Ko e Tuʻunga Monūʻia mo Fiefiá

Siʻi Ngaahi Mātuʻa,

Naʻe akoʻi ʻe he Tuʻi ko Penisimaní ʻa e fiefia ʻoku tau maʻu ʻi heʻetau moʻui ʻaki ʻa e ongoongoleleí. Naʻá ne faleʻi ʻa hono kakaí ke “fakakaukau ki he tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻOtuá” (Mōsaia 2:41).

Te mou lava ʻo toe vakaiʻi fakafāmili ʻa e ngaahi fakamatala ko ʻení mo fakakaukau ki he founga kuo hoko ai ʻa hono moʻui ʻaki ʻa e ngaahi tefitoʻi moʻoni ko ʻení ke ne ʻomi ʻa e fiefiá mo e ngaahi tāpuakí ki hoʻo moʻuí.

Fealēleaʻaki ʻi he Ongoongoleleí

Fafangaʻi Ho Laumālié ʻaki ʻa e Lotu

ʻOku tatau pē hono talamai ʻe he fiekaiá ʻa ʻetau fiemaʻu ha meʻakai fakatuʻasinó, mo hono fakahaaʻi mai ʻe hotau laumālié ʻoku tau fiemaʻu ha meʻakai fakalaumālié. Vahevahe ha ngaahi kupuʻi lea mei he fakamatala ʻa ʻEletā ʻŪlise Soālesi ki he lotú (peesi 4) pea fakaafeʻi ʻa e kau mēmipa ho fāmilí ke nau vahevahe ha taimi naʻa nau ongoʻi ai naʻe fafangaʻi ʻe he lotú ko iá honau laumālié.

ʻOku ʻAonga Ki Ai ʻa e Ngāué

ʻOku faingofua ke fifili pe ʻoku ʻaonga koā hoʻo ngaahi feinga ke akoʻi hoʻo fānaú. ʻI he fakamatala ʻa ʻEletā Hiuko E. Mātinesi ʻi he peesi 12, ʻokú ne vahevahe ai ʻene aʻusia ki hono akoʻi ʻo e ongoongoleleí ki heʻene fānaú. ʻI hoʻo laukongá, fakakaukau ki he fanga kiʻi sitepu iiki te ke lava ʻo fai ke fokotuʻu ai ha ʻapi ʻoku fakatefito ʻia Kalaisí—ʻa ia ʻoku ʻaonga maʻu pē ki ai ʻa e ngāué.

Ko e Fokotuʻu ha Fakavaʻe Mālohí

ʻOku fakahā ʻe he “Ko e Fāmilí: Ko ha Fanongonongo ki Māmani” ha ngaahi moʻoni mo e ngaahi tuʻunga moʻui mahuʻinga ʻo e ongoongoleleí. Lau ʻa e fakamatala ʻi he peesi 16 ke ako ha founga ʻe tolu ke fakaʻaongaʻi ai ʻa e fanongonongo ki he fāmilí ke tokoniʻi hoʻo fānaú ke nau fokotuʻu ha fakavaʻe fakalaumālie mālohi pea mateuteu ke taukaveʻi ʻenau tuí.

Fiefia Fakafāmili ʻi he Haʻu, ʻo Muimui ʻIate Aú

Fekumi Fakamātoato ʻi he Folofolá

Ngaahi Lea ʻa Molomoná 1:11

ʻI hono kotoa ʻo e hisitōliá, kuo fai ʻe he kau palōfitá ha ngaahi ngāue maʻongoʻonga ke fakatolonga ha lekooti ʻo ʻenau ngaahi akonakí koeʻuhí kae lava ke tau maʻu ha ʻilo ki he ongoongoleleí. Hili hono maʻu ʻe Molomona ʻa e ʻū lauʻi peleti koulá, naʻá ne tohi ʻo pehē: “Ko au, Molomona, ʻoku ou lotu ki he ʻOtuá koeʻuhí ke fakatolonga ia ʻo fai atu mei he taimí ni. Pea ʻoku ou ʻiloʻi ʻe fakatolonga ia; he ʻoku ʻi ai ha ngaahi meʻa mahuʻinga kuo tohi ai” (Ngaahi Lea ʻa Molomona 1:11).

Te tau lava ʻo fakahaaʻi ʻetau houngaʻia ʻi he ngaahi lekooti ko ʻení mo fakamālohia ʻetau tui ki he ʻEikí ʻaki ʻetau fekumi faivelenga ʻi he folofolá. Te mou lava ʻo fakahoko fakafāmili ha lova kumi folofola:

Hiki ha ngaahi foʻi lea kehekehe ʻo e ongoongoleleí hangē ko e Fakamoʻuí, tuí, fakatomalá, papitaisó, mo e Laumālie Māʻoniʻoní ʻi ha ʻū laʻipepa kehekehe.
Tuku ki ha mēmipa ʻo e fāmilí ke ne fili ha laʻipepa pea lau mai ʻa e foʻi leá.
ʻOku lova leva ʻa e kau mēmipa ʻo e fāmilí ke kumi ʻa e foʻi leá ʻi he Tohi ʻa Molomoná. Ko e tokotaha ko ia te ne ʻuluaki maʻu ha foʻi veesi ʻoku ʻi ai ʻa e foʻi lea ko iá, te ne lava ʻo vahevahe ʻa e veesi folofola ko iá mo e fāmilí.

Mei he Makasini ko e Kaumeʻá

Ngaahi Talanoa ʻo e Tohi ʻa Molomoná

Fakaʻaongaʻi ʻa e ngaahi tokoni ki he akó ʻi he konga ki he Haʻu, ʻo Muimui ʻIate Au ʻo e māhina ní ke akoʻi ki hoʻo fānaú ʻa e talanoa fakatātā ʻo e ʻakau ko e ʻōlivé pea mo e talanoa ʻo ʻĪnosí.

Ko e Mālohi ʻo e Lotú

Kumi ha ngaahi talanoa, ʻekitivitī, mo ha pōpoaki mei he palōfitá ke tokoniʻi hoʻo fānaú ke nau ako fekauʻaki mo e lotú.

“Te Ta Lava ʻo Fakaleleiʻi Ia”

Akoʻi hoʻo fānaú ke nau hoko ko ha kau faʻa fakalelei ʻaki hano lau ha talanoa fekauʻaki mo ha ongo tautehina naʻá na ako ke fakaleleiʻi ʻena ngaahi tō-kehekehé kae ʻikai kē.

Tupu Hangē ko Sīsuú

ʻI he Konga ki he Fānau Lalahi Angé, ako ʻa e founga naʻe fokotuʻu ai ʻe ʻIsapela mo Tēvita ha ngaahi taumuʻa ke fakatupulaki hona ngaahi talēnití mo fai ha liliú.