“Naʻe Fetongi ʻe he Nongá Homau Mamahí,” Liahona, Fēpueli 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Fetongi ʻe he Nongá Homau Mamahí
Naʻe ʻikai ke u mateuteu ke mālōlō ʻeku tamaí, ka naʻe ʻomi ʻe he palani ʻa e ʻOtuá ha nonga kiate au.
Tā fakatātā ʻa Ellen Marello
Naʻe hangē naʻe ʻikai ha meʻa ʻe faingataʻa ki heʻeku tamaí. Neongo naʻe fasi hono vaʻé, ka naʻá ne langa ha fale sima fungavaka maʻa homau fāmilí lolotonga ʻene lue tokotoko holó. Naʻe ʻikai taʻofi ia ʻe he fasi hono vaʻé mei heʻene ʻalu ki hono ngaahi fatongia lakanga fakataulaʻeikí pe tokoni ki he niʻihi kehé.
ʻI he taimi naʻe fanongonongo ai ʻe Palesiteni Lāsolo M. Nalesoni ʻi he 2020 ʻe fakahoko ʻa e houalotu sākalamēnití ʻi hotau ngaahi ʻapí, naʻe tūʻulutui ʻeku tangataʻeikí ʻi he angatonu mo e ʻofa ki he ʻEikí, ʻi he Sāpate kotoa pē ʻi he faliki simá ʻaki hono vaʻe naʻe fasí, ke tāpuakiʻi ʻa e sākalamēnití. Naʻá ne pehē ʻoku mahuʻinga ke tūʻulutui ke fakahaaʻi ha fakaʻapaʻapa ki he ouau toputapu ko ʻení.
ʻI he ʻaho 18 ʻo Mē 2020, naʻe mālōlō ai ʻeku tamai ʻofeiná, ko ʻeku heló, mei he COVID-19. Naʻe fakafokifā ʻene mālōloó naʻe ʻikai ai ke mau mateuteu. Naʻá ne taʻu 61 pē. Naʻá ku ako kuo pau ke tau fakaʻapaʻapaʻi ʻa e taimi ʻa e ʻOtuá, ʻo hangē pē ko hono fakaʻapaʻapaʻi ʻe he ʻOtuá ʻetau tauʻatāina ke filí. Ko hono ʻuhinga ia ʻoku ou houngaʻia ai ʻi Heʻene talaʻofa naʻe akoʻi ʻe he palōfita ko ʻAlamaá, “ʻoku fakafoki ʻa e laumālie ʻo e tangata kotoa pē, ʻo ka hili ange ʻa ʻenau mavahe mei he sino fakamatelié ni, ʻio, ʻa e laumālie ʻo e tangata kotoa pē ʻo tatau ai pē pe ʻoku nau angalelei pe angakovi, ki honau ʻapí ki he ʻOtua pē ko ia ʻa ia naʻe foaki ʻa e moʻuí kiate kinautolú” (ʻAlamā 40:11). Ko e tangata mo e fefine kotoa pē!
Naʻe siʻisiʻi mo toputapu ʻa e meʻafakaʻeiki ʻo ʻeku tangataʻeikí. Naʻe hivaʻi ʻe hamau toko hongofulu mā ua ha ngaahi himi fiefia ʻo e loto-houngaʻia ki he ʻOtuá koeʻuhí ko e moʻui fakamatelie ʻeku tangataʻeikí. ʻI heʻemau kamata hivaʻi ʻa e “Lolotonga ʻEku Nofó,”1 naʻe kamata ke fakalongolongo ʻa e fāmili ʻi homau tafaʻakí, ʻa ia naʻa nau siʻi tēngihia ha mālōlō haʻanau ʻofaʻanga. Naʻe hangē naʻa nau ʻohovale ʻi he ʻikai ke mau loto-mamahi lahi ʻi he mole [ʻeku tamaí], ka naʻa mau ongoʻi ʻa e nongá ʻi heʻemau ʻiloʻi ʻoku ʻi ai ha palani maʻatautolú. ʻOku ou tui naʻa nau ongoʻi foki ʻa e nonga ʻoku ʻomi ʻe Sīsuú.
ʻOku ʻikai faingofua ʻa e moʻuí ʻi he mole ʻeku tamaí, ka ʻoku mau maʻu ʻa e melino ʻa Kalaisí. Naʻá ku vāofi ʻaupito mo ʻeku tangataʻeikí, ka ʻoku lava ke u ongoʻi ʻokú ne ofi ange kiate au he taimí ni ʻi ha toe taimi kimuʻa. Kuo silaʻi au kiate ia mo ʻeku faʻeé ki he taʻengatá, pea ʻoku ou ʻilo ʻoku moʻui ʻeku tamaí. ʻOku ou ʻofa lahi kiate ia, ka kuó u maʻu ʻeni ha tamai ʻe toko ua ʻi he tafaʻaki ʻe taha ʻo e veilí—ko ʻeku Tamai Hēvaní mo ʻeku tamai ʻi he māmaní. ʻOku ou ʻilo ʻe tataki au ʻe he Tamai Hēvaní kae ʻoua kuo mau toe fakataha.