Haʻu, ʻo Muimui ʻIate Au

Seilomi 1; Mōsaia 3

ʻO Hangē Nai Kuo ʻOsi Hāʻele Mai ʻa e Fakamoʻuí

Ko e Vakai ki he ʻUluaki Hāʻele Mai ʻa e ʻEikí

Naʻe fakamatalaʻi ʻe Seilomi naʻe akoʻi ki he kau Nīfaí ʻa e taumuʻa ʻo e fono ʻa Mōsesé: ke tokoniʻi kinautolu ke nau “ʻamanaki atu ki he Mīsaiá, pea tui kiate ia ʻe hāʻele mai ʻo hangē kuó ne ʻosi hāʻele maí” (Seilomi 1:11; tānaki atu hono fakamamafaʻí).

Malanga ʻa e Tuʻi ko Penisimaní, tā ʻa Jeremy Winborg, ʻoua naʻa hiki hano tatau

Hili nai ha taʻu ʻe 275 mei ai, naʻe fai ʻe he Tuʻi ko Penisimaní ʻa e pōpoaki tatau—ke “tui ʻe hāʻele mai ʻa Kalaisi … ʻo hangē nai kuó ne ʻosi hāʻele mai kiate kinautolú” (Mōsaia 3:13; toki tānaki atu hono fakamamafaʻí).

Ko e tui ki he ʻEikí ʻi he ʻiloʻilo paú—ko e founga te nau ala tui ai kapau naʻá Ne ʻosi hāʻele mai ki honau lotolotongá—ʻe tupulaki ai ʻa ʻenau tui ke sio kiate Ia ki ha fakamolemole ʻo ʻenau ngaahi angahalá (vakai, 2 Nīfai 25:24–27). Naʻe akoʻi ʻe he kau palōfita Nīfaí neongo naʻe teʻeki ʻaloʻi mai ʻa e Fakamoʻuí ki he moʻui fakamatelié, ka ʻe lava ke ngāue ʻEne Fakaleleí ʻi heʻenau moʻuí.

The Second Coming [Ko e Hāʻele ʻAnga Ua Maí], tā fakatātaaʻi ʻe Harry Anderson

Ko e teuteu ki he Hāʻele ʻAnga Ua Mai ʻa e ʻEikí

Hangē pē ko ia ʻi he kuonga ʻo e Tohi ʻa Molomoná, ʻoku kei fakaafeʻi pē kitautolu ʻe he kau palōfitá ke tau “ʻamanaki atu ki he Mīsaiá” (Seilomi 1:11) mo teuteu ki Heʻene hāʻele maí:

“ʻOku fiemaʻu ke tau fakatou teuteu fakatuʻasino mo fakalaumālie ki he ngaahi meʻa naʻe kikiteʻi ʻe hoko ʻi he taimi ʻo e Haʻele ʻAnga Ua Maí.”¹

“Ko e taha ho ngaahi fatongia mahuʻingá ko e tokoni ke teuteuʻi ʻa e māmaní ki he Hāʻele ʻAnga Ua Mai ʻa e Fakamoʻuí.”²

“Ko e hā te tau lava ʻo fai he taimí ni ke teuteu ai ki he ʻaho ko iá? Te tau lava ʻo teuteu ke hoko ko ha kakai mateuteu; te tau lava ʻo tānaki ʻa e kakai ʻo e fuakava ʻa e ʻEikí; pea te tau lava ʻo tokoni ke huhuʻi ʻa e talaʻofa ʻo e fakamoʻuí ʻnaʻe fai ki he ngaahi tamai,’ ko ʻetau ngaahi kuí. Kuo pau ke hoko kotoa ʻeni ʻi ha founga lahi kimuʻa pea toe hāʻele mai ʻa e ʻEikí.”³

“Kuo fekau atu ʻe he ʻEiki ko e ʻOtuá ʻa ʻene kau palōfita māʻoniʻoní ki he fānau kotoa pē ʻa e tangatá, ke nau fakahā ʻa e ngaahi meʻá ni ki he faʻahinga kotoa pē, mo e puleʻanga, mo e lea, koeʻuhi ko kinautolu kotoa pē ʻoku tui ʻe hāʻele mai ʻa Kalaisí, ʻe maʻu ʻe kinautolu ʻa e fakamolemole ʻo ʻenau ngaahi angahalá, pea fiefia ʻi he fiefia lahi ʻaupito, ʻo hangē nai kuó ne ʻosi hāʻele mai kiate kinautolú.” —Mōsaia 3:13

Fealēleaʻaki

ʻE fakamālohia fēfē nai hoʻo tuí mo teuteuʻi koe ki he toe hāʻele mai ʻa Sīsū Kalaisí kapau naʻá ke tui kia Sīsū Kalaisi ʻaki ʻa e mālohi tatau ʻo hangē pē kuó Ne ʻosi ʻi hení?

Ngaahi Maʻuʻanga Fakamatalá

1. Dallin H. Oaks, “Preparation for the Second Coming,” Liahona, Mē 2004, 9.

2. Neil L. Andersen, “Ko Hono Teuteuʻi ʻo e Māmaní ki he Hāʻele ʻAngauá,” Liahona, Mē 2011, 49.

3. D. Todd Christofferson, “Teuteu ki he Toe Hāʻele Mai ʻa e ʻEikí,” Liahona, Mē 2019, 82.