʻi ha nonga mo ha fiefia ʻi hono fai iá pea mo hono maʻu ha fakamolemole meiate ia pea mei he Tamai Hēvaní.

Kuo ʻomi ʻe heʻeku ako fakafoʻituitui mo fakafāmili ʻa e Tohi ʻa Molomoná ha fakahinohino pea tokoniʻi au ke u ongoʻi ha nonga, poupou mo ha ʻamanaki lelei. ʻOku ou fifili he taimi ʻe niʻihi pe naʻá ku lava fēfē ʻo moʻui ʻi ha ngaahi taʻu lahi taʻekau ai ʻa e Tohi ʻa Molomoná!

Ka ne taʻeʻoua ʻa e Tohi ʻa Molomoná, he ʻikai ke u maʻu ha ʻamanaki lelei te u lava ʻo hoko ko ha tokotaha lelei ange. ʻE taʻekakato ʻeku moʻuí pea ʻikai ha taumuʻa mahino. He ʻikai ke u ʻilo ʻoku maʻu ʻe he ʻOtuá ha palani ʻo e fakamoʻuí maʻa ʻEne fānaú. He ʻikai ke u maʻu ha mahino kau ki he Fakalelei ʻa Sīsū Kalaisí. He ʻikai ke u maʻu ha ʻamanaki lelei ki ha māmani lelei ange. He ʻikai ke u tui ki he ngaahi meʻa ʻoku ou tui ki aí, fakahoko e ngaahi meʻa ʻoku ou faí, fakakaukau ʻi he founga ʻoku ou fakakaukau aí, mo aʻusia ʻa e tuʻunga ʻoku ou ʻi aí.

Kuó u maʻu ʻi he Tohi ʻa Molomoná ha fakapapau ʻoku ʻofa mo tokanga mai ʻa e ʻOtuá ki Heʻene fānaú kotoa ʻi he tapa kotoa pē ʻo e māmaní. ʻOku ou ʻilo ko e Tohi ʻa Molomoná ko ha fakamoʻoni ʻia ʻe taha ʻo Sīsū Kalaisi.