“Ko e Kau Faifekaú Kimautolu,” Liahona, ʻEpeleli 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
“Ko e Kau Faifekaú Kimautolu”
Naʻá ku kole ki he ʻOtuá ke tokoni mai ke u ʻiloʻi Hono siasi ʻoku ngāue fakafaifekaú.
Tā fakatātā ʻa Brian Call
Naʻe saiʻia ʻeku ongomātuʻá ke vahevahe ʻa e folofola ʻa e ʻEikí. Naʻá na faʻa foaki maʻu pē ha ʻū puha naʻe ʻi ai ha ʻū tatau ʻo e Fuakava Foʻoú ki he kaungāʻapí, fale fakapōpulá, falemahakí, mo e ngaahi ʻapiakó.
Ko ha konga ʻo e ngāue ʻa ʻeku ongomātuʻá, naʻe hiva ʻeku tamaí, lau ʻa e folofolá, fakamoʻoni kia Sīsū Kalaisi, pea fakaʻosi ʻaki ha lotu. ʻI hono fakakau au ʻi heʻeku kei siʻi ki he ngāue ko iá, naʻá ku fakatupulaki ai ha holi ke ngāue maʻá e ʻOtuá.
Ka neongo ia, ʻi he taimi naʻe mahaki mafu ai ʻeku tamaí, naʻe ngata leva ʻa e meʻa naʻa mau ui ko e “ngāue fakaʻevangelioó.” Naʻe ʻikai ke u lava ʻo tufaki toko taha pē ʻa e ʻū tatau ʻo e Fuakava Foʻoú, ko ia naʻá ku kole ki heʻeku tamaí ha ngofua ke u kumi ha siasi ʻoku ngāue fakafaifekaú.
ʻI hoku taʻu 15, naʻe kamata ke u fakaʻekeʻeke fekauʻaki mo e tokāteliné, papitaisó, vahehongofulú, mo e fokotuʻutuʻu ʻo e siasí. Naʻe talamai ʻe heʻeku tamaí ʻoku ʻikai ke toe ʻi ai ha siasi ia he taimí ni ʻokú ne fakahoko ʻa e ngaahi meʻa naʻe akoʻi ʻe he Fakamoʻuí. Ka naʻá ne talamai, kapau te u ʻilo ha siasi pehē, pea ʻoku totonu ke u kau ki ai.
Hili ha ngaahi taʻu mei ai, naʻá ku taʻefemahinoʻaki ai mo haʻaku kaungāngāue. ʻI heʻene haʻu ki homau ʻapí ke kole fakamolemolé, naʻá ne tuku mai ha tohi naʻe ui ko e Ko Hotau Tukufakaholó: Ko ha Hisitōlia Nounou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku lau ʻi ai ʻo kau ki he pekia fakamaʻata ʻa e Palōfita ko Siosefa Sāmitá. Naʻe ongo moʻoni kiate au ʻa e talanoá ni.
Naʻá ku maʻu foki ha laʻitā ʻo ha ongo talavou ʻokú na tui sote hina, hēkesi, mo ha pine hingoa. Naʻá na vahevahe ʻa e ongoongolelei ʻo Sīsū Kalaisí ki māmani fulipē. Naʻá ku fifili pe ʻoku ʻi ai nai ha kau faifekau pehē ʻi hoku koló.
ʻI he efiafi ko iá naʻá ku lotu ai ʻo kole ki he ʻOtuá ke tokoni mai ke u ʻiloʻi Hono siasi ngāue fakafaifekaú. ʻI he ʻaho hono hokó naʻá ku ʻalu ʻo kumi ʻa e ongo faifekaú. Naʻá ku vakaiʻi ʻa e tokotaha kotoa pē naʻá ku sio ki ai naʻe tui ha sote hiná, ka naʻe ʻikai ke ola lelei ʻeku feingá.
Hili ha ngaahi ʻaho siʻi mei ai, naʻá ku sio atu ki tuʻa ʻi hoku ʻapí ki ha kakai ʻe toko tolu ʻoku nau tui sote hina, hēkesi, mo ha pine hingoa! Naʻá ku lele ki fale ʻo toʻo mai ʻa e tohí, peá u fakavave atu kiate kinautolu.
ʻI heʻeku aʻu atu kiate kinautolú, naʻe ʻeke mai ʻe hanau tokotaha, “ʻE lava ke mau tokoni atu?”
“Ko e tohi nai ʻeni homou siasí?” Ko ʻeku fehuʻí ange ia.
Naʻá ne tali loto-vēkeveke mai, “ʻIo, ko ʻemau tohí ia. Ko e kau faifekaú kimautolu.”
Hili ha ngaahi uike lahi ʻo ʻeku ako ki he ongoongolelei kuo fakafoki maí, naʻe papitaiso au ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Hili ha taʻu ʻe taha mei ai naʻe papitaiso ʻekutamaí.
Koeʻuhí naʻá ku kei fie ngāue pē maʻá e ʻEikí—ko ha loto-holi naʻe ʻiate au talu mei heʻeku kei siʻí—naʻá ku kamata teuteu leva ke ʻalu ʻo ngāue fakafaifekau taimi kakato. Ko ha fiefia lahi moʻoni naʻá ku ongoʻí ʻi he ʻaho naʻá ku maʻu ai hoku uiuiʻi ke u hoko ko ha faifekau taimi kakató!