“Naʻe Fiemaʻu Ke U Tokoni Kiate Ia,” Liahona, Fēpueli 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Fiemaʻu Ke U Tokoni Kiate Ia
Naʻe akoʻi au ʻe heʻeku palesiteni Fineʻofá te tau lava moʻoni ʻo feongoongoi ʻo fakafou ʻi he ngāue tokoní.
Tā fakatātā ʻa Dilleen Marsh
ʻI he taimi naʻá ku feitama ai ʻi heʻeku tama siʻisiʻi tahá, naʻe hoko ʻa Makeleta Pelekipeni ko e palesiteni Fineʻofa homau uōtí. Naʻá ma mahení mei he fanga kiʻi taimi ne ma feʻiloaki ai lolotonga e ngaahi fakatahaʻanga ʻi he lotú.
Hili ʻeku fāʻeleʻi ʻeku pēpeé, naʻe ʻomi ʻe he kau fefiné ha meʻatokoni ʻi he ʻuluaki uike ko iá, kau ai ʻa Makeleta, ʻa ia naʻe matuʻotuʻa mo vaivai ange. Naʻá ku houngaʻia koeʻuhí naʻe ʻikai haʻaku ivi pe mālohi ke palani ha houa meʻatokoni, feimeʻatokoni, pe fakatau mai ʻa e ʻū meʻa ki he feimeʻatokoní—pe naʻa mo hono fakahoko tuʻo tolu iá.
Hili ʻa e ʻuluaki uike ko iá, naʻe hokohoko atu hono ʻomi ʻe Makeleta ha meʻatokoní. Neongo pe ko ha meʻatokoni naʻá ne ngaohi ʻi ʻapi pe ko ha toenga meʻatokoni mei ha ʻekitivitī fakauooti, naʻe ʻikai ke u tokanga ki ai. Naʻe hangē naʻá ne ʻilo naʻe tatau pē ʻeku fiemaʻu ha taha ke ne fuofua ʻeku pēpeé pe fakamaʻa hoku ʻapí, mo ʻeku fiemaʻu ko ia ʻa e tāpuaki ʻo e ʻikai fakakaukauʻi pe ko e hā ha meʻatokoni ki he efiafí.
Hili ha taimi nounou mei ai, naʻe tukuange ʻa Makeleta mei hono uiuiʻí koeʻuhí ko e fakaʻau ke holo hono tuʻunga moʻui leleí. Naʻe ʻikai ke u ʻiloʻi he taimi ko iá, ka naʻá ne puke ʻi he kanisaá.
ʻI he taimi pē ne u ʻiloʻi ai ʻene puké, naʻá ku ʻiloʻi ʻa e meʻa naʻe fiemaʻu ke u faí. Naʻe fiemaʻu ke u tokoni kiate ia—ʻo ʻikai koeʻuhí naʻá ku moʻua ki ai pe fiemaʻu ke totongi fakafoki ʻene angaʻofá. Ka koeʻuhí kuo hoko ʻene ngāue tokoni kiate aú ke u ʻofa ai ʻiate ia.
Naʻe akoʻi au ʻe Makeleta ʻoku fakafou ʻi he ngāue tokoní ʻa ʻetau fehokotaki moʻoní. ʻI heʻeku fakakaukau ki he fefine fakaofó ni, naʻe ongo ki hoku lotó ʻa ʻeku fakakaukau atu ki haʻane fakamaʻa pe tafi e faliki hono peitó. Ko ia ai, naʻá ku kamata ʻaʻahi kiate ia ʻi he uike kotoa pē mo fakamaʻa hono ʻapí.
ʻI ha ʻaho ʻe taha hili ʻeku foki ki ʻapí, ne u ongoʻi lōmekina ʻi he houngaʻia ʻi hono fokotuʻutuʻu ʻe he Tamai Hēvaní ʻa e ngaahi faingamālie ngāue ʻofa ko ʻení. Kapau naʻe ʻikai ke ngāue tokoni faivelenga mai ʻa Makeleta kiate au, mahalo naʻe ʻikai ke u mei fiemālie ke toutou ʻaʻahi ki hono ʻapí. Naʻá ku mataʻikoloa ʻaki ʻa e taimi ko ia naʻá ma feohi aí! Naʻe ʻafioʻi ʻe he ʻOtuá ʻi hono ʻomi ia kiate au ʻi he taimi ʻo ʻeku faingataʻaʻiá, ʻe tofa ai ʻa e hala ke u tokoni kiate ia ʻi he taimi ʻo ʻene faingataʻaʻiá.
Naʻá ku loʻimataʻia ʻi heʻeku fakatokangaʻi ʻa e haohaoa hono fakafehokotaki taʻengata kimaua ʻe he ngaahi ueʻi fakalaumālie mo e ngaahi faingamālie ngāue tokoni ko ʻení.